ព័ត៌មានថ្មីៗ

តើក្រុមការងារនៃអាជ្ញាធរជាតិអប្សរាកំពុងធ្វើការងារអ្វីខ្លះដើម្បីចូលរួមចំណែកជួយអភិរក្ស និងអភិវឌ្ឍន៍តំបន់អង្គរ?

បានផ្សាយនៅ ថ្ងៃទី 27 ខែ ធ្នូ ឆ្នាំ2016 03:14 PM ដោយ ៖ អាជ្ញាធរជាតិអប្សរា

អាជ្ញាធរជាតិអប្សរាបានបែងចែកក្រុមការងារសហគមន៍ជា៧ក្រុមដោយឡែកពីគ្នាដែលក្រុម៥ ចុះជួយប្រជាពលរដ្ឋតាមមូលដ្ឋានក្នុងបណ្តាស្រុកក្រុងទាំង៥ក្នុងតំបន់អង្គរ ដែលជាដែនសមត្ថកិច្ចរបស់អាជ្ញាធរជាតិអប្សរា រួមមានក្រុងសៀមរាប ស្រុកប្រាសាទបាគង ស្រុកបន្ទាយស្រី ស្រុកអង្គរធំ និងស្រុកពួក និង២ក្រុមទៀតសម្រាប់អប់រំផ្សព្វផ្សាយបេតិកភណ្ឌតាមគ្រឹះស្ថានសិក្សានិងក្រៅតំបន់អង្គរ ។

ក្រុមការងារសហគមន៍នីមួយៗត្រូវចុះទៅផ្សព្វផ្សាយបេតិកភណ្ឌ និងដោះស្រាយផលលំបាកនានាដល់ប្រជាពលរដ្ឋតាមគោលដៅរៀងៗខ្លួន ។ ដូច្នេះ តើក្រុមការងារសហគមន៍នីមួយៗនោះធ្វើការងារអ្វីខ្លះដើម្បីចូលរួមចំណែកការអភិរក្សនិងអភិវឌ្ឍន៍តំបន់អង្គរ?

ឯកឧត្តម ម៉ី ម៉ារ៉ាឌី ទីប្រឹក្សាអាជ្ញាធរជាតិអប្សរានិងជាប្រធានក្រុមការងារសហគមន៍ទី៥ចុះជួយស្រុកបន្ទាយស្រី ក្នុងឱកាសចុះផ្សព្វផ្សាយបេតិកភណ្ឌនៅភូមិអូរទទឹង ឃុំប្រដាក ស្រុកបន្ទាយស្រី ខេត្តសៀមរាប បានមានប្រសាសន៍ឲ្យដឹងថា ក្រុមការងារសហគមន៍នៃអាជ្ញាធរជាតិអប្សរាមានកិច្ចការងារសំខាន់ៗ ជាចម្បងចំនួន៣យ៉ាងដែលត្រូវធ្វើជាប្រចាំ ។

ការងារទី១គឺ ជួយលើកកម្ពស់សុខុមាលភាពស្រ្តីទើបឆ្លងទន្លេរួច តាមរយៈការចែកជូនកញ្ចប់ទ្រទ្រង់សុខុមាលភាព ម្តាយនិងទារកមានដូចជា កន្ត្រក បំពង់ទឹកក្តៅ កន្សែងពោះគោ កូនមុង ស្រោមដៃស្រោមជើង ខោអាវទារក និងថវិកាមួយចំនួនទៀត ដែលជាអំណោយដ៏ថ្លៃថ្លារបស់ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរានិងលោកជំទាវ។

ការងារទី២ចុះពិនិត្យនិងអនុញ្ញាតសំណើសុំសាងសង់ និងជួសជុលសំណង់តូចតាចជូនប្រជាពលរដ្ឋដល់មូលដ្ឋាន រួមមាន សុំតសំយ៉ាបផ្ទះ ធ្វើផ្ទះបាយ ធ្វើជង្រុក ធ្វើរបងផ្ទះ ធ្វើបង្គន់ ជួសជុលដំបូលផ្ទះ ធ្វើរោងលក់ឥវ៉ាន់ ធ្វើរោងគោ ទ្រុងមាន់ និងទ្រុងជ្រូក។ល។ចំណែកការសាងសង់សំណង់ធំៗមានរុះរើផ្ទះចាស់សាងសង់ផ្ទះថ្មីឬសុំពង្រីកផ្ទះជាដើមត្រូវដាក់ពាក្យស្នើសុំទៅមជ្ឈមណ្ឌលអាជា្ញធរជាតិអប្សរា ដើម្បីកុំឲ្យប៉ះពាល់តម្លៃបេតិកភណ្ឌ។

ការងារទី៣ អប់រំផ្សព្វផ្សាយឲ្យពួកគាត់បានយល់ពីតម្លៃបេតិកភណ្ឌ មាន ប្រាង្គប្រាសាទ ទំនៀមទម្លាប់ ប្រពៃណី វប្បធម៌ ព្រៃឈើ បរិស្ថាន ក្រមប្រតិបត្តិអង្គរ តួនាទីអាជ្ញាធរនិងតួនាទីរបស់ប្រជាពលរដ្ឋដែលត្រូវចូលរួមសហការគ្នាក្នុងការថែរក្សាការពារនិងអភិរក្សបេតិកភណ្ឌដ៏ល្អឯករបស់មនុស្សជាតិ ដើម្បីជាប្រយោជន៍ដល់ប្រជាជាតិទាំងឡាយនៅលើពិភពលោកទាំងពេលបច្ចុប្បន្ននិងទៅថ្ងៃអនាគត។

គួរបញ្ជាក់ថា ក្រុមការងារសហគមន៍នេះចុះតាមមូលដ្ឋានប្រជាពលរដ្ឋក្នុងបណ្តាស្រុកក្រុងទាំង៥នោះ ជាប្រចាំដោយក្នុងមួយសប្តាហ៍ចំនួន២ថ្ងៃ ដើម្បីធានាបាននូវការការពារបេតិកភណ្ឌប្រកបដោយនិរន្តរភាពនិងលើកស្ទួយបេតិកភណ្ឌដ៏មានតម្លៃមហាសាលសម្រាប់មនុស្សជាតិជំនាន់ក្រោយបានស្គាល់តទៅទៀត៕








ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានបំពេញព្រះរាជបេសកកម្មប្រកបដោយភាពជោគជ័យលើទឹកដីនៃអតីតរាជធានីនៃអាណាចក្រខ្មែរ។ កាលពីថ្ងៃទី២៤ ខែឧសភា ឆ្នាំ២០១៦កន្លងទៅនេះ នាព្រះលានជល់ដំរីនៃទីក្រុងអង្គរធំដែលជាអតីតរាជធានីដ៏ឧត្តុង្គឧត្តមនាកំឡុងសតវត្សទី៩ដល់ទី១៥ បច្ចុប្បន្នស្ថិតក្នុងរមណីយដ្ឋានអង្គរ ព្រះអង្គបានយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីច្រត់ព្រះនង្គ័ល។ ព្រះរាជបេសកកម្មបន្ទាប់គឺ ព្រះអង្គទ្រង់យាងទៅបំពេញព្រះរាជទស្សនកិច្ចនៅតំបន់ប្រាសាទកោះកេរដែលក៏ជាអតីតរាជធានីក្នុងកំឡុងដើមសតវត្សទី១០ បច្ចុប្បន្នស្ថិតក្នុងខេត្តព្រះវិហារ ដើម្បីបួងសួងដល់ព្រះវិញ្ញាណក្ខន្ធអតីតព្រះមហាក្សត្រខ្មែរគ្រប់ជំនាន់ ដើម្បីប្រទានក្តីសុខដល់ប្រជានុរាស្ត្រទូទាំងនគរនៃព្រះរាជាណាចក្រកម្ពុជា។
ព្រះរាជពិធីច្រត់ព្រះនង្គ័លឆ្នាំនេះ ត្រូវបានរៀបចំឡើងនៅលើទឹកដីសៀមរាបអង្គរ នៅមុខព្រះលានជល់ដំរី នាព្រឹកថ្ងៃទី២៤ ខែឧសភា ឆ្នាំ២០១៦ ត្រូវនឹងថ្ងៃ៤រោច ខែពិសាខ ពុទ្ធសករាជ ២៥៦០ ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដោយមានការចូលរួមពីថ្នាក់ដឹកនាំ និងប្រជាពលរដ្ឋយ៉ាងច្រើនកុះករ។
ដើម្បីអបអរសាទរព្រះរាជពិធីច្រត់ព្រះនង្គ័ល ដែលប្រារព្ធឡើងនៅក្នុងបរិវេណមុខព្រះលានជល់ដំរី ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានោះ អាជ្ញាធរជាតិអប្សរានឹងចែកទឹកជូនបងប្អូនប្រជាពលរដ្ឋ និងភ្ញៀវទេសចរទាំងអស់ ដែលមកទស្សនាកម្មវិធីរយៈពេល៤ថ្ងៃដោយមិនគិតថ្លៃ គឺចាប់ពីថ្ងៃទី២៣រហូតដល់ថ្ងៃទី២៦ ខែឧសភា ឆ្នាំ២០១៦។ ទីតាំងចែកចាយទឹកមានពីរកន្លែងស្ថិតនៅផ្នែកខាងជើង និងខាងត្បូងនៃព្រះលានជល់ដំរី ដែលជាទីតាំងប្រារព្ធពិធី។
អាជ្ញាធរជាតិអប្សរា តាមរយៈក្រុមការងារសហគមន៍ប្រចាំស្រុកបា្រសាទបាគង នាព្រឹកថ្ងៃទី២៣ ខែឧសភានេះ បាននាំយកអំណោយសង្គ្រោះបឋមរបស់ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ទៅជូនប្រជាពលរដ្ឋមួយគ្រួសារដែលមានអាសយដ្ឋាននៅភូមិកញ្ជរ ឃុំរលួស ដែលរងគ្រោះដោយត្រូវខ្យល់ព្យុះដួលរលំផ្ទះទាំងស្រុង កាលពីដើមខែឧសភាកន្លងទៅ។
ក្រុមអ្នកជំនាញផ្នែកគ្រប់គ្រងទឹកនៃអាជ្ញាធរជាតិអប្សរាកំពុងរៀបចំប្រព័ន្ធទឹក ដោយបង្កប់ទុយោដាក់តាមបណ្តោយផ្លូវចូលពីខ្លោងទ្វារចូលទៅកសិណនៃប្រាសាទបន្ទាយស្រី។ ការរៀបចំប្រព័ន្ធទឹកនេះ គឺដើម្បីបញ្ជូនទឹកកុំឲ្យដក់នៅយូរពេលភ្លៀងធ្លាក់ម្តងៗ និងដើម្បីលើកតម្លៃទេសភាពវប្បធម៌នៃប្រាសាទ ជាពិសេស គឺសម្រួលដល់ការធ្វើដំណើររបស់ភ្ញៀវទេសចរក្នុងរដូវភ្លៀង។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
17
ថ្ងៃនេះ
:
62779
ម្សិលមិញ
:
98152
សប្តាហ៍នេះ
:
62779
ខែនេះ
:
0062779
សរុប
:
015132582