ព័ត៌មានថ្មីៗ

អាជ្ញាធរជាតិអប្សរា ៖ ស្វែងយល់ពីរបៀបជួសជុលបំណែកកុលាលភាជន៍ខ្មែរបុរាណ

បានផ្សាយនៅ ថ្ងៃទី 09 ខែ មករា ឆ្នាំ2018 12:48 PM ដោយ ៖ អាជ្ញាធរជាតិអប្សរា

សម្ភារៈប្រើប្រាស់បុរាណដែលបុព្វបុរសបានផលិតឡើងពីដីដុតដូចជា ក្អម ខួច ចាន ពែង ជាដើម ត្រូវបានអ្នកស្រាវជ្រាវកំណត់ឈ្មោះជារួមថា កុលាលភាជន៍ (Ceramic)។ រយៈពេលជាង២០ឆ្នាំនៃការធ្វើកំណាយ អ្នកស្រាវជ្រាវនៃអាជ្ញាធរជាតិអប្សរា និងដៃគូបរទេសបានរកឃើញនិងប្រមូលបំណែកកុលាលភាជន៍បានជាង៩ម៉ឺនបំណែក យកមករក្សាទុកក្នុងអង្គភាពកុលាលភាជន៍អង្គរនៃអាជ្ញាធរជាតិអប្សរា។

បច្ចុប្បន្ន ក្រុមការងារនៃអង្គភាពកុលាលភាជន៍អង្គរកំពុងធ្វើការចុះបញ្ជី និងជួសជុលនូវបំណែកធំៗ ដើម្បីឲ្យលេចចេញជារូបរាងដើមនៃកុលាលភាជន៍បុរាណឡើងវិញ។ រហូតមកទល់ពេលនេះ អ្នកជំនាញសម្រេចការជួសជុលបានចំនួន១៩កុលាលភាជន៍ និងកំពុងបន្តជួសជុលនូវបំណែកផ្សេងៗទៀត។

លោក ធី សេរីវុឌ្ឍ មន្ត្រីជំនាញផ្នែកបុរាណវិទ្យា និងទទួលបានការបណ្តុះបណ្តាលបន្ថែមលើការជួសជុលកុលាលភាជន៍បុរាណ ដែលកំពុងបំពេញការងារផ្នែកជួសជុលនៅក្នុងអង្គភាពនេះបានបញ្ជាក់ថា ការងារជួសជុលកុលាលភាជន៍បុរាណត្រូវធ្វើឡើងជា៥ដំណាក់កាល គឺ ការសម្អាត ការតភ្ជាប់ ការបំពេញចន្លោះដោយម្នាងសិលា ការលាបថ្នាំ និងការចុះលេខបញ្ជី។

លោក សេរីវុឌ្ឍ ពន្យល់បន្តថា ដំណាក់កាលទី១ ជាដំណាក់កាលសម្អាតកម្ចាត់សារធាតុអំបិលដែលតោងស្អិតនៅជាប់កុលាភាជន៍ចេញ ដោយយកកុលាលភាជន៍ទៅត្រាំទឹកស្អាត។ ដំណាក់កាលទី២ គឺពង្រឹងមុខកាត់ដែលបែក រួចយកបំណែកកុលាភាជន៍ទាំងនោះមកផ្គុំបញ្ចូលគ្នាដើម្បីរកបំណែកដែលបាត់ ឬខូចខាត។ ដំណាក់កាលទី៣ គឺ ត្រូវប្រើប្រាស់ម្នាងសិលាយកមកបិទបំពេញចន្លោះ ក្នុងករណីដែលបំណែកកុលាភាជន៍មានការបាត់បង់ត្រង់ចំណុចរឹងមាំ។ ដំណាក់កាលទី៤ គឺលាបពណ៌លើម្នាងសិលាដើម្បីអោយពណ៌ស៊ីគ្នានឹងកុលាលភាជន៍។ ដំណាក់កាលទី៥ ដែលជាដំណាក់កាលចុងក្រោយ គឺ អ្នកអភិរក្សត្រូវចុះបញ្ជីសារពើភណ្ឌទៅក្នុងប្រព័ន្ធទិន្នន័យ ស្តីពីប្រវត្តិនៃការជួសជុលកុលាលភាជន៍នីមួយៗដើម្បីទុកជាឯកសារ។

កុលាលភាជន៍ដែលបានជួសជុលហើយ នឹងត្រូវយកទៅដាក់តាំងបង្ហាញជូនសាធារណជនចូលទស្សនា នៅសារមន្ទីរព្រះនរោត្តម សីហនុ-អង្គរ។ តាមរយៈពិព័រណ៍នេះ នឹងជួយឲ្យសាធារណជនបានយល់ដឹងអំពីតម្លៃបេតិកភណ្ឌ បណ្តុះចិត្តគំនិតស្រឡាញ់ និងចូលរួមថែរក្សាការពារទាំងអស់គ្នា៕






















គម្រោងជួសជុលស្ពានហាលខាងលិចនៃប្រាសាទអង្គរវត្ត បានបើកការដ្ឋានជាផ្លូវការកាលពីថ្ងៃទី៩ ខែឧសភា ឆ្នាំ២០១៦ ដោយគ្រោងនឹងចំណាយពេល៤ឆ្នាំដើម្បីឲ្យរួចរាល់។ នេះជាគម្រោងសហការជំហានទី២រវាងអាជ្ញាធរជាតិអប្សរា និងសាកលវិទ្យាល័យសូហ្វីយ៉ានៃប្រទេសជប៉ុន បន្ទាប់ពីដំណាក់កាលទី១នៃគម្រោងសហការដែលបានជួសជុលស្ពានហាលនេះប្រវែង ១០០ម៉ែត្រ រួចរាល់ជាស្ថាពរ(១៩៩៦-២០០៧)។
ក្រៅពីការងារអភិរក្ស និងអភិវឌ្ឍន៍ អាជ្ញាធរជាតិអប្សរាបានយកចិត្តទុកដាក់លើសុខុមាលភាពរបស់ប្រជាពលរដ្ឋក្នុងរមណីយដ្ឋានអង្គរជាប្រចាំ ក្នុងគម្រោងលើកស្ទួយកម្រិតជីវភាពប្រជាពលរដ្ឋ តាមរយៈក្រុមការងារសហគមន៍ ដែលតែងចុះដល់លំនៅឋានរបស់ប្រជាពលរដ្ឋគ្រប់តំបន់ទាំងអស់។
បន្ទាប់ពីធ្វើសវនកម្មផ្ទៃក្នុងលើប្រព័ន្ធគ្រប់គ្រងបរិស្ថាន-អង្គរនៅក្នុងស្ថាប័នអាជ្ញាធរជាតិអប្សរារយៈពេល៣ថ្ងៃ គឺចាប់ពីថ្ងៃទី២៦ ខែធ្នូ ឆ្នាំ២០១៧ ពេលនេះបានបិទបញ្ចប់ហើយនៅល្ងាចថ្ងៃទី២៨ ខែធ្នូ ឆ្នាំ២០១៧ ក្រោមអធិបតីភាពឯកឧត្តម សុខ លក្ខិណា ប្រធានអង្គភាពប្រព័ន្ធគ្រប់គ្រងបរិស្ថាន-អង្គរ តំណាងឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរា។
ដើមឈើជាច្រើនដើម ដុះនៅជុំវិញប្រាសាទអង្គរវត្ត ត្រូវបាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរា ធ្វើការកាត់ក្រីឱ្យស្រឡះ និងបង្ហាញនូវសម្រស់របស់ប្រាសាទកាន់តែមានភាពត្រកាល។
នៅស្នាក់ការអាជ្ញាធរជាតិអប្សរានារសៀលថ្ងៃទី ២៦ ខែធ្នូ ឆ្នាំ២០១៧ មានជំនួបពិភាក្សាការងាររវាង អាជ្ញាធរជាតិអប្សរា និងគណៈប្រតិភូខេត្ត យូណាន ដើម្បីស្វែងយល់ និងសហប្រតិបត្តិការលើការងារអភិរក្ស និងជួសជុលប្រាសាទក្នុងរមណីយដ្ឋានអង្គរ។

ប្រសាសន៍លោកជំទាវប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
2
ថ្ងៃនេះ
:
1222
ម្សិលមិញ
:
4070
សប្តាហ៍នេះ
:
19862
ខែនេះ
:
0093185
សរុប
:
004456549