NEWS

ពិធីបិទគម្រោងអប់រំបេតិកភណ្ឌសម្រាប់កុមារប្រចាំឆ្នាំ២០១៨នៅបន្ទាយឆ្មារ

Published on 27 June 2018 06:45 PM Post By ៖ Apsara National Authority

គម្រោងអប់រំបេតិកភណ្ឌកុមារប្រចាំឆ្នាំ២០១៨ នៅបន្ទាយឆ្មារ បានបិទបញ្ចប់កាលពីថ្ងៃទី២៤ ខែមិថុនា ឆ្នាំ២០១៨ ក្រោមអធិបតីភាពលោកជំទាវ ប៉ុក ណាឌី អភិបាលរង តំណាងឯកឧត្តមអភិបាលនៃគណៈអភិបាលខេត្តបន្ទាយមានជ័យ និងលោក យឹម សារារិទិ្ធ អគ្គនាយករងបេតិកភណ្ឌ តំណាងលោកជំទាវរដ្ឋមន្រ្តីក្រសួងវប្បធម៌ និងវិចិត្រសិល្បៈ តំណាងអាជ្ញាធរជាតិអប្សរា រួមទាំងមន្ទីរ ស្ថាប័នពាក់ព័ន្ធ លោកគ្រូ អ្នកគ្រូ និងសិស្សានុសិស្សសរុបចំនួន២៦០នាក់។

លោក អ៊ុន មុណីនីតា នាយកប្រតិបត្តិនៃអង្គការគាំពារកេរមរតក បានជម្រាបថា៖ ឆ្នាំ២០១៨ គឺជាឆ្នាំទី៤នៃកម្មវិធីអប់រំបេតិកភណ្ឌសម្រាប់កុមារ ដែលមានកុមារចូលរួមសរុបចំនួន១៧០នាក់ ចាប់ពីថ្នាក់ទី៥និងថ្នាក់ទី៦ មានអាយុចន្លោះពី១០ទៅ១៥ឆ្នាំ ហើយកុមារម្នាក់ៗអាចទទួលបានការបណ្ដុះបណ្ដាលក្នុងកម្មវិធីអប់រំនេះចំនួន២ឆ្នាំ មុននឹងបន្តទៅសិក្សាថ្នាក់អនុវិទ្យាល័យ។ សរុប៤ឆ្នាំមកនេះ កម្មវិធីបានបណ្ដុះចំណេះដឹងនិងបណ្ដុះគំនិតដល់កុមារបានចំនួន៣៦៥នាក់ ឱ្យចេះស្រឡាញ់បេតិកភណ្ឌ និងចូលរួមថែរក្សាមរតកវប្បធម៌ដូនតារបស់ខ្លួនបានយ៉ាងល្អ។

លោក អ៊ឹម សុខរិទ្ធី សមាជិកក្រុមប្រឹក្សាភិបាលអង្គការគាំពារកេរមរតកនិងជាអនុប្រធានក្រុមការងារអប់រំបេតិកភណ្ឌនៅអង្គរនៃអាជ្ញាធរជាតិអប្សរា បានឱ្យដឹងពីគោលបំណងនៃគម្រោង គឺដើម្បីឱ្យកុមារដែលកើតនិងរស់នៅក្នុងតំបន់រមណីយដ្ឋានវប្បធម៌-ប្រវត្តិសាស្ត្រ បានយល់ដឹងនូវកេរមរតកវប្បធ៌មរបស់ខ្លួន ព្រមទាំងបណ្ដុះគំនិតកុមារឱ្យជ្រួតជ្រាបពីតម្លៃមរតកវប្បធម៌ឱ្យចេះស្រឡាញ់ ចេះថែរក្សាការពារ។ ជាពិសេស កុមារទាំងនេះអាចធ្វើជាអ្នកស្នងតំណរនៅសហគមន៍របស់ខ្លួនលើវិស័យថែរក្សាការពារ និងគ្រប់គ្រងកេរមរតកវប្បធ៌មនាពេលអនាគត។

លោកបន្តថា មេរៀននិងសកម្មភាពសិក្សា រៀបចំដោយក្រុមគ្រូបង្រៀនដែលបង្រៀននៅមហាវិទ្យាល័យជិត២០ឆ្នាំមកហើយ និងអ្នកស្រាវជ្រាវផ្នែកសង្គមវប្បធម៌ នរវិទ្យា និងបុរាណវិទ្យា។ ការបង្រៀនម្តងៗ ក៏មានអញ្ជើញលោកគ្រូ អ្នកគ្រូ ចូលរួមស្តាប់ឱ្យបានជ្រួតជ្រាបអំពីមូលដ្ឋានគ្រឹះនៃបេតិកភណ្ឌវប្បធម៌ និងការចូលរួមរបស់សហគមន៍ចំពោះការថែរក្សា-ការពារបេតិកភណ្ឌវប្បធម៌ជាមុនសិន ដើម្បីឱ្យងាយស្រួលក្នុងការជួយជំរុញកុមារសិក្សាតាមគោលការណ៍ណែនាំ និងតម្រូវការនៃកម្មវិធីនេះ។

ចំពោះការអប់រំបេតិកភណ្ឌ គឺមានទាំងក្នុងថ្នាក់ ទាំងក្រៅថ្នាក់ ដោយបញ្ជូនកុមារឱ្យចុះសិក្សាតាមរមណីយដ្ឋាននានាក្នុងតំបន់ និងនៅសារមន្ទីរខេត្តបន្ទាយមានជ័យ ព្រមទាំងឱ្យកុមាររៀនអានសៀវភៅនិទានសម្រាប់កុមារដូចជា៖ រឿង “មនុស្សនិងផ្នូរបុរាណ” និងរឿង “វាចាថ្ម” ដែលជាប្រភេទរឿងនិទានទាក់ទងការរួមគ្នារបស់សហគមន៍ជួយគ្នាថែរក្សាការពារ ទប់ស្កាត់ការបំផ្លិចបំផ្លាញ ការជីកកកាយ និងការជួញដូរវត្ថុបុរាណ ព្រមទាំងឱ្យកុមារចេះគូរគំនូរ និងផាត់ពណ៌ជាដើម។

ការអប់រំនេះ ក៏ជំរុញឱ្យកុមារយល់ពីទម្រង់ផ្សេងៗគ្នានៃបេតិកភណ្ឌទាំងមរតករូបី និងមរតកអរូបី យល់ពីតម្លៃ និងសារៈសំខាន់ៗនៃបេតិកភណ្ឌវប្បធម៌ ឱ្យកុមារចេះពិចារណាលើបញ្ហាទាក់ទងនឹងការជីកកកាយ ការលួចវត្ថុបុរាណ ការបំផ្លិចបំផ្លាញទីតាំងបុរាណដ្ឋាន ឬការឈូសឆាយទីទួលបុរាណធ្វើស្រែចំការ ឬភាពមិនអើពើររបស់សហគមន៍ចំពោះស្ថានីយ៏វប្បធ៌ម-ប្រវត្តិសាស្ត្រ ព្រមទាំងឱ្យកុមារចេះលើកឡើងនូវការថែរក្សាការពារដើម្បីទុកជាផលប្រយោជន៍រួមក្នុងសហគមន៍ និងអាចទទួលបានចំណូលជាប្រចាំតាមរយៈវិស័យទេសចរណ៍វប្បធម៌នាពេលអនាគត។

សូមបញ្ជាក់ថា កម្មវិធីនេះកើតឡើងបានដោយមានការអនុញ្ញាតនិងការជួយជ្រោមជ្រែងគាំទ្រយ៉ាងសកម្មពីសាលាខេត្តបន្ទាយមានជ័យ ក្រសួងវប្បធម៌និងវិចិត្រសិល្បៈ មន្ទីរអប់រំខេត្ត គម្រោងអប់រំបេតិកភណ្ឌសម្រាប់កុមារដែលផ្តួចផ្តើមទ្បើងដោយអង្គការគាំពារកេរមរតក (Heritage Watch) និងក្រុមស្រាវជ្រាវផ្លូវបុរាណរបស់អាជ្ញាធរជាតិអប្សរា បានចាប់ផ្តើមអនុវត្តគម្រោង នៅសាលាបឋមសិក្សាបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ចាប់ពីឆ្នាំ២០១៥។

ពិសេសជាងឆ្នាំមុន ឆ្នាំនេះក៏មានសប្បុរសជនខ្មែរនៃក្រុមយុវជននៅសៀមរាប (ភ្នាក់ងារឯកជន) មាន៖ ជាងបាក់វណ្ណហុង ថេមផលគ្រុប ម៉េម៉រនិងស្ប៉ា បានជួយឧបត្ថម្ភជាជំនួយសម្ភារៈសិក្សា រៀបចំអាហារទទួលសម្រាប់កម្មវិធីបិទនេះ ផ្តល់កាបូបស្ពាយចំនួន២០ដល់សិស្សវិទ្យាល័យ និងកង់ចំនួន១០ដល់សិស្សបឋមសិក្សាដែលខ្វះខាតនិងរៀនពូកែ។ នេះជាសញ្ញាវិជ្ជមានខ្លាំង ដែលខ្មែរចាប់ផ្តើមជួយខ្មែរលើវិស័យអប់រំនិងការពារបេតិកភណ្ឌ ហើយជាទីគួរឱ្យមានមោទនៈខ្លាំង ដែលក្រុមយុវជននេះ ក៏បាននិងកំពុងរួមចំណែកដល់ការងារអប់រំបេតិកភណ្ឌនៅអង្គរផងដែរ៕
















នៅព្រឹកថ្ងៃទី២២ ខែមីនា ឆ្នាំ២០១៩ រដ្ឋមន្រ្តីក្រសួងវប្បធម៌ និងវិចិត្រសិល្បៈ ជាប្រធានអាជ្ញាធរជាតិអប្សរា បានដឹកនាំគណៈប្រតិភូរាជរដ្ឋាភិបាលកម្ពុជាចូលរួមកិច្ចប្រជុំពេញអង្គលើកទី៥ នៃគណៈកម្មាធិការសម្របសម្រួលអន្ដរជាតិសម្រាប់ការអភិរក្ស និងលើកតម្លៃរមណីយដ្ឋានប្រាសាទព្រះវិហារ (ICC-Preah Vihear) ដែលធ្វើឡើងនៅស្នាក់ការអាជ្ញាធរជាតិអប្សរា។
ព្រឹត្តិការណ៍សមរាត្រី (Equinox) រដូវប្រាំង (Vernal Equinox) បានបង្ហាញវត្តមានដ៏ត្រចះត្រចង់នៃដួងព្រះអាទិត្យរះចំកណ្តាលប្រាង្គប្រាសាទអង្គរវត្ត បង្កើតបាននូវទស្សនីយភាពពណ៌មាសដ៏ស្រស់ត្រកាលទាក់ទាញចិត្តអ្នកទស្សនាជាតិ-អន្តរជាតិជាច្រើនពាន់នាក់នាព្រឹកថ្ងៃទី២១ ខែមីនា ឆ្នាំ២០១៩ វេលាម៉ោង៦.៣០នាទី។
សម្ដេចពិជ័យសេនា ទៀ បាញ់ និងលោកជំទាវ តៅ តឿន នៅព្រឹកថ្ងៃទី២០ មីនា ឆ្នាំ២០១៩ បានចូលរួមក្នុងពិធីសំណេះសំណាល និងសួរសុខទុក្ខកុមារ គថ្លង់ និងពិការភ្នែកនៅវិទ្យាល័យអប់រំពិសេសសៀមរាប មុនឱកាសពិធីបុណ្យចូលឆ្នាំប្រពៃណីជាតិដែលនឹងចូលមកដល់ក្នុងពេលឆាប់ៗនេះ។ មានវត្តមានជាអធិបតីភាពក្នុងពិធីនោះដែរ រួមមានគណៈអភិបាលខេត្ត សមាជិកព្រឹទ្ធសភា សមាជិករដ្ឋសភា ប្រធានក្រុមប្រឹក្សាខេត្ត ឯកឧត្តម ហង់ ពៅ អគ្គនាយកអាជ្ញាធរជាតិអប្សរា រួមនិងមន្រ្ដីរាជការនៃអង្គភាព មន្ទីពាក់ព័ន្ធនានាជុំវិញខេត្តសៀមរាបយ៉ាងច្រើនកុះករ។
ជារៀងរាល់ឆ្នាំ ព្រឹត្តិការណ៍សមរាត្រី (Equinox) តែងតែកើតមាន២ដង គឺនៅរដូវប្រាំង (Vernal Equinox) កើតទ្បើងនៅខែមីនា និងសមរាត្រីរដូវវស្សា (Autumnal Equinox) កើតទ្បើងនៅខែកញ្ញា។
ឯកឧត្តម មូន ចេអុិន(Moon Jae-In) និងលោកជំទាវ បានដឹកនាំគណៈប្រតិភូជាន់ខ្ពស់កូរ៉េ មកបំពេញទស្សនកិច្ចនៅរមណីយដ្ឋានអង្គរ នាថ្ងៃទី១៦ ខែមីនា ឆ្នាំ២០១៩ ដែលអមដំណើរយ៉ាងកក់ក្តៅពីមន្ត្រីជាន់ខ្ពស់នៃរាជរដ្ឋាភិបាលកម្ពុជាក្រោមអធិបតីភាពសម្តេចចៅហ្វាវាំង គង់ សំអុល ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ឯកឧត្តម ហង់ ពៅ អគ្គនាយកអាជ្ញាធរជាតិអប្សរា តំណាងឯកឧត្តមអភិបាលនៃគណៈអភិបាលខេត្តសៀមរាប ព្រមទាំងមន្ត្រីអ្នកមុខអ្នកការជាច្រើនទៀត។
FirstPrev12345...203204NextLast

Speech of H. E. Ms. Phoeurng Sackona, President of APSARA National Authority

Welcome Remark by H.E Dr. SUM Map, Director General of APSARA National Authority

Weather Forecast

Angkor Code of Conduct

Angkor Code of Conduct's Video

Website Visitors

Now Online
:
4
Today
:
1013
Yesterday
:
3613
This Week
:
01013
This Month
:
0109584
Total
:
008265551