ព័ត៌មានថ្មីៗ

ក្រុមអភិរក្សនៅភ្នំគូលែនរបស់អាជ្ញាធរជាតិអប្សរា បានប្រទះឃើញរូបបដិមាព្រះពុទ្ធបុរាណ២អង្គ

បានផ្សាយនៅ ថ្ងៃទី 26 ខែ សីហា ឆ្នាំ2015 08:13 AM ដោយ ៖ អាជ្ញាធរជាតិអប្សរា

ព្រះពុទ្ធបដិមា២អង្គស្ថិតក្នុងឥរិយាបថសមាធិ និងផ្ចាញ់មារ ធ្វើពីលោហធាតុ ត្រូវបានក្រុមអភិរក្សប្រាសាទក្រៅឧទ្យានអង្គរ របស់អាជ្ញាធរជាតិអប្សរាប្រទះឃើញ នៅព្រឹកថ្ងៃទី២៥ ខែសីហា ឆ្នាំ២០១៥។ ព្រះពុទ្ធបដិមាទាំងពីរអង្គនេះមានកម្ពស់២៧សង់ទីម៉ែត្រ ទទឹង១៩សង់ទីម៉ែត្រ និងមួយអង្គទៀតមានកម្ពស់៣០សង់ទីម៉ែត្រ ទទឹង១៦សង់ទីម៉ែត្រ។

លោក ហែម ម៉ៃ បុគ្គលិកបច្ចេកទេសនៃនាយកដ្ឋានអភិរក្សប្រាសាទក្រៅឧទ្យានអង្គរ ដែលបានប្រទះឃើញបដិមានេះរៀបរាប់ថា នៅល្ងាចថ្ងៃទី២៤ ខែសីហា នៅពេលដែលលោកកំពុងបំពេញការងារនៅលើភ្នំគូលែន លោកតាអាចារ្យមួយរូបបានមកប្រាប់លោកថា ក្មេងៗដែលដើរបាញ់សត្វបានឃើញរូបស្នាមព្រះបាទ នៅផ្ទាំងថ្មធំ នៅខាងក្រោយព្រះអង្គធំប្រហែល១៥០ម៉ែត្រ។

លុះពេលព្រឹកឡើង ដោយចង់ពិនិត្យឲ្យបានច្បាស់ថាតើជាព្រះបាទមែនឬក៏អត់ លោកក៏បាននាំក្រុមការងារទៅ ពិនិត្យមើលជាក់ស្តែង ដោយឲ្យក្មេងៗដែលបានស្គាល់កន្លែងជាអ្នកនាំមុខ។ ក្រោយពេលទៅដល់ ក៏បានប្រទះឃើញស្នាមព្រះបាទដែលមិនទាន់ឆ្លាក់រួចរាល់ នៅលើផ្ទាំងថ្មដ៏ធំ។ ស្នាមព្រះបាទនេះមានបណ្តោយ២.៥ម៉ែត្រ ទទឹង១.៣ម៉ែត្រ និងមានជម្រៅ២.៨៥ម៉ែត្រ។

លោករៀបរាប់ថា ដោយសារតែមានដើមឈើដុះពីលើ និងមានស្លឹកឈើជ្រុះកប់ច្រើន ហើយមានទឹកជ្រៅទៀតនោះ លោកក៏បានឲ្យក្មេងៗបាចទឹកចេញ និងបោចឫសឈើសម្អាត ក៏បានប្រទះព្រះពុទ្ធបដិមានៅទីនោះតែម្តង។

លោក ឈាន រដ្ឋា ប្រធានស្តីទីនាយកដ្ឋានអភិរក្សប្រាសាទក្រៅឧទ្យានអង្គរ បញ្ជាក់ថា នៅពេលនេះ ព្រះពុទ្ធបដិមាទាំងពីរអង្គនោះ ត្រូវបានរក្សាទុកក្នុងនាយកដ្ឋានរបស់លោកនៅឡើយ ដោយរង់ចាំក្រុមជំនាញបុរាណវិទ្យា ធ្វើការសិក្សាវិភាគ ដើម្បីកំណត់អត្តសញ្ញាណ និងអាយុកាលនៃព្រះពុទ្ធបដិមានេះ។ លោកបញ្ជាក់ថា នៅពេលនេះ ក្រុមអ្នកជំនាញមិនទាន់ហ៊ានអះអាងច្បាស់លាស់នៅឡើយទេថា តើបដិមានេះស្ថិតនៅក្នុងសម័យកាលណានៅឡើយ៕
អកយំ ជាឈ្មោះប្រាសាទសង់អំពីឥដ្ឋមុនសម័យអង្គរ រាងសាជី (Pyramide) ស្ថិតនៅលើខឿនបីជាន់ មានទំហំ១០០ម៉ែត្របួនជ្រុងស្មើ កសាងឡើងក្នុងរាជព្រះបាទភវវរ្ម័ន ដែលឧទ្ទិសចំពោះទេព «កុម្ភីរេស្វរៈ» ក្នុងអំឡុងសតវត្សទី៦នៃគ.ស។ គេបានរកឃើញសិលាចារឹកចំនួនបីផ្ទាំងនៅក្នុងប្រាសាទនេះ គឺផ្ទាំងទី១នៅលើស៊ុមទ្វារចូលប្រាង្គកណ្តាលផ្នែកខាងកើត ដែលបានបញ្ជាក់អំពីកាលបរិច្ឆេទស្ថិតក្នុងឆ្នាំ៦៧៤នៃគ.ស។ ផ្ទាំងទី២នៅលើស៊ុមទ្វារចូលប្រាង្គកណ្តាលផ្នែកខាងត្បូង បញ្ជាក់កាលបរិច្ឆេទនាដើមសតវត្សទី៨ និងផ្ទាំងទី៣ជាអក្សរចារមួយខ្សែលើជើងទម្រកប់ក្រោមដីកាលលើកទំនប់បារាយណ៍ ដែលបង្ហាញអំពីកាលបរិច្ឆេទឆ្នាំ១០០១នៃគ.ស។
ផ្តែរថ្មមានទម្ងន់ជាង៥តោន និងសសរពេជ្រដែលបានជ្រុះធ្លាក់ពីប្រាសាទឥដ្ឋប៉មទី៨នៃប្រាសាទបាគង ក្នុងអំឡុងឆ្នាំ២០០៩ ដោយកម្លាំងខ្យល់ព្យុះកេតសូណា ត្រូវបានក្រុមអភិរក្សថ្ម នៃអាជ្ញាធរជាតិអប្សរាធ្វើការផ្គុំជួសជូលឡើងវិញ នៅសារមន្ទីរព្រះនរោត្តមសីហនុអង្គរ។ ផ្តែរថ្ម និងសសរពេជ្រនេះ ត្រូវបានក្រុមជំនាញដឹកជញ្ជូនមករក្សាទុកនៅសារមន្ទីរព្រះនរោត្តមសីហនុអង្គរ កាលពីឆ្នាំ២០១២ ដើម្បីធ្វើការអភិរក្សជួសជុល និងតភ្ជាប់ឡើងវិញ។
ប្រាសាទក្រហមជាប្រាសាទឥដ្ឋដែលមានតម្កល់រូបព្រះឥសូររាំដ៏អស្ចារ្យកម្ពស់៤.៥០ម៉ែត្រ (បច្ចុប្បន្នសល់តែបំណែកខ្លះនៅក្នុងប្រាសាទ ឯខ្លះទៀតរក្សាទុកនៅសារមន្ទីរអង្គរ) តាមរចនាប័ទ្មកោះកេរ ឧទ្ទិសចំពោះព្រហ្មញ្ញសាសនា។ អ្នកស្រុក អ្នកធ្វើដំណើរ អ្នកស្រាវជ្រាវមានជំនឿយ៉ាងខ្លាំងលើប្រាសាទក្រហម ព្រោះទីនោះមានអ្នកតាក្រហមដ៏ពូកែស័ក្តិសិទ្ធិ។
កាលពីថ្ងៃទី ០៦ ខែមករា ឆ្នាំ២០១៦ លោក ឈាន រដ្ឋា ប្រធាននាយកដ្ឋានស្តីទី នៃនាយកដ្ឋានអភិរក្សប្រាសាទក្រៅឧទ្យានអង្គរ បានដឹកនាំមន្រី្ត បុគ្គលិកក្រោមឱវាទ ទៅចូលរួមក្នុងពិធីបុណ្យនៅស្ពានបុរាណព្រះទិស (ស្ពានកំពង់ក្តី) ដែលផ្តួចផ្តើមឡើងដោយព្រះសង្ឃ គណៈកម្មការវត្ត ព្រមទាំងពុទ្ធបរិស័ទចំណុះជើងវត្តជីក្រែង និងសាលាស្រុកជីក្រែង ដែលប្រព្រឹត្តទៅពីថ្ងៃទី ០៦ ដល់ថ្ងៃទី ០៨ ខែមករា ឆ្នាំ ២០១៦។
លោក នាង ឈុនអេង និងលោកស្រី យ៉ង់ ដេត ព្រមទាំងលោកស្រី នាង សុវណ្ណារ៉ា ជាបុត្រ ដែលសព្វថ្ងៃរស់នៅទីក្រុងភ្នំពេញបានចំណាយថវិកាផ្ទាល់ខ្លួន ដើម្បីឆ្លាក់ព្រះកេសទេវតាចំនួន៣ ពីថ្មភក់ជំនួសព្រះកេសស៊ីម៉ង់ត៍ដើម្បីដាក់នៅខ្លោងទ្វារទន្លេអុំ ក្រុងអង្គរធំ។
ដើមដំបូងមុន123456បន្ទាប់ចុងក្រោយ

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
15
ថ្ងៃនេះ
:
64806
ម្សិលមិញ
:
98152
សប្តាហ៍នេះ
:
64806
ខែនេះ
:
0064806
សរុប
:
015134609