ព័ត៌មានថ្មីៗ

បញ្ហាអនាម័យនិងទឹកស្អាត ជាកង្វល់ដែលអាជ្ញាធរជាតិអប្សរាត្រូវដោះស្រាយសម្រាប់សហគមន៍ក្នុងឧទ្យានអង្គរ

បានផ្សាយនៅ ថ្ងៃទី 06 ខែ សីហា ឆ្នាំ2016 01:35 PM ដោយ ៖ អាជ្ញាធរជាតិអប្សរា
ដោយមើលឃើញពីផលវិបាកនិងផលប៉ះពាល់ដល់សុខភាពប្រជាជន សេដ្ឋកិច្ចគ្រួសារ សេដ្ឋកិច្ចជាតិ ការអភិវឌ្ឍធនធានមនុស្ស បរិស្ថាន និងវិស័យទេសចរណ៍នៅក្នុងតំបន់អង្គរ អាជ្ញាធរជាតិអប្សរាបានរៀបចំសិក្ខាសាលាមួយស្តីអំពី «ទឹកស្អាតនិងអនាម័យ» ក្នុង គម្រោងសុវុឌ្ឍិកម្មនៃការសម្អាតទឹកនិងការគ្រប់គ្រងទឹកក្នុងតំបន់អង្គរ នាព្រឹកថ្ងៃទី៥ ខែសីហា ឆ្នាំ២០១៦។

សិក្ខាសាលានេះគឺផ្តោតសំខាន់លើគម្រោងសាកល្បងគំរូនៃគម្រោងដែលអាជ្ញាធរជាតិអប្សរាសហការជាមួយរដ្ឋាភិបាលបារាំង ដើម្បីធ្វើការសិក្សាអំពីការគ្រប់គ្រងទឹកស្អុយ ទឹកស្អាត ការសម្អាតទឹក និងកាកសំណល់ផ្សេងៗនៅក្នុងតំបន់អង្គរ ដោយមានឯកឧត្តម ហង់ ពៅ អគ្គនាយករងតំណាងដ៏ខ្ពង់ខ្ពស់ឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរាចូលរួមជាអធិបតី។ ក្នុងនោះក៏មានវត្តមានរបស់អគ្គនាយករងនៃនាយកដ្ឋានពាក់ព័ន្ធ ក្រុមការងារសហគមន៍ អាជ្ញាធរមូលដ្ឋាន តំណាងប្រជាជន ដើម្បីផ្លាស់ប្តូរបទពិសោធន៍គ្នានិងសិក្សាបច្ចេកទេសលម្អិតពីអ្នកជំនាញមកពីគម្រោងទឹកស្អាតនិងអនាម័យរបស់ធានាគារពិភពលោក អង្គការIDE និងក្រសួងអភិវឌ្ឍន៍ជនបទ ដែលមានបទពិសោធន៍ក្នុងការងារនេះ ឱ្យសិក្ខាកាមយកទៅអនុវត្តបន្តនៅតាមសហគមន៍ក្នុងតំបន់អង្គរប្រកបដោយប្រសិទ្ធភាព។

លោក ចាន់ វីរៈ មន្ត្រីគម្រោងទឹកស្អាតនិងអនាម័យរបស់ធានាគារពិភពលោក បានលើកឡើងថា បញ្ហាអនាម័យនិងកង្វះទឹកស្អាតមិនមែនជារឿងមួយគ្រួសារ ហើយគ្រាន់តែធ្វើឱ្យកខ្វក់បរិស្ថានតែមួយមុខទេ តែវាជារឿងប៉ះពាល់ដល់ការរីកចម្រើននៃប្រទេសជាតិទាំងមូលដែលត្រូវយកចិត្តទុកដាក់ខ្ពស់ ព្រោះវាប៉ះពាល់ដល់សុខភាពប្រជាជន សេដ្ឋកិច្ច និងការលូតលាស់ធនធានមនុស្សក្នុងការអភិវឌ្ឍសង្គមផងដែរ។ លោកបញ្ជាក់ទៀតថា ប្រជាជនមួយចំនួនធំនៃប្រទេសកម្ពុជាពុំមានបង្គន់សមស្របប្រើប្រាស់ ខ្លះទៀតកំពុងបន្ទោរបង់ពាសវាលពាសកាល និងខ្លះទៀតបរិភោគទឹកដែលបានមកពីប្រភពមិនល្អប្រសើរ ជាហេតុបណ្តាលឱ្យជាតិនិងគ្រួសារត្រូវចំណាយថវិការាប់លានដុល្លារផងដែរក្នុងមួយឆ្នាំៗទៅលើសេវាសុខភាពសាធារណៈ និងការបាត់បង់ធនធានមនុស្សដោយសារជំងឺដែលឆ្លងពីការខ្វះខាតអនាម័យនិងទឹកស្អាតសម្រាប់ប្រើប្រាស់។

ឯកឧត្តម ហង់ ពៅ ក៏បានលើកឡើងដែរថា ដើម្បីទាក់ទាញទេសចរឱ្យមកទស្សនាតំបន់អង្គរឱ្យបានច្រើននិងស្នាក់នៅបានយូរ មានតែប្រាសាទស្អាតមិនគ្រប់គ្រាន់ទេ គឺត្រូវឱ្យភូមិដ្ឋានរបស់ប្រជាជនក្នុងតំបន់អង្គរមានការរស់នៅស្អាត មានអនាម័យ និងបរិស្ថានល្អ ព្រោះទេសចរជាច្រើនបានចាប់អារម្មណ៍ទៅលើទេសចរសហគមន៍ជាបណ្តើរៗហើយ។ ឯកឧត្តមបញ្ជាក់ទៀតថា ឥទ្ធិពលនៃកំណើនទេសចរជារៀងរាល់ឆ្នាំជារឿងគួរឱ្យមោទនៈ តែក៏ធ្វើឱ្យមានកំណើនអ្នកចំណូលស្រុកដែរ ដែលធ្វើឱ្យមានកំណើននៃទឹកស្អុយ ទឹកស្អាត និងសំរាមកើនឡើងដូចគ្នា ដែលមិនត្រឹមតែប៉ះពាល់ដល់សុខភាពប្រជាជន បរិស្ថានទេ ថែមទាំងប៉ះពាល់ដល់ទេសភាពវប្បធម៌ក្នុងតំបន់អង្គរផងដែរ ពិសេសការប្រើប្រាស់ថង់ប្លាស្ទិកហើយពុំបានគ្រប់គ្រងសំរាមទាំងនេះបានត្រឹមត្រូវ។

ដូច្នេះ ដើម្បីលើកកម្ពស់ការរស់នៅស្អាត មានទឹកស្អាតបរិភោគនិងប្រើប្រាស់គ្រប់គ្នា តាមរយៈគម្រោងដែលអាជ្ញាធរជាតិអប្សរាសហការជាមួយរដ្ឋាភិបាលបារាំង បានសិក្សានិងអនុវត្តគម្រោងគំរូអំពីទឹកស្អាតនិងអនាម័យលើភូមិចំនួន៤ភូមិមានលក្ខណៈផ្សេងៗពីគ្នា គឺភូមិស្រះស្រង់ខាងជើង ភូមិរហាល (លក្ខណៈប្រមូលផ្តុំ) ស្រែចង្ហូត (តាមដងផ្លូវ) និងលាងដៃ (ភូមិដែលមានផ្ទះដាច់ពីគ្នា) ដើម្បីសាកល្បងក្នុងការពិសោធន៍ មុននឹងយកទៅអនុវត្តជាក់ស្តែងលើភូមិទាំង១១២ក្នុងតំបន់អង្គរដោយមានក្រុមការងារសហគមន៍ជាអ្នកផ្សព្វផ្សាយបន្ត សំដៅធ្វើយ៉ាងណាឱ្យប្រជាជនក្នុងតំបន់អង្គរទទួលបាននូវភាពសុខដុមរមនា៕












នៅទីស្នាក់ការអាជ្ញាធរជាតិអប្សរា នាថ្ងៃទី១១ ខែកុម្ភៈ ឆ្នាំ ២០២០ បានរៀបចំពិធីបើកសវនកម្មផ្ទៃក្រៅ ប្រព័ន្ធគ្រប់គ្រងបរិស្ថាន ISO14001: 2015 ដោយស្ថាប័នធានាគុណភាពជប៉ុន ហៅកាត់ថា JQA (Japan Quality Assurance)។
គិតត្រឹមថ្ងៃទី១៩ ខែកុម្ភៈ ឆ្នាំ២០២០ខាងមុខនេះ គឺមានរយៈពេល២៥ឆ្នាំហើយ ដែលអាជ្ញាធរជាតិអប្សរាត្រូវបានបង្កើតឡើង អនុលោមទៅតាមគោលការណ៍មួយក្នុងចំណោមគោលការណ៍ទាំង៥ សម្រាប់លក្ខខណ្ឌនៃការចុះបញ្ជីរមណីយដ្ឋានអង្គរ ជាសម្បត្តិបេតិកភណ្ឌពិភពលោក។
ភ្នាក់ងារទេសចរណ៍ប្រចាំប្រាសាទអង្គរវត្ត បាននាំគ្នាសម្អាតបរិស្ថាន រៀបចំអនាម័យនៅក្តារបែន និងតាមបរិវេណប្រាសាទអង្គរវត្តទាំងមូល ដើម្បីលើកកម្ពស់សោភ័ណភាពក្នុងប្រាសាទ និងសុខុមាលភាពភ្ញៀវទេសចរដែលចូលមកទស្សនាក្នុងប្រាសាទដ៏ល្បីល្បាញមួយនេះ មិនឱ្យមានផលប៉ះពាល់ដល់សុខភាពនិងអារម្មណ៍ក្នុងពេលទស្សនា៕
បំណែកជើងបដិមាមួយត្រូវបានក្រុមការងារជួសជុលប្រាសាទទន្លេស្ងួតនៃអាជ្ញាធរជាតិអប្សរារកឃើញកាលពីថ្ងៃទី១៣ ខែមករា ឆ្នាំ២០២០។

បំណែកជើងបដិមានេះត្រូវបានរកឃើញនៅទីតាំងដែលមានចម្ងាយត្រឹមតែ១ម៉ែត្រពីចុងជើងនៃទ្វារបាលដែលបានរកឃើញកាលពីឆ្នាំ២០១៧ ដោយគម្រោងស្រាវជ្រាវរវាងអាជ្ញាធរជាតិអប្សរា វិទ្យាស្ថានបច្ចេកវិទ្យាកម្ពុជា (ITC) និងវិទ្យាស្ថានស្រាវជ្រាវអាស៊ីអាគ្នេយ៍នៃប្រទេសសិង្ហបុរី (ISEAS)។
ដើមដំបូងមុន12345...289290បន្ទាប់ចុងក្រោយ

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
4
ថ្ងៃនេះ
:
6445
ម្សិលមិញ
:
22285
សប្តាហ៍នេះ
:
55698
ខែនេះ
:
0200140
សរុប
:
010156287