ចាប់តាំងពីថ្ងៃទី៣០ ខែវិច្ឆិកា ឆ្នាំ២០២៤មក សារមន្ទីរព្រះនរោត្តមសីហនុ-អង្គរ បានរៀបចំពិព័រណ៍មិនអចិន្ត្រៃយ៍មួយ ដើម្បីតាំងបង្ហាញវត្ថុសិល្បៈដែលបានមកពីការធ្វើកំណាយបុរាណវិទ្យា នៅស្ថានីយភូមិល្វា ព្រៃក្មេង និងភ្នំគូលែន ដោយពិព័រណ៍ខាងលើ មានរយៈពេល៣ខែ គ្រោងនិងបញ្ចប់នៅចុងខែមករា ឆ្នាំ២០២៥ខាងមុខ ។
វត្ថុសិល្បៈដែលបានដាក់តាំងបង្ហាញនៅសារមន្ទីរព្រះនរោត្តមសីហនុ-អង្គរ ទាំងអស់មានចំនួន៥៧វត្ថុ។ ដោយយកមកពីភូមិល្វា និងព្រៃក្មេង ជាស្ថានីយសម័យបុរេប្រវត្តិសាស្រ្ត ដែលវត្ថុទាំងអស់ គឺយកចេញពីផ្នូរសព គ្រឿងអលង្ការ មានចិញ្ចៀន ក្រវិល និងកងដៃអំពីសំរិទ្ធ។ ហើយក្នុងនោះក៏មានកណ្តឹង ចង្ក្រង់ និងកាក់ធ្វើអំពីសំរិទ្ធ ខ្នារអំបោះ និងគ្រាប់លុញធ្វើពីឥដ្ឋដុតផងដែរ។ រីឯវត្ថុសិល្បៈមកពីភ្នំគូលែនវិញ ជាបុរាណដ្ឋានសម័យប្រវត្តិសាស្រ្ត ដែលវត្ថុទាំងនោះ កំណាយយកចេញពីកន្លែងខុសៗគ្នា មានប្រាសាទ ,បន្ទាយ និងពើងថ្មជាដើម។ វត្ថុដែលរកឃើញមានច្រើនយ៉ាងក្នុងនោះមាន សន្លឹកមាស ,ត្បូង ,ត្រាធ្វើអំពីថ្ម អង្កាំ ,បន្ទះសំរិទ្ធ និងផ្លែកាំបិទជាដើម។
សូមបញ្ជាក់ថា វត្ថុសិល្បៈដែលបានមកពីការធ្វើកំណាយបុរាណវិទ្យនៅភូមិល្វា និងព្រៃក្មេង ជាកិច្ចសហប្រតិបត្តិការស្រាវជ្រាវរវាងសាកលវិទ្យាល័យស៊ីដនី តាមរយៈគម្រោងពីវាលស្រែ ក្លាយមកជាទីក្រុង ជាមួយអាជ្ញាធរជាតិអប្សរា រវាងឆ្នាំ២០១១ ដល់ ឆ្នាំ២០១៤។ រីឯនៅភ្នំគូលែន ជាកិច្ចសហប្រតិបត្តិការរវាងអង្គការមូលនិធិបុរាណវិទ្យា និងការអភិវឌ្ឍន៍ ហៅកាត់ថា ADFជាមួយអាជ្ញាធរជាតិអប្សរា ក្នុងកំឡុងឆ្នាំ២០០៨ ដល់ឆ្នាំ២០១២។ គោលបំណងនៃការតាំងពិព័រណ៍នេះគឺដើម្បីបង្ហាញជូនសារធារណៈជនទូទៅ ដែលចង់ស្វែងយល់អំពីវត្ថុសិល្បៈ និងរបស់ប្រើប្រាស់ផ្សេងៗពីបុរាណ។ ជាពិសេសគឺចង់ឲ្យសារធារណៈជនដឹងថា ក្រោយពេលធ្វើកំណាយរួច តើវត្ថុដែលគេរកឃើញទាំងនោះ គេយកទៅទីណា?
ដូច្នេះហើយការតាំងបង្ហាញនៅសារមន្ទីរព្រះនរោត្តមសីហនុ-អង្គរ អាចផ្តល់ភាពងាយស្រួល ដល់សារធារណៈជនដែលចង់យល់ដឹងអំពីប្រវត្តិសាស្រ្ត តាមរយៈវត្ថុសិល្បៈផ្សេងៗ ដែលបុព្វបុរសយើងធ្លាប់ប្រើប្រាស់ក្នុងជីវភាពប្រចាំថ្ងៃផង និងក្នុងកិច្ចគោរពបូជាផង។ ក្នុងន័យនេះ សូមអញ្ជើញសាធារណជន ចូលរួមទស្សនា និងឈ្វេងយល់ពីវត្ថុសិល្បៈ ដែលបានដាក់តាំងបង្ហាញក្នុងសារមន្ទីរព្រះនរោត្តមសីហនុ-អង្គរ ដែលមានទីតាំងក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប និងបើកឱ្យភ្ញៀវទេសចរជាតិ និងអន្តរជាតិ ចូលទស្សនាចាប់ពីថ្ងៃអង្គារ ដល់ថ្ងៃអាទិត្យ វេលាម៉ោង៨:៣០នាទីព្រឹក ដល់ម៉ោង៤:៣០ល្ងាច៕
អត្ថបទ៖នាយកដ្ឋាន ស្រាវជ្រាវ បណ្តុះបណ្តាល និងផ្សព្វផ្សាយ
រូបភាព៖លោក ហាប់ គឹមអាន
The Preah Norodom Sihanouk-Angkor Museum is currently hosting a temporary exhibition showcasing artefacts from archaeological excavations at Phum Lvea, Prei Kmeng, and Phnom Kulen stations. This exhibition began on November 30, 2024, and will run for three months, concluding at the end of January 2025.
Visitors can explore a total of 57 artefacts from the prehistoric sites of Phum Lvea and Prei Kmeng, which include items such as bronze rings, earrings, bracelets, bells, pendants, coins, and clay beads. Additionally, the exhibition features historical relics from Phnom Kulen, excavated from various locations including temples and fortresses. Notable objects on display include gold leaf, jade, stone seals, beads, bronze plaques, and daggers.
The artefacts from Phum Lvea and Prei Kmeng were uncovered during a collaborative research project between the University of Sydney and the APSARA National Authority conducted from 2011 to 2014. Meanwhile, the items from Phnom Kulen were part of a joint initiative by the Archaeology and Development Foundation (ADF) and APSARA National Authority between 2008 and 2012.
The purpose of this exhibition is to educate the public about ancient artefacts and their historical significance. It aims to inform visitors about the origins of these objects and how they were used in daily life and worship by our ancestors.
The museum is located in Boeung Doan Pa Village, Sangkat Slak Kram, Siem Reap City, and welcomes both national and international tourists from Tuesday to Sunday, operating hours are from 8:30 AM to 4:30 PM.
Article: Department of Research, Training and Communication
Photos: Hap Kim An
Article Translator: Net Phirun
