ព័ត៌មានថ្មីៗ

លោកជំទាវ ម៉ែន សំអន អំពាវនាវឱ្យពលរដ្ឋនិងវិស័យឯកជន «កុំឱ្យវិស័យទេសចរណ៍ បំពានលើវប្បធម៌ ត្រូវយកវប្បធម៌ ដើម្បីពង្រីកវិស័យទេសចរណ៍»

បានផ្សាយនៅ ថ្ងៃទី 12 ខែ កុម្ភៈ ឆ្នាំ2018 10:56 AM ដោយ ៖ អាជ្ញាធរជាតិអប្សរា

ក្នុងពិធីបិទសន្និបាតបូកសរុបការងារឆ្នាំ២០១៧ និងលើកទិសដៅការងារសម្រាប់ឆ្នាំ២០១៨ របស់ក្រសួងវប្បធម៌ និងវិចិត្រសិល្បៈ នារសៀលថ្ងៃទី៨ ខែកុម្ភៈ ឆ្នាំ២០១៨ នៅសាលសន្និសីទចតុមុខ លោកជំទាវ ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានថ្លែងអំពាវនាវដល់ប្រជាពលរដ្ឋនិងវិស័យឯកជន «កុំឱ្យវិស័យទេសចរណ៍ បំពានលើវប្បធម៌ ផ្ទុយទៅវិញត្រូវយកវប្បធម៌ ដើម្បីពង្រីកវិស័យទេសចរណ៍» ទើបធ្វើឱ្យវិស័យទេសចរណ៍មាននិរន្តរភាព​ «ធានាយ៉ាងណា កុំឱ្យវិស័យទេសចរណ៍បំពាន ទៅលើវប្បធម៌ ចំណុចនេះដែលយើងតែងតែរំឭកដាស់តឿនថា បេតិកភណ្ឌពិភពលោកដូចជា ប្រាសាទអង្គរ ប្រាសាទព្រះវិហារ និងសំបូរព្រៃគុក មិនត្រូវបានបំពានណាមួយនោះទេ»។ ជាពិសេស តាមរយៈទេសចរណ៍បេតិកភណ្ឌ និងវប្បធម៌ដែលជាវិស័យកំពុងមានសន្ទុះយ៉ាងខ្លាំងក្លា ដោយបាននាំមកនូវចំណូលរាប់ពាន់លានដុល្លារទៅក្នុងចរន្តសេដ្ឋកិច្ចជាតិ។

លោកជំទាវ ម៉ែន សំអន បានបញ្ជាក់ថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន បានយកចិត្តទុកដាក់ខ្ពស់លើវិស័យវប្បធម៌ និងគិតគូរយ៉ាងច្បាស់លាស់ក្នុងការការពារ អភិរក្ស និងអភិវឌ្ឍបេតិកភណ្ឌវប្បធម៌ជាតិ ប្រកបដោយចីរភាព ដោយឈរលើគោលការណ៍ «អភិរក្សដើម្បីអភិវឌ្ឍ និងអភិវឌ្ឍលើមូលដ្ឋានអភិរក្ស» សំដៅទាញយកប្រយោជន៍សមស្របសម្រាប់ការអភិវឌ្ឍប្រទេសជាតិ និងផ្ទេរមរតកដ៏មានតម្លៃនេះដល់យុវជនជំនាន់ក្រោយៗទៀត។

ជាក់ស្តែងចេញតាមរយៈកិច្ចខិតខំប្រឹងប្រែងជាប់មិនដាច់ និងការដាក់ចេញនូវគោលនយោបាយផ្សេងៗ រាជរដ្ឋាភិបាលកម្ពុជាទទួលបានសមិទ្ធផលយ៉ាងច្រើន ជាបន្តបន្ទាប់នាពេលកន្លងមក និងបានប្រែក្លាយកម្ពុជាដែលគេធ្លាប់ស្គាល់ថា ជាវាលពិឃាតមកជាព្រះរាជាណាចក្រនៃវប្បធម៌ ជាតួអង្គមួយដ៏លេចធ្លោនៅលើវេទិកាបេតិកភណ្ឌពិភពលោក និងធ្លាប់ទទួលបានជោគជ័យជាច្រើនលើករួចមកហើយ ក្នុងការស្នើសុំដាក់បញ្ចូលបេតិកភណ្ឌវប្បធម៌ជាតិទាំងរូបី និងអរូបីទៅក្នុងបញ្ជីបេតិកភណ្ឌពិភពលោក របស់អង្គការយូណេស្កូមានដូចជា៖ រមណីយដ្ឋានអង្គរ របាំព្រះរាជទ្រព្យ ឬរបាំក្បាច់បុរាណខ្មែរ ល្ខោនស្រមោលស្បែកធំ ប្រាសាទព្រះវិហារ ល្បែងទាញព្រ័ត្រ ចាប៉ីដងវែង និងថ្មីៗនេះតំបន់ប្រាសាទសំបូរព្រៃគុក។

អាជ្ញាធរជាតិអប្សរាដែលមានតួនាទីថែរក្សា ការពារអភិរក្សតំបន់អង្គរ បានប្រែក្លាយមរតកបេតិកភណ្ឌពិភពលោកប្រឈមនឹងគ្រោះថ្នាក់មួយនេះ ទៅជារមណីយដ្ឋានបេតិកភណ្ឌពេញលេញនិងធ្វើឱ្យអង្គរក្លាយជាចំណុចស្នូលក្នុងការទាក់ទាញភ្ញៀវទេចរឱ្យចូលមកកម្សាន្តទស្សនាជាច្រើនម៉ឺននាក់ក្នុងមួយឆ្នាំៗ ។

ម្យ៉ាងទៀត តម្លៃជាសាកលរបស់តំបន់បេតិកភណ្ឌអង្គរក្តី ព្រះវិហារ សម្បូរព្រៃគុកក្តី គឺជាល្បាយបញ្ចូលគ្នារវាងស្នាដៃឯករបស់បុព្វបុរសខ្មែរ ជាសំណង់ប្រាសាទដ៏វិសេសវិសាល រួមទាំងប្រពៃណីរបស់អ្នកស្រុក ជាមួយនឹងបរិស្ថានជុំវិញប្រាសាទ ជាចំណុចធ្វើឱ្យតំបន់បេតិកភណ្ឌទាំងនេះមានការទាក់ទាញបំផុតសម្រាប់ទេសចរ និងធ្វើឱ្យអង្គរបានក្លាយជាគោលដៅទេសចរណ៍ទី១ដល់ទៅ៣ឆ្នាំជាប់គ្នាតាមការបោះឆ្នោតជាសាកលពីសំណាក់ភ្ញៀវទេសចរណ៍លើពិភពលោក។ ភាពរីករចម្រើននិងការអភិវឌ្ឍនៅក្នុងតំបន់បុរាណដ្ឋានដ៏ល្បីល្បាញនេះ ឱ្យក្លាយជាប្រភពសេដ្ឋកិច្ចចូលជាតិដ៏សំខាន់៕
















គម្រោងអភិវឌ្ឍន៍ភូមិធម្មជាតិរុនតាឯក បានផ្តោតសំខាន់លើការអភិវឌ្ឍកសិកម្មដោយធម្មជាតិ មិនប្រើប្រាស់សារធាតុគីមី។ ដើម្បីជំរុញគម្រោងនេះឲ្យដំណើរការទៅដោយរលូន អាជ្ញាធរជាតិអប្សរាបានសហការជាមួយស្ថាប័នបរទេសមួយចំនួន ដែលមានជំនាញលើការងារកសិកម្មធម្មជាតិ។
ភ្នាក់ងារទេសចរដែលបំពេញការងារនៅតាមប្រាសាទក្នុងរមណីយដ្ឋានអង្គរចំនួន៤០នាក់ បានទទួលការបណ្តុះបណ្តាលវគ្គសង្គ្រោះបឋមពីអង្គការ NPO Srolanh Project បង្រៀនដោយអ្នកជំនាញជប៉ុន៩រូប។
សិក្ខាកាម២២រូប នៃក្រសួងវប្បធម៌និងវិចិត្រសិល្បៈ ជាមន្ត្រីជំនាញមកពីអាជ្ញាធរជាតិអប្សរា នាយកដ្ឋានគាំពារនិងអភិរក្សសំណង់បុរាណ អាជ្ញាធរជាតិព្រះវិហារ និងអាជ្ញាធរជាតិសំបូរព្រៃគុក បានបញ្ចប់វគ្គសិក្សាអំពី ការរៀបចំផែនការមេនៃសំណង់ប្រាសាទបុរាណក្នុងតំបន់អង្គរ កាលពីថ្ងៃទី៩ ខែកុម្ភៈ ឆ្នាំ២០១៨។
មន្ត្រីជំនាញផ្នែកគ្រប់គ្រងទេសចរណ៍ក្នុងតំបន់បេតិកភណ្ឌ ដែលមកពីបណ្តាប្រទេសផ្សេងៗចំនួន១៧ ក្នុងកិច្ចប្រជុំស្តីពី និរន្តរភាព និងការគ្រប់គ្រងទេសចរណ៍ក្នុងរមណីយដ្ឋានបុរាណវិទ្យា និងបេតិកភណ្ឌ បានបង្ហាញការយល់ឃើញផ្សេងៗគ្នាលើដំណើរការគ្រប់គ្រងរមណីយដ្ឋានអង្គរ ក្រោយពីបានស្តាប់បទបង្ហាញ ពិភាក្សាផ្លាស់ប្តូរយោបល់ និងចុះបំពេញទស្សនកិច្ចសិក្សានៅទីតាំងសំខាន់ៗមួយចំនួននៃរមណីយដ្ឋានអង្គរ។
តំបន់រមណីយដ្ឋានអង្គរ ជាតំបន់បេតិកភណ្ឌរស់ដែល សម្បូរទៅដោយមរតកអរូបីជាច្រើន ហើយត្រូវបានអ្នកស្រុកអង្គរបន្តប្រតិបត្តិយ៉ាងខ្ជាប់ខ្ជួនរហូតមកដល់បច្ចុប្បន្ន។ ពិធីបុណ្យឡើងមាឃឬបុណ្យឡើងអ្នកតា ក៏ជាទំនៀមទម្លាប់ប្រពៃណីមួយក្នុងចំណោមបេតិកភណ្ឌអរូបីជាច្រើនប្រតិបត្តិដោយអ្នកស្រុកអង្គរ។

ប្រសាសន៍លោកជំទាវប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
15
ថ្ងៃនេះ
:
5499
ម្សិលមិញ
:
6854
សប្តាហ៍នេះ
:
35844
ខែនេះ
:
0205290
សរុប
:
004745888