ព័ត៌មានថ្មីៗ

សហគមន៍អ្នកប្រើប្រាស់ទឹកបារាយណ៍ទឹកថ្លាធ្វើការជ្រើសរើសប្រធានថ្មីក្រោមការសម្របសម្រួលអាជ្ញាធរជាតិអប្សរា

បានផ្សាយនៅ ថ្ងៃទី 12 ខែ មិនា ឆ្នាំ2018 09:21 AM ដោយ ៖ អាជ្ញាធរជាតិអប្សរា

នៅព្រឹកថ្ងៃទី៩ ខែមីនា ឆ្នាំ២០១៨ អាជ្ញាធរជាតិអប្សរា បានសម្របសម្រួលរៀបចំបោះឆ្នោតប្រធានសហគមន៍អ្នកប្រើប្រាស់ទឹកបារាយណ៍ទឹកថ្លាអណត្តិទី២ បន្ទាប់ពីអណត្តិចាស់ដែលបានជ្រើសរើសកាលពីឆ្នាំ២០១៤ ត្រូវបានបញ្ចប់។ ការបោះឆ្នោតនេះក្នុងអណត្តិថ្មីនេះ លោក សុខ ម៉ក់ ត្រូវជាប់ជាអ្នកដឹកនាំនៅអណត្តិទី២នេះ។

ក្រោយរាជរដ្ឋាភិបាលប្រគល់សិទ្ធិឱ្យអាជ្ញាធរជាតិអប្សរា គ្រប់គ្រងទឹកបារាយណ៍ទឹកថ្លា នៅឆ្នាំ២០១៤មក អាជ្ញាធរជាតិអប្សរា បានសម្របសម្រួលរៀបចំឱ្យមានសហគមន៍ប្រើប្រាស់ទឹកឲ្យបានត្រឹមត្រូវ សម្រាប់ទាញយកទឹកបារាយណ៍ទឹកថ្លាយកទៅប្រើប្រាស់ជាប្រយោជន៍ដល់ការងារកសិកម្ម។ នៅឆ្នាំ២០១៤ តាមរយៈការបោះឆ្នោតជ្រើសរើសប្រធានសហគមន៍នេះ លោក ហួត ហាយ បានជាប់ជាប្រធាន និងបានដឹកនាំសហគមន៍អ្នកប្រើប្រាស់ទឹកបារាយណ៍ទឹកថ្លា រយៈពេល៣ឆ្នាំ។

លោក សុខ ម៉ក់ ដែលទើបជាប់ជាប្រធាន និងមានទីលំនៅក្នុងសង្កាត់ទឹកវិល បានឱ្យប្តេជ្ញានឹងខិតខំប្រឹងប្រែង ធ្វើយ៉ាងណាឱ្យស័ក្តិសមចំពោះការបោះឆ្នោតគាំទ្រពីប្រជាពលរដ្ឋ។ លោកបន្ថែមថា នឹងស្វែងរកគ្រប់មធ្យោបាយ រិះរកដើម្បីឱ្យពលរដ្ឋមានទឹកប្រើប្រាស់គ្រប់គ្រាន់។

លោក ជូរ៉ា ឌីណា អនុប្រធាននាយកដ្ឋានគ្រប់គ្រងទឹក នៃអាជ្ញាធរជាតិអប្សរា ដែលបានដឹកនាំក្រុមការងាររៀបចំកម្មវិធីបោះឆ្នោតនៅសហគមន៍អ្នកប្រើប្រាស់ទឹកបារាយណ៍ទឹកថ្លា បានឱ្យដឹងថា ជាគោលការណ៍របស់អាជ្ញាធរជាតិអប្សរា គឺរៀបចំឱ្យមានអាណត្តិបោះឆ្នោត៣ឆ្នាំម្តង។ លោកបញ្ជាក់ថា កាលពីអាណត្តិមុន ក្រោមការដឹកនាំរបស់លោក ហួត ហាយ គឺធ្វើឱ្យប្រជាពលរដ្ឋសប្បាយរីករាយ ពេលដែលពួកគេមានទឹកប្រើប្រាស់បានគ្រប់គ្រាន់។

តាមការលើកឡើងរបស់មន្រ្តីជំនាញទឹក ដើម្បីឱ្យការប្រើប្រាស់ទឹកនៅបារាយណ៍ទឹកថ្លាមាននិរន្តរភាព គឺអាជ្ញាធរជាតិអប្សរា ចង់ឱ្យពលរដ្ឋទាំងអស់ ផ្លាស់ប្តូរពីការធ្វើស្រែមកដាំដំណាំវិញ។ លោក ជូរ៉ា ឌីណា ពន្យល់ថា ការដាំដំណាំ ប្រើប្រាស់ទឹកអស់តិច ហើយគេអាចបង្វែរទាំងក្នុងបារាយណ៍ទៅធ្វើទឹកស្អាតវិញ ព្រោះតម្រូវការក្នុងទីក្រុងសៀមរាបបច្ចុប្បន្នមានការកើនឡើងខ្ពស់។ លោកបន្ថែមទៀតថា ការដាំដំណាំ ក្រៅពីប្រើទឹកអស់តិចហើយនោះ ក៏អាចលក់បានថ្លៃជាងទៀត ដូច្នេះលើកទឹកចិត្តឱ្យពលរដ្ឋ គួរងៀកទៅដាំដំណាំ និងបន្លែជំនួសវិញ។

សូមបញ្ជាក់ថា កាលពីថ្ងៃទី១ ខែកក្កដា ឆ្នាំ២០១៤ រាជរដ្ឋាភិបាលបានប្រគល់ការងារគ្រប់គ្រងទឹក និងទ្វារទឹកនៅបារាយណ៍ទឹកថ្លា (បារាយណ៍ខាងលិច) ជូនអាជ្ញាធរជាតិអប្សរា ដោយត្រូវទទួលខុសត្រូវទាំងស្រុងលើតម្រូវការទឹកសម្រាប់ស្រូវចំនួន១២០០០ហិកតា (ស្រូវវស្សា៨០០០ហិកតា ស្រូវប្រាំង៤០០០ហិកតា) និងដំណាំរួមផ្សំផ្សេងទៀតចំនួន១០០០ហិកតា និងធានាដោះស្រាយរាល់បញ្ហាគ្រោះទឹកជំនន់ និងភាពរាំងស្ងួត ដែលអាចកើតមានឡើងជាយថាហេតុ។ បន្ទាប់ពីបានទទួលគោលការណ៍នេះហើយ អាជ្ញាធរជាតិអប្សរាបានជួសជុល ស្តារឡើងវិញជាបន្ទាន់នូវទ្វារទឹក និងប្រព័ន្ធប្រឡាយនៃបារាយណ៍ខាងលិច ដែលការងារនេះ ធ្វើឲ្យប្រជាពលរដ្ឋមានទឹកគ្រប់គ្រាន់សម្រាប់ការបង្កបង្កើនផលបានគ្រប់រដូវ៕













នៅព្រឹកថ្ងៃទី៣១ ខែតុលា ឆ្នាំ២០១៨ នាសាលសន្និសីទអង្គរ នៃអាជ្ញាធរជាតិអប្សរា បានបើកវគ្គបណ្តុះបណ្តាលពីកិច្ចការពារ និងគ្រប់គ្រងរមណីយដ្ឋានអង្គរ បេតិកភណ្ឌពិភពលោក។ វគ្គបណ្តុះបណ្តាលនេះមានរយៈពេល៣ថ្ងៃ ចាប់ពីថ្ងៃទី៣១ តុលា ដល់ថ្ងៃទី២ វិច្ឆកា ឆ្នាំ២០១៨ រៀបចំឡើងក្នុងគោលបំណងបំពេញចំណេះដឹងបន្ថែមដល់បុគ្គលិកផ្នែកសណ្តាប់ធ្នាប់ចំនួន ៣៦នាក់ និងផ្នែកទេសចរណ៍ចំនួន ៦៤នាក់ដែលទើបចូលបម្រើការងារនៅអាជ្ញាធរជាតិអប្សរាឱ្យយល់ដឹងកាន់តែស៊ីជម្រៅ និងទូលំទូលាយបន្ថែមទៀតអំពីតម្លៃប្រវត្តិសាស្រ្តខ្មែរ ការងារអភិរក្ស និងអភិវឌ្ឍន៍ ក្នុងតំបន់ការពារបេតិកភណ្ឌ«អង្គរ»ទាំងមូល។
នៅរសៀលថ្ងៃទី២៦ ខែតុលា ឆ្នាំ ២០១៨ ប្រតិភូអាជ្ញាធរជាតិអប្សរា ដឹកនាំដោយលោក ជុំ សុភមករា អគ្គនាយករងអាជ្ញាធរជាតិអប្សរា ព្រមទាំងថ្នាក់ដឹកនាំ និងមន្រ្តីមួយចំនួន បានអញ្ជើញគោរពវិញ្ញាណក្ខន្ធសពឯកឧត្តម ឧត្តមសេនីយ៍ឯក ជា ម៉ន នៅគេហដ្ឋានឯកឧត្តម ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប។
គណៈប្រតិភូក្រសួងវប្បធម៌ និងវិចិត្រសិល្បៈ ដឹកនាំដោយលោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានអាជ្ញាធរជាតិអប្សរា រួមដំណើរដោយថ្នាក់ដឹកនាំនៃអាជ្ញាធរជាតិអប្សរា អញ្ជើញចូលរួមក្នុងសិក្ខាស្ដីពីលទ្ធផលគម្រោងអភិរក្ស និងជួសជុលប្រាសាទព្រះពិធូរ នៅថ្ងៃទី២៦ ខែតុលា ឆ្នាំ២០១៨ នាទីក្រុងសេអ៊ូល សាធារណរដ្ឋកូរ៉េ។ សិក្ខាសាលានេះរៀបចំឡើងដោយមូលនិធិបេតិកភណ្ឌវប្បធម៌កូរ៉េ Korea Cultural Heritage Foundation និងមានការអញ្ជើញចូលរួមជាកិត្តិយសដោយឯកឧត្តម ឡុង ឌីម៉ង់ ឯកអគ្គរាជទូតព្រះរាជាណាចក្រកម្ពុជាប្រចាំសាធារណរដ្ឋកូរ៉េ តំណាងទីភ្នាក់ងារអភិវឌ្ឍន៍អន្តរជាតិកូរ៉េ KOICA និងរដ្ឋបាលគ្រប់គ្រងបេតិកភណ្ឌវប្បធម៌កូរ៉េ។

ថ្លែងក្នុងពិធីបើកសិក្ខាសាលាខាងលើ លោក Jin OK-Sub ប្រធានមូលនិធិបេតិកភណ្ឌវប្បធម៌កូរ៉េ បានសម្ដែងនូវអារម្មណ៍សប្បាយរីករាយក្រៃលែង និងស្វាគមន៍យ៉ាងកក់ក្ដៅចំពោះគណៈប្រតិភូកម្ពុជាទាំងអស់ដែលបានចំណាយពេលចូលរួមក្នុងសិក្ខាសាលាដ៏មានសារសំខាន់នេះ។ ការចូលរួមនេះគឺបង្ហាញពីការយកចិត្តទុកដាក់នៃស្ថាប័នជំនាញពាក់ព័ន្ធក្នុងកិច្ចការងារបេតិកភណ្ឌ លើកិច្ចសហប្រតិបត្តិការរវាងកម្ពុជា និងកូរ៉េ។

ទាក់ទងនឹងការងារអភិរក្ស និងជួសជុលប្រាសាទនេះដែរ ប្រធានមូលនិធិបេតិកភណ្ឌវប្បធម៌កូរ៉េ បានឱ្យដឹងទៀតថា អ្វីដែលជាមោទនភាពបំផុតរបស់កូរ៉េ គឺបានចូលរួមជួយស្ដារឡើងវិញនៃភាពល្បីល្បាញរបស់បេតិកភណ្ឌកម្ពុជា ដែលជាបេតិកភណ្ឌមនុស្សជាតិ និងជួយជំរុញការផ្សព្វផ្សាយការយល់ដឹងលើការងារនេះដល់ប្រជាជនកូរ៉េផងដែរ។

ថ្លែងក្នុងពិធីនោះដែរ លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា បានសម្ដែងនូវការអរគុណដល់ស្ថាប័នសំខាន់ៗមួយចំនួនដូចជា មូលនិធិបេតិកភណ្ឌវប្បធម៌កូរ៉េ ទីភ្នាក់ងារអភិវឌ្ឍន៍អន្តរជាតិកូរ៉េ KOICA រដ្ឋបាលគ្រប់គ្រងបេតិកភណ្ឌវប្បធម៌កូរ៉េ ដែលបានផ្តល់កិច្ចសហប្រតិបត្តិការទាំងផ្នែកបច្ចេកទេស និងថវិកា ក្នុងកិច្ចសហប្រតិបត្តិការអភិរក្ស និងជួសជុលប្រាសាទព្រះពិធូរនាពេលកន្លងមក។ ជាពិសេសទៅទៀតនោះ កិច្ចសហប្រតិបត្តិការរវាងមូលនិធិបេតិកភណ្ឌវប្បធម៌កូរ៉េនិងអាជ្ញាធរជាតិអប្សរាបានបង្កើតនូវសមិទ្ធផលយ៉ាងល្អប្រសើ ហើយតែងតែទទួលបានការគាំទ្រនិងកោតសរសើរពីសំណាក់គណៈកម្មាធិការអាយសីុសីុ-អង្គរ។ ដូច្នេះរាល់សមិទ្ធផលទាំងនេះគឺជាការលើកទឹកចិត្តដ៏ខ្លាំងក្លាដល់គ្រប់ផ្នែកពាក់ព័ន្ធទាំងអស់។

ជាការចែករំលែកចំណេះដឹង អង្គសិក្ខាសាលាក៏មានការធ្វើបទបង្ហាញគន្លឹះចំនួនពីរដោយថ្នាក់ដឹកនាំនៃអាជ្ញាធរជាតិអប្សរាលើប្រធានបទលើការគ្រប់គ្រងទឹក និងការអភិវឌ្ឍវិស័យទេសចរណ៍នៅរមណីយដ្ឋានអង្គរ។ ក្នុងនោះដែរ អ្នកជំនាញអន្តរជាតិដែលបានចូលរួមធ្វើការស្រាវជ្រាវនៅក្រុមប្រាសាទព្រះពិធូរក៏បានធ្វើបង្ហាញលើប្រធានបទសំខាន់ៗដូចជា បុរាណវិទ្យា ស្ថាបត្យកម្ម ប្រវត្តិសិល្បៈ និងការអភិរក្ស។ល។

គួររំឭកដែរថា មូលនិធិបេតិកភណ្ឌវប្បធម៌កូរ៉េ បានចាប់ផ្តើមគម្រោងជួសជុលអភិរក្សក្រុមប្រាសាទព្រះពិធូរ កាលពីឆ្នាំ២០១៥ និងបញ្ចប់ជំហានដំបូងនៅចុងឆ្នាំ២០១៨ និងបានបណ្តុះបណ្តាលជំនាញផ្សេងៗដល់អ្នកជំនាញខ្មែរទាំងក្នុងនិងក្រៅប្រទេសនាពេលកន្លងមកដើម្បីចែករំលែកនូវបទពិសោធន៍ល្អៗទាំងលើកិច្ចការអភិរក្សនិងការគ្រប់គ្រងរមណីយដ្ឋានបេតិកភណ្ឌពិភពលោក៕


























ប្រសាសន៍លោកជំទាវប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
5
ថ្ងៃនេះ
:
6814
ម្សិលមិញ
:
25107
សប្តាហ៍នេះ
:
48003
ខែនេះ
:
0124751
សរុប
:
007523253