ព័ត៌មានថ្មីៗ

អាជ្ញាធរជាតិអប្សរាសហការជាមួយស្ថានទូតអាមេរិកប្រចាំកម្ពុជាបណ្តុះបណ្តាលមន្ត្រីលើជំនាញគ្រប់គ្រងទេសចរណ៍ក្នុងតំបន់បេតិកភណ្ឌ

បានផ្សាយនៅ ថ្ងៃទី 17 ខែ ឧសភា ឆ្នាំ2017 09:31 AM ដោយ ៖ អាជ្ញាធរជាតិអប្សរា

មន្ត្រីជំនាញផ្នែកគ្រប់គ្រងទេសចរណ៍នៃអាជ្ញាធរជាតិអប្សរា ទទួលបានវគ្គបណ្តុះបណ្តាលបន្ថែមជំនាញលើការងារគ្រប់គ្រងទេសចរណ៍ក្នុងតំបន់បេតិកភណ្ឌ។ កម្មវិធីនេះរៀបចំឡើងដោយអាជ្ញាធរជាតិអប្សរា ក្រោមជំនួយឧបត្ថម្ភរបស់ស្ថានទូអាមេរិកប្រចាំកម្ពុជា ក្នុងក្របខណ្ឌ Fulbright Specialist Program។

មន្ត្រីជំនាញ រួមទាំងប្រធាន និងអនុប្រធានភ្នាក់ងារទេសចរណ៍ប្រចាំនៅតាមប្រាសាទសរុបចំនួន៦៥រូប បានចូលរួមវគ្គបណ្តុះបណ្តាលនេះចំនួន២វគ្គ ដោយវគ្គទី១ ចាប់ផ្តើមពីថ្ងៃទី១៥ ដល់ទី២៨ ខែឧសភា ឆ្នាំ២០១៧ និងវគ្គទី២ ចាប់ពីថ្ងៃទី១៤ ខែកក្កដា ដល់ថ្ងៃទី១០ សីហា ឆ្នាំ២០១៧។

ក្នុងពិធីបើកវគ្គបណ្តុះបណ្តាលនារសៀលថ្ងៃទី១៦ ខែឧសភានេះ លោកស្រីបណ្ឌិត Claudia G.Green ដែលមានបទពិសោធន៍ការងារបង្រៀនលើវិស័យទេសចរណ៍ក្នុងតំបន់បេតិកភណ្ឌក្នុងបណ្តាប្រទេសជាច្រើន និងជាគ្រូបង្គោលក្នុងកម្មវិធីនេះបញ្ជាក់ថា “ខ្ញុំពិតជារីករាយដែលទទួលបានឱកាសនេះ។ ក្នុងវគ្គនេះ ខ្ញុំនឹងមិនព្យាយាមនិយាយច្រើនទេ តែខ្ញុំចង់ស្តាប់បញ្ហារបស់អ្នករាល់គ្នា ហើយខ្ញុំនឹងចែករំលែកបទពិសោធន៍របស់ខ្ញុំដើម្បីរួមចំណែកបន្ថែមលើចំណុចខ្វះខាត”។

ឯកឧត្តម សុខ សង្វារ អគ្គនាយករងនៃអាជ្ញាធរជាតិអប្សរាមានប្រសាសន៍ថា មន្ត្រី និងភ្នាក់ងាររបស់អាជ្ញាធរជាតិអប្សរា គឺជាភ្នាក់ងារបម្រើសេវាកម្មទេសចរណ៍ ដែលត្រូវគិតគូរទាំងគុណភាពនៃសេវាកម្មទេសចរណ៍ និងគិតគូរពីផលប៉ះពាល់នៃភ្ញៀវទេសចរមកលើប្រាសាទរបស់យើង។ ដូច្នេះ យើងត្រូវតែសិក្សាបន្ថែមសមត្ថភាពរបស់យើង ក្នុងន័យធ្វើយ៉ាងណាឲ្យភ្ញៀវទេសចរដែលមកទស្សនាអង្គរ ទទួលបានបទពិសោធន៍ដ៏ល្អបំផុត តែផ្តល់ផលប៉ះពាល់ដ៏តិចបំផុតដល់តំបន់រមណីយដ្ឋានអង្គរ។

វគ្គសិក្សានេះបែងចែកជាពីរក្រុមគឺ មន្ត្រីជំនាញនឹងសិក្សាអំពីការងារគ្រប់គ្រងទេសចរណ៍ ស្ថិតិ និងវិធីសាស្ត្រវិភាគទិន្នន័យ និងសិក្សាអំពីបទពិសោធន៍នៃការគ្រប់គ្រងទេសចរណ៍ពិភពលោក ដោយប្រៀបជាមួយនឹងការគ្រប់គ្រងទេសចរណ៍ក្នុងតំបន់អង្គរ។ ចំណែក ភ្នាក់ងារទេសចរណ៍សិក្សាបង្កើនចំណេះដឹងផ្នែកភាសាអង់គ្លេស និងសិក្សាអំពីសេវាកម្ម និងការងារគ្រប់គ្រងលំហូរភ្ញៀវទេសចរ៕








រយៈពេល៦ខែដើមឆ្នាំ២០១៧នេះ អាជ្ញាធរជាតិអប្សរាតាមរយៈមជ្ឈមណ្ឌលសេវាកម្មច្រកចេញតែមួយ បានទទួលសំណើពាក់ព័ន្ធនឹងការសុំសាងសង់លំនៅឋានចំនួន៦៤១ករណី។ សំណើទាំងនេះបានឆ្លើយតបរួចរាល់ចំនួន៥៤១ករណី និងកំពុងរៀបចំចំនួន១០០ករណីទៀត។
អាជ្ញាធរជាតិអប្សរាតាមរយៈគម្រោងអភិវឌ្ឍន៍សេដ្ឋកិច្ចសហគមន៍និងបេតិកភណ្ឌអង្គរ ហៅកាត់ថា ACHA បានសហការជាមួយអង្គការអ្នកកសាងសមត្ថភាព LOCAB បើកវគ្គបណ្តុះបណ្តាលស្តីពីការប្រើប្រាស់ថាមពលពន្លឺព្រះអាទិត្យ ដើម្បីការអភិវឌ្ឍប្រកបដោយនិរន្តរភាព ដល់បុគ្គលិកបច្ចេកទេសរបស់ខ្លួននៅមជ្ឈមណ្ឌលអាជ្ញាធរជាតិអប្សរា នៅព្រឹកថ្ងៃទី២៥ ខែកក្កដា ឆ្នាំ២០១៧នេះ។
មន្ត្រី-បុគ្គលិកអាជ្ញាធរជាតិអប្សរាចំនួន១០នាក់នៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ បានចូលរៀនវគ្គបណ្តុះបណ្តាលស្តីអំពីវិទ្យាសាស្ត្រពាក់ព័ន្ធនឹងការអភិរក្សបុរាណដ្ឋានក្នុងតំបន់អង្គរ ពីសំណាក់លោកបណ្ឌិត Chung Yongjae សាស្ត្រាចារ្យសាកលវិទ្យាល័យជាតិកូរ៉េនៃបេតិកភណ្ឌវប្បធម៌ នារសៀលថ្ងៃទី២៤ ខែកក្កដា ឆ្នាំ២០១៧។
គេដឹងហើយថា វត្តអារាមជាទីតាំងនៃជំនឿរបស់ពុទ្ធបរិស័ទអ្នកគោរពព្រះពុទ្ធសាសនា។ ប៉ុន្តែ ដោយសារពុទ្ធបរិស័ទខ្មែរមានជំនឿតដូនតាទាំងផ្នែកជំនឿលើព្រលឹង លើអារក្ខអ្នកតា និងព្រហ្មញ្ញសាសនាផងនោះ ទើបធ្វើឲ្យវត្តភាគច្រើនរបស់ព្រះពុទ្ធសាសនាក៏ក្លាយជាទីតាំងនៃជំនឿដូនតាទាំងអស់នេះដែរ។
ជំនឿបែងអារឹសរបស់អ្នកស្រុកអង្គរ
( ថ្ងៃទី 22 ខែ កក្កដា ឆ្នាំ2017 )
អារឹស ជាជំងឺម្យ៉ាងដែលធ្វើឱ្យកូនកើតហើយមិនគង់ គឺស្លាប់ទៅវិញក្នុងរយៈពេលខ្លី ឬស្លាប់ភ្លាមៗតែម្តង។ ក្មេងដែលស្លាប់ដូច្នេះ អ្នកស្រុកនិយមហៅថា អារឹសម្តាយដើម គឺកូនដែលលួចមកកើតនឹងម្តាយថ្មី (ជាតិនេះ) ដោយមិនប្រាប់ម្តាយដើម (ម្តាយជាតិមុន) ឱ្យដឹង។ ដូច្នេះ ដើម្បីបញ្ជៀសកុំឱ្យម្តាយដើមយកព្រលឹងកូននោះទៅ (ស្លាប់) គេបានប្រារព្ធពិធីមួយហៅថា «បែងអារឹស»។

ប្រសាសន៍លោកជំទាវប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
3
ថ្ងៃនេះ
:
2349
ម្សិលមិញ
:
5767
សប្តាហ៍នេះ
:
11801
ខែនេះ
:
0115620
សរុប
:
003077774