ព័ត៌មានថ្មីៗ

ចម្លាក់ផ្កាឈូកដ៏ធំនៅលើរានហាលព្រះលានជល់ដំរីនឹងលេចចេញរូបរាងឡើងវិញនៅខែសីហាខាងមុខនេះ

បានផ្សាយនៅ ថ្ងៃទី 17 ខែ ឧសភា ឆ្នាំ2017 01:21 PM ដោយ ៖ អាជ្ញាធរជាតិអប្សរា

នៅលើរានហាលនៃព្រះលានជល់ដំរីផ្នែកខាងជើង ក្បែរចម្លាក់ស្តេចគម្លង់ ដែលអ្នកស្រុកទម្លាប់ហៅថា កន្លែងដំរីក្បាល៣សេះក្បាល៥ មានចម្លាក់ផ្កាឈូកក្រពុំដ៏ធំ ដែលត្រូវបានកសាងឡើងក្នុងសម័យក្រោយបាយ័ន។ចម្លាក់ផ្កាឈូកនេះមានកម្ពស់១ម៉ែត្រកន្លះ និងអង្កត់ផ្ទិត៣ម៉ែត្រកន្លះ ផ្គុំឡើងពីដុំថ្មភក់តូចធំចំនួន៦៩ដុំ និងទ្រដោយទម្រថ្មបាយក្រៀម។

នៅអំឡុងពាក់កណ្តាលឆ្នាំ២០១៥ នៅពេលដែលមានភ្លៀងធ្លាក់ខ្លាំង ទឹកហូរច្រោះគ្រឹះ ធ្វើឲ្យចម្លាក់ផ្កាឈូកនេះ បានរបេះធ្លាក់ថ្មដែលជាត្របកផ្កាឈូកអស់មួយចំនួននៅជ្រុងនិរតី។ ជាការបន្ទាន់ ក្រុមជំនាញនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរាបានរៀបចំទល់ទ្របណ្តោះអាសន្នបង្ការការធ្លាក់របេះបន្ថែម ព្រមទាំងរៀបចំផែនការដើម្បីជួសជុលឡើងវិញ។

ចាប់ពីពាក់កណ្តាលឆ្នាំ២០១៦មក ក្រុមការងារអភិរក្សបានចាប់ផ្តើមជួសជុលចម្លាក់ផ្កាឈូកនេះ ហើយតាមគម្រោងការងារជួសជុលនេះនឹងបញ្ចប់នៅរវាងខែសីហា ឆ្នាំ២០១៧ខាងមុខ។ ក្រោយការជួសជុលរៀបចំឡើងវិញហើយ ភ្ញៀវទេសចរគ្រប់ជាតិសាសន៍នឹងបានឃើញនូវផ្កាឈូកដ៏ធំនេះឡើងវិញ។

លោក ម៉ៅ សុខនី ស្ថាបត្យករ ដែលដឹកនាំការងារជួសជុលនេះ បញ្ជាក់ថា នៅឆ្នាំ១៩៩៥ សាលាបារាំងចុងបូព៌ាធ្លាប់បានជួសជុលចម្លាក់ផ្កាឈូកនេះម្តងរួចមកហើយ។ ដោយឡែក ការជួសជុលនៅពេលនេះ ថ្វីត្បិតតែអ្នកជំនាញផ្ទាល់ជាអ្នកកាន់ការងារជួសជុល តែក៏មានការត្រួតពិនិត្យ និងផ្តល់អនុសាសន៍ពីអ្នកជំនាញនៃគណៈកម្មាធិការអាយស៊ីស៊ីអង្គរផងដែរ។

ចំពោះបច្ចេកទេសនៃការជួសជុល លោក សុខនី រៀបរាប់ថា “យើងបានរៀបចំបាតគ្រឹះឡើងវិញ ជួសជុលត្របកផ្កាឈូកដែលធ្លាក់បាក់ ប្រើបច្ចេកទេសដែកទាមដូចសម័យបុរាណដែរ ដើម្បីទាមថ្មពីមួយដុំទៅមួយដុំឲ្យជាប់គ្នានិងរឹងមាំ។ ជាមួយគ្នានេះ ក្រុមការងារបានប្រើប្រាស់ថ្មចាស់ៗដែលមានស្រាប់ និងប្រើប្រាស់ថ្មថ្មីក្នុងកម្រិតអប្បបរមាដើម្បីជំនួសថ្មចាស់បាត់ ឬមានគុណភាពមិនអាចយកមកប្រើប្រាស់ឡើងវិញបាន។ ជាក់ស្តែង ការជួសជុលផ្កាឈូកនេះ ក្រុមការងារបានប្រើប្រាស់ថ្មថ្មីចំនួន៤ដុំបំពេញបន្ថែមជំនួសថ្មចាស់ដែលបាត់រកមិនឃើញ ដើម្បីឲ្យមានលំនឹងជាប់បានយូរ។

រហូតមកដល់ពេលនេះ ការងារជួសជុលសម្រេចបានប្រហែល៧០%ហើយ ដោយបានរៀបគ្រឹះ និងស្រទាប់ត្របកឈូកទី១ក៏បានរួចរាល់ ហើយកំពុងបន្តរៀបត្របកទី២ និងកំពូលបន្តិចប៉ុណ្ណោះ។

សូមបញ្ជាក់ថា ការជួសជុលប្រាង្គប្រាសាទ គឺជាការងារអាទិភាពនៃការងារគ្រប់គ្រងរមណីយដ្ឋានអង្គរ។ ដើម្បីឲ្យការងារនេះបានជោគជ័យរាជរដ្ឋាភិបាលកម្ពុជា ដែលមានអាជ្ញាធរជាតិអប្សរាជាសេនាធិការ បានសម្របសម្រួលជាមួយស្ថាប័នអន្តរជាតិជាច្រើនដើម្បីមកចូលរួមការងារអភិរក្សជួសជុល។

ជាក់ស្តែង ចាប់ពីឆ្នាំ១៩៩២មក មានស្ថាប័នអន្តរជាតិចំនួន២១ មកពី១៣ប្រទេស បានអនុវត្តគម្រោងអភិរក្ស និងជួសជុលប្រាសាទចំនួន៣១គម្រោង។ ប្រទេសទាំង១៣នោះរួមមាន ចិន សាធារណរដ្ឋឆែក បារាំង អាឡឺម៉ង់ ឥណ្ឌា ឥណ្ឌូណេស៊ី អ៊ីតាលី ជប៉ុន ស៊្វីស អាមេរិក អូស្ត្រាលី ហុងគ្រី និងសាធារណរដ្ឋកូរ៉េ។

ទន្ទឹមនឹងការចូលរួមរបស់ស្ថាប័នអន្តរជាតិ អាជ្ញាធរជាតិអប្សរាក៏មានក្រុមការងារអភិរក្សជួសជុលដោយផ្ទាល់ផងដែរ។ ក្រុមការងារទាំងនេះកំពុងអនុវត្តការងាររបស់ខ្លួននៅលើការដ្ឋានជាច្រើនដូចជា នៅកំពែងអង្គរធំ ព្រះលានជល់ដំរី ច្រាំងកសិន្ធុប្រាសាទអង្គរវត្ត ជួសជុលចម្លាក់តោនៅប្រាសាទក្រវ៉ាន់ ជួសជុលចម្លាក់នាគនៅប្រាសាទប្រែរូប ជួសជុលចង្រឹងបង្អួចនៅប្រាសាទអង្គរត្ត ជួសជុលប្រាសាទឥដ្ឋនៅប្រាសាទព្រះគោ និងប្រាសាទលលៃ ជួសជុលប្រាសាទ និងរចនាសម្ព័ន្ធ នៅប្រាសាទគោកចក។ល។












នាព្រឹកថ្ងៃទី៧ មករា ឆ្នាំ២០១៨នេះ ថ្នាក់ដឹកនាំនៃអាជ្ញាធរជាតិអប្សរាដឹកនាំដោយឯកឧត្តម ហង់ ពៅ អគ្គនាយករង តំណាងដ៏ខ្ពង់ខ្ពស់ឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរា បានចូលរួមគោរពវិញ្ញាណក្ខន្ធអតីតវីរយុទ្ធជន យុទ្ធនារី នៅវិមានរំឭកគុណអតីតវីរយុទ្ធជនខេត្តសៀមរាប ដែលប្រារព្ធឡើងក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។
នាថ្ងៃទី១១ ខែមករា ឆ្នាំ២០១៨ខាងមុខនេះ នៅមជ្ឈមណ្ឌលបណ្តុះបណ្តាលអង្គរនៃអាជ្ញាធរជាតិអប្សរា នឹងមានការធ្វើបទបង្ហាញអំពីប្រវត្តិសាស្ត្រនិងបច្ចេកទេសសំយោគលោហៈ (Copper Alloy Sculpture Techniques and History: an International Interdisciplinary Group) ពីសំណាក់អ្នកស្រាវជ្រាវជាន់ខ្ពស់អន្តរជាតិផ្នែកបុរាណវិទ្យាមកពីច្រើនប្រទេសដូចជា៖ បារាំង អង់គ្លេស សហរដ្ឋអាមេរិក បែលហ្សិក និងលុច្សសាំបួរ ដើម្បីធ្វើបទបង្ហាញពីការសិក្សាស្រាវជ្រាវការដ្ឋានស្លសំរឹទ្ធនិងលទ្ធផលដែលបានរកឃើញកន្លងមក។
កាលពីថ្ងៃទី៣០ ខែកក្កដា ឆ្នាំ២០១៧ កន្លងមក ក្នុងគម្រោងស្រាវជ្រាវរវាងអាជ្ញាធរជាតិអប្សរា វិទ្យាស្ថានបច្ចេកវិទ្យាកម្ពុជា (ITC) និងវិទ្យាស្ថានស្រាវជ្រាវអាស៊ីអាគ្នេយ៍នៃប្រទេសសិង្ហបុរី (ISEAS) បានរួមគ្នាធ្វើកំណាយស្រាវជ្រាវនៅក្នុងបរិវេណប្រាសាទទន្លេស្ងួត រកឃើញបដិមាទ្វារបាលដែលមានចំនួន០៦បំណែក មានព្រះកេស ដងខ្លួន បំណែកដៃ ជើង និងក្រវិល ដែលបច្ចុប្បន្នកំពុងជួសជុលនិងអភិរក្សដោយក្រុមការងារអភិរក្សនិងជួសជុលវត្ថុសិល្បៈ ហៅកាត់ថា I.T.A.L.I.A នៃអាជ្ញាធរជាតិអប្សរា។
ភាពរីកចម្រើនគួរឱ្យកត់សម្គាល់នៅភូមិធម្មជាតិរុនតាឯក ធ្វើឱ្យប្រជាពលរដ្ឋដែលកំពុងរស់នៅ និងប្រកបរបរនៅទីនោះ មានការសាទរ និងកំពុងរស់នៅដោយភាពសប្បាយរីករាយ ជាមួយសមិទ្ធផលដែលពួកគេកំពុងទទួលបាន។ កម្រិតជីវភាពនៅទីនោះ មានភាពល្អប្រសើរ ប្រជាពលរដ្ឋមានការងារធ្វើគ្រប់គ្នា ពិសេសគឺអាចរកចំណូលចូលគ្រួសារបានគ្រប់គ្រាន់ ធ្វើឱ្យកម្រិតជីវភាពរបស់ពួកគេមានភាពធូរធារជាលំដាប់។
ក្រោយការចូលរួមបោះឆ្នោតពីភ្ញៀវទេសចររាប់លាននាក់ជុំវិញពិភពលោក គេហទំព័រដ៏ល្បីល្បាញ TripAdvisor បានផ្តល់ចំណាត់ថ្នាក់លេខ១ដល់ប្រាសាទអង្គរវត្តរបស់កម្ពុជា ជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតនិងចំណាត់ថ្នាក់លេខ៨ជាគោលដៅទេសចរណ៍របស់ពិភពលោកសម្រាប់ឆ្នាំ២០១៧នេះ។

ប្រសាសន៍លោកជំទាវប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
5
ថ្ងៃនេះ
:
1499
ម្សិលមិញ
:
4755
សប្តាហ៍នេះ
:
16069
ខែនេះ
:
0089392
សរុប
:
004452756