NEWS

The English version of this website is still under construction. This section is only available in Khmer language at this stage. We apologise for any inconvenience

Published on 25 June 2016 08:13 PM Post By ៖ Apsara National Authority

“ទោះបីជាកន្លងមក មានអ្នកស្រាវជ្រាវជាតិ និងអន្តរជាតិជាច្រើនបានធ្វើកំណាយសា្រវជ្រាវនៅតាមតំបន់បុរាណស្ថាននានាក្នុងតំបន់អង្គរ និងប្រាសាទជាច្រើនទៀតក្តី តែលទ្ធផលនៃការស្រាវជ្រាវទាំងនោះ មិនសូវទទួលបានបំណែកកុលាលភាជន៍ច្រើនដូចជាការធ្វើកំណាយស្រាវជ្រាវនៅតំបន់កោះកែរនាពេលនេះទេ”។ នេះជាការលើកឡើងរបស់លោកបណ្ឌិត Kyle Latinis ក្នុងបទបង្ហាញកាលពីរសៀលថ្ងៃអង្គារទី២១ ខែមិថុនា ឆ្នាំ២០១៦ នៅសាលសិក្សាលលៃនៃមជ្ឈមណ្ឌលបណ្តុះបណ្តាលអង្គរ នៃអាជ្ញាធរជាតិអប្សរា។

បទបង្ហាញដែលបានទាញចំណាប់អារម្មណ៍អ្នកចូលរួមយ៉ាងច្រើនកុះករ ពីសំណាក់អ្នកស្រាវជ្រាវ មគ្គុទ្ទេសក៍ទេសចរណ៍ និងក្រុមអ្នកសារព័ត៌មាន បានធ្វើឡើងប្រកបដោយភាពជោគជ័យ និងទទួលបានការអបអរសាទរយ៉ាងខ្លាំងពីសំណាក់អ្នកចូលរួមស្តាប់។ ក្នុងបទបង្ហាញដែលស្តីពីលទ្ធផលបឋមថ្មីៗ ពីការស្រាវជ្រាវបុរាណវិទ្យានៅកោះកែរនេះ លោកបណ្ឌិត Kyle Latinis និងតាមរយៈការសម្របសម្រួលរបស់លោកបណ្ឌិត អ៊ា ដារិទ្ធ បញ្ជាក់ថា លទ្ធផលដែលទទួលបានពីការស្រាវជ្រាវនេះ បានវត្ថុតាងច្រើនហួសពីការរំពឹងទុក ជាពិសេស គឺបំណែកនៃបុរាណវត្ថុ។

លោកបណ្ឌិត Kyle Latinis បានលើកឡើងថា ក្រុមការងារបានរកឃើញជាង២៤២០០បំណែក ដូចជា បំណែកចាន ថូ ក្បាច់ចម្លាក់ ខួចដី កុលាលភាជន៍ ក្បាលមនុស្ស ស្នែងសត្វ ដែលបំណែកវត្ថុខ្លះធ្វើពីមាស សំរឹទ្ធ ដែក ឆ្អឹងសត្វ ស្នែងសត្វ និងដីដុត និងហេដ្ឋារចនាសម្ព័ន្ធបុរាណមួនចំនួនទៀត។ ចំនួននៃបំណែកទាំងនោះ បានមកពីការធ្វើកំណាយ ៣ កន្លែងនៅក្នុងតំបន់កោះកែរ ដែលតំបន់ទី១ ឈ្មោះ កោះកែររណ្តៅទី១ (KK1)មានទំហំ ៨ ម៉ែត្រការ៉េជីកលើទួល រកឃើញបំណែក១១០០០បំណែក តំបន់ទី២ ឈ្មោះថា កោះកែររណ្តៅទី២ (KK2) មានទំហំ ១២ ម៉ែត្រការ៉េជីកលើទួល រកឃើញបំណែក ១២០០០បំណែក និងតំបន់ទី៣ ឈ្មោះ កោះកែររណ្តៅទី៣ (KK3) មានទំហំ ៣៤.៧៥ ម៉ែត្រការ៉េដែលនៅលើប្រឡាយបង្ហូរទឹកបុរាណពីរានហាលចូលទៅគូទឹកប្រាសាទកោះកែររកឃើញបំណែក១២០០បំណែកផងដែរ។

លោកបណ្ឌិត បានបញ្ជាក់ថា នៅមានវត្ថុតាងមួយចំនួនទៀត ដូចជា សម្បកខ្យង និងធ្យូងដែលនៅលើស្រទាប់ដីធម្មជាតិដែលមានជម្រៅមួយម៉ែត្រ ដែលបង្ហាញឱ្យយើងដឹងអំពីអាយុកាលនៃការតាំងទីលំនៅរបស់មនុស្សក្នុងតំបន់កោះកែរ តាំងពីសតវត្សទី៧មកម្ល៉េះ។ លទ្ធផលទាំងនេះ បើធៀបនឹងផ្ទៃដីតំបន់ប្រាសាទកោះកែរទាំងមូល គឺមានចំនួនតិចតួចប៉ុណ្ណោះ។ ទោះជាយ៉ាងណា ក្រុមការងាររបស់លោកនឹងបន្តធ្វើកំណាយស្រាវជ្រាវនៅតំបន់នេះ ដើម្បីបានលទ្ធផលបន្ថែមមកបង្ហាញជូនពិភពលោកឱ្យបានដឹងអំពីភាពអស្ចារ្យនៅតំបន់កោះកែរ។

គួរបញ្ជាក់ថា នេះជាកិច្ចការស្រាវជ្រាវមួយដែលធ្វើឡើងដោយកិច្ចសហការរវាងអាជ្ញាធរជាតិអប្សរា និងវិទ្យាស្ថានសិក្សាអាស៊ីអាគ្នេយ៍នៃប្រទេសសិង្ហបុរី ដែលបានចាប់ផ្តើមធ្វើកាលពីថ្ងៃទី០១ ដល់ថ្ងៃទី២២ ខែធ្នូ ឆ្នាំ២០១៥ មានរយៈពេល២២ថ្ងៃ មានសមាជិកចំនួន ១២នាក់ មកពីប្រទេសចំនួន៩ ក្នុងនោះ មានប្រទេសកម្ពុជា ហ្វីលីពីន ឥណ្ឌូនេស៊ី ឡាវ វៀតណាម ហុងកុង ញ៉ូវហ្សេឡែន ភូមា និងសិង្ហបូរី ដោយផ្តោតលើតំបន់កោះកែរជាចម្បងក្នុងការធ្វើកំណាយស្រាវជ្រាវ៕

















ក្រុមអ្នកជំនាញអភិរក្សថ្មរបស់នាយកដ្ឋានអភិរក្សប្រាសាទក្នុងឧទ្យានអង្គរនិងបុរាណ វិទ្យាបង្ការនៃអាជ្ញាធរជាតិអប្សរាកំពុងអនុវត្តគម្រោងជួសជុលចម្រឹងបង្អួចនៅរោងទងទី២ផ្នែក ខាងជើងនៃប្រាសាទអង្គរវត្ត។ ជាទូទៅស្ថានភាពចម្រឹងបង្អួចទាំងអស់នៅប្រាសាទអង្គរវត្ត ពុំមានភាពរឹងមាំល្អឡើយ ចម្រឹងខ្លះពុកផុយនិងសឹករិចរិលដោយអន្លើៗ ឯខ្លះទៀតបានបាក់ និងបាត់បង់ទាំងស្រុង។ ក្នុងដំណាក់កាលដំបូងនៃការសិក្សាលើស្ថានភាពចម្រឹងបង្អួចនៅរោង ទងទី២ផ្នែកខាងក្នុងគឺមានសរុបចំនួន១៤៩ស៊ុមស្មើនឹង១០៣៩ចម្រឹង ក្នុងនោះបានបង្ហាញពី ការខូចខាតខ្លាំងប្រមាណ២១% ខូចខាតមធ្យម ១៦% និងខូចតិចតួចចំនួន៣៩%។
នាព្រឹកថ្ងៃទី១៨ ខែកក្កដា ឆ្នាំ២០១៦ នៅសាលប្រជុំនាមជ្ឈមណ្ឌលអាជ្ញាធរជាតិអប្សរា ឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរា ឯកឧត្តម សុខ សង្វារ អគ្គនាយករង និងក្រុមការងារ បានទទួលជួបពិភាក្សាជាមួយគណៈប្រតិភូនៃអង្គការមូលនិធិ Three Hearts Foundation របស់ប្រទេសជប៉ុន ដែលដឹកនាំដោយកញ្ញា Hisae Arai អតីតកញ្ញាឯកប្រទេសជប៉ុន ឆ្នាំ២០១១ និងជានាយកគ្រប់គ្រងទូទៅ។
ក្រៅពីការយកចិត្តទុកដាក់លើការងារអភិរក្ស និងអភិវឌ្ឍន៍ប្រកបដោយចីរភាពក្នុងតំបន់រមណីយដ្ឋានអង្គរ អាជ្ញាធរជាតិអប្សរាក៏បានយកចិត្តទុកដាក់ជាប្រចាំ ចំពោះសុខទុក្ខបងប្អូនប្រជាពលរដ្ឋដែលរស់នៅក្នុងតំបន់រមណីយដ្ឋានអង្គរដែរ។ ជាក់ស្តែងក្រុមការងារសហគមន៍នៃអាជ្ញាធរជាតិអប្សរាប្រចាំស្រុកបន្ទាយស្រី ដឹកនាំដោយឯកឧត្តម ម៉ី ម៉ារ៉ាឌី ទីប្រឹក្សាអាជ្ញាធរជាតិអប្សរា សហការជាមួយអាជ្ញាធរមូលដ្ឋាន បានចុះសាកសួរសុខទុក្ខប្រជាពលរដ្ឋ និងបាននាំយកអំណោយជាថវិកា ទៅឧបត្ថម្ភជូនគ្រួសារដែលត្រូវភ្លើងឆេះផ្ទះ នៅភូមិប្រដាក និងគ្រួសារដែលខ្យល់កន្ត្រាក់ដួលផ្ទះ នៅភូមិព្រៃទទឹង ឃុំប្រដាក ស្រុកបន្ទាយស្រី ខេត្តសៀមរាប នៅព្រឹកថ្ងៃទី១៨ខែកក្កដា ឆ្នាំ២០១៦កន្លងទៅនេះ។ ។
មគ្គុទ្ទេសក៍ទេសចរណ៍ចំនួន២០រូប រួមនឹងមន្ត្រី៤រូបនៃអាជ្ញាធរជាតិអប្សរាផង បានចំណាយពេល៩ថ្ងៃទៅទីក្រុងម៉ាកាវ នៃសាធារណរដ្ឋប្រជាមានិតចិន កាលពីអំឡុងខែមិថុនាកន្លងទៅនេះ។ ដំណើរបេសកកម្មនេះធ្វើឡើងក្រោមការផ្តួចផ្តើមរបស់អាជ្ញាធរជាតិអប្សរា តាមរយៈកិច្ចសហការជាមួយអង្គការទេសចរណ៍ពិភពលោក (UNWTO)។

Speech of H. E. Ms. Phoeurng Sackona, President of APSARA National Authority

Weather Forecast

Angkor Code of Conduct

Angkor Code of Conduct's Video

Website Visitors

Now Online
:
15
Today
:
7241
Yesterday
:
61021
This Week
:
147860
This Month
:
0451368
Total
:
014894209