ព័ត៌មានថ្មីៗ

លោកសាស្ត្រាចារ្យ Yoshiaki Ishizawa ជាងពាក់កណ្តាលជីវិតដើម្បីការងារអភិរក្សអង្គរ

បានផ្សាយនៅ ថ្ងៃទី 04 ខែ សីហា ឆ្នាំ2017 10:31 AM ដោយ ៖ អាជ្ញាធរជាតិអប្សរា

លោកសាស្ត្រាចារ្យ យ៉ូស៊ីអាគី អ៊ីស៊ីសាវ៉ា (Yoshiaki Ishizawa) កើតនៅឆ្នាំ១៩៣៧ នៅទីក្រុង Obihiro កោះ Hokkaido។ គាត់គឺជា អតីតសាកលវិទ្យាធិការនៃសាកលវិទ្យាល័យ សូហ្វីយ៉ា (Sophia) ប្រទេសជប៉ុន និងជាប្រធានមជ្ឈមណ្ឌលអាស៊ីសិក្សា និងបណ្តុះបណ្តាលធនធានមនុស្សនៃសាកលវិទ្យាល័យសូហ្វីយ៉ា ដែលមានទីតាំងនៅខេត្តសៀមរាប។

ក្រោមកិច្ចខិតខំប្រឹងប្រែងលះបង់ទាំងកាយ កម្លាំងចិត្ត ប្រាជ្ញា ស្មារតីអស់រយៈពេល៥០ឆ្នាំនៃជីវិតរបស់លោកលើទឹកដីអង្គរ ដើម្បីចូលរួមស្តារនិងអភិរក្សប្រាសាទអង្គរវត្តដែលជាកេរ្ដិ៍ដំណែលវប្បធម៌របស់កម្ពុជា លោកសាស្ត្រាចារ្យបានក្លាយជាម្ចាស់ជ័យលាភីពានរង្វាន់ Ramon Magsaysay Award ឬហៅថាណូបែលអាស៊ី ប្រចាំឆ្នាំ២០១៧ ដែលនឹងប្រារព្ធធ្វើឡើងនាថ្ងៃទី៣១ ខែសីហាខាងមុខក្នុងទីក្រុងម៉ានីល ព្រមទាំងទទួលបានវិញ្ញាបនបត្រ មេដាយមាសរូបលោក Magsaysay និងរង្វាន់ជាទឹកប្រាក់ផងដែរ។

តើលោកសាស្ត្រាចារ្យ អ៊ីស៊ីសាវ៉ា មានស្នាដៃអ្វីខ្លះនៅលើទឹកដីអង្គរ រហូតបានទទួលពានរង្វាន់ណូបែលអាស៊ី?

លោកសាស្ត្រាចារ្យ អ៊ីស៊ីសាវ៉ា បានមកទស្សនកិច្ចនៅប្រាសាទអង្គរវត្តជាលើកដំបូងក្នុងនាមជានិស្សិតនាឆ្នាំ១៩៦១។ ក្រោយមកក៏បានបន្តបេសកកម្មការងារផ្នែកបុរាណវិទ្យាតាមរយៈសាកលវិទ្យាល័យសូហ្វីយ៉ាជាច្រើននៅអង្គរដូចជា៖
• សីហា ១៩៨០៖ របាយការណ៍ស្តីពីប្រាសាទអង្គរវត្ត មានចំណងជើងថា បេតិកភណ្ឌអង្គរ ផ្សព្វផ្សាយតាមទូរទស្សន៍ Nippon ក្នុងឆ្នាំ១៩៨១ សរសេរដោយបណ្ឌិត អ៊ីស៊ីសាវ៉ា។
• មីនា ១៩៨៩៖ បេសកកម្មអន្តរជាតិលើកទី១នៅអង្គរ នៃSophia (ក្រោយមកដូរទៅជា Sophia Angkor) ផ្តើមសិក្សាស្រាវជ្រាវនៅប្រាសាទបន្ទាយក្តី ធ្វើរបាយការណ៍ស្រាវជ្រាវមានចំណងជើងថា បណ្តាញវប្បធម៌កម្ពុជាលេខរៀងទី១ (Rennaisance Culturelle du Cambodge N.1) (ពីលេខ២-២៤ បោះពុម្ពផ្សាយចាប់ពីឆ្នាំ១៩៩០-២០០៩)។
• មេសា ១៩៩១៖ ការបង្កើតលេខាធិការដ្ឋានស្តីពី “ក្រុមប្រឹក្សាជប៉ុនសម្រាប់ការងារអភិរក្សអង្គរ” នៅសាកលវិទ្យាល័យ សូហ្វីយ៉ា។ សមាជិកបេសកកម្មបានបង្រៀនដំបូងនៅសាកលវិទ្យាល័យភូមិន្ទវិចិត្រសិល្បៈ ភ្នំពេញ (RUFA) (ក្រោយមកដូរទៅជាមហាវិទ្យាល័យសិល្បៈ) ហើយបន្តការងាររហូតដល់១៩៩៧។ ការបណ្តុះបណ្តាលនេះចុះអនុវត្តផ្ទាល់នៅប្រាសាទបន្ទាយក្តី និងបន្តរហូតសព្វថ្ងៃ។
• ធ្នូ ១៩៩៣៖ រដ្ឋាភិបាលកម្ពុជាស្នើឲ្យបេសកកម្មនេះដើម្បីជួសជុលស្ពានហាលខាងលិចប្រាសាទអង្គរនៅផ្នែកខាងជើង ដែលមានប្រវែង២០០ម៉ែត្រ (ក្រោយមក “គម្រោងជួសជុលប្រាសាទអង្គរវត្ត”)
• សីហា ១៩៩៦៖ សាងសង់មជ្ឈមណ្ឌលអាស៊ីសិក្សា និងបណ្តុះបណ្តាលធនធានមនុស្សនៃសាកលវិទ្យាល័យសូហ្វីយ៉ា (ក្រោយមកជា “មជ្ឈមណ្ឌលអាស៊ីសូហ្វីយ៉ា”) ក្នុងក្រុងសៀមរាបប្រទេសកម្ពុជា។
• កញ្ញា ១៩៩៨៖ ចាប់ផ្តើមកំណាយនៅឡតានៃ(បេសកកម្មលើកទី២៧)
• សីហា ២០០១៖ សមាជិកបេសកកម្មធ្វើកំណាយឃើញព្រះពុទ្ធបដិមានៅបន្ទាយក្តីចំនួន២៧៤អង្គ។
• មីនា ២០០៣៖ សូហ្វីយ៉ាស្នើឲ្យមានការស្រាវជ្រាវរួមគ្នាជាមួយអាជ្ញាធរជាតិអប្សរា។ ការទទួលបានស្តង់ដារអន្តរជាតិ ISO 14001។
• ឧសភា ២០០៦៖ អាជ្ញាធរជាតិអប្សរាទទួលបានសញ្ញាបត្រ ISO 14001។
• វិច្ឆិកា ២០០៧៖ បញ្ចប់ការងារសាងសង់សារមន្ទីរព្រះនរោត្តមសីហនុអង្គរ និងប្រគល់ព្រះពុទ្ធបដិមា២៧៤អង្គទៅប្រទេសកម្ពុជា។
• វិច្ឆិកា ២០០៧៖ បញ្ចប់គម្រោងជួសជុលស្ពានហាលអង្គរវត្តជំហានទី១ ប្រវែង១០០ម៉ែត្រ និងប្រគល់ជូនអាជ្ញាធរជាតិអប្សរា។
• ឧសភា ២០១៦៖ ជួសជុលស្ពានហានខាងលិចប្រាសាទអង្គរវត្តដំណាក់កាលទី២។

លោកសាស្ត្រាចារ្យ អ៊ីស៊ីសាវ៉ា ក៏បានរំឭកដែរថា «មរតវប្បធម៌ជាកេរ្តិ៍ដំណែលខ្មែរ គួរត្រូវបានជួសជុល ថែរក្សា ការពារដោយជនជាតិខ្មែរ ដើម្បីខ្មែរ»។ ដូច្នេះហើយ ក្រៅពីរួមចំណែកក្នុងការកសាងសមិទ្ធិផលជាច្រើនក្នុងតំបន់អង្គរ លោកសាសាស្ត្រាចារ្យក៏បានបណ្តុះបណ្តាលធនធានមនុស្សក្នុងវិស័យអភិរក្ស ជួសជុលបេតិកភណ្ឌខ្មែរផងដែរលើផ្នែកស្ថាបត្យកម្មនិងបុរាណវិទ្យា។ ក្នុងនោះ បណ្តុះបណ្តាលជំនាញកាត់ថ្មដល់កម្មករខ្មែរជាង៥០នាក់ និងបណ្តុះបណ្តាលនិស្សិតខ្មែរថ្នាក់អនុបណ្ឌិតនិងបណ្ឌិតទៅសិក្សានៅសាកលវិទ្យាល័យសូហ្វីយ៉ាប្រទេសជប៉ុនបានចំនួន១៨នាក់ ដែលបច្ចុប្បន្នខ្លះជាថ្នាក់ដឹកនាំនៃអាជ្ញាធរជាតិអប្សរា អាជ្ញាធរជាតិព្រះវិហារ ក្រសួងវប្បធម៌និងវិចិត្រសិល្បៈ និងនៅសាកលវិទ្យាល័យភូមិន្ទភ្នំពេញ។ ក្រៅពីនោះ ក៏មានបណ្តុះបណ្តាលវគ្គសិក្សាខ្លីៗដល់អ្នកជំនាញខ្មែរជាច្រើនវគ្គ ច្រើននាក់ទៀតផង។
រង្វាន់និងគ្រឿងឥស្សរិយសសំខាន់ៗដែលលោកសាស្ត្រាចារ្យទទួលបាន៖
- ១៩៩១ រង្វាន់ក្រសួងការបរទេសនៃប្រទេសជប៉ុន
- ១៩៩៨ គ្រឿងឥស្សរិយយស សហមេត្រីពីព្រះបាទនរោត្តមសីហនុព្រះមហាក្សត្រនៃព្រះរាជាណាចក្រកម្ពុជា
- ២០០៧ គ្រឿងឥស្សរិយយស សហមេត្រី ថ្នាក់ធិបឌិន ពីព្រះបាទនរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា
- ២០១២ គ្រឿងឥស្សរិយយស សម្បត្តិពិសិដ្ឋផ្កាយមាសនិងប្រាក់ ពីព្រះចៅអធិរាជនៃប្រទេសជប៉ុន
- ២០១៧ ពានរង្វាន់រ៉ាម៉ុន ម៉ាកសាយសាយ (រង្វាន់ណូបែលអាស៊ី)៕






នៅថ្ងៃទី ២២ ខែកក្កដា ឆ្នាំ២០១៦នេះ ឯកឧត្តម សឺង គង់ ទីប្រឹក្សានៃអាជ្ញាធរជាតិអប្សរានិងមន្ត្រី/បុគ្គលិកអាជ្ញាធរជាតិអប្សរាមួយចំនួនទៀតបានចូលរួមក្នុងពិធីដាំកូនឈើជាមួយនឹងអាជ្ញាធរស្រុក ឃុំ ភូមិ ព្រះសង្ឃ លោកគ្រូអ្នកគ្រូ សិស្សានុសិស្ស និង ប្រជាពលរដ្ឋ ពុទ្ធបរិស័ទយ៉ាងច្រើនកុះករតាមផ្លូវចូលទៅក្នុងវត្តបរិវេណវត្តខ្នារធ្នង់និងបឋមសិក្សា-អនុវិទ្យាល័យខ្នារធ្នង់ស្ថិតនៅភូមិថ្នល់តាសិត ឃុំគោកធ្លកក្រោម ស្រុកជីក្រែង ខេត្តសៀមរាប ។
ការចេះដឹងអំពីបេតិកភណ្ឌរបស់ខ្លួន នឹងជំរុញឲ្យយុវជនរឹងរឹតតែស្រឡាញ់ និងមានឆន្ទៈមុតមាំក្នុងការថែរក្សាអភិរក្សឲ្យបានគង់វង្ស។ កាលបើយុវជនដែលជាទំពាំងស្នងឫស្សីមានការយល់ដឹងច្បាស់ និងរួមចំណែកថែរក្សាហើយនោះ បេតិកភណ្ឌដូនតានឹងអាចតាំងនៅយូរអង្វែងតជំនាន់វែងឆ្ងាយទៅទៀត។ ដូច្នេះ មានតែអប់រំទេដែលអាចសម្រេចបំណងនេះបាន។
បន្ទាប់ពីបញ្ចប់កិច្ចការងារមនុស្សធម៌ ក្រុមគ្រូពេទ្យស្ម័គ្រចិត្តបាំរាំងនៃសមាគមបេសកកម្មមនុស្សធម៌នៅកម្ពុជា(AMH) ចំនួន២៥រូប បារាំង១៦រូបនិងខ្មែរ៩រូបបានប្រារព្ធពិធីដាំកូនឈើក្នុងភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប កាលពីថ្ងៃទី២១ ខែកក្កដា ឆ្នាំ២០១៦ កន្លងទៅនេះ ។
វត្តបូណ៌ ឬ វត្តរាជបូណ៌ ជាបូជនីយដ្ឋាននិងបុរាណដ្ឋានដ៏ល្បីមួយនៅក្នុងខេត្តសៀមរាប កសាងឡើងក្នុងរវាងឆ្នាំ១៦៥០។ បើរាប់ពីដំបូល តួព្រះវិហារ គ្រឹះ ហោជាង សន្លឹកទ្វារ សន្លឹកបង្អួច ព្រះពុទ្ធបដិមា បល្ល័ង្ក សសរ រូបគំនូរ ពណ៌ គឺសុទ្ធតែជាទីចាប់អារម្មណ៍បំផុតសម្រាប់អ្នកទេសចរ អ្នកស្រាវជ្រាវជាតិ-អន្តរជាតិ។

ប្រសាសន៍លោកជំទាវប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
4
ថ្ងៃនេះ
:
6452
ម្សិលមិញ
:
7079
សប្តាហ៍នេះ
:
21755
ខែនេះ
:
0191201
សរុប
:
004731799