អ្នកស្រុកអង្គររក្សាបានទំនៀមចាប់ត្រីរួមគ្នាសម្រាប់ធ្វើម្ហូបត្រៀមឡើងមាឃឬឡើងអ្នកតា
ក្រោយពីបញ្ចប់ការងារច្រូតកាត់ ប្រមូលផលស្រូវរួចរាល់ហើយ ប្រជាជនក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប តែងតែប្រារព្ធពិធីចាប់ត្រីសម្រាប់ពិធីឡើងមាឃ ឬឡើងអ្នកតារៀងរាល់ខែមាឃ តាមទម្លាប់មិនដែលអាក់ខាន។ ពិធីចាប់ត្រីរួមគ្នានេះ ធ្វើឡើងនៅក្នុងបឹងបុរាណមួយដែលអ្នកភូមិអភិរក្សត្រីមិនឱ្យមានការនេសាទផ្តេសផ្តាស គឺទុកសម្រាប់តែរកត្រីរួមគ្នាក្នុងឱកាស ធ្វើពិធីឡើងមាឃ ឬឡើងអ្នកតាប៉ុណ្ណោះ។
លោកមេភូមិ ពេជ្រ ឃិន បានឱ្យដឹងថា ពិធីចាប់ត្រីឡើងមាឃ ត្រូវប្រារព្ធធ្វើឡើងនៅថ្ងៃ១កើត ខែមាឃ តែត្រូវពន្យារពេលមកដល់៥រោច ខែមាឃនេះវិញ មូលហេតុទឹកក្នុងបឹងច្រើន ថែមទាំងមានភ្លៀងកក់ខែថែមទៀត ដែលនាំឱ្យពិបាកក្នុងការចាប់ត្រីបន្តិច ដោយការនេសាទប្រើតែឧបករណ៍បុរាណសុទ្ធសាធ។ លោកឱ្យដឹងទៀតថា ឆ្នាំនេះត្រីក្នុងបឹងសម្បូរ ហើយប្រជាពលរដ្ឋមានការយល់ដឹង និងចូលរួមអភិរក្សកាន់តែបានល្អប្រសើរពីមួយឆ្នាំទៅមួយឆ្នាំ។ គណៈកម្មការបានកំណត់ការជួបជុំគ្នា និងចុះចាប់ម៉ោង៧ព្រឹក ដែលមានបាញ់កាំជ្រួចធ្វើជាសញ្ញាផង។ ជំនួសការហ៊ុំសម្រាស់ នៅឆ្នាំនេះ គណៈកម្មការរៀបចំកម្មវិធីបានសម្រេចជីកស្រះមួយនៅក្នុងផ្ទៃបឹងដើម្បីទុកចាប់ត្រីរួមយកទៅធ្វើជាម្ហូបអាហារ និងធ្វើចង្ហាន់ជាដើមនៅក្នុងពីធីឡើងមាឃ ដោយឡែក ត្រីដែលរកបានពីបឹងប្រជាពលរដ្ឋអាចយកទៅធ្វើជាម្ហូបលក្ខណៈគ្រួសារ។ លោកមេភូមិបញ្ជាក់ថា រាល់ឆ្នាំ ត្រីចាប់រួមបានមិនក្រោមមួយរយគីឡូនោះឡើយ និងអនុញ្ញាតឱ្យតែអ្នកភូមិបង្កោងតែប៉ុណ្ណោះ។ ប៉ុន្ដែក្រោយពីអ្នកភូមិបង្កោងបានធ្វើពិធីចាប់ត្រីរួមគ្នារួចហើយទើបអ្នកភូមិផ្សេងអាចមានសិទ្ធិមករកត្រីនៅបឹងនេះនៅថ្ងៃបន្ទាប់បាន។
លោក ភក្តិ ភណ្ឌ អ្នកចូលរួមចាប់ត្រីម្នាក់ក្នុងចំណោមប្រជាពលរដ្ឋភូមិបង្កោងបានសម្តែងការសប្បាយចិត្ត ដោយភូមិរបស់ខ្លួនរក្សានូវទំនៀមដែលមានតាំងពីយូរមកហើយ។ លោក ភក្តិ ភណ្ឌ បញ្ជាក់ថា លោកតែងតែមកចូលរួមចាប់ត្រីនៅបឹងនេះមិនដែលខកខាន ក្រៅពីបានរកត្រីក៏បានជួបជុំបងប្អូនក្នុងភូមិសប្បាយរីករាយ ហើយត្រីដែលរកបានមួយផ្នែកនឹងធ្វើទឹកនំបញ្ចុកប្រគេនចង្ហាន់ព្រះសង្ឃក្នុងថ្ងៃឡើងមាឃ និងមួយផ្នែកទៀតសម្រាប់ក្រុមគ្រួសារ។
លោក គួយ សង្វារ ប្រជាពលរដ្ឋរស់នៅខេត្តកណ្តាលដែលបានមកមើលព្រឹត្តិការណ៍ចាប់ត្រីរួមគ្នាត្រៀមឡើងមាឃរបស់អ្នកភូមិ បង្កោងបានឱ្យដឹងថា នេះជាលើកទីមួយសម្រាប់រូបលោកដែលបានឃើញទំនៀមចាប់ត្រីរួមគ្នាដែលជាទំនៀមរបស់អ្នកស្រុកអង្គរ។ ទិដ្ឋភាពសប្បាយរីករាយប្រជាជនក្នុងភូមិបានជួបជុំគ្នា ដោយមេភូមិដឹកនាំធ្វើតមិនដាច់ និងរីកចម្រើនបន្ថែមទៀត។ លោក សង្វារ ចង់ឱ្យមានពិធីនេះនៅតែរក្សាបានគង់វង្ស ព្រមទាំងសំណូមពរដល់ប្រជាពលរដ្ឋចូលរួមថែរក្សាទំនៀមទម្លាប់វប្បធម៌ទាំងអស់គ្នា៕
អត្ថបទ និងរូបភាព: លោក យី សុថា
….
Angkor villagers have a tradition of catching fish together to prepare food for a traditional spiritual ceremony
After finishing the rice harvest, the villagers in Bang Korng village, Ampil Commune, Prasat Bakong district, Siem Reap province, always gather to fish together to prepare food for a traditional ceremony. This fishing ceremony takes place in an ancient pond where the villagers preserve the fish from overfishing, leaving it only for fishing together during the traditional spiritual ceremony.
Pich Khin, the village chief, said this year, there are lots of fish in the pond because the villagers have a better understanding and participation in conservation from year to year. The commission set the meeting at 7 a.m. The village chief confirmed that every year, no less than one hundred kilograms of fish are caught and only his villagers are allowed to catch them. However, after the villagers of Bang Korng have already held a fishing ceremony together, other villagers may have the right to fish in the pond the next day.
Pheak Phorn, one of the fishing participants in Bang Korng village, expressed his happiness that his village has maintained this traditional ceremony.
Mr. Kuoy Sangvar from Kandal province who comes to see this fishing event said that this is the first time for him to see the tradition of fishing together, which is the tradition of the villagers in Angkor site. This kind of scene is fun, the villagers are gathered by the village chief, leading uninterrupted and more prosperous. Mr. Sangvar wants this ceremony to remain intact and requests the people to participate in preserving all cultural traditions.
Articles and pictures: Mr. Yi Sotha
