ព័ត៌មានថ្មីៗ

សិក្ខាកាម២៦រូបបញ្ចប់វគ្គបណ្តុះបណ្តាលស្តីពីវិជ្ជាសង្គ្រោះបឋមនៅអាជ្ញាធរជាតិអប្សរា

បានផ្សាយនៅ ថ្ងៃទី 31 ខែ សីហា ឆ្នាំ2017 01:56 PM ដោយ ៖ អាជ្ញាធរជាតិអប្សរា

សិក្ខាកាមចំនួន២៦រូប មកពីក្រសួងវប្បធម៌និងវិចិត្រសិល្បៈ អាជ្ញាធរជាតិអប្សរា អាជ្ញាធរជាតិព្រះវិហារ អាជ្ញាធរជាតិសម្បូរព្រៃគុក នគរបាលទេសចរណ៍ នគរបាលចរាចរណ៍ និងនគរបាលការពារបេតិកភណ្ឌ បានបញ្ចប់វគ្គបណ្តុះបណ្តាលខ្លីស្តីពីវិជ្ជាសង្គ្រោះបឋម កាលពីថ្ងៃទី៣០ ខែសីហា ឆ្នាំ២០១៧ នៅមជ្ឈមណ្ឌលអាជ្ញាធរជាតិអប្សរា។

ការបណ្តុះបណ្តាលនេះមានរយៈពេល៣ថ្ងៃ ចាប់ផ្តើមពីថ្ងៃទី២៨ ខែសីហា ឆ្នាំ២០១៧ រៀបចំដោយអាជ្ញាធរជាតិអប្សរា បង្រៀនដោយសាខាកាកបាទក្រហមកម្ពុជាខេត្តសៀមរាប។ វគ្គសិក្សានេះបានផ្តោតសំខាន់លើជំនាញសង្គ្រោះបឋមដូចជា គោលការណ៍គ្រឹះនៃការសង្គ្រោះបឋម ការដាក់ស្ថានភាពដំណេក ភាពស្ហុក សន្លប់បាត់ស្មារតី បាត់ដង្ហើម-គាំងបេះដូង (CPR) ស្លាក់ លង់ទឹក ឆក់ចរន្តអគ្គិសនី រន្ទះបាញ់ ការពុល ការរលាក ការហូរឈាម របួស ការបាក់ឆ្អឹង ការលើកដាក់និងបញ្ជូនជនរងគ្រោះ និងការអនុវត្តផ្ទាល់លើទ្រឹស្តី។

លោក លីវ ឡន គ្រូឧទ្ទេសនៃវគ្គសិក្សាបានលើកឡើងថា ការរៀនវិជ្ជាសង្គ្រោះបឋមត្រឹមតែ៣ថ្ងៃ គ្រាន់តែចេះនិងដឹង តែអ្វីដែលជាក់ស្តែងមានប្រសិទ្ធិភាព គឺការជួយសង្គ្រោះជនរងគ្រោះផ្ទាល់ ហេតុនេះសុំឱ្យសិក្ខាកាមទាំងអស់តាំងចិត្តថា ការសង្គ្រោះមនុស្សជាការធ្វើបុណ្យ កុំខ្លាច ត្រូវអត់ធ្មត់ កុំរើសអើង ឬស្អប់ខ្ពើមជនរងគ្រោះ។ រឿងត្រូវចងចាំ គឺមិនត្រូវផ្តល់ថ្នាំពេទ្យសម្រាប់ការសង្គ្រោះបឋមឡើយ ហើយត្រូវយកចិត្តទុកដាក់លើការពិនិត្យ ព្រោះបើពិនិត្យខុស សន្និដ្ឋានខុស សង្គ្រោះក៏ខុសដែរ ដែលនាំឱ្យជនរងគ្រោះអាចបាត់បង់ជីវិតបាន។ លោកក៏សប្បាយចិត្តផងដែរដែលឃើញសិក្ខាកាមទាំងអស់យកចិត្តទុកដាក់ខ្លាំងក្នុងការរៀនសូត្រ ហើយសង្ឃឹមថា ចំណេះដឹងដែលទទួលបានក្នុងពេលនេះ ផ្សំនឹងបទពិសោធន៍កន្លងមក នឹងក្លាយជាប្រយោជន៍ធ្វើឱ្យការអនុវត្តន៍ការងារប្រចាំថ្ងៃបានទទួលលទ្ធផលល្អប្រសើរ។

លោក វុធ ជា អនុប្រធានភ្នាក់ងារប្រាសាទភ្នំបាខែងបានចាប់អារម្មណ៍ថា វគ្គបណ្តុះបណ្តាលសង្គ្រោះបឋមនេះ ថ្វីត្បិតតែមានរយៈពេលខ្លី តែវាមានសារៈសំខាន់ណាស់សម្រាប់ចូលរួមជួយដល់សហគមន៍មូលដ្ឋាន និងភ្ញៀវទេសចរដែលយើងធ្វើការជាមួយគាត់។ ពីមុនយើងជួបប្រទះបញ្ហាជាច្រើនចំពោះភ្ញៀវ ហើយដោះស្រាយតាមអ្វីដែលយើងធ្លាប់ដឹងមក តែក្រោយពីទទួលបានការបណ្តុះបណ្តាលនេះ ខ្ញុំបានយល់ច្បាស់ពីការសង្គ្រោះបឋម មានការរុំរបួស ការឃាត់ឈាម ការលើកដាក់ភ្ញៀវឱ្យមានសុវត្ថិភាពបានល្អប្រសើរជាងមុនប្រកបដោយប្រសិទ្ធិភាពនិងអាចទទួលយកបាន។ សិក្ខាកាមរូបនេះក៏សូមសំណូមពរសូមឱ្យអាជ្ញាធរជាតិអប្សរាបង្កើតវគ្គសិក្សានេះឱ្យបានច្រើន និងបានគ្រប់អ្នកពាក់ព័ន្ធទាំងអស់ ពិសេសបើពង្រីកដល់សហគមន៍ទៀតកាន់តែល្អ ដើម្បីឱ្យប្រជាជនមានសមត្ថភាពអាចជួយខ្លួនឯង គ្រួសារ និងអ្នកដទៃបានទាន់ពេលនិងត្រឹមត្រូវ។

ថ្លែងក្នុងពិធីបិទវគ្គនេះ ឯកឧត្តម សុខ សង្វារ អគ្គនាយករងតំណាងឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរាបានសម្តែងការអរគុណយ៉ាងជ្រាលជ្រៅចំពោះការខិតខំប្រឹងប្រែងបង្រៀនយ៉ាងយកចិត្តទុកដាក់ដល់សិក្ខាកាមទាំងអស់របស់លោកគ្រូអ្នកគ្រូជំនាញសង្គ្រោះបឋមមកពីសាខាកាកបាទក្រហមខេត្តសៀមរាប។ ឯកឧត្តមបន្តទៀតថា ការសង្គ្រោះបឋមជាចំណេះដឹងមូលដ្ឋានដែលត្រូវដឹងគ្រប់គ្នា ហើយមានសារៈសំខាន់ណាស់សម្រាប់វិស័យទេសចរណ៍ ដែលបុគ្គលិកបម្រើការងារគ្រប់រូបត្រូវចេះ ដើម្បីជួយសង្គ្រោះដល់ភ្ញៀវដែលមកទស្សនាតំបន់ទេសចរណ៍នៅកម្ពុជាទទួលបានភាពកក់ក្តៅនិងសុខសុវត្ថិភាព។ ជាទិសដៅទៅអនាគតផងដែរ អាជ្ញាធរជាតិអប្សរា ពិសេសនាយកដ្ឋានអភិវឌ្ឍន៍ទេសចរណ៍នឹងបង្កើតឱ្យមានវគ្គសិក្សានេះបន្តទៀតឱ្យបានទូលំទូលាយជាងមុនដើម្បីបង្កើនចំណេះដឹងផ្នែកសង្គ្រោះបឋមដល់មន្ត្រី-បុគ្គលិកឱ្យអនុវត្តន៍ការងារបានល្អប្រសើរ ថែមទាំងមានប្រសិទ្ធិភាពពេលត្រូវការ៕
























កិច្ចប្រជុំបច្ចេកទេសលើកទី៣០នៃគណៈកម្មាធិការអន្តរជាតិដើម្បីសម្របសម្រួលកិច្ចគាំពារនិងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា អាយស៊ីស៊ី-អង្គរ (International Coordinating Committee for the Safeguarding and Development of Historic Site of Angkor : ICC-Angkor) បានបញ្ចប់ដោយជោគជ័យនៅរសៀលថ្ងៃទី០៦ ខែមិថុនា ឆ្នាំ២០១៨ នាសាលសន្និសីទអង្គរនៃមជ្ឈមណ្ឌលអាជ្ញាធរជាតិអប្សរា។
អស់រយៈពេល២៥ឆ្នាំមកហើយ ដែលរមណីយដ្ឋានអង្គរត្រូវបានចុះក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ។ ក្នុងរយៈពេល២៥ឆ្នាំនេះ ពិភពលោកទាំងមូលមានភាពរំជើបរំជួលចំពោះសំណង់ស្ថាបត្យកម្មនៃប្រាសាទអង្គរវត្ត ហើយពីមួយឆ្នាំទៅមួយឆ្នាំ ភ្ញៀវទេសចរកាន់តែច្រើនបានមកទស្សនារមណីយដ្ឋានអង្គរ។
កម្មវិធីបណ្ដុះគំនិតកុមារថែរក្សាបរិស្ថានអង្គរ ជាកម្មវិធីសម្រាប់អប់រំកុមារតូចឱ្យយល់ដឹងពីការថែរក្សាបរិស្ថានក្នុងរមណីយដ្ឋានអង្គរ។ កម្មវិធីនេះត្រូវបានបង្កើតឡើងដោយស្ថាប័នធានាគុណភាពជប៉ុន (Japan Quality Assurance Organization= JQA) សហការជាមួយអាជ្ញាធរជាតិអប្សរា និងមន្ទីរអប់រំ យុវជន និងកីឡា ខេត្តសៀមរាប។ គោលបំណងនៃកម្មវិធីអប់រំនេះ គឺដើម្បីបណ្ដុះគំនិតកុមារទៅលើការថែរក្សាបរិស្ថាន ជំរុញឱ្យការគ្រប់គ្រងបរិស្ថានអង្គរមាននិរន្ដរភាពជានិរន្ដន៍។
គណៈកម្មាធិការអន្តរជាតិដើម្បីសម្របសម្រួលកិច្ចគាំពារនិងអភិវឌ្ឍន៍រមណីយដ្ឋានប្រវត្តិសាស្ត្រអង្គរហៅកាត់ថា អាយស៊ីស៊ី-អង្គរ (International Coordination Committee for the Safeguarding and Development of Historic Site of Angkor : ICC-Angkor) នឹងបើកកិច្ចប្រជុំបច្ចេកទេសលើកទី៣០របស់ខ្លួន នៅថ្ងៃទី០៥និងទី០៦ ខែមិថុនា ឆ្នាំ២០១៨ នាសាលសន្និសីទអង្គរ នៅមជ្ឈមណ្ឌលអាជ្ញាធរជាតិអប្សរា។
ក្រុមប្រឹក្សាកុមារនិងយុវជនចំនួន៤០០នាក់ ជាបន្តបន្ទាប់បានមកទស្សនាស្វែងយល់អំពីអង្គរនៅក្នុងខែឧសភា ឆ្នាំ២០១៨ ដើម្បីទទួលបានការអប់រំបណ្តុះបណ្តាល និងស្វែងយល់អំពីប្រវត្តិសាស្រ្ត វប្បធម៌ និងបេតិកភណ្ឌអង្គរ។ ដំណើរទស្សនកិច្ចសិក្សានេះបានរៀបចំដោយនាយកដ្ឋានយុវជននៃក្រសួងអប់រំ យុវជននិងកីឡា ដោយសហការជាមួយអាជ្ញាធរជាតិអប្សរាដើម្បីបង្ហាត់បង្ហាញដល់កុមារនិងយុវជន ទាំងនៅមជ្ឈមណ្ឌលជាតិយុវជនខេត្តសៀមរាបនិងនៅតាមប្រាសាទនានាក្នុងរមណីយដ្ឋានអង្គរ។

ប្រសាសន៍លោកជំទាវប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
4
ថ្ងៃនេះ
:
0659
ម្សិលមិញ
:
8554
សប្តាហ៍នេះ
:
09213
ខែនេះ
:
0150544
សរុប
:
005787850