សមុច្ច័យជាសំពត់ហូល និងផាមួង មានអាយុកាលយូរឆ្នាំ ចំនួន៣០សមុច្ច័យទៀត ត្រូវបានសារមន្ទីរវាយនភណ្ឌប្រពៃណីអាស៊ី ទទួលពីប្រជាពលរដ្ឋរស់នៅស្រុកព្រៃកប្បាស ខេត្តតាកែវ-30 collections were received by the MGC Asian Traditional Textiles Museum from residents of Prey Kabas district, Takeo province-02 June 2023

ក្រុមការងារសារមន្ទីរវាយនភណ្ឌប្រពៃណីអាស៊ី បានធ្វើដំណើរទៅកាន់មូលដ្ឋានស្រុកព្រៃកប្បាស នៃទឹកដីខេត្តតាកែវ ដើម្បីទទួលសមុច្ច័យ មានដូចជា៖ ក្រណាត់ហូល សំពត់ហូល អាវហូល សរសៃសូត្រ និងកៀត ចំនួន៣០សមុច្ច័យ ដែលបងប្អូនប្រជាពលរដ្ឋ រស់នៅក្នុងឃុំតាំងយ៉ាប ស្រុកព្រៃកប្បាស ខេត្តតាកែវ ស្ម័គ្រចិត្តប្រគល់ជូន យកមករក្សាទុកនៅក្នុងសារមន្ទីរវាយនភណ្ឌប្រពៃណីអាស៊ី ដើម្បីតាំងបង្ហាញជូនសាធារណៈបានទស្សនា និងសិក្សាស្វែងយល់។

ប្រជាពលរដ្ឋរស់នៅឃុំតាំងយ៉ាប ស្រុកព្រៃកប្បាស បានស្ម័គ្រចិត្តប្រគល់ជាសំពត់ហូល ផាមួង និងវត្ថុពីបុរាណមួយចំនួន ដោយពួកគាត់យល់ថា វាជារបស់មានតម្លៃ អាចយកមករក្សាទុកបន្តនៅក្នុងសារមន្ទីរ ដើម្បីឱ្យកូនខ្មែរជំនាន់ក្រោយបានស្គាល់។ ដោយសម្លៀកបំពាក់ខ្លះដែលប្រជាពលរដ្ឋបានប្រគល់ជូន សារមន្ទីរវាយនភណ្ឌប្រពៃណីអាស៊ីនេះ មានអាយុកាលចន្លោះពី៣០ឆ្នាំ ទៅ៥០ឆ្នាំមុន ទៅតាមការរក្សាទុករបស់ពួកគាត់។
មកដល់ពេលនេះសមុច្ច័យសរុបមានចំនួន៥១សមុច្ច័យហើយ ដែលសារមន្ទីរវាយនភណ្ឌប្រពៃណីអាស៊ីបានទទួលពីបងប្អូនប្រជាពលរដ្ឋចំនួន២១គ្រួសារ រស់នៅក្នុងស្រុកព្រៃកប្បាស ខេត្តតាកែវ។
លោកស្រី គង់ សុភ័ក្រ្ត មន្ត្រីផ្នែកអភិរក្សនៃសារមន្ទីរវាយនភណ្ឌប្រពៃណីអាស៊ី បានឱ្យដឹងថា សមុច្ច័យទាំង៥១សមុច្ច័យ ទើបទទួលបាននេះ ក្រុមការងារជំនាញកំពុងមមាញឹកក្នុងការចុះបញ្ជី ថែទាំ និងសម្អាតយ៉ាងយកចិត្តទុកដាក់នូវសមុច្ច័យទាំងនោះ ដោយសារវាមានអាយុកាលយូរ ខ្លះក៏ដាច់ឬរហែកដោយកត្តាផ្សេងៗ ដូច្នេះត្រូវចំណាយពេលវេលាយ៉ាងតិចបំផុត១៥ថ្ងៃទើបរួចរាល់ និងត្រៀមដាក់តាំងបង្ហាញជូនសាធារណជនបានចូលទស្សនា។

លោក សែន គឹមស៊ុន នាយកស្តីទីនៃសារមន្ទីរវាយនភណ្ឌប្រពៃណីអាស៊ីមានប្រសាសន៍ថា សារមន្ទីរវាយនភណ្ឌប្រពៃណីអាស៊ី រីករាយស្វាគមន៍រាល់ការបរិច្ចាកសមុច្ច័យ ក្នុងវិស័យវាយនភណ្ឌនានាដែលមានអាយុកាលយូរឆ្នាំ ឬជារបស់កម្រណាមួយពីសាធារណជន ដើម្បីយកមករក្សាទុក អភិរក្ស និងថែរក្សាយ៉ាងល្អប្រសើរ សម្រាប់តាំងបង្ហាញជាសាធារណៈ។

សូមជម្រាបថា ក្រណាត់ហូល សំពត់ហូល អាវហូល សរសៃសូត្រនិងកៀត ដែលបងប្អូនប្រជាពលរដ្ឋរស់នៅក្នុងស្រុកព្រៃកប្បាស ខេត្តតាកែវ ប្រគល់ជូនមកកាន់សារមន្ទីរវាយនភណ្ឌប្រពៃណីអាស៊ី មានអាយុកាលយូរឆ្នាំ ត្បាញឡើងដោយដៃ ជ្រលក់ល័ក្ខធម្មជាតិតាមក្បួនខ្នាតពីបុរាណ និងមានក្បាច់រចនាផ្សេងៗគ្នា យ៉ាងស្រស់ស្អាត មាន៖ក្បាច់គោមពីងពាង ក្បាច់គោមខ្សែកោងក្លាយគោមត្បូងពេជ្រ ក្បាច់គោមបាត់ដំបង ក្បាច់គោមផ្កាថ្កុល ក្បាច់គោមកូនអណ្តើក ក្បាច់ស្នឹងគោមបញ្ឈរសម្រាប់ដាក់សសៃសូត្រគៀត ក្បាច់គោមក្តឹបកន្ទឹមខ្សែកូនគោមលាយដើមផ្កា ក្បាច់គោមភ្នែកមាន់ ជោជើងកូនគោម ក្បាច់គោមខ្សែកោងក្នុងគោមត្បូងពេជ្រ ក្បាច់គោមខ្សែកូនគោមក្នុងគោមលីបកង់ អាវផាមួយគុណក្រណាត់ហូលចុងជាយ ក្បាច់គោមស្លាបព្រួញ ក្បាច់គោមសំបុកឃ្មុំ ក្បាច់គោមផ្កាក្នុងគោមផ្កាយព្រឹក ក្បាច់គោមសក់ក្រអូប ផាមួងគុណគោមខ្សែថ្នក់ក្នុងគោមផ្កាយព្រឹក សសៃសូត្រគៀតព័ណ៌ខ្មៅ ក្បាច់គោមត្បូងពេជ្រ និងក្បាច់គោមខ្សែបីជាន់។ នេះជាលើកទីពីរហើយ ដែលសារមន្ទីរវាយនភណ្ឌប្រពៃណីអាស៊ី បានទទួលសមុច្ច័យជាសម្លៀកបំពាក់ ផលិតពីសសៃសូត្រ ពីប្រជាពលរដ្ឋរស់នៅក្នុងស្រុកព្រៃកប្បាស នៃខេត្តតាកែវ។

លោកអ្នកនាងចង់ទស្សនាដោយផ្ទាល់ នូវសម្លៀកបំពាក់បុរាណដែលទើបទទួលបានទាំងនេះ រួមទាំងសម្លៀកបំពាក់សហសម័យ ដែលនាំមកពីប្រទេសចំនួន៦ តាមដងទន្លេមេគង្គ និងទន្លេគង្គារ មាន៖ ប្រទេសកម្ពុជា ឥណ្ឌា ឡាវ មីយ៉ាន់ម៉ា ថៃ និងប្រទេសវៀតណាម អាចអញ្ជើញទៅទស្សនានៅសារមន្ទីរវាយនភណ្ឌប្រពៃណីអាស៊ី ស្ថិតនៅភូមិបឹងដូនប៉ា តាមបណ្តោយផ្លូវ៦០ម៉ែត្រ សង្កាត់ស្លក្រាម ក្រុងសៀមរាប។ សារមន្ទីរបើកឱ្យសាធារណជនបានចូលទស្សនា ចាប់ពីថ្ងៃពុធ ដល់ថ្ងៃចន្ទ ពីម៉ោង៨និង៣០នាទី ដល់ម៉ោង៤ល្ងាច៕
អត្ថបទ៖នាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ
រូបភាព៖លោករដ្ឋ ផល្លីន និងលោកយី សុថា

30 collections were received by the MGC Asian Traditional Textiles Museum from residents of Prey Kabas district, Takeo province.

The team of the MGC Asian Traditional Textiles Museum traveled to Prey Kabas district, Takeo Province to receive a collection of 30 pieces of silk skirts, blouses, and silk fabrics. It was handed over and kept in the MGC Asian Traditional Textiles Museum for public display.

Residents of Taing Yap commune, Prey Kabas district, Takeo province volunteered to donate handkerchiefs and some antiques, believing that they were valuable and could be kept in a museum for the next generations to know. Some of the clothes donated are between 30 and 50 years old.
So far, a total of 51 collections have been received by the MGC Asian Traditional Textiles Museum from 21 families living in Prey Kabas district, Takeo province.
Ms. Kong Sopheak, Conservation Officer of the MGC Asian Traditional Textiles Museum, said that some of the 51 collections are torn by various factors, so it takes at least 15 days to register and get ready to be displayed to the public.

Sen Kimsun, Acting Director of the MGC Asian Traditional Textiles Museum, said that the museum welcomes donations of old or rare textiles from the public to be preserved and displayed.

It should be noted that the MGC Asian Traditional Textiles Museum is located in Boeung Don Pa Village, along the 60-meter road, Sangkat Slor Kram, Siem Reap City, Siem Reap Province. The museum is open to the public from Wednesday to Monday, 8:30 a.m. to 4 p.m.

Article: Department of Research, Training, and Communication
Photos: Rath Phallin and Yi Sotha