ព័ត៌មានថ្មីៗ

មន្ត្រីបុគ្គលិកគម្រោងអភិវឌ្ឍន៍ភូមិធម្មជាតិរុនតាឯកនិងសប្បុរសជនទិញគោយន្តភ្ជួរដី ជូនប្រជាជននៅភូមិធម្មជាតិរុនតាឯក

បានផ្សាយនៅ ថ្ងៃទី 12 ខែ កក្កដា ឆ្នាំ2016 01:49 PM ដោយ ៖ អាជ្ញាធរជាតិអប្សរា

គោយន្តភ្ជួរដីថ្មីមួយគ្រឿងតម្លៃ១៧៥០ដុល្លារ ជាថវិការបស់ក្រុមហ៊ុន SBI MIEN NAM នៃប្រទេសវៀតណាម រួមទាំងការរួមចំណែកពីប្រជាជន និងក្រុមការងារអភិវឌ្ឍន៍ភូមិធម្មជាតិរុនតាឯកនៃអាជ្ញាធរជាតិអប្សរាផង បានយកមកជូនប្រជាពលរដ្ឋភូមិធម្មជាតិហើយ នាថ្ងៃទី១០ ខែកក្កដា ឆ្នាំ២០១៦។

កម្មវិធីប្រគល់គោយន្តភ្ជួរដីនេះធ្វើឡើងក្រោមអធិបតីភាពឯកឧត្តម ម៉ី ម៉ារ៉ាឌី ប្រធានគម្រោងអភិវឌ្ឍន៍ធម្មជាតិរុនតាឯក និងជាទីប្រឹក្សាអាជ្ញាធរជាតិអប្សរា លោក ភ័ន ផល្លា ប្រធាននាយកដ្ឋានរដ្ឋបាលនិងបុគ្គលិក រួមទាំងក្រុមការងារអាជ្ញាធរជាតិអប្សរា និងប្រជាពលរដ្ឋក្នុងភូមិរុនតាឯក១០០គ្រួសារចូលរួមជាកិត្តិយស។ នៅក្នុងថ្ងៃប្រគល់នោះដែរ ក៏មានការរើសប្រធានគ្រប់គ្រងគោយន្ត បេឡា និងអ្នកភ្ជួរ ដើម្បីចាត់ចែងការភ្ជួររាស់និងកាន់កាប់ លុយកាក់សម្រាប់ជួសជុលគោយន្តពេលខូច។

ឯកឧត្តម ម៉ី ម៉ារ៉ាឌី បានប្រាប់ថា គោយន្តថ្មីនេះមិនមែនជាកម្មសិទ្ធិរបស់អាជ្ញាធរជាតិអប្សរាទេ វាជាអំណោយរបស់សប្បុរជនក្រុមហ៊ុន SBI MIEN NAM នៃប្រទេសវៀតណាមចំនួន១០០០ដុល្លារ និងការរួមចំណែករបស់អ្នកភូមិ និងក្រុមការងារផងចំនួន៧៥០ដុល្លារដើម្បីបង្គ្រប់តម្លៃទិញគោយន្ត១៧៥០ដុល្លារ ជូនប្រជាជនក្នុងភូមិធម្មជាតិរុនតាឯក។ ដូច្នេះហើយទាំងការគ្រប់គ្រង ការជួសជុល ថ្លៃឈ្នួលអ្នកភ្ជួរ ថ្លៃប្រេង គឺជាបន្ទុករបស់ម្ចាស់ដីស្រែនោះ។

ឯកឧត្តមរំឭកដែរថា ដំបូងឡើយក្រុមហ៊ុន SBI MIEN NAM ចង់យកលុយ១០០០ដុល្លារនោះទិញគ្រឿងឧបភោគបរិភោគជូនអ្នកភូមិ២០គ្រួសារ តែដោយសារអ្នកភូមិនៅទីនេះមានដល់១០០គ្រួសារ ទើបខ្លាចនាំឱ្យមានការអាក់អន់ចិត្តចំពោះគ្នា ហើយបើយកលុយនោះទៅចែកប្រជាជនទាំង២០គ្រួសារ ក៏បានម្នាក់បន្តិច ទើបពិភាក្សាគ្នាថា គួរទិញអ្វីដែលជាប្រយោជន៍រួមទើបល្អជាង ទើបទាំងអ្នកភូមិនិងក្រុមការងារសម្រេចទិញគោយន្តភ្ជួរដីដើម្បីធ្វើកសិកម្មវិញ។

លោក ភ័ន ផល្លា ក៏បានលើកឡើងដែរថា ការទិញគោយន្តភ្ជួរដីនេះ វានឹងចំណេញ សម្រាប់អ្នកភូមិទាំងអស់គ្នា ព្រោះតម្លៃនៃការជួលនឹងថោកជាងតម្លៃទីផ្សារ។ លោកក៏បានផ្តាំផ្ញើដល់ប្រជាជនឱ្យចេះចែកកាលវិភាគគ្នាក្នុងការភ្ជូររាស់ ពិសេសត្រូវយកចិត្តទុកដាក់ថែ រក្សាឱ្យបានល្អ និងចូលរួមសន្សំលុយមួយចំនួនតូចសម្រាប់គ្រប់គ្នាដើម្បីទុកជួសជុលពេល គោយន្តខូច ព្រោះគ្រប់គ្នាសុទ្ធតែទទួលបានប្រយោជន៍ពីគោយន្ត ដូច្នេះគ្រប់គ្នាក៏ត្រូវមានចំណែកក្នុងការទទួលខុសត្រូវពេលគោយន្តខូចដែរ។ លោក ផល្លា ក៏បានឧបត្ថម្ភប្រេងចំនួន២៥លីត្រសម្រាប់ប្រជាជនប្រើប្រាស់ផងដែរ។

លោក ខឿន គីន ប្រធានគ្រប់គ្រងគោយន្តភ្ជួរដែលជាប់ដោយការបោះឆ្នោតជ្រើសតាំងរបស់អ្នកភូមិ ក៏បានសម្តែងនូវសេចក្តីរំភើបជាខ្លាំងចំពោះក្រុមហ៊ុន SBI MIEN NAM ពិសេសក្រុមការងារភូមិធម្មជាតិរុនតាឯក ដែលបានផ្តល់ថវិកាដើម្បីទិញគោយន្តភ្ជួរនេះឱ្យអ្នកភូមិប្រើប្រាស់សម្រាប់ធ្វើកសិកម្ម ហើយការឱ្យនេះវាទាន់ពេលល្មមសម្រាប់ការធ្វើស្រែចម្ការរបស់ពួកយើង៕












១អាជ្ញាធរជាតិអប្សរាដាក់ឱ្យដំណើរការរហាត់ទឹកនៅស្ថានីយ៍បណ្ដុះកូនឈើប្រាសាទតាកែវ
នៅព្រឹកថ្ងៃទី២២ ខែកុម្ភៈ ឆ្នាំ២០២១ នេះ អាជ្ញាធរជាតិអប្សរាបានរៀបចំពិធីសម្ពោធ និងដាក់ឱ្យដំណើរការនូវរហាត់ទឹក ស្ថិតនៅស្ថានីយបណ្ដុះកូនឈើប្រាសាទតាកែវ ក្រោមអធិបតីភាពដ៏ខ្ពង់ខ្ពស់របស់លោកជំទាវកិត្តិ សង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
ថ្ងៃទី២៦ ខែកុម្ភៈ ឆ្នាំ២០២១ ក្រុមការងារសហគមន៍នៃអាជ្ញាធរជាតិអប្សរាចំនួន៤គោលដៅ ដែលមានការចូលរួមសហការជាមួយអាជ្ញាធរមូលដ្ឋាន បានចុះពិនិត្យ និងដោះស្រាយសំណើសុំជួសជុលផ្ទះរបស់ប្រជាពលរដ្ឋក្នុងឧទ្យានអង្គរ។
ម្បីរួមចំណែកលើកកម្ពស់សោភ័ណភាពតាមដងផ្លូវនិងកុំឱ្យប៉ះពាល់ដល់រចនាសម្ពន្ធប្រាសាទក្នុងរមណីយដ្ឋានអង្គរ និងតំបន់ដែលគ្រប់គ្រងដោយអាជ្ញាធរជាតិអប្សរា អាជ្ញាធរជាតិអប្សរានឹងដកហូតដើមឈើនិងកាត់ក្រីមែកឈើនៅតាមទីតាំងមួយចំនួនដូចក្នុងសេចក្តីជូនដំណឹង
ថ្ងៃទី២៥ ខែកុម្ភៈ ឆ្នាំ២០២១ ក្រុមការងារសហគមន៍នៃអាជ្ញាធរជាតិអប្សរា ដែលមានការចូលរួមសហការជាមួយអាជ្ញាធរមូលដ្ឋានបានចុះពិនិត្យ និងដោះស្រាយសំណើសុំជួសជុលផ្ទះរបស់ប្រជាពលរដ្ឋក្នុងឧទ្យានអង្គរ។
ថ្ងៃពុធ ទី ២៤ ខែកុម្ភៈ ឆ្នាំ២០២១ ក្រុមការងារសហគមន៍ចំនួននៃអាជ្ញាធរជាតិអប្សរាចំនួន២គោលដៅដែលមានការសហការចូលរួមអាជ្ញាធរមូលដ្ឋាន បានចុះពិនិត្យ និងដោះស្រាយសំណើសុំជួសជុលផ្ទះរបស់ប្រជាពលរដ្ឋក្នុងឧទ្យានអង្គរ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
19
ថ្ងៃនេះ
:
0411
ម្សិលមិញ
:
73217
សប្តាហ៍នេះ
:
144517
ខែនេះ
:
0144517
សរុប
:
015214320