ព័ត៌មានថ្មីៗ

សកម្មភាពភ្នាក់ងារទេសចរណ៍នៃអាជ្ញាធរជាតិអប្សរាបានជួយសង្គ្រោះភ្ញៀវ និងប្រគល់របស់ជូនភ្ញៀវទេសចរ

បានផ្សាយនៅ ថ្ងៃទី 12 ខែ កញ្ញា ឆ្នាំ2018 02:20 PM ដោយ ៖ អាជ្ញាធរជាតិអប្សរា

ភ្នាក់ងារទេសចរណ៍ មានតួនាទីសំខាន់ក្នុងការផ្តល់នូវព័ត៌មានអំពីសេវាកម្មទេសចរណ៍ដល់ភ្ញៀវ មើលសកម្មភាពនានានៅក្នុងរមណីយដ្ឋានអង្គរ និងពន្យល់ណែនាំឱ្យភ្ញៀវគោរពតាមក្រមប្រតិបត្តិអង្គរ ជួយសង្គ្រោះភ្ញៀវ ជួយស្វែងរកនិងប្រគល់របស់ជូនភ្ញៀវ ជាពិសេសដោះស្រាយនូវបញ្ហាផ្សេងៗដែលបានកើតឡើងចំពោះភ្ញៀវជាយថាហេតុក្នុងដំណើរទស្សនាតំបន់អង្គរ។

របាយការណ៍សកម្មភាពការងាររបស់នាយកដ្ឋានអភិវឌ្ឍន៍ទេសចរណ៍អង្គរនៃអាជ្ញាធរជាតិអប្សរាប្រចាំខែសីហា ឆ្នាំ២០១៨ បង្ហាញថា ក្រុមការងារជួយសង្រោះភ្ញៀវទេសចរដែលរងរបួសដោយ រអិលឬជំពប់ជើង ដួល គ្រិច ថ្លោះដៃ ជើង ខ្យល់គរ វិលមុខ ចុកពោះ សត្វស្វាខាំ និងពុលអាហារជាដើមបាន១៩ករណី។ បញ្ហាទាំងនេះកើតឡើងដោយសារភ្ញៀវខ្លះមានការធ្វេសប្រហែស និងមិនគោរពតាមការណែនាំ ឬផ្លាកសញ្ញាហាមឃាត់ និងបញ្ហាសុខភាពផ្ទាល់ខ្លួន។

បញ្ហាទាំងនេះត្រូវបានភ្នាក់ងារទេសចរណ៍ដែលមានជំនាញសង្រ្គោះបឋមនិងមានបរិក្ខារសង្រ្គោះបឋមនៅជាប់ខ្លួនជួយសង្គ្រោះបឋមទាន់ពេលវេលានៅកន្លែងកើតហេតុក្នុងករណីស្រាលៗនិងសហការជាមួយនគរបាលទេសចរ និងនគរបាលការពារបេតិកភណ្ឌ បញ្ជូនទៅមន្ទីរពេទ្យក្នុងរកណីរបួសធ្ងន់ធ្ងរ។

ក្រុមភ្នាក់ងារទេសចរណ៍ក៏បានរើសរបស់របរភ្ញៀវដែលភ្លេចឬជ្រុះនៅតាមប្រាសាទចំនួន៣៤ករណីនិងបានរកឃើញ៣១ករណីរួមមាន៖ ទូរសព្ទដៃ អាយផេត កាបូបស្ពាយ កាបូបយួរដៃ កាបូបលុយ កាតវីសារ និងម៉ាស៊ីនថតជាដើម ហើយបានរកឃើញនិងប្រគល់ជូនម្ចាស់វិញ។ ឯរបស់ខ្លះទៀត ដែលភ្ញៀវមិនបានមករកភ្លាមៗ ក្រុមការងារបានប្រគល់ឱ្យនគរបាលទេសចរណ៍រក្សាទុក រងចាំម្ចាស់ដើមមកទាក់ទងយក។ គួរបញ្ជាក់ថាសកម្មភាពទាំងអស់នេះទទួលបាននូវការថ្លែងអំណរគុណនិងការកោតសរសើរយ៉ាងកក់ក្តៅពីសំណាក់ភ្ញៀវទេសចរជាតិនិងអន្តរជាតិ ព្រមទាំងបានបង្ហាញនូវក្តីស្រលាញ់និងទំនុកចិត្តខ្ពស់មកលើភ្នាក់ងារទេសចរណ៍។

ក្រៅពីសកម្មភាពសង្គ្រោះនិងការរើស ប្រគល់វត្ថុដែលភ្ញៀវបាត់ឬភ្លេច ក្រុមភ្នាក់ងារទេសចរណ៍ក៏បានហាមឃាត់ភ្ញៀវដែលប្រព្រឹត្តិមិនសមរម្យបានចំនួន៦២ករណីរួមមាន៖ ការបង្ហោះត្រូន (Drone) ការបន្ទោបង់ក្នុងបរិវេណប្រាសាទ ជនបរទេសថតរូបអាពាហ៍ពិពាហ៍ដោយគ្មានការអនុញ្ញាត ការថតរូបបញ្ចេញកាយវិការមិនសមរម្យ (ថតបង្ហាញម៉ូត ថតរូបភាពមិនសមរម្យ) ស្លៀកពាក់មិនសមរម្យ សម្តែងសៀកនៅក្នុងប្រាសាទ រៀបចំពិធីទទួលទានអាហារនៅក្នុងប្រាសាទ ប្រើប្រាស់ម៉ាស៊ីនថតខ្នាតធំ ធ្វើពិធីសាសនាដោយគ្នានការអនុញ្ញាត ថតរូបផ្សព្វផ្សាយពាណិជ្ជកម្មនិង គូរគំនូរលក្ខណៈទ្រង់ទ្រាយធំដោយមិនមានការអនុញ្ញាត។ល។ ក្រោយពីហាមឃាត់ ក្រុមភ្នាក់ងារទេសចរបានណែនាំតាមគោលការណ៍ដែលមានជាធរមាន និងពន្យល់ណែនាំដល់បុគ្គលទាំងនោះ ត្រូវដាក់សំណើសុំច្បាប់អនុញ្ញាតពីអាជ្ញាធរជាតិអប្សរាជាមុនសិន ក្នុងករណីណាមួយដែលត្រូវឆ្លងកាត់អាជ្ញាធរជាតិអប្សរា៕










ក្នុងខែឧសភា ឆ្នាំ២០១៩ ប្រជាពលរដ្ឋរស់នៅក្នុងតំបន់រមណីយដ្ឋានអង្គរចំនួន ៣៥គ្រួសារ បានទទួលការអនុញ្ញាតពីអាជ្ញាធរជាតិអប្សរាដើម្បីរុះរើផ្ទះចាស់និងសាងសង់ផ្ទះថ្មីឡើងវិញ។ ក្នុងករណីសាធារណជនមានបំណងរុះរើផ្ទះចាស់ និងសាងសង់ជាថ្មីឡើងវិញ សូមអញ្ជើញដាក់ពាក្យស្នើសុំនៅមជ្ឈមណ្ឌលសេវាកម្មអាជ្ញាធរជាតិអប្សរាដែលមានអាសយដ្ឋាននៅភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប។
សារមន្ទីរវាយនភណ្ឌប្រពៃណីអាស៊ី បានសហការជាមួយសារមន្ទីរឧក្រិដ្ឋកម្មប្រល័យពូជសាសន៍ទួលស្លែង បើកវគ្គបណ្តុះបណ្តាលស្តីពី «ការអភិរក្សវាយនភណ្ឌ» រយៈពេល១១ថ្ងៃដល់មន្ត្រី-បុគ្គលិកអាជ្ញាធរជាតិអប្សរា ចាប់ពីថ្ងៃទី០៣ ខែមិថុនា ដល់ទី១៣ ខែមិថុនា ឆ្នាំ២០១៩ ដោយផ្តោតសំខាន់លើទ្រឹស្តី និងការអនុវត្តផ្ទាល់។ ពិធីបើកវគ្គបណ្តុះបណ្តាលក្រោមអធិបតីភាពឯកឧត្តម យិត ចាន់ដារដ្ឋ អគ្គនាយករង តំណាងដ៏ខ្ពង់ខ្ពស់ឯកឧត្តម ហង់ ពៅ អគ្គនាយកនៃអាជ្ញាធរជាតិអប្សរា។
នៅក្នុងដំណើរចុះតាមដានអនុសាសន៍ពាក់ព័ន្ធនឹងបច្ចេកទេសនៃកិច្ចការអភិរក្ស ជួសជុលប្រាសាទនៅតំបន់ឧទ្យានរលួស នាព្រឹកថ្ងៃច័ន្ទ ១កើត ខែជេស្ឋ ឆ្នាំកុរ ឯកស័កព.ស.២៥៦៣ ត្រូវនឹងថ្ងៃទី០៣ ខែមិថុនា ឆ្នាំ២០១៩ របស់អ្នកជំនាញអាដហុកនៃគណៈកម្មាធិការអន្ដរជាតិសម្របសម្រួល ការគាំពារ និងអភិវឌ្ឍន៍តំបន់ប្រវត្តិសាស្រ្ដអង្គរ (អាស៊ីស៊ី-អង្គរ) លោកសាស្រ្តាចារ្យ Mounir Bouchenaki បានចាត់ទុកការសម្រេចព្រះទ័យរបស់ព្រះសង្ឃនៅវត្តលលៃដោយព្រមផ្លាស់ទីកុដិមកគង់នៅខាងក្រោមប្រាសាទ គឺជាការចូលរួមចំណែកលើកស្ទួយការអភិរក្សប្រាសាទ ការស្រឡាញ់មរតកដូនតាខ្មែរ និងយល់ពីតម្លៃបេតិកភណ្ឌពិភពលោក។ នេះជាគំរូដ៏ល្អគួរឱ្យគោរពនិងកោតសរសើរ ដែលបុរាណដ្ឋានដទៃទៀតនៅក្នុងតំបន់អង្គរនិងពិភពលោកគួរយកគំរូតាម។
តាមរយៈកម្មវិធីបណ្តុះបណ្តាល Technical Exchange NAPAV/APSARA ក្រោមកិច្ចសហការរបស់ស្ថានទូតអាមេរិក ដឹកនាំដោយសាស្រ្តាចារ្យ Barbara J. Anello-Adnani រយៈពេល៤ថ្ងៃ ចាប់ពីថ្ងៃទី៣១ ខែឧសភា ដល់ថ្ងៃទី០៣ ខែមិថុនា ឆ្នាំ២០១៩ បានបញ្ចប់ហើយ និងប្រកបដោយជោគជ័យ។ វគ្គសិក្សាថ្មី នឹងចាប់ផ្តើមពីខែកញ្ញា ដល់ខែមិថុនាខាងមុខ។
គណៈកម្មាធិការអាយស៊ីស៊ី-អង្គរ នឹងបើកកិច្ចប្រជុំបច្ចេកទេសលើកទី៣២ នៅថ្ងៃទី១១-១២ ខែមិថុនា ឆ្នាំ២០១៩។ ជាទៀងទាត់ និងជាផ្នែកមួយនៃកិច្ចប្រជុំ អ្នកជំនាញការអាដហុកតែងចុះពិនិត្យតាមការដ្ឋាននានានៅក្នុងតំបន់អង្គរ ដើម្បីតាមដានការអនុវត្តន៍នូវរាល់អនុសាសន៍ដែលបានផ្តល់ជូនក្នុងកិច្ចប្រជុំមុនៗសម្រាប់រាល់គម្រោង ថាតើបានអនុវត្តត្រឹមត្រូវហើយឬនៅ? និងពិភាក្សានូវបញ្ហាប្រឈមនានាមកដោះស្រាយក្នុងកិច្ចប្រជុំ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
5
ថ្ងៃនេះ
:
1645
ម្សិលមិញ
:
6399
សប្តាហ៍នេះ
:
08044
ខែនេះ
:
0075089
សរុប
:
008544672