NEWS

The English version of this website is still under construction. This section is only available in Khmer language at this stage. We apologise for any inconvenience

Published on 22 July 2016 03:35 PM Post By ៖ Apsara National Authority

ការចេះដឹងអំពីបេតិកភណ្ឌរបស់ខ្លួន នឹងជំរុញឲ្យយុវជនរឹងរឹតតែស្រឡាញ់ និងមានឆន្ទៈមុតមាំក្នុងការថែរក្សាអភិរក្សឲ្យបានគង់វង្ស។ កាលបើយុវជនដែលជាទំពាំងស្នងឫស្សីមានការយល់ដឹងច្បាស់ និងរួមចំណែកថែរក្សាហើយនោះ បេតិកភណ្ឌដូនតានឹងអាចតាំងនៅយូរអង្វែងតជំនាន់វែងឆ្ងាយទៅទៀត។ ដូច្នេះ មានតែអប់រំទេដែលអាចសម្រេចបំណងនេះបាន។

អាជ្ញាធរជាតិអប្សរា ដែលមានបេសកកម្មលើការងារអភិរក្ស​និងអភិវឌ្ឍន៍រមណីយដ្ឋានអង្គរ បានបំពេញតួនាទីនេះជាបណ្តើរៗមកហើយ។ ជាក់ស្តែង ក្រុមការងារសហគមន៍ដែលមានគ្រប់ទាំង៥ស្រុក-ក្រុងក្នុងរមណីយដ្ឋាន តែងចុះអប់រំប្រជាពលរដ្ឋតាមទីតាំងទាំងនេះជាប្រចាំ ដើម្បីឲ្យពួកគាត់បានយល់ដឹង និងចូលរួមថែរក្សាបេតិកភណ្ឌអង្គរ។

ដោយឡែក ក្នុងឆ្នាំ២០១៦ គឺចាប់ពីខែកក្កដានេះតទៅ អាជ្ញាធរជាតិអប្សរាបានដំណើរការចុះអប់រំបេតិកភណ្ឌតាមសាលារៀនជាបន្តទៀត ក្នុងទិសដៅបណ្តុះផ្នត់គំនិតយុវសិស្សទាំងអស់ឲ្យចេះស្រឡាញ់ និងចូលរួមថែរក្សាបេតិកភណ្ឌទាំងអស់គ្នា។ ថ្ងៃទី២២ ខែកក្កដានេះ សាកលវិទ្យាល័យអង្គរ គឺជាទិសដៅដំបូងគេបង្អស់នៃការចុះអប់រំស្តីពីបេតិកភណ្ឌ ក្រោមប្រធានបទ “បេតិកភណ្ឌដើម្បីទាំងអស់គ្នា ទាំងអស់គ្នាដើម្បីបេតិកភណ្ឌ”

លោក មួង ណារិន សាកលវិទ្យាធិការរងនៃសាកលវិទ្យាល័យអង្គរបានលើកឡើងថា ក្នុងនាមថ្នាក់ដឹកនាំ និងខ្លួនលោកផ្ទាល់ លោកពិតជារីករាយ និងស្វាគមន៍ចំពោះការផ្សព្វផ្សាយនេះខ្លាំងណាស់។ ទោះជានិស្សិតរៀនពីមុខវិជ្ជាអ្វីក៏ដោយ តែចំណេះដឹងអំពីបេតិកភណ្ឌរបស់ដូនតានេះ និស្សិតត្រូវតែចេះដឹងគ្រប់គ្នា។ វាមិនត្រឹមតែជួយនិស្សិតឲ្យចេះស្រឡាញ់ និងចូលរួមការពារទេ តែវាជាចំណេះដឹងទូទៅមួយ ដែលជួយដល់និស្សិតពេលប្រឡងធ្វើការងារក្រោយបញ្ចប់កិច្ចសិក្សាផងដែរ។

លោក សុខ នី អនុប្រធានមន្ទីរអប់រំយុវជន និងកីឡាខេត្តសៀមរាប ដែលបានអញ្ជើញចូលរួមក្នុងពិធីព្រឹកមិញនេះ ក៏បានសម្តែងនូវការគាំទ្រពេញទំហឹងលើការចុះអប់រំអំពីបេតិកភណ្ឌនេះដែរ។ លោកមានប្រសាសន៍ថា និស្សិតភាគច្រើនមិនសូវយល់ច្បាស់អំពីបេតិកភណ្ឌនេះទេ សូម្បីអ្នកដែលរស់នៅក្នុងតំបន់អង្គរក៏ដោយ ក៏មិនប្រាកដថាបានយល់ដឹងថាអ្វីខ្លះជាបេតិកភណ្ឌដែរ។ ដូច្នេះ ការចុះអប់រំរបៀបនេះ ពិតជាអាចផ្តល់ចំណេះដឹងដែលអាចជួយឲ្យនិស្សិត ចេះគិតគូរអំពីតម្លៃបេតិកភណ្ឌដែលដូនតាបានបន្សល់ទុកឲ្យមិនខាន។

ឯកឧត្តម សុខ សង្វារ អគ្គនាយករងនៃអាជ្ញាធរជាតិអប្សរា និងជាប្រធានក្រុមការងារនេះមានប្រសាសន៍ទៅកាន់និស្សិតប្រមាណជាង១៤០នាក់ ដែលបានចូលរួមក្នុងពិធីផ្សព្វផ្សាយនេះថា ការអភិរក្សបេតិកភណ្ឌគឺចាំបាច់ត្រូវមានការចូលរួមពីយុវជនគ្រប់គ្នា ប៉ុន្តែមុននឹងយុវជនអាចចូលរួមក្នុងការងារនេះបាន ទាល់តែបានយល់ច្បាស់អំពីតម្លៃនៃបេតិកភណ្ឌ និងសារៈសំខាន់ដែលចាំបាច់ត្រូវតែថែរក្សា។ “យើងត្រូវស្គាល់ថា យើងជាអ្នកណា? មានអ្វីខ្លះដែលសំខាន់សម្រាប់យើងនិងគ្រួសារយើង? ពេលដឹងហើយ យើងនឹងស្រឡាញ់របស់នោះ ថែរក្សារបស់នោះមិនខាន។ ដូចគ្នាដែរ យើងត្រូវដឹងថា ដូនតាយើងបន្សល់អ្វីខ្លះដល់យើង? របស់ទាំងនោះសំខាន់យ៉ាងណាខ្លះដល់យើង? យើងត្រូវតែដឹង ដើម្បីថែរក្សាមរតកទាំងនោះឲ្យបានគង់វង្ស”

ឯកឧត្តម​បន្ថែម​ថា​ តាមរយៈ​កិច្ច​ប្រឹងប្រែង​របស់រាជរដ្ឋាភិបាលកម្ពុជា​ បានធ្វើ​ឲ្យអង្គរដែលបានទទួលចុះបញ្ជីបេតិកភណ្ឌពិភពលោកក្នុងឆ្នាំ១៩៩២​ ជាបេតិកភណ្ឌប្រឈមនឹងគ្រោះថ្នាក់នោះ​ បានក្លាយ​ជាបេតិកភណ្ឌពិភពលោកពេញលេញ​ ហើយយន្តការគ្រប់គ្រងអង្គរក៏បានក្លាយជាគំរូនៃបណ្តាប្រទេសផ្សេងៗក្នុងពិភពលោកទៀតផង។​ ដូច្នេះ​ យើងជាយុវជនទាំងអស់គ្នាត្រូវខិតខំបន្តទៀត​ ដើម្បី​បន្តការងារនេះឲ្យរឹងរឹតតែប្រសើរឡើង។​

គួរបញ្ជាក់ថា គម្រោងចុះអប់រំអំពីបេតិកភណ្ឌតាមសាលារៀន នឹងធ្វើឡើងគ្រប់សាកលវិទ្យាល័យ និងវិទ្យាស្ថានទាំងអស់ក្នុងខេត្តសៀមរាប រួមទាំងអនុវិទ្យាល័យ និងវិទ្យាល័យទាំងអស់ដែលស្ថិតនៅក្នុងតំបន់រមណីយដ្ឋានអង្គរទាំងមូល។ ទៅអនាគត ក្រុមការងារគ្រោងនឹងចុះអប់រំតាមបណ្តាសាកលវិទ្យាល័យធំៗ ក្នុងទីក្រុងភ្នំពេញ និងតាមបណ្តាខេត្តមួយចំនួនទៀត៕












នាយកដ្ឋានរៀបចំដែនដីនិងគ្រប់គ្រងលំនៅដ្ឋានក្នុងឧទ្យានអង្គរនៃអាជ្ញាធរជាតិអប្សរាឱ្យដឹងថា ក្នុងខែវិច្ឆិកាឆ្នាំ២០២០ ក្រុមការងារបានចុះពិនិត្យនិងជួយសម្រួលលក្ខណៈបច្ចេកទេស នៃការសាងសង់លំនៅដ្ឋាននិងសំណង់ឧបសម្ពន្ធផ្សេងៗទៀតដល់ប្រជាពលរដ្ឋដែលរស់នៅក្នុងឧទ្យាននិងក្រៅឧទ្យានអង្គរបានចំនួន៣៩១គ្រួសារ។ ចំពោះប្រជាពលរដ្ឋដែលរស់នៅក្នុងឧទ្យានអង្គរមានចំនួន៣៨៣គ្រួសារមាន
ក្រុងសៀមរាបចំនួន១១៧គ្រួសារ
១ អគ្គនាយកអាជ្ញាធរជាតិអប្សរាចូលរួមគោរពវិញ្ញាណក្ខន្ធ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប
នាព្រឹកថ្ងៃទី២៦ ខែវិច្ឆិកា ឆ្នាំ២០២០ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា បានដឹកនាំសហការី ចូលរួមគោរពវិញ្ញាណក្ខន្ធ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប អាណត្តិទី៣ ដែលបានទទួលមរណភាពកាលពីថ្ងៃទី២៣ ខែវិច្ឆិកា ឆ្នាំ២០២០ ដោយរោគាពាធ។
ក្នុងនាមថ្នាក់ដឹកនាំអាជ្ញាធរជាតិអប្សរា ឯកឧត្តម ហង់ ពៅ ក៏បានសម្តែងនូវការគោរពនិងចូលរួមរំលែកនូវមរណទុក្ខដ៏ក្រៀមក្រំបំផុតជាមួយលោកជំទាវ ប៊ី មាលា និងក្រុមគ្រួសារចំពោះការបាត់បង់ ឯកឧត្តម អ៊ឹង ហឿន ដែលជាស្វាមី ឪពុក ជីតាមួយរូបប្រកបដោយព្រហ្មវិហារធម៌ និងជាទីគោរពស្រលាញ់នៃកូន ចៅ ចៅទួតទាំងអស់នៅក្នុងគ្រួសារ។
ក្នុងឱកាសដ៏សោកសៅនេះ ឯកឧត្តមអគ្គនាយកអាជ្ញាធរជាតិអប្សរានិងសហការី ក៏សូមឧទ្ទិសកុសលផលបុណ្យដែលបានសាងនិងបួងសួងសូមឱ្យវិញ្ញាណក្ខន្ធរបស់ឯកឧត្តម អ៊ឹង ហឿន បានទៅកាន់សុគតិភពកុំបីឃ្លៀងឃ្លាតឡើយ។ យើងខ្ញុំទាំងអស់គ្នាសូមសម្តែងការគោរព ដឹងគុណ និងចងចាំជានិច្ចនូវស្នាដៃរបស់ឯកឧត្តមចំពោះប្រទេសជាតិ ពិសេសការអភិវឌ្ឍនៅខេត្តសៀមរាប។

២ អាជ្ញាធរជាតិអប្សរាបើកកិច្ចប្រជុំសវនកម្មផ្ទៃក្នុងគ្រប់នាយកដ្ឋាន និងអង្គភាពចំណុះដើម្បីបញ្ជាក់នូវភាពអនុលោមជាប្រចាំនៃប្រព័ន្ធគ្រប់គ្រងបរិស្ថានអង្គរ
ថ្ងៃទី២៤ ខែវិច្ឆិកា ឆ្នាំ២០២០ អង្គភាពប្រព័ន្ធគ្រប់គ្រងបរិស្ថាន-អង្គរ នៃអាជ្ញាធរជាតិអប្សរា បានបើកកិច្ចប្រជុំសវនកម្មផ្ទៃក្នុងគ្រប់នាយកដ្ឋាននិងអង្គភាពចំណុះ ដើម្បីបញ្ជាក់នូវភាពអនុលោមជាប្រចាំនៃប្រព័ន្ធគ្រប់គ្រង បរិស្ថានអង្គរតាមតម្រូវការនៃស្តង់ដារ ISO-14001:2015 នៅក្នុងរយៈពេលនៃការអនុវត្តបន្តពីសវនកម្មឆ្នាំមុន។
ឯកឧត្តម យិត ចាន់ដារដ្ឋ អគ្គនាយករងនៃអាជ្ញាធរជាតិអប្សរា មានប្រសាសន៍ក្នុងកម្មវិធីបើកសវនកម្មផ្ទៃក្នុងថា បរិស្ថាននៅទីនេះផ្តោតលើធាតុ២សំខាន់ គឺធម្មជាតិ និងវប្បធម៌ ជាអ្វីៗដែលស្ថិតនៅជុំវិញខ្លួនយើង ហើយកត្តាទាំង២នេះ គឺមានការចូលរួមរបស់មនុស្ស ជាអ្នកជំរុញការងារឱ្យមានភាពប្រទាក់ក្រឡា និងសុខដុមរមនាជាមួយគ្នាដោយមិនអាចខ្វះមួយណាបានឡើយ។
ឯកឧត្តម សុខ លក្ខិណា ទីប្រឹក្សាអាជ្ញាធរជាតិអប្សរា និងជាប្រធានអង្គភាពប្រព័ន្ធគ្រប់គ្រងប្រព័ន្ធបរិស្ថាន-អង្គរ បានបញ្ជាក់ថា ការបើកសវនកម្មផ្ទៃក្នុងនៅពេលនេះ ក្នុងគោលបំណងដើម្បីត្រៀមលក្ខណៈជាមុន និងពិនិត្យឱ្យឃើញនូវភាពអនុលោម និងភាពមិនអនុលោមទាំងឡាយ សំដៅកែលម្អ ត្រៀមលក្ខណៈទទួលធ្វើសវនកម្មផ្ទៃក្រៅ ដែលនឹងប្រព្រឹត្តិទៅ នៅឆ្នាំ២០២១ខាងមុខនេះ។

៣ យុវជននិងគ្រូបង្រៀនចំនួន១៥០នាក់នៃក្រសួងអប់រំ យុវជន និងកីឡារាជធានីភ្នំពេញស្វែងយល់អំពីការគ្រប់គ្រងបេតិកភណ្ឌក្នុងរមណីយដ្ឋានអង្គរ
នារសៀលថ្ងៃទី២៧ ខែវិច្ឆិកា ឆ្នាំ២០២០ លោក ង៉ែត សុខចាន់ ប្រធានការិយាល័យយុវជននៃមន្ទីរអប់រំ និងយុវជនរាជធានីភ្នំពេញ បានដឹកនាំក្រុមប្រឹក្សាកុមារកម្ពុជា-យុវជនកម្ពុជា លោកគ្រូ អ្នកគ្រូ នៃក្រសួងអប់រំ យុវជន និងកីឡារាជធានីភ្នំពេញចំនួន១៥០នាក់ មកស្តាប់បទបង្ហាញអំពីកិច្ចការអភិរក្សនិងអភិវឌ្ឍន៍ប្រកបដោយចីរភាពនៅរមណីយដ្ឋានអង្គរពីថ្នាក់ដឹកនាំអាជ្ញាធរជាតិអប្សរា។
ក្នុងឱកាសទទួលស្វាគមន៍គណៈប្រតិភូយុវជនទាំង១៥០នាក់នេះ ឯកឧត្តម គឹម សុធិន អគ្គនាយករងនៃអាជ្ញាធរជាតិអប្សរា ក៏បានធ្វើបទបង្ហាញអំពីកិច្ចការអភិរក្សប្រាសាទ បញ្ហាប្រឈម កិច្ចសហប្រតិបត្តិការជាតិ-អន្តរជាតិ។រីឯ ឯកឧត្តម សុខ សង្វារ អគ្គនាយករង ក៏បានធ្វើបទបង្ហាញអំពីការគ្រប់គ្រងទេសចរណ៍ក្នុងតំបន់អង្គរ និងលោក ម៉ុក គន្ធី ប្រធានការិយាល័យនៃនាយកដ្ឋានរដ្ឋបាល បុគ្គលិក និងសម្ភារៈ បានបង្ហាញអំពីស្ថាប័នអាជ្ញាធរជាតិអប្សរាដល់យុវជនដើម្បីទទួលបានចំណេះដឹងថ្មី ព្រមទាំងពួកគេបានស្វែងយល់ដោយផ្ទាល់នៅតាមការដ្ឋានថែមទៀត ។

៤ សវនកម្មផ្ទៃក្នុងលើប្រព័ន្ធគ្រប់គ្រងបរិស្ថាន-អង្គរ របស់អាជ្ញាធរជាតិអប្សរាបង្ហាញថាមានភាពល្អប្រសើរលើសឆ្នាំកន្លងមក
នៅក្នុងពិធីបិទសវនកម្មផ្ទៃក្នុងប្រព័ន្ធគ្រប់គ្រងបរិស្ថាន-អង្គរ នៅថ្ងៃទី២៦ វិច្ឆិកា ឆ្នាំ២០២០ លោក អ៊ុន មណីនីតា ប្រធានសវនករបានបង្ហាញថា សវនកម្មនៅឆ្នាំ២០២០នេះ មានភាពល្អប្រសើរគួរជាទីមោទនភាពជាងឆ្នាំកន្លងមក ហើយភាពល្អប្រសើរឡើង គឺក្នុងនោះមិនមានចំណុចមិនអនុលោមឡើយ ចំណុចតាមអង្កេត២ ចំណុចប្រសើរ១៦ និងអនុសាសន៍១០។
ឯកឧត្តម សុខ លក្ខិណា ប្រធានអង្គភាពប្រព័ន្ធគ្រប់គ្រងបរិស្ថាន-អង្គរ បានសាទរចំពោះលទ្ធផលដ៏ល្អដែលទទួលបាននៅពេលនេះ និងបញ្ជាក់ថា ភាពជោគជ័យល្អប្រសើរនេះបានមកពីការខិតខំប្រឹងប្រែងរបស់ថ្នាក់ដឹកនាំ រួមទាំងមន្រ្តី-បុគ្គលិកទាំងអស់។ ឯកឧត្តម បានផ្ដាំផ្ញើដល់គ្រប់នាយកដ្ឋានទាំងអស់ ត្រូវបង្កើនការយកចិត្តទុកដាក់បន្ថែម ដើម្បីធ្វើយ៉ាងណា ឱ្យលទ្ធផលកាន់តែប្រសើរជាងនេះជាបន្តបន្ទាប់។
គួរបញ្ជាក់ថា សវនកម្មផ្ទៃក្នុងលើប្រព័ន្ធគ្រប់គ្រងបរិស្ថាន-អង្គរ ធ្វើឡើងដើម្បីប្រសិទ្ធភាព ផ្តោតលើលទ្ធផលសម្រេចបានតាមគោលនយោបាយ និងគោលបំណងបរិស្ថាន។ ស្ថានភាពនៃការគោរពច្បាប់បញ្ញត្តិទាក់ទងនឹងបរិស្ថាន ឆ្លើយតបទៅនឹងការប្រាស្រ័យទាក់ទងជាមួយភាគីផ្ទៃក្រៅ ស្ថានភាពនៃការកែតម្រូវ និងការបង្ការភាពមិនអនុលោម កែលម្អការសម្តែងបរិស្ថានទាំងមូល។

៥ អាជ្ញាធរជាតិអប្សរាបញ្ចប់ការជួសជុលព្រះពុទ្ធបដិមាមួយអង្គ នៅរួតបាកាណកំពូលប្រាសាទអង្គរវត្ត
ព្រះពុទ្ធបដិមាមួយអង្គនៅទិសខាងត្បូងនៃរួតបាកាណកំពូលប្រាសាទអង្គរវត្ត ដែលមានបញ្ហាចុះខ្សោយគុណភាពសំណង់ ត្រូវបានអ្នកជំនាញអភិរក្សចម្លាក់នៃអាជ្ញាធរជាតិអប្សរាជួសជុលរួចរាល់ជាស្ថាពរ នាខែវិច្ឆិកា ឆ្នាំ២០២០នេះ។ លោក សយ សុភារិន្ទ មន្ត្រីជំនាញអភិរក្សចម្លាក់ នៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ និងជាអ្នកជួសជុលបានលើកឡើងថា ព្រះពុទ្ធបដិមាអង្គនេះមានបញ្ហាមួយចំនួននៅត្រង់ព្រះកេស ព្រះភក្រ្ត ព្រះបាទផ្នែកខាងក្រោម និងជើងទម្រទប់លំនឹង។
ដើម្បីសង្គ្រោះបដិមាឱ្យល្អប្រសើរឡើងវិញ ក្រុមអ្នកអភិរក្សត្រូវតាមដានអង្កេតមើល ពីស្ថានភាពខូចខាតជាប្រចាំ ហើយសិក្សាស្រាវជ្រាវចងក្រង និងជួសជុលឱ្យបានទាន់ពេលវេលា បង្ការកុំឱ្យមានបញ្ហាធ្ងន់ធ្ងរដល់បដិមាទាំងមូល។ បច្ចុប្បន្ននេះ អ្វីដែលត្រូវធ្វើដំបូង គឺពង្រឹងជើងក្រោម ផ្លាស់ប្តូរទ្រនល់សម្រាប់ទប់បដិមាឱ្យមានលំនឹងឡើងវិញ ដើម្បីកាត់បន្ថយកម្លាំងសង្កត់ទៅលើជើងទម្រ។ ព្រះពុទ្ធអង្គនេះ ដើមឡើយគឺនៅជាប់នឹងជញ្ជាំងបិទសន្ធប់ទ្វារបន្ទប់នៅរួតបាកាណ តែត្រូវបានដាប់ចេញពីជញ្ជាំងនៅក្នុងសម័យបារាំងប្រហែលឆ្នាំ១៩៤៣ ដើម្បីជីកកំណាយអណ្តូង កណ្តាលតួបាកាណចុះទៅក្រោមក្នុងបំណងស្រាវជ្រាវបុរាណវិទ្យា។

៦ សប្ដាហ៍ទី៤ ខែវិច្ឆិកានេះ ក្រុមការងារសហគមន៍នៃអាជ្ញាធរជាតិអប្សរា ចុះពិនិត្យ និងដោះស្រាយសំណើសុំជួសជុលផ្ទះរបស់ប្រជាពលរដ្ឋក្នុងឧទ្យានអង្គរ បានចំនួន៥៤សំណើ
ក្នុងសប្ដាហ៍ទី៤ ខែវិច្ឆិកា ឆ្នាំ២០២០ ក្រុមការងារសហគមន៍នៃអាជ្ញាធរជាតិអប្សរា សហការជាមួយអាជ្ញា-ធរមូលដ្ឋានបានចុះពិនិត្យ និងដោះស្រាយសំណើសុំជួសជុលផ្ទះរបស់ប្រជាពលរដ្ឋក្នុងឧទ្យានអង្គរ បានចំនួន៥៤ សំណើ។ ការអនុញ្ញាតទាំងនោះរួមមាន ក្រុមការងារប្រចាំស្រុកប្រាសាទបាគង ពិនិត្យ និងដោះស្រាយ ហើយអនុញ្ញាត ចំនួន ៦សំណើ។ ក្រុមការងារប្រចាំស្រុកបន្ទាយស្រី ពិនិត្យ និងដោះស្រាយ ហើយអនុញ្ញាត ចំនួន ៥ សំណើ។ ក្រុមការងារប្រចាំក្រុងសៀមរាប ពិនិត្យ និងដោះស្រាយ ហើយអនុញ្ញាត ចំនួន ១៤សំណើ។ ក្រុមការងារប្រចាំស្រុកពួក ពិនិត្យ និងដោះស្រាយ ហើយអនុញ្ញាត ចំនួន ១៦សំណើ។ ក្រុមការងារប្រចាំស្រុកអង្គរធំ ពិនិត្យ និងដោះស្រាយ ហើយអនុញ្ញាត ចំនួន ១៣សំណើ។

៧ ប្រជាពលរដ្ឋក្នុងរមណីយដ្ឋានអង្គររៀបរាប់ ពីនិតិវិធីស្នើសុំការសាងសង់ផ្ទះថ្មី ជំនួសផ្ទះចាស់
លោកតា កែវ ផៃ ប្រជាពលរដ្ឋភូមិអូរទទឹង ឃុំព្រះដាក់ ស្រុកបន្ទាយស្រី ខេត្តសៀមរាប ដែលទើបសង់ផ្ទះរួច មានប្រសាសន៍ថា៖ ខ្ញុំស្នើសុំច្បាប់សាងសង់ផ្ទះមិនមានការលំបាកទេ ត្រឹម១ខែគេចេញច្បាប់ឱ្យធ្វើ ព្រោះខ្ញុំមានឯកសារគ្រប់គ្រាន់និងត្រឹមត្រូវតាមលក្ខខណ្ឌដែលអាជ្ញាធរជាតិអប្សរាបានកំណត់ដូចជា ខ្ញុំជាអ្នកស្រុកចាស់រស់នៅតាំងពីឆ្នាំ១៩៨០ជាង មានខ្នងផ្ទះចាស់ មានឯកសារកាន់កាប់ដីធ្លីស្របច្បាប់ មានសៀវភៅគ្រួសារ និងអត្តសញ្ញាណបណ្ណសញ្ជាតិខ្មែរ។ មុននិងក្រោយអនុញ្ញាតច្បាប់សាងសង់ អាជ្ញាធរជាតិអប្សរាតែងចុះមកពិនិត្យ ថតរូប ក៏ដូចជាប្រឹក្សាយោបល់ផ្សេងៗ។ ពលរដ្ឋភូមិអូរទទឹង លោក សួង ដានី បានលើកឡើងថា ខ្ញុំបានសុំច្បាប់សាងសង់តាមរយៈមេភូមិ ដោយភ្ជាប់ជាមួយឯកសារដែលគេត្រូវការត្រឹមត្រូវ។ មិនតែប៉ុណ្ណោះអាជ្ញាធរជាតិអប្សរា បានជួយសម្របសម្រួល គូស ប្លង់បច្ចេកទេស និងរចនាបថផ្ទះបែបខ្មែរឱ្យខ្ញុំទៀតផង។
លោក ខៀវ វិចិត្រ មន្ត្រីបច្ចេកទេសនៃនាយកដ្ឋានរៀបចំដែនដីនិងគ្រប់គ្រងលំនៅដ្ឋានក្នុងតំបន់អង្គរបាន បញ្ជាក់ថា បើប្រជាពលរដ្ឋមានបំណងចង់ដាក់ពាក្យស្នើសុំសាងសង់លំនៅដ្ឋាន ជួសជុលតូចតាច និងសំណើផ្សេងៗអាចមកដាក់ពាក្យនៅច្រកចេញចូលទាំង៦របស់អាជ្ញាធរជាតិអប្សរាដែលមានមន្ត្រី បុគ្គលិក ប្រចាំការនៅទីនោះចាំប្រឹក្សាយោបល់អំពីឯកសារដែលត្រូវភ្ជាប់មកជាមួយដូចជា លិខិតកាន់កាប់ដីធ្លីស្របច្បាប់ សៀវភៅគ្រួសារ សំបុត្រកំណើត និងអត្តសញ្ញាណបណ្ណ។

ថ្ងៃទី១៦ ខែវិច្ឆិកា ឆ្នាំ២០២០ ក្រុមអ្នកស្រាវជ្រាវរបស់មជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរនៃអាជ្ញាធរជាតិអប្សរាបានធ្វើកំណាយស្រាវជ្រាវនៅទួលត្រពាំងបុស្ស ស្ថិតក្នុងភូមិនគរក្រៅ សង្កាត់គោកចក ក្រុង/ខេត្តសៀមរាប ដែលមានទីតាំងនៅខាងជើងខ្លោងទ្វារដីឆ្នាំងនៃក្រុងអង្គរធំ បានប្រទះឃើញឡដុតកុលាលភាជន៍បុរាណមួយ ដែលតាមការសន្និដ្ឋានបឋមប្រហែលជាស្ថិតក្នុងសម័យអង្គរ ឬសម័យក្រោយអង្គរ។
នារសៀលថ្ងៃទី២៧ ខែវិច្ឆិកា ឆ្នាំ២០២០ លោក ង៉ែត សុខចាន់ ប្រធានការិយាល័យយុវជននៃមន្ទីរអប់រំ និងយុវជនរាជធានីភ្នំពេញ បានដឹកនាំក្រុមប្រឹក្សាកុមារកម្ពុជា-យុវជនកម្ពុជា លោកគ្រូ អ្នកគ្រូ នៃក្រសួងអប់រំ យុវជន និងកីឡារាជធានីភ្នំពេញចំនួន១៥០នាក់ មកស្តាប់បទបង្ហាញអំពីកិច្ចការអភិរក្សនិងអភិវឌ្ឍន៍ប្រកបដោយចីរភាពនៅរមណីយដ្ឋានអង្គរពីថ្នាក់ដឹកនាំអាជ្ញាធរជាតិអប្សរា។
រយៈពេល៣ថ្ងៃ ក្រោយពីចុះពិនិត្យឯកសារ និងលទ្ធផលការងារនៅតាមនាយកដ្ឋាន អង្គភាពចំណុះនៃអាជ្ញាធរជាតិអប្សរា រួមទាំងបានចុះពិនិត្យដល់ទីតាំងជាក់ស្តែងក្នុងតំបន់រមណីយដ្ឋានអង្គរ សវនកម្មផ្ទៃក្នុងលើប្រព័ន្ធគ្រប់គ្រងបរិស្ថាន-អង្គរត្រូវ បានបិទបញ្ចប់នៅថ្ងៃទី២៦ វិច្ឆិកា ឆ្នាំ២០២០។
FirstPrev12345...365366NextLast

Speech of H. E. Ms. Phoeurng Sackona, President of APSARA National Authority

Weather Forecast

Angkor Code of Conduct

Angkor Code of Conduct's Video

Website Visitors

Now Online
:
17
Today
:
0091
Yesterday
:
55244
This Week
:
55335
This Month
:
0000091
Total
:
013691545