នៅព្រឹកថ្ងៃទី១៩ ខែកុម្ភៈ ឆ្នាំ២០២៥នេះ អាជ្ញាធរជាតិអប្សរា រៀបចំពិធីសាសនា រួមទាំងពិធីរាប់បាត្រព្រះសង្ឈ១៣០អង្គ ក្នុងឱកាសប្រារព្ធខួប៣០ឆ្នាំ នៃការបង្កើតអាជ្ញាធរជាតិអប្សរា (១៩ ខែកុម្ភៈ ឆ្នាំ១៩៩៥-១៩ ខែកុម្ភៈ ឆ្នាំ២០២៥) នៅបរិវេណស្ពានហាលប្រាសាទបាយ័ន ច្រកចូលខាងកើត ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា តំណាងអង្គការយូណេស្កូប្រចាំកម្ពុជា ឯកឧត្តម ហង់ ពៅ អគ្គនាយកអាជ្ញាធរជាតិអប្សរា អគ្គនាយករង ឯកឧត្តម ប្រាក់ សោភ័ណ អភិបាលខេត្តសៀមរាប មន្ត្រីបុគ្គលិកអាជ្ញាធរជាតិអប្សរាជាតិ និងអ្នកពាក់ព័ន្ធជាច្រើនរូបចូលរួមផងដែរ។
ឯកឧត្តម ហង់ ពៅ អគ្គនាយកអាជ្ញាធរជាតិអប្សរា មានប្រសាសន៍ថា ស្ថាប័នអាជ្ញាធរជាតិអប្សរាបានដើរតួនាទីអភិរក្ស ដោយមានការជ្រោមជ្រែងជាឆ្អឹងខ្នង ការអនុវត្តបច្ចេកទេសពីគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្តអង្គរ(អាយស៊ីស៊ី-អង្គរ) ការជួយជ្រោមជ្រែងពីបណ្តាប្រទេសអន្តរជាតិជាមិត្ត ជាពិសេសជំហរដ៏រឹងមាំរបស់រាជរដ្ឋាភិបាលកម្ពុជា ធ្វើឱ្យអាជ្ញាធរជាតិអប្សរាទទួលបានជោគជ័យ។ ក្នុងឆ្នាំ២០០៤ អង្គរត្រូវបានដកចេញពីបញ្ជីបេតិកភណ្ឌប្រឈមនឹងគ្រោះថ្នាក់ ហើយបន្ទាប់មកទៀត អាជ្ញាធរជាតិអប្សរាបានកំណត់គោលដៅបន្ថែមទៀតគឺការអភិវឌ្ឍដោយចីរភាពបន្ថែមលើការអភិរក្ស។ ក្រៅពីធានាឱ្យបាននូវកិច្ចការអភិរក្ស និងការអភិវឌ្ឍដោយចីរភាព ការងារដែលសំខាន់មួយទៀត គឺការយកចិត្តទុកដាក់ចំពោះប្រជាពលរដ្ឋរស់នៅក្នុងតំបន់អង្គរទាំង១១២ភូមិ ដែលជាផ្នែកមួយដ៏សំខាន់ក្នុងបេតិកភណ្ឌអរូបី ការថែរក្សាទំនៀមទម្លាប់ប្រពៃណី និងអត្តសញ្ញាណរបស់តំបន់អង្គរ ឱ្យមានជីវិតរស់រវើក។ ដោយសារកិច្ចខិតខំប្រឹងប្រែងរបស់រាជរដ្ឋាភិបាល រួមជាមួយអាជ្ញាធរជាតិអប្សរា នៅឆ្នាំ២០២៣ អង្គរ ត្រូវបានស្ថាប័នអន្តរជាតិទទួលស្គាល់និងយកធ្វើជាគំរូ ក្នុងការអនុវត្តទៅលើបេតិកភណ្ឌផ្សេងទៀតលើពិភពលោក ក្នុងចំណោមបេតិកភណ្ឌ៣ប្រភេទ គឺបេតិកភណ្ឌក្នុងសង្រ្គាម បេតិកភណ្ឌក្រោយសង្រ្គាម និងបេតិកភណ្ឌជោគជ័យ។
ឯកឧត្តមអគ្គនាយក មានប្រសាសន៍ទៀតថាសមិទ្ធផលទាំងអស់នេះមិនអាចកើតឡើងបានទេ បើគ្មានសន្តិភាព និងការគាំទ្រពីថ្នាក់ដឹកនាំប្រទេសប្រកបដោយភាពឈ្លាសវ៉ៃរបស់ប្រមុខរាជរដ្ឋាភិបាលកម្ពុជាគ្រប់ជាន់ថ្នាក់ ដៃគូអន្តរជាតិ និងឧទ្ទិសព្រះរាជកុសលថ្វាយ ព្រះករុណា ព្រះបរមរតនកោដ្ឋ ចំពោះព្រះរាជកិច្ចដ៏ថ្លៃថ្លាលើកិច្ចការវប្បធម៌និងបេតិកភណ្ឌ និងសូមឧទ្ទិសកុសលផលបុណ្យ ចំពោះវិញ្ញាណក្ខន្ធ អតីតថ្នាក់ដឹកនាំជាតិ អន្តរជាតិ និងឥស្សរជនផ្សេងទៀត ចំពោះបុព្វហេតុថែរក្សា ការពាររមណីយដ្ឋានអង្គរ។
លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរាមានប្រសាសន៍ថា ពិធីប្រារព្ធខួប៣០ឆ្នាំនៃការបង្កើតអាជ្ញាធរជាតិអប្សរា ធ្វើឡើងក្រៅពីរំលឹកការដំណើរការដំបូងនៃអាជ្ញាធរជាតិអប្សរា ការខិតខំប្រឹងប្រែងកន្លងមក របស់បុព្វការីជន និងឥស្សរជនជាតិ អន្តរជាតិគ្រប់ជំនាន់ ដែលបានខិតខំកសាង ថែរក្សា ការពារ និងអភិរក្សរមណីយដ្ឋានអង្គរ មរតកវប្បធម៌ដ៏មានតម្លៃមិនអាចកាត់ថ្លៃបាន។ លោកជំទាវថា ក្រោមការដឹកនាំប្រកបដោយគិតបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន និងការបន្តស្មារតីដ៏ត្រឹមត្រូវនិងឈ្លាសវ៉ៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ធ្វើឱ្យវិស័យទេសចរណ៍និងវប្បធម៌កំពុងមានវឌ្ឍនភាព និងជាវិស័យមានភាពប្រទាក់ក្រឡាគ្នា គាំទ្រគ្នា ដើម្បីទាក់ទាញទេសចរជាតិនិងអន្តរជាតិ។ ជាក់ស្តែង កិច្ចអភិរក្ស និងអភិវឌ្ឍន៍រមណីយដ្ឋានអង្គរទាំងមូល បានផ្លាស់ប្តូរប្រកបដោយសោភ័ណភាព ទៅតាមអនុសាសន៍ដ៏ថ្លៃថ្លារបស់ថ្នាក់ដឹកនាំកំពូលជាតិ រហូតមានការទទួលស្គាល់ និងកោតសរសើរពីសាធារណជន។
លោកជំទាវបណ្ឌិតសភាចារ្យមានប្រសាសន៍កោតសរសើរចំពោះការខិតខំប្រឹងប្រែងរបស់ថ្នាក់ដឹកនំា មន្ត្រីរាជការ បុគ្គលិក ភ្នាក់ងារ ពលករនិងឆ្មាំទាំងអស់ នៃអាជ្ញាជាតិអប្សរា និងអាជ្ញាធរពាក់ព័ន្ធជាតិ និងអន្តរជាតិ ដែលបានខិតខំប្រឹងប្រែងយកអស់កម្លាំងកាយចិត្ត បញ្ញាស្មារតី ថែរក្សា ការពារ អភិរក្ស និងអភិវឌ្ឍន៍ រមណីយដ្ឋានអង្គរប្រកបដោយការយកចិត្តទុកដាក់៕
អត្ថបទ៖ការិយាល័យផ្សព្វផ្សាយ
រូបភាព៖លោក រដ្ឋ ផល្លីន និងលោក ភោគ ជា
On February 19, 2025, the APSARA National Authority marked its 30th anniversary with a religious ceremony at the Bayon Temple, featuring offerings to 130 monks. The event was presided over by H.E. Dr. PHOEURNG Sackona, Minister of Culture and Fine Arts and President of the Board of APSARA National Authority, alongside distinguished guests including the UNESCO Representative in Cambodia, H.E. Dr. Hang Peou, Director General of the APSARA National Authority, Deputy Director-Generals, and H.E. Prak Sophon, Governor of Siem Reap Province, among other stakeholders and APSARA staff.
In his address, H.E. Dr. Hang Peou highlighted the APSARA National Authority’s significant role in conservation efforts, supported by the International Coordinating Committee for the Safeguarding and Development of the Historic Sites of Angkor (ICC-Angkor) and international allies. He noted that Angkor was removed from the list of endangered heritage sites in 2004, allowing APSARA to focus on sustainable development and conservation. He emphasized the importance of caring for the 112 villages in the Angkor region, which are integral to preserving the area’s intangible heritage and cultural identity.
Dr. Hang Peou credited the achievements of the APSARA National Authority to the peace and leadership provided by the Royal Government of Cambodia, dedicating the success to the Late King Father Norodom Sihanouk and other national and international leaders committed to protecting Angkor.
H.E. Dr. PHOEURNG Sackona remarked that the anniversary celebration not only honored the establishment of the APSARA National Authority but also recognized the contributions of past leaders who worked tirelessly to protect Angkor’s cultural heritage. She noted that under the leadership of Former Prime Minister Samdech Akka Moha Sena Padei Techo Hun Sen and his successor Samdech Moha Borvor Thipadei HUN MANET, there has been significant progress in tourism and culture, enhancing Angkor’s appeal to both national and international visitors.
Dr. Sackona expressed gratitude to all those involved in the conservation and development efforts at Angkor, acknowledging their dedication and hard work in preserving this invaluable cultural site.
Article by Office of Communication
Photos by Rath Phallin/Phouk Chea
Translation by Net Phirun
