ព័ត៌មានថ្មីៗ

អាជ្ញាធរជាតិអប្សរានិងអាជ្ញាធរជាតិព្រះវិហារបើកវគ្គបណ្តុះបណ្តាលស្តីពីការស្រាវជ្រាវផ្នែកបុរាណវិទ្យានិងប្រវត្តិសាស្រ្តខ្មែរដល់សិក្ខាកាមអន្តរជាតិ

បានផ្សាយនៅ ថ្ងៃទី 07 ខែ ធ្នូ ឆ្នាំ2016 08:42 AM ដោយ ៖ អាជ្ញាធរជាតិអប្សរា

អាជ្ញាធរជាតិអប្សរា អាជ្ញាធរជាតិព្រះវិហារ និងវិទ្យាស្ថានសិក្សាអាស៊ីអាគ្នេយ៍ (Institute of Southeast Asian Studies, Singapore) បានសហការរៀបចំវគ្គបណ្តុះបណ្តាលមួយស្តីពីការស្រាវជ្រាវផ្នែកបុរាណវិទ្យានិងប្រវត្តិសាស្ត្រកម្ពុជានិងសិង្ហបុរី ដល់សិក្ខាកាមជាតិ-អន្តរជាតិរយៈពេល២៥ថ្ងៃ គឺចាប់ពីថ្ងៃទី២០ ខែវិច្ឆិកា ដល់ថ្ងៃទី១៥ ខែធ្នូ ឆ្នាំ២០១៦។

វគ្គបណ្តុះបណ្តាលនេះទទួលខុសត្រូវគម្រោងដោយឯកឧត្តម ត័ន ប៊ុនស៊ុយ អគ្គនាយករងអាជ្ញាធរជាតិអប្សរា លោក អ៊ា ដារិទ្ធ អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ និងលោក Kyle Latinis ជាសហប្រធានគម្រោងតំណាងភាគីអាជ្ញាធរជាតិអប្សរា និងសិង្ហបុរី លោក ផេង សំអឿន តំណាងភាគីអាជ្ញាធរជាតិព្រះវិហារ។

មានវត្តមាននាកន្លែងកំណាយនៅអណ្តូងព្រេងក្នុងតំបន់កោះកេរ កឧត្តម ត័ន ប៊ុនស៊ុយ ក៏បានចុះទៅពិនិត្យ សួរសុខទុក្ខ និងលើកទឹកចិត្តសិក្ខាកាមទាំង១៤នាក់ មកពី១០ប្រទេសដូចជា៖ កម្ពុជា វៀតណាម ថៃ ម៉ាឡេស៊ី ឥណ្ឌូនេស៊ី សិង្ហបុរី ហ្វីលីពីន ឥណ្ឌា ញូវហ្សេឡែន និងអូស្ត្រាលីយ៉ាងកក់ក្តៅផងដែរ។ ឯកឧត្តមបានបញ្ជាក់ថា អ្នកដែលមកចូលរួមនេះ មិនមែនជាអ្នកបុរាណវិទ្យាទាំងអស់ទេ អ្នកខ្លះជាគ្រូបង្រៀនប្រវត្តិសាស្ត្រ អ្នកខ្លះទៀតជាជាតិពន្ធុវិទូ តែពួកគេសុទ្ធតែចង់ដឹងពីការកំណាយស្រាវជ្រាវ និងស្វែងយល់ពីប្រវត្តិសាស្ត្ររបស់ប្រទេសខ្មែរ។

លោក អ៊ា ដារិទ្ធ បានបញ្ជាក់ថា ឆ្នាំ២០១៦នេះជាលើកទី២ហើយនៃការបណ្តុះបណ្តាលអន្តរជាតិស្តីពីការស្រាវជ្រាវផ្នែកបុរាណវិទ្យា និងប្រវត្តិសាស្ត្រប្រទេសកម្ពុជានិងសិង្ហបុរី ក្នុងគោលបំណងដើម្បីបណ្តុះបណ្តាលនិងផ្សព្វផ្សាយពីវប្បធម៌និងអរិយធម៌ខ្មែរដល់សិក្ខាកាម បង្រៀនពីបច្ចេកទេសស្រាវជ្រាវបុរាណវិទ្យាតាមលក្ខណៈវិទ្យាសាស្ត្រ ព្រមទាំងពង្រីកទំនាក់ទំនងកិច្ចសហប្រតិបត្តិការក្នុងតំបន់អាស៊ីអាគ្នេយ៍។

លោកបន្តទៀតថា រយៈពេល២០ថ្ងៃនៃការសិក្សានេះគឺធ្វើឡើងនៅប្រទេសកម្ពុជា នៅលើទឹកដីប្រវត្តិសាស្ត្ររបស់ខ្មែរ ដោយសិក្ខាកាមទាំងអស់ត្រូវធ្វើដំណើរទស្សនកិច្ចសិក្សាទៅកាន់អតីតរាជធានីខ្មែរតាំងពីសម័យហ្វូណន (ស.វទី១-៦នៃគ.ស) សម័យចេនឡា (ស.វទី៧-៨នៃគ.ស) សម័យអង្គរ (ស.វទី៩-១៥នៃគ.ស) សម័យលង្វែក (ស.វទី១៦-១៧នៃគ.ស) សម័យឧត្តុង្គ (ស.វទី១៧-១៩នៃគ.ស) និងសម័យទំនើប (ស.វទី១៩-បច្ចុប្បន្ន) ហើយគ្រប់ទីតាំងប្រវត្តិសាស្ត្រទាំងអស់ គឺមានអ្នកជំនាញខ្មែរជាអ្នកធ្វើបទបង្ហាញណែនាំដល់សិក្ខាកាមទាំង១៤រូប។ វគ្គសិក្សានេះ ក៏មានកម្មវិធីបោះជំរុំនៅក្បែរត្រពាំងខ្នារក្នុងតំបន់កោះកេរដើម្បីធ្វើការស្រាវជ្រាវផ្នែកបុរាណវិទ្យានៅលើទីតាំងអតីតរាជធានីសម័យកោះកេរ និងហេដ្ឋារចនាសម្ពន្ធនៃការគ្រប់គ្រងទឹកនាសម័យនោះ ដោយមានមន្ត្រីជំនាញរបស់អាជ្ញាធរជាតិអប្សរានិងអាជ្ញាធរជាតិព្រះវិហារជាអ្នកដឹកនាំអនុវត្តដោយផ្ទាល់ ដើម្បីបង្រៀនសិក្ខាកាមជាតិនិងអន្តរជាតិ។ បន្ថែមពីនោះទៀត សិក្ខាកាមទាំងអស់ក៏បានសិក្សាស្វែងយល់ពីតួនាទីរបស់អាជ្ញាធរជាតិអប្សរាក្នុងតំបន់ឧទ្យានអង្គរ និងតួនាទីរបស់អាជ្ញាធរជាតិព្រះវិហារនៅតំបន់ព្រះវិហារផងដែរ។ រីឯ៥ថ្ងៃចុងក្រោយនៃវគ្គបណ្តុះបណ្តាល សិក្ខាកាមជាតិ-អន្តរជាតិ នឹងរៀនអំពីរបៀបវិភាគវត្ថុបុរាណ សរសេររបាយការណ៍ ការរៀបចំបទបង្ហាញជាសាធារណៈ និងទស្សនកិច្ចសិក្សាបុរាណដ្ឋាន និងសារមន្ទីរនៅប្រទេសសិង្ហបុរីវិញម្តង។

ក្នុងនាមជាសហប្រធានភាគីសិង្ហបុរីនិងជាអ្នកសម្របសម្រួលកម្មវិធីដែរនោះ លោក KYLE Latinis បានលើកឡើងថា លោកធ្វើការនៅខ្មែររយៈពេល២២ឆ្នាំមកហើយ លោកចាប់អារម្មណ៍យ៉ាងខ្លាំងចំពោះវប្បធម៌និងអរិយធម៌ខ្មែរដ៏រុងរឿងនិងគួរឱ្យចាប់អារម្មណ៍បំផុតតាំងពីសម័យហ្វូណនរហូតដល់បច្ចុប្បន្ន។ លោកនឹងជំរុញកិច្ចសហការជាមួយអាជ្ញាធរជាតិអប្សរា អាជ្ញាធរជាតិព្រះវិហារបន្តទៀតសម្រាប់គម្រោងឆ្នាំក្រោយៗដើម្បីបើកវគ្គបណ្តុះបណ្តាលអន្តរជាតិនេះទៀត ព្រោះមានប្រធានបទជាច្រើនដែលត្រូវសិក្សា ទាំងជីវភាពរស់នៅរបស់ប្រជាជនខ្មែរ វប្បធម៌ និងប្រាង្គប្រាសាទនានា។ ពិសេសជាងនេះគឺ លោកសប្បាយចិត្តដែលឃើញខ្មែរ មានអ្នកជំនាញអាចធ្វើការប្រកបដោយសមត្ថភាពពិតៗ អាចបង្រៀនដល់បរទេសពីវប្បធម៌របស់ខ្លួនបាន៕














បំណែកបដិមានិងថ្មចម្លាក់ចំនួន៤១ដុំ ត្រូវបានបានព្រះចៅអធិការវត្តព្រះឥន្ទទេព ព្រះនាម សែម សំ ពេញព្រះទ័យប្រគល់ជូនអាជ្ញាធរជាតិអប្សរាថែរក្សា ក្រោយពីព្រះអង្គរបានប្រមូលយកទៅរក្សាទុកបណ្តោះអាសន្ននៅក្នុងបរិវេណវត្តដែលស្ថិតនៅជ្រុងអាគ្នេយ៍នៃប្រាសាទបាយ័ន្ត។
ថ្ងៃទី១១ ខែតុលា ឆ្នាំ២០២០ ឯកឧត្តម ហង់ ពៅ អគ្គនាយកនៃអាជ្ញាធរជាតិអប្សរានិងសហការី បានចុះពិនិត្យស្ថានភាពទឹកក្នុងតំបន់រមណីយដ្ឋានអង្គរ។
ប្រាសាទកណ្តាលស្រះស្រង់ បានដំណើរការជួសជុលឱ្យមានរូបរាងឡើងវិញកាលពីអំឡុងខែឧសភា ឆ្នាំ២០២០ ដោយអ្នកជំនាញអាជ្ញាធរជាតិអប្សរា។ មកដល់ពេលនេះ ក្រុមការងារបានរៀបគ្រឹះប្រាសាទជិតរួចរាល់ហើយ។
ទឹកជាច្រើនលានម៉ែត្រគូប ត្រូវបានអាជ្ញាធរជាតិអប្សរា ប្រមូលរក្សាទុកនៅតាមអាងស្ដុកទឹកនានាក្នុងតំបន់រមណីយដ្ឋានអង្គរ បន្ទាប់ពីកម្ពុជាមានភ្លៀងធ្លាក់ជាបន្តបន្ទាប់ដោយសារការរងនូវឥទ្ធិពលព្យុះពីតំបន់ជុំវិញនារយៈពេលចុងក្រោយនេះ។ ក្នុងការងារនេះ អាជ្ញាធរជាតិអប្សរាបានបង្ហាញនូវអារម្មណ៍ជាទីមោទនបំផុត ក្នុងការប្រមូលទឹកស្ដុកទុកដើម្បីបម្រើកិច្ចការអភិរក្សប្រាសាទ ក៏ដូចជាត្រៀមសម្រាប់ចែកចាយដល់ប្រជាពលរដ្ឋក្នុងតំបន់សម្រាប់ប្រើប្រាស់នារដូវប្រាំងខាងមុខនេះ។
១ អគ្គនាយកអាជ្ញាធរជាតិអប្សរាដឹកនាំក្រុមការងារចុះពិនិត្យការដ្ឋានមួយចំនួនក្នុងតំបន់រមណីយដ្ឋានអង្គរ
នៅព្រឹកថ្ងៃទី៨ ខែតុលា ឆ្នាំ២០២០ ឯកឧត្ដម ហង់ ពៅ អគ្គនាយកអាជ្ញាធរជាតិអប្សរា បានដឹកនាំក្រុមការងារ ចុះពិនិត្យមើលការដ្ឋានមួយចំនួន ក្នុងតំបន់រមណីយដ្ឋានអង្គរ ដើម្បីតាមដាន និងសុំយោបល់សម្រេចជារួម លើកិច្ចការអភិរក្ស និងអភិវឌ្ឍន៍នានា។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
11
ថ្ងៃនេះ
:
7089
ម្សិលមិញ
:
7094
សប្តាហ៍នេះ
:
29518
ខែនេះ
:
0124197
សរុប
:
012893629