ព័ត៌មានថ្មីៗ

អាជ្ញាធរជាតិអប្សរាសូមជូននូវព័ត៌មានសំខាន់ៗប្រចាំសប្តាហ៍ទី២ ខែឧសភា ឆ្នាំ២០២០ ដែលមានខ្លឹមសារដូចខាងក្រោម៖

បានផ្សាយនៅ ថ្ងៃទី 17 ខែ ឧសភា ឆ្នាំ2020 10:34 AM ដោយ ៖ អាជ្ញាធរជាតិអប្សរា
១៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី អញ្ជើញពិនិត្យសមិទ្ធផលនៃការអភិរក្សសំណង់ព្រះវិហារដ៏ចំណាស់នៅវត្តរាជបូណ៌
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភានិងអធិការកិច្ច អមដំណើរដោយលោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈ នៅព្រឹកថ្ងៃទី១៤ ខែឧសភា ឆ្នាំ២០២០ បានអញ្ជើញពិនិត្យសមិទ្ធផលនៃការអភិរក្សសំណង់ព្រះវិហារដ៏ចំណាស់នៅវត្តព្រះរាជ បូណ៌ ដែលព្រះវិហារនេះត្រូវបានអាជ្ញាធរជាតិអប្សរាធ្វើការជួសជុលកែលម្អ ព្រមទាំងអញ្ជើញចូលក្រាបថ្វាយបង្គំ និងសួរសុខទុក្ខ ព្រះមហាវិមលធម្ម សិរីសុវណ្ណោ ពិន សែម ព្រះរាជាគណៈថ្នាក់ទោ សមាជិកថេរសភាសង្ឃ ជាឧត្តមទីប្រឹក្សាគណៈសង្ឃនាយក និងជាព្រះគ្រូចៅអធិការវត្តរាជបូណ៌ដែរ។ អានបន្ត

២៖ លោកជំទាវកិត្តិសង្គហបណ្ឌិត ឧបនាយករដ្ឋមន្ត្រី ម៉ែន សំអន អញ្ជើញពិនិត្យការវិវត្តនៃដំណើរការជួសជុលនៅប្រាសាទកណ្តាលស្រះស្រង់
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភានិងអធិការកិច្ច អមដំណើរដោយលោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈ ឯកឧត្ដមរដ្ឋមន្ត្រីក្រសួងទេសចរណ៍ ឯកឧត្ដមអភិបាលនៃគណៈអភិបាលខេត្តសៀមរាប និងថ្នាក់ដឹកនាំអាជ្ញាធរជាតិអប្សរា នៅថ្ងៃទី១៤ ខែឧសភា ឆ្នាំ២០២០ បានអញ្ជើញមកពិនិត្យការវិវត្ត នៃដំណើរការជួសជុល និងប្រារព្ធពិធីបួងសួងសុំ សេចក្តីសុខចម្រើនពីវត្ថុស័ក្តិសិទ្ធិនៅប្រាសាទកណ្ដាលស្រះស្រង់ និងសូមឱ្យដំណើរការជួសជុលប្រាសាទបានសម្រេចជោគជ័យ និងសូមឱ្យកម្ពុជាសម្បូរសប្បាយរុងរឿងដូចបុរាណកាល។ ក្នុងឱកាសនេះដែរ ក្រុមការងារអាជ្ញាធរជាតិអប្សរា ក៏បានជម្រាបជូនលោកជំទាវ អំពីដំណើរការជួសជុលនិងការប្រទះឃើញក្នុងកំណាយរួមមាន រចនាសម្ពន្ធសំណង់ប្រាសាទ ចម្លាក់សត្វអណ្តើក ចម្លាក់ក្បាលនាគ ខ្វាតព៌ណសនិងត្រីសូល៍។ អានបន្ត

៣៖ លោកជំទាវ ភឿង សកុណា អញ្ជើញពិនិត្យការជួសជុលប្រាសាទតាព្រហ្ម
នាព្រឹកថ្ងៃទី១៣ ខែឧសភា ឆ្នាំ២០២០ លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈនិងជាប្រធានក្រុមប្រឹក្សាភិបាលអាជ្ញាធរជាតិអប្សរា អមដំណើរដោយថ្នាក់ដឹកនាំអាជ្ញាធរជាតិអប្សរា បានអញ្ជើញត្រួតពិនិត្យការដ្ឋានជួសជុលប្រាសាទតាព្រហ្ម ក្រោមក្របខណ្ឌកិច្ចសហប្រតិបត្តិការរវាងអាជ្ញាធរជាតិអប្សរានិងស្ថាប័នស្រាវជ្រាវបុរាណវិទ្យាឥណ្ឌា (ASI)។ ក្នុងឱកាសនោះ អ្នកជំនាញឥណ្ឌាបានជម្រាបអំពីដំណើរការរីកចម្រើននៃការជួសជុលសាលរបាំប្រាសាទតាព្រហ្ម និងគម្រោងជួសជុលខ្លោងទ្វារខាងកើតនាពេលខាងមុខដ៏ខ្លី។ អានបន្ត

៤៖ លោកជំទាវ ភឿង សកុណា អញ្ជើញពិនិត្យការកែលម្អផ្លូវនៅប្រាសាទបាគង
លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា បានអញ្ជើញត្រួតពិនិត្យវឌ្ឍនភាព នៃការជួលជុលកែលម្អផ្លូវប្រាសាទបាគង ដែលភ្ជាប់ពីផ្លូវជាតិលេខ៦ កាត់តាមប្រាសាទព្រះគោ ឆ្ពោះទៅជុំវិញប្រាសាទបាគង ។ ផ្លូវនេះមានប្រវែង ២.៧៨១ ម៉ែត្រ ទទឹង ៥-៦ ម៉ែត្រ ហើយនឹងត្រូវអ៊ុតបេតុងកៅស៊ូ (AC) កម្រាស់ ៦ ស.ម . ចែកជាពីរស្រទាប់ (ស្រទាប់ក្រោមពណ៌ខ្មៅ និងស្រទាប់លើពណ៌ក្រហមចាស់) ដើម្បីឱ្យសមស្របតាមបទដ្ឋានបេតិកភណ្ឌពិភពលោក ស្តង់ដារបច្ចេកទេស និងអនុសាសន៍របស់អ្នកជំនាញការអន្តរជាតិអាយស៊ីស៊ី-អង្គរ។ អានបន្ត

៥៖ អគ្គនាយកអាជ្ញាធរជាតិអប្សរាចុះពិនិត្យការជួសជុលប្រាសាទតាអួន
នាព្រឹកថ្ងៃទី១២ ខែឧសភា ឆ្នាំ២០២០ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា បានចុះត្រួតពិនិត្យការជួសជុលប្រាសាទតាអួន។ ក្នុងឱកាសនោះ ក្រុមការងារបានជម្រាបលម្អិតអំពីដំណើរការនៃការជួសជុល និងការវិវត្តនៃការងារជាក់ស្ដែងនៅប្រាសាទតាអួន។ ជាមួយនេះដែរ ឯកឧត្តមអគ្គនាយកបានកោតសរសើរក្រុមការងារចំពោះកិច្ចប្រឹងប្រែង និងស្នើឱ្យក្រុមការងារគិតគូរហ្មត់ចត់ ស្របតាមអនុសាសន៍អ្នកជំនាញអាយស៊ីស៊ី-អង្គរ។ អានបន្ត

៦៖ គណៈកម្មការគ្រប់គ្រង និងអភិវឌ្ឍន៍ទេសចរណ៍ខេត្តសៀមរាបពិភាក្សាពីស្រូបទាញភ្ញៀវទេសចរជាតិដើម្បីជួយប៉ះប៉ូវដល់អាជីវកម្មទេសចរណ៍ដែលកំពុងរងផលប៉ះពាល់ដោយសារកូវីដ១៩
ស្របពេលដែលជំងឺកូវីដ១៩ នៅតែបន្ត គណៈកម្មការអភិវឌ្ឍន៍ទេសចរណ៍ខេត្តសៀមរាប បានដាក់ចេញនូវផែនការគន្លឹះមួយចំនួនដូចជា ការផ្សព្វផ្សាយឲ្យបានទូលំទូលាយនូវគោលដៅទេសចរណ៍ ការជំរុញឲ្យមានកម្មវិធីទេសចរណ៍ខ្នាតតូចដូចជា បោះតង់ ជិះកង់កម្សាន្ត ការរៀបចំសម្អាតបរិស្ថាន ហេដ្ឋារចនា សម្ព័ន្ធ និងស្តង់ដារចំណីអាហារ ដើម្បីទាក់ទាញភ្ញៀវទេសចរជាតិមកទស្សនានៅខេត្តសៀមរាប។
ឯកឧត្តម សុខ សង្វារ អគ្គនាយករង និងជាអនុប្រធាន គណៈកម្មការ បានជំរុញឲ្យបង្កើតក្រុមការងារតូចមួយ ក្នុងចំណោមគណៈកម្មការនេះ ដើម្បីសិក្សាស្រាវជ្រាវបទពិសោធន៍ពីបណ្តាប្រទេសផ្សេងៗ ដែលគេបានរៀបចំឡើងក្នុងវិបត្តិកូវីដនេះ។ ជាពិសស ឆ្លៀតឱកាស ប្រែក្លាយបញ្ហានេះទៅជាឱកាសដើម្បីរៀបចំគោលដៅទេសចរណ៍របស់យើង ដូចជា បញ្ហាបរិស្ថាន ហេដ្ឋារចនាសម្ព័ន្ធ ការបណ្តុះបណ្តាលបុគ្គលិក មគ្គុទ្ទេសក៍ទេសចរណ៍ជាដើម។ អានបន្ត

៧៖ មន្ត្រី-បុគ្គលិកអាជ្ញាធរជាតិអប្សរាចំនួន២០រូប បានទទួលវគ្គបណ្តុះបណ្តាលជំនាញនិងបច្ចេកទេសនៃការប្រើប្រាស់ Drone
មជ្ឈមណ្ឌលបណ្តុះបណ្តាលអង្គរ នៃអាជ្ញាធរជាតិអប្សរាបានបើកវគ្គបណ្តុះបណ្តាលស្តីពី “ជំនាញនិងបច្ចេកទេសនៃការប្រើប្រាស់ Drone” ដល់មន្ត្រី-បុគ្គលិកបច្ចេកទេសនៃអាជ្ញាធរជាតិអប្សរាចំនួន២០រូប មកពីនាយកដ្ឋានជំនាញផ្សេងៗគ្នា រយៈពេល២ថ្ងៃ ចាប់ពីថ្ងៃទី១២ ដល់ថ្ងៃទី១៣ ខែឧសភា ឆ្នាំ២០២០។ វគ្គបណ្តុះ បណ្តាល ដែលបង្រៀនដោយ លោក រ៉ម វិចិត្រ និងលោក ជាវ ប៊ុនថង ជាមន្ត្រីបច្ចេកទេសបម្រើការងារនៅនាយកដ្ឋានគ្រប់គ្រងទឹក ផ្តោតទៅលើរបៀបវារៈសំខាន់ៗដូចជា សេចក្តីណែនាំទូទៅអំពី Drone អនុវត្តន៍ការបង្ហោះ Drone នៅក្នុង Plan Mode ការបង្កើតផែនទី 2D ដោយប្រើរូបថតពី Drone មូលដ្ឋានទ្រឹស្តីនៃការបង្ហោះ និង អនុវត្តន៍ការបង្ហោះ Drone នៅក្នុង Manuel Mode ការបង្កើត 3D object ដោយប្រើរូបថតពី Drone និងសំណួរ ចម្លើយ រួមនឹងការចុះអនុវត្តការប្រើប្រាស់ Drone ជាក់ស្ដែងនៅលើទីតាំងផ្ទាល់។ អានបន្ត

៨៖ សប្តាហ៍ទី១នៃខែឧសភា ក្រុមការងារសហគមន៍អនុញ្ញាតឱ្យប្រជាពលរដ្ឋជួសជុលផ្ទះ និងសាងសង់សំណង់តូចតាច ចំនួន២៩គ្រួសារ
សប្តាហ៍ទី១ ខែឧសភា ឆ្នាំ២០២០ ក្រុមការងារសហគមន៍ បានចុះសម្របសម្រួលជាមួយប្រជាពលរដ្ឋដើម្បីពិនិត្យ និងដោះស្រាយសំណើស្នើសុំជួសជុលផ្ទះ រួមទាំងសាងសង់ខ្នាតតូច តាមភូមិទាំង១១២ ក្នុងតំបន់ឧទ្យានអង្គរ ហើយអនុញ្ញាតជូនប្រជាពលរដ្ឋចំនួន២៩គ្រួសារគឺ ស្រុកអង្គរធំចំនួន០៥គ្រួសារ ស្រុកពួកចំនួន ១៣គ្រួសារ ស្រុកបន្ទាយស្រីបានចំនួន ០៥គ្រួសារ និងក្រុងសៀមរាបចំនួន ០៦គ្រួសារ។ អានបន្ត

៩៖ សួនបណ្ដុះកូនឈើមណ្ឌល៣ ត្រៀមកូនឈើប្រមាណ៣ម៉ឺនដើមសម្រាប់ដាំនិងចែកចាយ
ឆ្នាំនេះ សួនបណ្ដុះកូនឈើមណ្ឌល៣ ដែលបណ្ដុះប្រភេទឈើព្រៃហូបផ្លែ និងឈើលម្អដូចជា ដើមរំដួល ដើមសេមាន់ ដើមគុយ ដើមផ្ញៀវ ដើមផ្កាត្របែកព្រៃ ដើមផ្កាអ៊ិនតាណែល និងប្រភេទដើមឈើមួយចំនួនទៀតសរុបជាង១០មុខ បានត្រៀមកូនឈើប្រមាណ៣ម៉ឺនដើមសម្រាប់ការដាំដុះ និងការចែកចាយ។ សួនបណ្ដុះកូនឈើមណ្ឌល៣នេះ មានប្រភេទកូនឈើកម្រ ហើយក្នុងមួយឆ្នាំៗ សួនបណ្ដុះកូនឈើមណ្ឌល៣ អាចបណ្ដុះឈើចម្រុះពី២ទៅជាង៣ម៉ឺនដើម។ សម្រាប់ប្រជាពលរដ្ឋមានបំណងស្នើសុំកូនឈើយកទៅដាំ សូមទាក់ទងទៅកាន់ស្នាក់ការអាជ្ញាធរជាតិអប្សរា។ អានបន្ត

១០៖ អាជ្ញាធរជាតិអប្សរាបើកទីតាំងទទួលពាក្យចំនួន៣បន្ថែមទៀត ដើម្បីជួយសម្រួលដល់ការស្នើសុំសាងសង់របស់ប្រជាពលរដ្ឋនៅក្នុងតំបន់ឧទ្យានអង្គរ
កន្លែងទទួលពាក្យចំនួន៣កន្លែងទើបនឹងបង្កើតទីតាំងបន្ថែមទៀត ទី១ នៅមជ្ឈមណ្ឌលសេវាកម្មអតីតបញ្ជរលក់បណ្ណចូលទស្សនារមណីយដ្ឋានអង្គរ ទី២ ច្រកចេញចូលតែមួយរបស់រដ្ឋបាលស្រុកអង្គរធំ និងទី៣ នៅស្រុកបន្ទាយស្រី បានដាក់ឱ្យដំណើរការ ដើម្បីសម្រួលដល់ការស្នើសុំសាងសង់របស់ប្រជាពលរដ្ឋក្នុងឧទ្យានអង្គរ។ជាក់ស្តែងរយៈពេល១មួយសប្តាហ៍ចុងខែមេសាកន្លងទៅ អាជ្ញាធរជាតិអប្សរាបានទទួលពាក្យស្នើសុំសាងសង់ថ្មី និងជួសជុលចំនួន៥២ករណី ហើយក្រុមការងារជំនាញ បានចុះពិនិត្យសំណើទាំងនេះបានចំនួន២៤ករណី ជួយសម្រួល និងរៀបចំគំនូសប្លង់ជូនបាន៦ករណី។ អានបន្ត

១១៖ ប្រាសាទក្រហមក្នុងរាជ្យព្រះបាទជ័យវរ្ម័នទី២នៅលើខ្នងភ្នំគូលែនទើបបញ្ចប់ការជួសជុលជាលើកដំបូង
ប្រាសាទក្រហម កម្ពស់៣៧០ម៉ែត្រពីនីវ៉ូទឹកសមុទ្រ និងមាន១៤គីឡូម៉ែត្រពីព្រះអង្គធំ កសាងក្នុងស.វ.ទី៩ ក្នុងរាជ្យព្រះបាទជ័យវរ្ម័នទី២នៅលើភ្នំគូលែន បានបញ្ចប់ការជួសជុលឱ្យផុតពីហានិភ័យជាលើកដំបូង ដោយក្រុមអ្នកជំនាញអាជ្ញាធរជាតិអប្សរា នៃនាយកដ្ឋានអភិរក្សប្រាសាទក្រៅឧទ្យានអង្គរ។ ចំពោះការជួសជុលលើកដំបូងនេះ ក្រុមការងារបានកាយបកដីដែលចាក់បង្គ ស្វែងរកវត្ថុសិល្បៈ រៀបទុកដាក់ឥដ្ឋឱ្យមានសណ្តាប់ធ្នាប់ ធ្វើជំរាលរំដោះទឹក សម្អាតរុក្ខជាតិ ដើមឈើ រៀបភ្ជឹតជញ្ជាំង ជួសជុលពង្រឹងជញ្ជាំងនិងដំបូលដែលបម្រុងជ្រុះធ្លាក់ ព្រមទាំងជួសជុលនិងដំឡើងក្លោងទ្វារខាងកើតឡើងវិញ។
ទៅអនាគតនាយកដ្ឋាននឹងស្នើគម្រោងជួសជុលដំណាក់កាលទី២ គឺជួសជុលផ្នែកដំបូល ពង្រឹងរចនាសម្ពន្ធគ្រឹះឥដ្ឋសម្រាប់ទ្រលិង្គនិងយោនី ជួសជុលវត្ថុសិល្បៈបន្ថែមដែលបានរកឃើញនៅជុំវិញប្រាសាទដើម្បីឱ្យប្រាសាទនៅរឹងមាំ គង់វង្សយូរអង្វែង និងកំណាយស្រាវជ្រាវដើម្បីដឹងព័ត៌មានបន្ថែមពីប្រាសាទនេះ។ អានបន្ត

បច្ចុប្បន្នបរិវេណមុខប្រាសាទអង្គរវត្ត បានចាប់ផ្តើមប្រែមុខមាត់ថ្មីជាបណ្ដើរៗស័ក្ដិសមជារមណីយដ្ឋានបេតិកភណ្ឌពិភពលោកដែលមានភាពទាក់ទាញដ៏អស្ចារ្យ ដោយលោកអ្នកអាចឃើញនូវទស្សនីយភាពថ្មី ប្លែកភ្នែក ពេលមកទស្សនាប្រាសាទអង្គរវត្ត ក្រោយពីតំបន់នេះមានការអភិវឌ្ឍជាបន្តបន្ទាប់ពីសំណាក់អាជ្ញាធរជាតិអប្សរា។
១ ព្រះមហាវិមលធម្ម សិរីសុវណ្ណោ ពិន សែម បំផុសគំនិតឱ្យពលរដ្ឋខ្មែរដាំដើមព្នៅឡើងវិញ
នារសៀលថ្ងៃទី២២ ខែកញ្ញា ឆ្នាំ២០២០ ព្រះមហាវិមលធម្ម សិរីសុវណ្ណោ ពិន សែម រាជាគណៈថ្នាក់ទោ និងជាឧត្តមទីប្រឹក្សាគណៈសង្ឃនាយក នៃព្រះរាជាណាចក្រកម្ពុជា និងជាព្រះចៅអធិការវត្ត រាជបូណ៌ បានដឹកនាំព្រះសង្ឃប្រមាណ៦០អង្គ ដាំដើមព្នៅចំនួន៨៤ដើម នៅបរិវេណកសិន្ធុខាងជើងនៃប្រាសាទអង្គរវត្ត។ ព្រះអង្គមានសង្ឃដីកាថា ដើមព្នៅមានសារប្រយោជន៍ដ៏អស្ចារ្យ ដែលប្រជាពលរដ្ឋខ្មែរត្រូវដឹង និងចូលរួមដាំឡើងវិញកុំឱ្យបាត់បង់ គឺថាដើមព្នៅជារុក្ខជាតិដ៏ខ្ពង់ខ្ពស់ក្នុងសាសនាព្រាហ្មណ៍ ជារុក្ខជាតិរបស់ព្រះសិវៈ និងជាឱសថព្យាបាលរោគផង។
ក្នុងឱកាសនោះ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា មានប្រសាសន៍ថា អាជ្ញាធរជាតិអប្សរាបានត្រៀមដីមួយកន្លែងនៅខាងជើងក្រុងអង្គរធំ សម្រាប់ធ្វើជាចម្ការព្នៅ និងដាំពូជព្នៅចម្រុះសម្រាប់ជាប្រយោជន៍ទៅថ្ងៃក្រោយ។ ឯកឧត្តមបន្ថែមទៀតថា ក្នុងរមណីយដ្ឋានអង្គរ ដើមឈើរហូត ១៨៣ប្រភេទ ហើយគោលការណ៍អាជ្ញាធរជាតិអប្សរា គឺថែរក្សាតំបន់នេះ ឲ្យនៅតែសម្បូរធនធានធម្មជាតិចម្រុះបែបនេះរហូតតទៅ។ ព័ត៌មានលំអិត
rn
២ កូនឈើចំនួន៥០០ដើម ត្រូវបានដាំនៅបរិវេណវត្តតាំងតុក្នុងក្រុងអង្គរធំ
នៅព្រឹកថ្ងៃទី២៤ ខែកញ្ញា ឆ្នាំ២០២០នេះ អាជ្ញាធរជាតិអប្សរា ព្រះសង្ឃ និងកម្លាំងនគរបាលបេតិកភណ្ឌ បានដាំកូនឈើចំនួន៥០០ដើម នៅក្នុងបរិវេណវត្តតាំងតុ ស្ថិតនៅតាមបណ្ដោយផ្លូវឆ្ពោះទៅខ្លោងទ្វារជ័យ នៃក្រុងអង្គរធំ។ នាពេលនោះ លោក ឡុង កុសល អ្នកនាំពាក្យអាជ្ញាធរជាតិអប្សរា និងជាប្រធាននាយកដ្ឋានផ្សព្វផ្សាយ បានឱ្យដឹងថា ការដាំកូនឈើគឺដូចជាការផ្តល់នូវជីវិតឡើងវិញ និងជារួមចំណែកគិតគូរពីបញ្ហាបរិស្ថាននៅក្នុងប្រទេសកម្ពុជា។ លោកបន្ថែមថា ការចូលរួមនេះទោះតិចឬច្រើន គឺយើងបាននាំប្រយោជន៍ដល់សង្គមជាតិ ពិសេសបានរួមចំណែកកាត់បន្ថយការបំពុលបរិស្ថាន។ ជាងនេះទៅទៀត ការដាំកូនឈើឡើងវិញក្នុងរមណីយដ្ឋានអង្គរ គឺជាចំណែកដ៏សំខាន់ក្នុងវិស័យបេតិកភណ្ឌ ដ្បិតថា ព្រៃឈើជាផ្នែកមួយដ៏សំខាន់ក្នុងកិច្ចការការពារបេតិកភណ្ឌជាតិក្នុងតំបន់រមណីយដ្ឋានអង្គរ។ ព័ត៌មានលំអិត
rn
៣ អ្នកជួសជុលប្រាសាទភ្នំបាខែងមានមោទនភាពចំពោះការងារអភិរក្សប្រាង្គប្រាសាទ
អ្នកជំនាញជួសជុលប្រាសាទ លោក ឈឹម សុខា បានបម្រើការងារផ្នែកអភិរក្សតាំងឆ្នាំ២០០១ «ខ្ញុំសប្បាយចិត្តណាស់ ដែលបានធ្វើការជួសជុលមរតកដូនតា ឱ្យល្អប្រសើរឡើងវិញ។ យើងខ្ញុំធ្វើការបម្រើអង្គរដោយស្មោះត្រង់ ដោយកម្លាំងញើសឈាម ធ្វើការទាំងក្តៅ ទាំងភ្លៀង ជួបការលំបាកជាច្រើន សូម្បីថ្មបាយក្រៀមក៏រុញឡើង ថ្មនៅតែដាប់ ធ្វើការបែកដៃបែកជើង ហូរញើសជោកខ្លួនជាមួយបរទេស ដើម្បីតែភាពរឹងមាំរបស់ប្រាសាទ។ ដូច្នេះ សូមបងប្អូនជួយស្រឡាញ់វត្ថុបុរាណនិងបេតិកភណ្ឌរបស់យើងឡើងវិញ។ យើងខ្ញុំស្រឡាញ់បេតិកភណ្ឌដូនតាណាស់»។
លោកស្រី Ginevra Baotto ប្រធានគម្រោងមូលនិធិប្រាសាទពិភពលោកប្រចាំកម្ពុជា «ខ្ញុំរីករាយដែលបានឃើញការខិតខំរបស់ពួកគេនៅក្នុងរឿងកិច្ចការអភិរក្ស តាមរយៈគំនិតផ្តួចផ្តើមនិងការប្រាស្រ័យទាក់ទង ផ្សេងៗ។ លោកស្រីបន្ថែមថា ក្រុមការងារអន្តរជាតិទាំងអស់ ដែលធ្វើការនៅតំបន់អង្គរ និងអាជ្ញាធរជាតិអប្សរាក៏កំពុងធ្វើការជាមួយគោលដៅរួមគ្នាដើម្បីផ្តល់ផលប្រយោជន៍ ដល់ប្រទេសកម្ពុជានិងប្រជាជនកម្ពុជា»។ អាជ្ញាធរជាតិអប្សរា សហការជាមួយមូលនិធិប្រាសាទពិភពលោក (World Monument Fund) តាំងពីឆ្នាំ២០០៧ ដើម្បីអភិរក្ស ជួសជុល ប្រាសាទភ្នំបាខែង ឲ្យមានភាពរឹងមាំ សោភ័ណភាពស្អាតឡើងវិញ។ ព័ត៌មានលំអិត
rn
៤ ប្រជាពលរដ្ឋក្នុងតំបន់អង្គរចំនួន៣០៩គ្រួសារ ត្រូវបានអាជ្ញាធរជាតិអប្សរាចុះពិនិត្យ លក្ខណៈបច្ចេកទេសនៃការសាងសង់លំនៅដ្ឋាន
តាមរបាយការណ៍ របស់នាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរ នៃអាជ្ញាធរជាតិអប្សរា ឱ្យដឹងថា ខែកញ្ញា ឆ្នាំ២០២០នេះ ក្រុមការងារ បានចុះពិនិត្យនិងជួយសម្រួលលក្ខណៈបច្ចេកទេសដល់ប្រជាពលរដ្ឋដែលសាងសង់លំនៅដ្ឋានចំនួន៣០៩គ្រួសារ នៅក្នុងតំបន់អង្គរ រួមមាន ក្រុងសៀមរាបចំនួន៨១គ្រួសារ ស្រុកប្រាសាទបាគង ចំនួន៧២គ្រួសារ ស្រុកបន្ទាយស្រីចំនួន ៧០គ្រួសារ ស្រុកអង្គរធំ ចំនួន៤៦គ្រួសារ និងស្រុកពួក ចំនួន៤០ គ្រួសារ។
ក្រុមការងារនាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរនៃអាជ្ញាធរជាតិអប្សរា តែងតែចុះពិនិត្យជាប្រចាំ ដើម្បីសម្រប សម្រួលករណីសំណើផ្សេងៗនិងជួយណែនាំផ្សព្វ ផ្សាយអប់រំប្រជាពលរដ្ឋឱ្យយល់កាន់តែច្បាស់ពីតួនាទីនិងភារកិច្ចរបស់អាជ្ញាធរជាតិអប្សរា។ ព័ត៌មានលំអិត
rn
៥ ក្រុមការងារនៃនាយកដ្ឋានសណ្ដាប់ធ្នាប់ និងសហប្រតិបត្តិការចូលរួមដាំកូនឈើនៅតំបន់ប្រាសាទព្រះខ័ន
នៅព្រឹកថ្ងៃទី២១ ខែកញ្ញា ឆ្នាំ២០២០ នេះ ក្រុមការងារនៃនាយកដ្ឋានសណ្ដាប់ធ្នាប់ និងសហប្រតិបត្តិការ នៃអាជ្ញាធរជាតិអប្សរា បានសហការចូលរួមដាំកូនឈើជាមួយកម្លាំងនគរបាលការពារបេតិកភណ្ឌ ដោយបានដាំកូនឈើសរុបចំនួន ១០០ដើម នៅតាមដងផ្លូវស្ថិតនៅភូមិភ្លុង សង្កាត់អង្គរធំ ក្រុងសៀមរាប។ កូនឈើទាំងនោះត្រូវបានដាំឡើងវិញ ដើម្បីបំពេញចន្លោះព្រៃឈើនៅតាមដងផ្លូវ និងចូលរួមចំណែកក្នុងកិច្ចការអភិរក្ស និង អភិវឌ្ឍន៍ប្រកបដោយចីរភាពរមណីយដ្ឋានអង្គរ។ ព័ត៌មានលំអិត
rn
៦ ក្រុមការងារសណ្តាប់ធ្នាប់សាធារណៈ នៃអាជ្ញាធរជាតិអប្សរាចុះណែនាំអ្នកលក់ដូរតាមប្រាសាទ
ភ្នាក់ងារសណ្តាប់ធ្នាប់សាធារណៈ នៃនាយកដ្ឋានសណ្តាប់ធ្នាប់ និងកិច្ចសហប្រតិបត្តិការអាជ្ញាធរជាធរជាតិអប្សរា នាព្រឹកថ្ងៃទី២២ ខែកញ្ញា ឆ្នាំ២០២០នេះ បានចុះណែនាំអាជីវករលក់ដូរតាមប្រាសាទនានាក្នុងរមណីយដ្ឋានអង្គរ ឱ្យលក់ដូរមានរបៀបរៀបរយ ត្រឹមត្រូវតាមទីតាំងដែលបានកំណត់ និងចូលរួមសម្អាតបរិស្ថានឱ្យបានស្អាតជុំវិញកន្លែងលក់ដូររបស់ខ្លួន។ ព័ត៌មានលំអិត
rn
៧ ក្រុមការងារគ្រប់គ្រងទឹករបស់អាជ្ញាធរជាតិអប្សរា ប្រមូលទឹកស្ដុកទុកមិនឱ្យជន់លិចរមណីយដ្ឋានអង្គរ នាអំឡុងពេលមានភ្លៀងធ្លាក់ខ្លាំងក្រោមឥទ្ធិពលរបស់ព្យុះនូល
ប្រទេសកម្ពុជា បានរងនូវឥទ្ធិពលពីព្យុះនូលចាប់ពីថ្ងៃទី១៨រហូតដល់ថ្ងៃទី២០ ខែកញ្ញា ឆ្នាំ២០២០ ដែលបណ្ដាលឱ្យតំបន់មួយចំនួនមានភ្លៀងធ្លាក់ជាបន្តបន្ទាប់ ក្នុងខេត្តសៀមរាប ហើយក្រុមការងារគ្រប់គ្រងទឹកនៃអាជ្ញាធរជាតិអប្សរា បានខិតខំប្រឹងប្រែង ប្រមូលទឹកភ្លៀងទាំងនោះ តាមប្រព័ន្ធផ្លូវទឹកបុរាណ ដើម្បីបញ្ចូនទៅរក្សាក្នុងបារាយណ៍ខាងជើង បារាយណ៍លលៃ កសិន្ធុអង្គរវត្ត កសិន្ធុក្រុងអង្គរធំ បារាយណ៍ខាងលិច កសិន្ធុប្រាសាទចៅស្រីវិបុលនិង អាងស្តុកផ្សេងៗទៀ ដើម្បីបញ្ជៀសមិនឱ្យជន់លិចតំបន់រមណីយដ្ឋានអង្គរ ក៏ដូចជាក្រុងសៀមរាប។ ការប្រមូលទឹកចូលក្នុងអាងស្តុកទឹកនេះ ជាប្រយោជន៍ដល់កិច្ចការអភិរក្សប្រាសាទ និងការស្រោចស្រពកសិកម្មរបស់បងប្អូនប្រជាពលរដ្ឋ នារដូវប្រាំង។ ព័ត៌មានលំអិត
rn
៨ ក្រុមការងារសណ្តាប់ធ្នាប់សាធារណៈនៃអាជ្ញាធរជាតិអប្សរាចុះរៀបចំសណ្តាប់ធ្នាប់តាមដងផ្លូវក្នុងរមណីយដ្ឋានអង្គរ
នាព្រឹកថ្ងៃទី២២ ខែកញ្ញា ឆ្នាំ២០២០នេះ ក្រុមការងារនៃនាយកដ្ឋានសណ្តាប់ធ្នាប់ និងកិច្ចសហប្រតិបត្តិការនៃអាជ្ញាធរជាតិអប្សរា បានចុះរៀបចំសណ្តាប់ធ្នាប់តាមដងផ្លូវនៅតាមប្រាសាទនានាក្នុងរមណីយដ្ឋានអង្គរ។ កិច្ចការនេះមានការរៀបចំបង្គោលរបងខណ្ឌផ្លូវកុំឱ្យយានជំនិះជិះចូលឬចតទុក ឱ្យមានរៀបរៀបរយ និងកាប់ឆ្ការមែកឈើផ្សេងៗ ដែលប៉ះពាល់ដល់ការធ្វើដំណើរទៅប្រាសាទ ដើម្បីឱ្យមានសោភ័ណភាពស្រស់ស្អាតនិងបង្ការគ្រោះថ្នាក់ដល់ទេសចរ។ ព័ត៌មានលំអិត
rn
ព្នៅ ជាប្រភេទរុក្ខជាតិបុរាណខ្មែរ ហើយមានសារប្រយោជន៍ច្រើនមុខ ទាំងសម្រាប់បរិភោគ និងជាឱសថផង លើសពីនេះ វាជារុក្ខជាតិដែលត្រូវបានលើកតម្កើងទាំងពិធីសាសនា និងកិច្ចពិធីផ្សេងៗក្នុងសាសនាព្រាហ្មណ៍។ ដោយយល់ពីសារប្រយោជន៍ ក៏ដូចជាដើម្បីអភិរក្សពូជដើមព្នៅកុំឱ្យបាត់បង់ អាជ្ញាធរជាតិអប្សរា មានគម្រោងរៀបចំជាចម្ការព្នៅ ដោយដាំពូជព្នៅចម្រុះនៅក្នុងតំបន់រមណីយដ្ឋានអង្គរ ក៏ដូចជាសម្រាប់ទុកឱ្យអ្នកជំនាន់ក្រោយៗបានស្គាល់ផង។
ក្រោមស្នាដៃជួសជុលដោយកូនខ្មែរនិងបរទេសក្នុងការអភិរក្សប្រាសាទភ្នំបាខែងឱ្យផុតពីគ្រោះថ្នាក់ អាជ្ញាធរជាតិអប្សរាសហការជាមួយមូលនិធិប្រាសាទពិភពលោក (World Monument Fund) តាំងពីឆ្នាំ២០០៧ បានធ្វើការអភិរក្ស ជួសជុល ប្រាសាទភ្នំបាខែង ដោយប្រែស្ថានភាពពីចាស់ទ្រុឌទ្រោម បាក់បែក មកជាសំណង់ប្រាសាទដែលមានភាពរឹងមាំ សោភ័ណភាពស្អាត និងទាក់ទាញទេសចរ។
នៅព្រឹកថ្ងៃទី២៤ ខែកញ្ញា ឆ្នាំ២០២០នេះ មន្រ្តី និងបុគ្គលិកនៃអាជ្ញាធរជាតិអប្សរា រួមមាននាយកដ្ឋានផ្សព្វផ្សាយ នាយកដ្ឋានសណ្ដាប់ធ្នាប់ និងសហប្រតិបត្តិការ និងនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន បានចូលរួមជាមួយព្រះសង្ឃ និងកម្លាំងនគរបាលបេតិកភណ្ឌ ដាំកូនឈើចំនួន៥០០ដើម នៅក្នុងបរិវេណវត្តតាំងតុ ស្ថិតនៅតាមបណ្ដោយផ្លូវឆ្ពោះទៅខ្លោងទ្វារជ័យ នៃក្រុងអង្គរធំ។
ដើមដំបូងមុន12345...347348បន្ទាប់ចុងក្រោយ

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
4
ថ្ងៃនេះ
:
3754
ម្សិលមិញ
:
6587
សប្តាហ៍នេះ
:
22922
ខែនេះ
:
0003754
សរុប
:
012773186