ព័ត៌មានថ្មីៗ

អាជ្ញាធរជាតិអប្សរាលើកកម្ពស់ប្រជាជនក្នុងតំបន់អង្គរឱ្យមានបង្គន់ប្រើប្រាស់ជាលក្ខណៈគ្រួសារ

បានផ្សាយនៅ ថ្ងៃទី 30 ខែ ធ្នូ ឆ្នាំ2016 08:16 PM ដោយ ៖ អាជ្ញាធរជាតិអប្សរា

តាមការសង្កេតជាក់ស្តែង ប្រជាជននៅក្នុងតំបន់អង្គរមានជីវភាពរស់នៅល្អប្រសើរពីមួយថ្ងៃទៅមួយថ្ងៃ ប៉ុន្តែ មានគ្រួសារតិចណាស់ដែលមានបង្គន់ប្រើប្រាស់ជាលក្ខណៈគ្រួសារ ព្រោះខ្វះវិធីសាស្ត្រក្នុងការកែច្នៃបង្គន់ប្រើប្រាស់ និងមិនបានចាប់អារម្មណ៍ចំពោះផលប៉ះពាល់សុខភាពតាមរយៈការបន្ទោបង់ពាសវាលពាសកាល។

ដោយមានបំណងលើកស្ទួយការយល់ដឹងផ្នែកសុខភាពប្រជាជនក្នុងការរស់នៅឱ្យមានអនាម័យល្អប្រសើរ និងជួយកាត់បន្ថយការចំណាយលើការធ្វើបង្គន់ គម្រោងសុវុឌ្ឍិកម្មនៃការសម្អាតទឹក និងការគ្រប់គ្រងទឹកក្នុងតំបន់អង្គរ (PAAGERA) បានសហការជាមួយនឹងអាជ្ញាធរជាតិអប្សរា សាលាខេត្តសៀមរាប និងប្រទេសបារាំង បើកយុទ្ធនាការផ្សព្វផ្សាយលើកទី៣ស្តីពី «ការប្រែក្លាយតំបន់អង្គរឱ្យមានបង្គន់អនាម័យគ្រប់គ្នា» នៅភូមិស្រែចង្ហូត ឃុំរុនតាឯក សុ្រកបន្ទាយស្រី ខេត្តសៀមរាប នាព្រឹកថ្ងៃទី២៩ ខែធ្នូ ឆ្នាំ២០១៦។

លោក ស៊ុន ពិសី បុគ្គលិកនាយកដ្ឋានគ្រប់គ្រងទឹក និងជាគ្រូបង្គោលនៃវគ្គបណ្តុះបណ្តាលនេះបានលើកឡើងពីផលលំបាកនៃការគ្មានបង្គន់អនាម័យប្រើប្រាស់ គឺនាំឱ្យយើងខ្មាសគេពេលមានភ្ញៀវមកលេងផ្ទះ ប្រឈមមុខនឹងការចម្លងរោគខ្ពស់ មានគ្រោះថ្នាក់ជាយថាហេតុដល់អាយុជីវិតពេលទៅបត់ជើងនៅយប់ព្រលប់ ពិសេសចំពោះក្មេងស្រីៗក៏ប្រឈមមុខនឹងភាពអាម៉ាស់ឬបំពានផងដែរ។ ដូច្នេះការមានបង្គន់អនាម័យនៅផ្ទះធានាបាននូវភាពថ្លៃថ្នូរ សុខភាពល្អ ភាពងាយស្រួល និងសុវត្ថិភាពក្នុងការរស់នៅ។

តាមរយៈយុទ្ធនាការផ្សព្វផ្សាយនេះដែរ ក្រុមការងារអាជ្ញាធរជាតិអប្សរាក៏បានណែនាំឱ្យប្រជាជននៅភូមិស្រែចង្ហូតយល់ដឹងកាន់តែច្បាស់ពីផលប៉ះពាល់នានាដោយសារគ្មានបង្គន់ះនាម័យ និងបង្រៀនអំពីវិធីធ្វើបង្គន់អនាម័យដោយខ្លួនឯង ហើយចំណាយថវិកាតិចឬមិនចំណាយសោះតែម្តង ដោយគ្រាន់តែប្រើកម្លាំងកាយរបស់សមាជិកក្នុងគ្រួសារនិងសម្ភារៈដែលមានស្រាប់ជាការស្រេច។

ក្នុងឱកាសនោះដែរ លោកពូ ប៉ិស ប្រជាកសិករភូមិស្រែចង្ហូតក៏បានចែករំលែកបទពិសោធន៍ផ្ទាល់ខ្លួនកាលមិនទាន់មានបង្គន់ប្រើប្រាស់ថា វាពិតជាពិបាកខ្លាំងណាស់ពេលចង់បន្ទោបង់ម្តងៗពិសេសពេលយប់ ពេលភ្លៀង និងពេលឈឺពោះខ្លាំង ព្រោះត្រូវធ្វើដំណើរទៅឆ្ងាយ មកវិញស្រួលមិនស្រួលជាន់របស់គេទៀត។ ពេលបន្ទោបង់ហើយ ក៏មិនបានលាងសម្អាតឱ្យស្អាតដែរ គិតទៅវាគគ្រិចខ្លាំងណាស់។ ប៉ុន្តែចាប់តាំងពីមានបង្គន់មក គឺងាយស្រួលគ្រប់ពេលវេលាពេលចង់បន្ទោបង់ ពិសេសសុខភាពនិងការរស់នៅក៏មិនសូវមានជំងឺតម្កាត់ ពេលបងប្អូនភ្ញៀវពន្លឺមកលេងក៏មិនសូវខ្មាសគេដែរ។

លោកពូក៏បានសំណូមពរផងដែរ ឱ្យអ្នកភូមិគិតគូរឱ្យបានច្រើនពីបញ្ហាសុខភាពនិងត្រូវធ្វើបង្គន់អនាម័យប្រើប្រាស់ឱ្យបានគ្រប់គ្នាតាមរយៈការណែនាំពីក្រុមការងារអាជ្ញាធរជាតិអប្សរា ចៀសវាងការបន្ទោបង់ផ្តេសផ្តាសដូចមុនដែលអាចបង្កនូវគ្រោះថ្នាក់ផ្សេងៗដល់អាយុជីវិត៕








កាំជណ្តើរកសិណអង្គរវត្តផ្នែកខាងលិចស្លាបខាងជើងប្រវែង៨០ម៉ែត្រដែលរងការខូចខាតដោយសារការស្រុតដីបាក់រលំ និងការខូចខាតប្រព័ន្ធបញ្ជៀសទឹកក្រោមដីនោះ ត្រូវបានអាជ្ញាធរជាតិអប្សរាសហការជាមួយក្រុមការងារ IGeS របស់ប្រទេសអ៊ីតាលី ធ្វើការជួសជុលអស់រយៈពេល៤ឆ្នាំ គឺតាំងពីឆ្នាំ២០១២នឹងបានបញ្ចប់ជាស្ថាពរនៅចុងឆ្នាំ២០១៥ ។
បច្ចុប្បន្នអាកាសធាតុក្តៅហួតហែង បានបង្កឱ្យមានកង្វះទឹកស្ទើរគ្រប់ខេត្តក្រុងក្នុងប្រទេសកម្ពុជា ពិសេសតំបន់មួយចំនួននៃខេត្តសៀមរាបក៏រងនូវផលប៉ះពាល់នេះដែរ ដែលបណ្តាលឱ្យសត្វ រុក្ខជាតិស្លាប់ជាហូរហែរ និងធ្វើឱ្យមនុស្សពិបាកក្នុងការរស់នៅ។
អាជ្ញាធរជាតិអប្សរា ដោយមានកិច្ចសហការពីអាជ្ញាធរមូលដ្ឋាន និងនគរបាលការពារបេតិកភណ្ឌ កាលពីយប់ថ្ងៃទី២៧ ខែមេសា ឆ្នាំ២០១៦កន្លងទៅនេះ បានចុះទៅបង្រ្កាបពួកជនខិលខូចមួយក្រុមកំពុងលួចជីកគាស់កកាយរូបក្បាលនាគ នៅតាមបណ្តោយផ្លូវបេងទៅកំពង់ស្វាយបម្រុងនឹងដឹកចេញយកទៅលក់ ស្ថិតនៅភូមិអូរ ឃុំខ្វាវ ស្រុកជីក្រែង ខេត្តសៀមរាប។
សម្រាប់ព័ត៌មានលម្អិតបន្ថែម សូមទំនាក់ទំនងទូរស័ព្ទ ០៧៧ ៨៩៦ ៦៨៩ ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
12
ថ្ងៃនេះ
:
1633
ម្សិលមិញ
:
55244
សប្តាហ៍នេះ
:
56877
ខែនេះ
:
0001633
សរុប
:
013693087