ព័ត៌មានថ្មីៗ

គម្រោងអភិរក្សក្រុមប្រាសាទព្រះពិធូរបើកសម្ពោធបន្ទប់ពិសោធន៍បម្រើដល់ការងារអភិរក្សជួសជុល

បានផ្សាយនៅ ថ្ងៃទី 07 ខែ វិច្ឆិកា ឆ្នាំ2017 02:30 PM ដោយ ៖ អាជ្ញាធរជាតិអប្សរា

ក្រោមកិច្ចសហការរវាងអាជ្ញាធរជាតិអប្សរា និងមូលនិធិការពារបេតិកភណ្ឌវប្បធម៌កូរ៉េ KCHF និង KOICA គម្រោងជួសជុលក្រុមប្រាសាទព្រះពិធូរបានបើកម្ពោធជាផ្លូវការនូវបន្ទប់ពិសោធន៍ ដែលផ្ទុកដោយឧបករណ៍វិទ្យាសាស្ត្រជាច្រើនបម្រើដល់ការងារអភិរក្សជួសជុលនៅក្នុងក្រុមប្រាសាទព្រះពិធូរ នាព្រឹកថ្ងៃទី៧ ខែវិច្ឆិកា ឆ្នាំ២០១៧នេះ។

ពិធីនេះប្រារព្ធឡើងក្រោមអធិបតីភាពឯកឧត្តម បណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរា លោក Jeong Jun Gil ប្រធានKOICAប្រចាំកម្ពុជា និងមានការអញ្ជើញចូលរួមពីសំណាក់ឯកឧត្តម អ៊ីម សួ អគ្គលេខាធិការរងគណៈកម្មាធិការនីតិសម្បទានិងអភិវឌ្ឍន៍កម្ពុជា ឯកឧត្តម Park Seung Yoo អគ្គកុងស៊ុលរបស់ស្ថានទូតកូរ៉េប្រចាំខេត្តសៀមរាប ព្រមមន្ត្រីបុគ្គលិកជាច្រើនរូបទៀត។

លោក Kim Jiseo អ្នកគ្រប់គ្រងគម្រោងជួសជុលនេះបញ្ជាក់ថា គម្រោងអភិរក្សជួសជុលក្រុមប្រាសាទប្រាសាទព្រះពិធូរមានរយៈពេល៤ឆ្នាំ ដោយចាប់ផ្តើមពីឆ្នាំ២០១៥ ដល់ឆ្នាំ២០១៨ ជាមួយនឹងទឹកប្រាក់ប្រមាណ៤លានដុល្លារ ដែលជាជំនួយឥតសំណងរបស់សាធារណរដ្ឋកូរ៉េ។ គម្រោងនេះមានការងារចម្បងៗចំនួន៥ដែលត្រូវអនុវត្តគឺ ការងារស្រាវជ្រាវចងក្រងឯកសារ ការបណ្តុះបណ្តាលមន្ត្រីអាជ្ញាធរជាតិអប្សរា ការជួសជុលរានហាលនៃប្រាសាទកោរសក់ រោងព័ត៌មាន និងបន្ទប់ពិសោធន៍នេះ។

ដោយឡែកបន្ទប់ពិសោធន៍នេះបំពាក់ដោយសម្ភារៈទំនើបៗដែលមិនធ្លាប់មាននៅកម្ពុជា មានដូចជា ឧបករណ៍ពិសោធន៍ភាពរឹងមាំរបស់ថ្ម UTM ម៉ាស៊ីនកាត់ថ្ម ម៉ាស៊ីនMicroscope និងឧបករណ៍វាស់ទឹកក្រោមដីជាដើម ដែលចំណាយថវិកាសរុបជាង១លានដុល្លារ និងដាក់ឲ្យដំណើរការចាប់ពីឆ្នាំ២០១៧នេះតទៅ។

ឯកឧត្តមបណ្ឌិត ស៊ុំ ម៉ាប់ បានបង្ហាញនូវមោទនភាពនៃទំនាក់ទំនងយ៉ាងរលូនរវាងអាជ្ញាធរជាតិអប្សរា និងសាធារណរដ្ឋកូរ៉េ ដែលឈានមកដល់ការសហការអភិរក្សជួសជុលក្រុមប្រាសាទព្រះពិធូររួមគ្នានៅពេលនេះ។ ឯកឧត្តមបញ្ជាក់ថា ពិធីសម្ពោធឲ្យប្រើប្រាស់ជាផ្លូវការនូវបន្ទប់ពិសោធន៍នៅពេលនេះ គឺជាសក្ខីភាពនៃដំណើរការយ៉ាងជោគជ័យជាបណ្តើរៗនៃគម្រោងជួសជុល។ ជាពិសេស ឯកឧត្តមក៏បានថ្លែងអំណរគុណចំពោះដៃគូគម្រោងដែលបានយកចិត្តទុកលើការងារបណ្តុះបណ្តាលសមត្ថភាពមន្ត្រីបុគ្គលិកអាជ្ញាធរជាតិអប្សរា ដែលជាកត្តាសំខាន់បំផុតសម្រាប់និរន្តរភាពនៃការងារគ្រប់គ្រងរមណីយដ្ឋានអង្គរទាំងបច្ចុប្បន្ន និងអនាគត៕












ព្រៃឈើមិនត្រឹមតែផ្តល់ផលប្រយោជន៍ខ្លាំងចំពោះមនុស្សនិងសត្វនោះទេ តែក៏មានប្រយោជន៍ចំពោះបេតិកភណ្ឌផងដែរព្រោះព្រៃឈើអាចធ្វើជារបាំងការពារខ្យល់បក់បោក ទប់ស្កាត់ការសឹករឹល ការហូរច្រោះនិងស្រូបទឹកក្រោមដីដើម្បីផ្តល់សំណើមដល់ប្រាង្គប្រាសាទ។
ប្រាសាទបាយ័នមានទីតាំងស្ថិតនៅចំកណ្តាលនៃក្រុងអង្គរធំ។ ប្រាសាទនេះកសាងឡើងនៅចុងសតវត្សរ៍ទី ១២ និងដើមសតវត្សរ៍ទី ១៣ ក្នុងរាជ្យព្រះបាទជ័យវរ្ម័នទី៧។ ដោយភាពមហិមានៃសំណង់ ទឹកមុខញញឹមនៃចម្លាក់មុខព្រហ្មនៃប្រាង្គប្រាសាទបាយ័ន រួមនឹងក្បូរក្បាច់រចនា និងចម្លាក់ពិពណ៌នានូវជីវភាពរបស់ប្រជាពលរដ្ឋនៅក្នុងសម័យនោះផង ប្រាសាទនេះបានក្លាយជាទីចាប់អារម្មណ៍យ៉ាងខ្លាំងពីសំណាក់ភ្ញៀវទេសចរគ្រប់ជាតិសាសន៍ដែលមកទស្សនាអង្គរ។
ក្រៅពីការងារអភិរក្សជួសជុលបេតិកភណ្ឌ ការអភិវឌ្ឍជីវភាពរស់នៅរបស់ប្រជាពលរដ្ឋនៅក្នុងឧទ្យានអង្គរឲ្យបានល្អប្រសើរ ក៏ជាភារកិច្ចដ៏សំខាន់មួយទៀតក្នុងឧទ្យានអង្គរ។ ក្នុងកិច្ចការនេះ អាជ្ញាធរជាតិអប្សរាបានចាប់ដៃគូជាមួយស្ថាប័នជាតិ និងអន្តរជាតិជាបន្តបន្ទាប់ ដើម្បីពង្រឹងកម្មវិធីអភិវឌ្ឍន៍សហគមន៍ក្នុងឧទ្យានអង្គរ ដូចជា ទេសចរណ៍ សិប្បកម្ម អប់រំសុខភាព និងអនាម័យជាដើម។
ប្រជាពលរដ្ឋជាង៣០០នាក់មកពី៤ឃុំសង្កាត់ នៅព្រឹកថ្ងៃទី២០ ខែវិច្ឆិកា ឆ្នាំ២០១៦នេះ បានចូលរួមជាមួយអាជ្ញាធរជាតិអប្សរា ធ្វើការសម្អាតប្រព័ន្ធប្រឡាយបង្ហូរទឹក ចេញពីបារាយណ៍ខាងលិច ដែលជាប្រភពទឹកដ៏សំខាន់ សម្រាប់ប្រជាសហគមន៍ចំនួន៩ឃុំសង្កាត់ក្នុងក្រុងសៀមរាប និងស្រុកពួកប្រើប្រាស់ក្នុងវិស័យកសិកម្ម។

ប្រសាសន៍លោកជំទាវប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
3
ថ្ងៃនេះ
:
1785
ម្សិលមិញ
:
2569
សប្តាហ៍នេះ
:
07538
ខែនេះ
:
0100697
សរុប
:
007691396