ព័ត៌មានថ្មីៗ

ជំនឿអ្នកស្រុកអង្គរអំពីពិធីឆាន់សុំទឹកភ្លៀង

បានផ្សាយនៅ ថ្ងៃទី 05 ខែ កក្កដា ឆ្នាំ2016 03:57 PM ដោយ ៖ អាជ្ញាធរជាតិអប្សរា

តំបន់អង្គរ ក្រៅពីមានប្រាង្គប្រាសាទជាមរតកដ៏មានតម្លៃនិងជាបេតិកភណ្ឌពិភពលោកមិនអាចកាត់ថ្លៃបានហើយ ក៏ជាកន្លែងប្រមូលផ្តុំដោយវប្បធម៌រូបីនិងអរូបីផងដែរ។ វត្តមានរួមគ្នានេះ ធ្វើឱ្យអង្គរនៅតែជាដួងព្រលឹងដ៏ស័ក្តិសិទ្ធិរបស់កូនខ្មែរមិនសាបសូន្យ។ ទំនៀមទម្លាប់ ជំនឿជាច្រើនត្រូវបានប្រជាជនក្នុងតំបន់អង្គរនៅតែឱ្យតម្លៃនិងបន្តប្រតិបត្តិយ៉ាងខ្ជាប់ខ្ជួន រហូតដល់សព្វថ្ងៃក្នុងជីវភាពរស់នៅរបស់ពួកគាត់។ អាជ្ញាធរជាតិអប្សរាតែងតែគាំទ្រជានិច្ច ព្រមទាំងចូលរួមយ៉ាងសកម្មជាមួយអ្នកស្រុកដើម្បីរក្សាជំនឿទាំងនេះ។

តួយ៉ាងពិធីឆាន់សុំទឹកភ្លៀង ត្រូវបានអ្នកស្រុកអង្គរបន្តធ្វើរហូតដល់សព្វថ្ងៃ ដោយការគោរពនិងជឿជាក់បំផុត។ បើគិតចាប់ពីចុងខែពិសាខមកដល់ដើមខែអាសាធ ខេត្តសៀមរាបស្ទើរតែមានភ្លៀងធ្លាក់រាល់ថ្ងៃនិងគ្រប់ទីកន្លែង ប៉ុន្តែទោះជាយ៉ាងនេះក្តី ក៏ប្រជាជនតំបន់អង្គរនៅភូមិប្រដាក ស្រុកបន្ទាយស្រី ខេត្តសៀមរាប នៅតែបន្តធ្វើពិធីសុំទឹកភ្លៀងតាមទម្លាប់។ ការប្រារព្ធពិធីនេះជាទំនៀមទម្លាប់និងជាជំនឿដែលមានតាំងពីដូនតា ដែលពួកគាត់គោរពមិនហ៊ានខកខាន បើទោះបីជាមិនមានទ្រព្យធនធ្វើពិធីធំដុំ ក៏អ្នកស្រុកសាមគ្គីគ្នារៀបចំធ្វើពិធីតូចតាចដែរ។

តាមការរៀបរាប់របស់លោកតា មិត្ត និងលោកតា ទុយ លន់ ជាអាចារ្យនិងចាស់ព្រឹទ្ធាចារ្យក្នុងភូមិបានប្រាប់ថា តាមពិតទៅ ឆាន់សុំទឹកភ្លៀង ត្រូវធ្វើនៅថ្ងៃ៣កើតខែពិសាខទេ តែដោយសារអ្នកភូមិរវល់បុណ្យទាននិងកិច្ចការផ្សេងៗផង ក៏អូសបន្លាយដល់ខែជេស្ឋឬអាសាធ។ លោកតាបន្តទៀតថា ជារៀងរាល់ឆ្នាំអ្នកភូមិប្រដាក តែងតែរៀបចំឆាន់សុំទឹកភ្លៀងមួយព្រឹកនៅប្រាសាទមេបុណ្យ ដោយមានកិច្ចពិធីប្រុងពលី ព្រះសង្ឃសូត្រមន្ត បួងសួងសុំទឹក សុំភ្លៀង សែនម្ចាស់ប្រាសាទ និងវេរចង្វាន់ប្រគេនព្រះសង្ឃគឺចប់កិច្ចហើយ។

ទាក់ទងនឹងសំណួរថា បើខែនេះមានភ្លៀងទៅហើយ តើចាំបាច់ឆាន់សុំទឹកភ្លៀងធ្វើអ្វី? លោកតាបញ្ជាក់ថា បើទោះបីជាមានភ្លៀងធ្លាក់ហើយក៏ដោយ ក៏អ្នកស្រុកអង្គរនៅតែបន្តធ្វើពិធីសុំទឹកភ្លៀងដែរ មិនហ៊ានខកខានទេ ខ្លាចមានជំងឺឧត្បាតកើតឡើងចំពោះកូនចៅ សត្វអំពេរដែលចិញ្ចឹម ព្រោះតែយើងភ្លេចរំឭកនឹកគុណដល់ពួកគាត់ (អ្នកថែរក្សា)។ ក្រៅពីឆាន់ដើម្បីសុំទឹកភ្លៀង គេក៏យកពិធីនេះរំឭកដល់វិញ្ញាណក្ខន្ធបុព្វបុរសដែលបានសាងអង្គរវត្ត អង្គរធំ ភ្នំគូលែនជាដើមទុកដល់កូនចៅជំនាន់ក្រោយដែរ ដើម្បីសុំសេចក្តីសុខសប្បាយដល់អ្នកភូមិនិងសត្វ ពិសេសគឺធ្វើស្រែស្រូវបានល្អ។

បន្ថែមពីនោះ អ៊ំស្រី យឿយ ក៏បានបង្ហាញពីការរក្សាទំនៀមទម្លាប់មួយនេះដែរថា «ពិធីសុំទឹកភ្លៀងមានតាំងពីបរមបុរាណមក ហើយពេលអត់ពីចាស់ៗទៅ ពួកខ្ញុំជាកូនចៅជំនាន់ក្រោយជាអ្នកធ្វើបន្ត ទោះអត់យ៉ាងម៉េច ក៏មិនដែលខានទេ។ ជួនយើងធ្វើនៅខែជេស្ឋ ជួនធ្វើនៅខែអាសាធ មិនទៀងទេ បើខែណារាំងក៏បួងសួងសុំទឹកភ្លៀងទៅ តែបើទោះជាខែនោះភ្លៀងហើយក៏ដោយ ក៏នៅតែធ្វើពិធីនេះដែរដើម្បីសុំសេចក្តីសុខសប្បាយដល់កូនចៅទាំងអស់គ្នា។ ពួកខ្ញុំជឿជាក់ណាស់ ពេលខ្លះធ្វើភ្លាមភ្លៀងភ្លាម ពេលខ្លះ២ទៅ៣ថ្ងៃទើបភ្លៀង»

ក្រៅពីកិច្ចពិធីទូទៅហើយ ការបញ្ចូលមេមត់គឺសំខាន់ណាស់ក្នុងពិធីសុំទឹកភ្លៀង។ គេធ្វើពិធីនេះដើម្បីអញ្ជើញរូបអារក្សអ្នកតាម្ចាស់ទឹកម្ចាស់ដី អ្នកមានបុណ្យបារមីគ្រប់ទីកន្លែងដែលរក្សាភូមិស្រុក ប្រាសាទនានាឱ្យមករាំរែក និងហូបចុកចំណីអាហារដែលកូនចៅដាក់សែនព្រែនឱ្យ ក៏ដូចជាសួរនាំរូបដែលចូលសណ្ឋិតថាចង់ហូបអី ត្រូវការអី និងសុំឱ្យពួកគាត់ជួយថែរក្សាកូនចៅ កុំខឹង កុំធ្វើបាបកូនចៅ ដូចប្រសាសន៍របស់ អ៊ំស្រី វឿន ថា «ពេលសុំទឹកភ្លៀង គឺតែងតែមានចូលរូបមិនដែលអត់ទេ ដើម្បីឱ្យរូបមករាំលេង មកសេពសោយអាហារ ដូចថ្ងៃនេះមានរូបច្រើនណាស់ មានតារាជនៅអង្គរ តាទរ តាសៅ និងរូបច្រើនទៀត។ ពេលរូបចូលយើងសួរថា តាឬយាយ? នៅឯណា? ឈ្មោះអី? ចង់ហូបអី? ហើយយើងក៏រៀបចំចំណីចំណុកជាច្រើនឱ្យគាត់តាមការចូលចិត្ត។ បើគាត់ចូលចិត្ត គាត់ក៏ហូប បើគាត់មិនចូលចិត្តក៏ខឹង ហើយរុញម្ហូបចេញ។ ការសុំទឹកភ្លៀងនេះថាស័ក្តិសិទ្ធិក៏បាន មិនស័ក្តិសិទ្ធិក៏បាន ព្រោះខែខ្លះដែលក្តៅហែង គ្រាន់តែធ្វើភ្លាម ភ្លៀងក៏ធ្លាក់ភ្លាម តែខ្លះក៏ចាំ១ឬ២ថ្ងៃ ទើបភ្លៀង ហើយតែងមើលរូបដែលចូលមកដែរ បើរូបថារងាញាក់ញ័រ គឺច្បាស់ណាស់មិនយូរទេច្បាស់ជាភ្លៀងមិនខាន ដូច្នេះមិនជឿមិនបាន»




















ពិធីចូលឆ្នាំថ្មី ឆ្នាំរកា នព្វស័ក ពុទ្ធសករាជ ២៥៦១ នឹងឈានចូលមកដល់នៅថ្ងៃទី១៤ ខែមេសា ឆ្នាំ២០១៧វេលាម៉ោង ៣៖១២នាទីទៀបភ្លឺ។ កម្មវិធីសាសនា និងប្រពៃណីជាច្រើនកំពុងរៀបចំនិងប្រព្រឹត្តទៅក្នុងបរិវេណរមណីយដ្ឋានអង្គរ ជាបន្តបន្ទាប់ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិនេះ។
នាព្រឹកថ្ងៃទី១២ ខែមេសា ឆ្នាំ២០១៧នេះ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានចុះជួបសំណេះសំណាលថ្នាក់ដឹកនាំនៃអាជ្ញាធរជាតិអប្សរា នៅទីស្នាក់ការនៃអាជ្ញាធរជាតិអប្សរាផ្ទាល់។ នេះគឺជាជំនួបដំបូងបង្អស់របស់លោកជំទាវក្នុងឋានៈជាប្រធានអាជ្ញាធរជាតិអប្សរា បន្ទាប់ពីអាជ្ញាធរជាតិអប្សរាត្រូវបានរាជរដ្ឋាភិបាលផ្ទេរការគ្រប់គ្រងពីទីស្តីការគណៈរដ្ឋមន្ត្រី ឲ្យស្ថិតនៅក្រោមក្រសួងវប្បធម៌ និងវិចិត្រសិល្បៈ។
ដើម្បីអបអរសាទរដល់ការដាក់ចាប៉ីដងវែងរបស់ខ្មែរចូលក្នុងបញ្ជីបេតិកភណ្ឌពិភពលោក កាលពីថ្ងៃទី៣០ វិច្ឆិកា ឆ្នាំ២០១៦កន្លងទៅនេះ ក្រុមការងារអង្គរសង្រ្កាន្តបានរៀបចំចាប៉ីដងវែងដ៏ធំ ដើម្បីដាក់តាំងនៅក្នុងបរិវេណភូមិខ្ញុំជូនភ្ញៀវទេសចរជាតិ-អន្តរជាតិចូលទស្សនាក្នុងព្រឹត្តិការណ៍អង្គរសង្ក្រាន្តឆ្នាំនេះ។
នាវេលាព្រឹកថ្ងៃទី១១ ខែមេសា ឆ្នាំ២០១៧ ប្រតិភូរបស់ក្រសួងទេសចរណ៍ និងអាជ្ញាធរជាតិអប្សរា ដឹកនាំដោយឯកឧត្តមបណ្ឌិត ថោង ខុន រដ្ឋមន្រ្ដីក្រសួងទេសចរណ៍ និងឯកឧត្តម សឺង គង់ ទីប្រឹក្សា អាជ្ញាធរជាតិអប្សរា តំណាងដ៏ខ្ពង់ខ្ពស់ឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរា បានចុះសួរសុខទុក្ខ និងនាំយកអំណោយ ចែកជូនដល់កងទ័ពដែលឈរជើងប្រចាំការនៅបញ្ជាការដ្ឋានយោធភូមិភាគទី៤ ស្ថិតនៅក្នុងភូមិស្ពានក្អែក ឃុំកណ្តែក ស្រុកប្រាសាទបាគង ខេត្តសៀមរាប ដើម្បីរួមចំណែកអបអរសាទរ ក្នុងឱកាសបុណ្យចូលឆ្នាំថ្មីប្រពៃណីជាតិដែលនឹងប្រព្រឹត្តទៅក្នុងពេលខាងមុខ។
ភូមិគិរីមានន្ទ ជាភូមិចំណាស់មួយដែលស្ថិតនៅក្នុងតំបន់រមណីយដ្ឋានអង្គរ ភាគខាងកើតសង្កាត់អំពិល ក្រុងសៀមរាប។ តាមប្រវត្តិដើមនៃឈ្មោះភូមិនេះ ដែលនិទានដោយព្រះតេជគុណ ពិន សែម ចៅអធិការវត្តព្រះរាជបូណ៌ ភូមិនេះមានឈ្មោះថា មានីមានន្ទ មិនមែន គិរីមានន្ទ ដែលអ្នកភូមិហៅសព្វថ្ងៃនេះទេ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
13
ថ្ងៃនេះ
:
18594
ម្សិលមិញ
:
17889
សប្តាហ៍នេះ
:
54782
ខែនេះ
:
0292899
សរុប
:
014352754