ព័ត៌មានថ្មីៗ

អាជ្ញាធរជាតិអប្សរាចុះអប់រំប្រជាពលរដ្ឋនៅភូមិស្រែចង្ហូតអំពីការបន្សុទ្ធទឹកនិងទុកដាក់ទឹកឱ្យមានសុវត្ថិភាព

បានផ្សាយនៅ ថ្ងៃទី 23 ខែ ធ្នូ ឆ្នាំ2016 01:42 PM ដោយ ៖ អាជ្ញាធរជាតិអប្សរា

ដើម្បីរួមចំណែកលើកកម្ពស់សុខភាពប្រជាជននៅក្នុងតំបន់អង្គរ ឱ្យមានការយល់ដឹងពីអនាម័យ ការរស់នៅស្អាត ហូបស្អាតក្នុងជីវិតរស់នៅប្រចាំថ្ងៃប្រកបដោយសុខភាពល្អ នៅព្រឹកថ្ងៃទី២២ ខែធ្នូ ឆ្នាំ២០១៦ គម្រោងសុវុឌ្ឍិកម្មនៃការសម្អាតទឹក និងការគ្រប់គ្រងទឹកក្នុងតំបន់អង្គរ (PAAGERA) ដែលអាជ្ញាធរជាតិអប្សរាបសហការជាមួយសាលាខេត្តសៀមរាប និងប្រទេសបារាំង បានចុះទៅអប់រំផ្សព្វផ្សាយអំពី «ការបន្សុទ្ធទឹក និងទុកដាក់ទឹកឱ្យមានសុវត្ថិភាព» ដល់ប្រជាជនជាង៨០សិបនាក់នៅភូមិស្រែចង្ហូត ឃុំរុនតាឯក ស្រុកបន្ទាយស្រី ខេត្តសៀមរាប។

លោក ឡៃ ប៉ូទី មន្ត្រីជំនាញនៃនាយកដ្ឋានគ្រប់គ្រងទឹករបស់អាជ្ញាធរជាតិអប្សរាបានប្រាប់ថា កន្លងមកប្រជាជនតែងយល់ថា ទឹកថ្លា គឺជាទឹកដែលស្អាត តែការពិតមិនអ៊ីចឹងទេ! ទឹកស្អាត គឺត្រូវតែមានសុវត្ថិភាព គ្មានជាតិគីមី គ្មានមេរោគ និងការបំពុលផ្សេងៗ ហើយពេលបរិភោគទៅមិនប៉ះពាល់ដល់សុខភាព។ ក្នុងនោះ ដើម្បីបានទឹកស្អាតមកទទួលទាន និងប្រើប្រាស់ ទី១៖គឺត្រូវការពារប្រភពទឹកឱ្យបានល្អដោយព័ទ្ធរបងឬចាក់សាបជុំវិញស្រះនិងអណ្តូង ហើយដាច់ខាតមិនត្រូវសង់បង្គន់នៅលើប្រភពទឹក ទី២៖ ត្រូវទុកទឹកឱ្យរងសិនមុននឹងប្រើប្រាស់ ទី៣៖ ដាំទឹកឱ្យពុះយ៉ាងតិច១នាទីទៅ៥នាទីមុនទទួលទាន ទី៤៖ រក្សាទឹកឱ្យមានសុវត្ថិភាព ដោយប្រើគម្របគ្របពាងទឹក អាងទឹកឱ្យបានត្រឹមត្រូវ ទី៥៖ បើទឹកនោះមិនស្អាត ត្រូវប្រើវិធីចម្រោះដោយក្រណាត់ ឬធុងចម្រោះជាដើម។

លោកស្រី ស៊ិន ហ៊ាក ជំទប់ទី១ឃុំរុនតាឯកបានប្រាប់ថា នេះជាលើកទី២ហើយដែលអ្នកភូមិស្រែចង្ហូតទទួលបានការបណ្តុះបណ្តាលអំពី «ការបន្សុទ្ធទឹក និងទុកដាក់ទឹកឱ្យមានសុវត្ថិភាព» ដោយអាជ្ញាធរជាតិអប្សរា។ អ្នកស្រីតែងលើកទឹកចិត្តនិងជំរុញប្រជាជនឱ្យចេះសម្អាតបរិស្ថាននិងធ្វើអនាម័យក្នុងការរស់នៅឱ្យបានប្រសើរ ពិសេសចូលរួមទទួលយកចំណេះដឹងពីការរស់នៅស្អាត ហូបស្អាតតាមរយៈការផ្សព្វផ្សាយរបស់អាជ្ញាធរជាតិអប្សរា ក៏ដូចជាអង្គការផ្សេងៗកន្លងមក ដើម្បីឱ្យអ្នកភូមិមានសុខភាពល្អ ព្រោះការរស់នៅស្អាត មិនចំណាយលុយខ្ជះខ្ជាយលើការព្យាបាលជំងឺ នឹងនាំមកនូវសុភមង្គលក្នុងគ្រួសារ។ អ្នកស្រីក៏អរគុណដល់អាជ្ញាធរជាតិអប្សរាដែលបានរួមចំណែកជាមួយមន្ត្រីមូលដ្ឋានយកចិត្តទុកដាក់ចំពោះការរស់នៅរបស់ប្រជាជនក្នុងតំបន់អង្គរ ទាំងការអប់រំ សុខភាព បរិស្ថាន។ល។

បងប្រុស រឿន សៅ បានសម្តែងនូវការចាប់អារម្មណ៍យ៉ាងខ្លាំងចំពោះប្រធានបទនៅថ្ងៃនេះ ព្រោះវាបានផ្តល់នូវវិធីសាស្ត្រល្អៗ ងាយស្រួលក្នុងការទទួលបានទឹកស្អាតដើម្បីបរិភោគនិងប្រើប្រាស់ប្រចាំថ្ងៃ។ រាល់ថ្ងៃបងប្រុសតែងដាំទឹកផឹក ហើយមានធុងចម្រោះសម្រាប់ប្រើផងដែរ មិនដែលផឹកទឹកដោយផ្ទាល់ពីអណ្តូងទេ។ បងប្រុស សៅ ក៏សូមឱ្យមានកម្មវិធីបែបនេះទៀត ដើម្បីជំរុញទឹកចិត្តនិងផ្តល់ចំណេះដឹងដល់ប្រជាជនឱ្យយល់ដឹងកាន់តែច្រើនអំពីសុខភាព ការរស់នៅស្អាត ផឹកស្អាត។










ដើម្បីអបអរសាទរព្រះរាជពិធីច្រត់ព្រះនង្គ័ល ដែលប្រារព្ធឡើងនៅក្នុងបរិវេណមុខព្រះលានជល់ដំរី ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានោះ អាជ្ញាធរជាតិអប្សរានឹងចែកទឹកជូនបងប្អូនប្រជាពលរដ្ឋ និងភ្ញៀវទេសចរទាំងអស់ ដែលមកទស្សនាកម្មវិធីរយៈពេល៤ថ្ងៃដោយមិនគិតថ្លៃ គឺចាប់ពីថ្ងៃទី២៣រហូតដល់ថ្ងៃទី២៦ ខែឧសភា ឆ្នាំ២០១៦។ ទីតាំងចែកចាយទឹកមានពីរកន្លែងស្ថិតនៅផ្នែកខាងជើង និងខាងត្បូងនៃព្រះលានជល់ដំរី ដែលជាទីតាំងប្រារព្ធពិធី។
អាជ្ញាធរជាតិអប្សរា តាមរយៈក្រុមការងារសហគមន៍ប្រចាំស្រុកបា្រសាទបាគង នាព្រឹកថ្ងៃទី២៣ ខែឧសភានេះ បាននាំយកអំណោយសង្គ្រោះបឋមរបស់ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ទៅជូនប្រជាពលរដ្ឋមួយគ្រួសារដែលមានអាសយដ្ឋាននៅភូមិកញ្ជរ ឃុំរលួស ដែលរងគ្រោះដោយត្រូវខ្យល់ព្យុះដួលរលំផ្ទះទាំងស្រុង កាលពីដើមខែឧសភាកន្លងទៅ។
ក្រុមអ្នកជំនាញផ្នែកគ្រប់គ្រងទឹកនៃអាជ្ញាធរជាតិអប្សរាកំពុងរៀបចំប្រព័ន្ធទឹក ដោយបង្កប់ទុយោដាក់តាមបណ្តោយផ្លូវចូលពីខ្លោងទ្វារចូលទៅកសិណនៃប្រាសាទបន្ទាយស្រី។ ការរៀបចំប្រព័ន្ធទឹកនេះ គឺដើម្បីបញ្ជូនទឹកកុំឲ្យដក់នៅយូរពេលភ្លៀងធ្លាក់ម្តងៗ និងដើម្បីលើកតម្លៃទេសភាពវប្បធម៌នៃប្រាសាទ ជាពិសេស គឺសម្រួលដល់ការធ្វើដំណើររបស់ភ្ញៀវទេសចរក្នុងរដូវភ្លៀង។
កាលពីព្រឹកថ្ងៃទី២០ ខែឧសភា ឆ្នាំ២០១៦ អាជ្ញាធរជាតិអប្សរា ក្រោមការដឹកនាំរបស់ឯកឧត្តម សឹង គង់ ទីប្រឹក្សាអាជា្ញធរជាតិអប្សរា និងមន្រ្តីបុគ្គលិកអាជ្ញាធរជាតិអប្សរាមួយចំនួនទៀតបានចូលរួមពិធីរំឭកវិញ្ញាណក្ខន្ធជនរួមជាតិដែលបានស្លាប់ក្នុងរបបកម្ពុជាប្រជាធិបតេយ្យជាមួយព្រះសង្ឃ អាជា្ញធរខេត្ត មន្រ្តីជុំវិញខេត្តសិស្សានុសិស្ស ប្រជាពលរដ្ឋយ៉ាងច្រើនកុះករនៅវត្តទេពពោធិវង្សក្រុង-ខេត្តសៀមរាប។
ក្រុមអ្នកជំនាញបុរាណវិទ្យានៃអាជ្ញាធរជាតិអប្សរា កំពុងធ្វើកំណាយបន្ទាន់មួយនៅលើទំនប់ត្រពាំងខ្មោច ដែលស្ថិតនៅក្នុងភូមិស្រះស្រង់ខាងត្បូង សង្កាត់នគរធំ ក្រុងសៀមរាប មុននឹងអនុញ្ញាតឲ្យអាជ្ញាធរមូលដ្ឋាននៃសង្កាត់នគរធំ ធ្វើការស្តារឡើងវិញ។ ការធ្វើកំណាយនៅពេលនេះ ដើម្បីស្តារត្រពាំងបុរាណឡើងវិញនៅពេលនេះ គឺ ស្របតាមការអំពាវនាវរបស់ប្រមុខរាជរដ្ឋាភិបាលកម្ពុជា ខណៈពេលដែលកម្ពុជាកំពុងជួបប្រទះនឹងគ្រោះរាំងស្ងួត ដើម្បីឲ្យស្ថាប័នគ្រប់ជាន់ថ្នាក់យកចិត្តទុកដាក់ស្តារត្រពាំង និងស្រះបុរាណឡើងវិញសម្រាប់ទប់ទឹកប្រើប្រាស់កុំឲ្យខ្វះខាតនាឆ្នាំខាងមុខៗ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
7
ថ្ងៃនេះ
:
4215
ម្សិលមិញ
:
5965
សប្តាហ៍នេះ
:
10180
ខែនេះ
:
0252855
សរុប
:
012760444