ព័ត៌មានថ្មីៗ

ការងារអភិរក្សបេតិកភណ្ឌ ៖ បណ្តុះបណ្តាលតែអ្នកជំនាញមិនទាន់គ្រប់គ្រាន់ទេ ទាល់តែអ្នកស្រុកចេះផងទើបរក្សាគង់

បានផ្សាយនៅ ថ្ងៃទី 19 ខែ សីហា ឆ្នាំ2016 01:35 PM ដោយ ៖ អាជ្ញាធរជាតិអប្សរា

អ្នកជំនាញបុរាណវិទ្យាខ្មែរ និងជប៉ុននៃគម្រោងអប់រំបេតិកភណ្ឌរបស់សាកលវិទ្យាល័យសូហ្វីយ៉ាបានកាន់ដៃគ្នាតាំងពីឆ្នាំ១៩៨៩មក ដើម្បីធ្វើកំណាយស្រាវជ្រាវ និងបណ្តុះបណ្តាលធនធានមនុស្សទាក់ទងនឹងចំណេះដឹងបុរាណវិទ្យា ស្ថាបត្យកម្ម ក្នុងគោលដៅអភិរក្សបេតិកភណ្ឌអង្គរ។ មិនមែនបណ្តុះបណ្តាលឲ្យមានតែអ្នកជំនាញប៉ុណ្ណោះទេ គម្រោងអប់រំបេតិកភណ្ឌនេះក៏បានបណ្តុះបណ្តាលដល់អ្នកស្រុក និងសិស្សានុសិស្សរាប់រយនាក់មកហើយ ដើម្បីឲ្យអ្នកអង្គរផ្ទាល់កាន់តែយល់ កាន់តែស្រឡាញ់ និងចូលរួមថែរក្សានូវមរតកដូនតាដ៏មានតម្លៃរបស់ខ្លួន។

នៅព្រឹកថ្ងៃទី១៩ ខែសីហានេះ គម្រោងអប់រំបេតិកភណ្ឌរបស់សាកលវិទ្យាល័យសូហ្វីយ៉ានៃប្រទេសជប៉ុន ក្រោមកិច្ចសហការនៃអាជ្ញាធរជាតិអប្សរា សាកលវិទ្យាល័យភូមិន្ទវិចិត្រសិល្បៈ និងមន្ទីរអប់រំយុវជន និងកីឡាខេត្តសៀមរាប បានដឹកនាំសិស្សានុសិស្សប្រមាណ៦០នាក់ មកពីអនុវិទ្យាល័យព្រះឥន្ទកោសា ដើម្បីមកធ្វើកម្មសិក្សាអំពីបេតិកភណ្ឌនៅតំបន់ប្រាសាទបន្ទាយក្តី។

លោក ញឹម សុធាវិន្ទ អតីតនិស្សិតបុរាណវិទ្យាខ្មែរ និងជាអ្នកសម្រសម្រួលកម្មវិធីអប់រំបេតិកភណ្ឌនេះបានរៀបរាប់ថា កម្មសិក្សារបស់សិស្សានុសិស្សនៅពេលនេះ គឺក្នុងគោលបំណងជួយឲ្យពួកគាត់មានចំណេះដឹងមូលដ្ឋានខ្លះអំពីតម្លៃបេតិកភណ្ឌ និងកិច្ចការអភិរក្សបេតិកភណ្ឌ។ លោកបន្តថា “យើងមិនអាចបណ្តុះបណ្តាលតែអ្នកជំនាញមួយមុខគ្រប់គ្រាន់ទែ លុះត្រាតែប្រជាជនដែលនៅជុំវិញអង្គរមានការយល់ដឹង និងចូលរួមថែរក្សាផង ទើបការអភិរក្សរបស់យើងបានជោគជ័យ ជាពិសេស គឺយើងចង់បណ្តុះបណ្តាលសិស្សតាំងពីក្មេងៗទៅ បន្តិចម្តងៗពួកគេនឹងបានយល់ តែកាលណាគេយល់ គេនឹងស្រឡាញ់ ហើយនឹងចូលរួមថែរក្សាមិនខាន”

ព្រឹទ្ធបុរសមហាវិទ្យាល័យបុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈ លោក មួន សុភាព បានរៀបរាប់ថា ទំនាក់ទំនងរវាងសាកលវិទ្យាល័យសូហ្វីយ៉ា និងសាកលវិទ្យាល័យភូមិន្ទវិចិត្រសិល្បៈ បានចាប់ផ្តើមតាំងពីឆ្នាំ១៩៩០មកម្ល៉េះ។ តាមរយៈទំនាក់ទំនងនេះ សាកលវិទ្យាល័យសូហ្វីយ៉ាបានបញ្ជូនអ្នកជំនាញបុរាណវិទ្យាជាច្រើន មកបណ្តុះបណ្តាលនិស្សិតនៅសាកលវិទ្យាល័យភូមិន្ទវិចិត្រសិល្បៈ និងដឹកនាំមកសិក្សាអនុវត្តផ្ទាល់នៅក្នុងការងារអភិរក្សជាក់ស្តែងនៅក្នុងតំបន់អង្គរ ជាពិសេស បានផ្តល់អាហារូបករណ៍ដល់និស្សិតខ្មែរទៅបន្តយកថ្នាក់អនុបណ្ឌិត និងបណ្ឌិតនៅប្រទេសជប៉ុន ដែលមកទល់នឹងពេលនេះ មានអ្នកជំនាញផ្នែកបុរាណវិទ្យា និងស្ថាបត្យកម្មដែលបានបញ្ចប់ថ្នាក់បណ្ឌិត និងអនុបណ្ឌិតជិត៣០នាក់ហើយ។

អ្នកគ្រូ ញឹម ធារ៉ា ដែលបានដឹកនាំសិស្សមកធ្វើកម្មសិក្សាក្នុងកម្មវិធីនេះបានរៀបរាប់ថា អ្នកគ្រូពិតជារីករាយណាស់ ដែលកម្មវិធីបានជ្រើសរើសសាលារបស់អ្នកគ្រូ ដោយបានផ្តល់ឱកាសឲ្យសិស្សរបស់អ្នកគ្រូបានយល់ដឹងកាន់តែទូលាយអំពីបេតិកភណ្ឌរបស់ខ្លួន។ “យើងខ្មែរ ពេលមកដើរលេង គ្រាន់តែលេងធម្មតា មិនដឹងថាម៉េចទេ តែពេលនេះកម្មវិធីមានអ្នកជួយពន្យល់ណែនាំចឹងទៅ ក្មេងៗបានចេះដឹងច្រើន។ មិនត្រឹមតែក្មេងៗទេ ខ្ញុំដែលបានជូនមកនេះ ក៏ទទួលបានចំណេះដឹងបន្ថែមច្រើនដែរ។ ខ្ញុំសុំឲ្យកម្មវិធីនេះ ឬស្ថាប័នអភិរក្សផ្សេងទៀតបន្តការងាររបៀបនេះឲ្យបានច្រើន ដើម្បីឲ្យកូនខ្មែរស្គាល់តម្លៃមរតកដូនតារបស់ខ្លួនឯង”

ប្អូនស្រី ភុយ លីអឺ ជាសិស្សថ្នាក់ទី៩បានរៀបរាប់ថា តាមរយៈកម្មវិធីនេះប្អូនស្រីបានចេះដឹងច្រើន ដោយលោកគ្រូបានណែនាំអំពីប្រវត្តិខ្លះនៃការកសាងប្រាសាទ តម្លៃបេតិកភណ្ឌ និងការងារមួយចំនួនទៀត ដែលយើងទាំងអស់គ្នាត្រូវចូលរួមក្នុងការងារថែរក្សាបេតិកភណ្ឌ។ ប្អូនស្រីតាំងចិត្តថា ពេលប្អូនរៀនដល់ថ្នាក់មហាវិទ្យាល័យ ប្អូននឹងជ្រើសមុខវិជ្ជាណាដែលអាចឲ្យប្អូនដឹងកាន់តែច្រើនអំពីបេតិកភណ្ឌ និងអាចចូលរួមថែរក្សាបេតិកភណ្ឌនេះបានដោយផ្ទាល់។ “ខ្ញុំសុំឲ្យអ្នកគ្រប់គ្នាដែលមកទស្សនាប្រាសាទខ្មែរ សូមកុំចោលសម្រាមផ្តេសផ្តាស កុំស្រែកឡូឡា កុំឡើងជិះជាន់ចម្លាក់ប្រាសាទ និងកុំស្លៀកខ្លីៗខើចៗ ព្រោះប្រាសាទគឺជាទីគោរពបូជា”








នេះជាលើកទី២ហើយដែលម្ចាស់ភោជនីយដ្ឋាន «ផ្ទះបាយតានីខ្មែរអង្គរ» បានស្ម័គ្រចិត្តរុះរើសំណង់ភោជនីយដ្ឋានចំនួនមួយខ្នងបន្ថែមទៀត ដែលជាអតីតភោជនីយដ្ឋាន «ភ្នំស្រី» ដើម្បីសម្រួលដល់ការសាងសង់ទីលានបដិសណ្ឋារកិច្ចមុខប្រាសាទអង្គរវត្ត នៅថ្ងៃទី២៧ ខែឧសភា ឆ្នាំ២០២០នេះ។
ប្រជាពលរដ្ឋដែលជាម្ចាស់ស្រុកក្នុងតំបន់អង្គរ តែងទទួលបានការយកចិត្តទុកដាក់ខ្ពស់ពីសំណាក់អាជ្ញាធរជាតិអប្សរា ក្នុងការអនុញ្ញាតជាគោលការណ៍សាងសង់លំនៅដ្ឋានរបស់ខ្លួនក៏ដូចជាសំណង់ឧបសម្ពន្ធមួយចំនួនទៀត។
នាយកដ្ឋានទ្រទ្រង់បច្ចេកទេស និងអន្តរវិស័យ របស់អាជ្ញាធរជាតិអប្សរា កំពុងចាប់ផ្ដើមអ៊ុតគំនូសចរាចរណ៍នៅលើកំណាត់ទ្រូងផ្លូវប្រវែង២១៨១ម៉ែត្រ ចាប់ពីរង្វង់មូលព្រះបាទជ័យវរ្ម័នទី៧មកដល់ចំណុចព្រលានយន្តហោះ និងកំពុងដាំឧបករណ៍ចំណាំងភ្លើង(គ្រាប់ភ្នែកកង្កែប)លើកំណាត់ទ្រូងផ្លូវប្រវែង៦៧១២ម៉ែត្រទៀត ចាប់ពីចំណុចមុខភោជនីយដ្ឋានប្រាសាទនាងពៅទៅដល់ចំណតឡាន មុខប្រាសាទអង្គរវត្ត។
អាជ្ញាធរជាតិអប្សរា មានកិត្តិយស សូមជូនដំណឹងដល់ក្រសួង ស្ថាប័នជាតិ-អន្តរជាតិ អាជ្ញាធរដែនដី មន្ទីរ-អង្គភាព សមាគមទីភ្នាក់ងារទេសចរណ៍ សមាគមមគ្គុទេសទេសចរណ៍ សមាគមដឹកជញ្ជូនភ្ញៀវទេសចរណ៍ ក្រុមហ៊ុនទេសចរណ៍ភ្ញៀវទេសចរជាតិ-អន្តរជាតិ សាធារណជន ព្រមទាំងបងប្អូនប្រជាពលរដ្ឋទាំងអស់មេត្តាជ្រាបថា អាជ្ញាធរជាតិអប្សរា នឹងបើកឲ្យដំណើរការឡើងវិញ ជូនភ្ញៀវជាតិ-អន្តរជាតិ និងសារធារណជនទាំងអស់ បានចូលទស្សនា ដោយមិនគិតថ្លៃ ចាប់ពីថ្ងៃទី ០១ ខែមិថុនា ឆ្នាំ២០២០ នេះតទៅ នៅសារមន្ទីទាំងបីរបស់អាជ្ញាធរជាតិអប្សរា។
អាជ្ញាធរជាតិអប្សរាបានលើកទឹកចិត្តប្រជាពលរដ្ឋដែលរស់នៅក្នុងតំបន់ឧទ្យានអង្គរ ឱ្យចាប់អារម្មណ៍និងការសាងសង់លំនៅដ្ឋានតាមគំរូផ្ទះខ្មែរបុរាណ។ ទាំងនេះគឺ ដើម្បីរួមចំណែកថែរក្សាទំនៀមទម្លាប់ ប្រពៃណីពីបុរាណ ការពារទេសភាពវប្បធម៌ ព្រមទាំងជួយលើកគុណតម្លៃរមណីយដ្ឋានប្រវត្តិសាស្រ្តអង្គរ ដែលជាសម្បត្តិបេតិកភណ្ឌពិភពលោកផង។
ដើមដំបូងមុន12345...317318បន្ទាប់ចុងក្រោយ

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
6
ថ្ងៃនេះ
:
11564
ម្សិលមិញ
:
16308
សប្តាហ៍នេះ
:
47713
ខែនេះ
:
0195821
សរុប
:
010876474