ព័ត៌មានថ្មីៗ

អគ្គនាយកអាជ្ញាធរជាតិអប្សរាអនុញ្ញាតឲ្យមគ្គុទ្ទេសក៍ទេសចរណ៍ចូលជួបសម្តែងការគួរសម

បានផ្សាយនៅ ថ្ងៃទី 09 ខែ មិថុនា ឆ្នាំ2016 03:45 PM ដោយ ៖ អាជ្ញាធរជាតិអប្សរា
ក្រុមមគ្គុទ្ទេសក៍ទេសចរណ៍ចំនួន២០រូបដែលត្រូវ ចេញដំណើរទៅចូលរួមវគ្គបណ្តុះបណ្តាលមគ្គុទ្ទេសក៍ទេសចរណ៍នៅទីក្រុងម៉ាកាវ សាធារណរដ្ឋប្រជាមានិតចិនបានចូលជួបសម្តែងការគួរសមជាមួយឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរានៅព្រឹកថ្ងៃទី៩ ខែមិថុនា ឆ្នាំ២០១៦នៅសាលប្រជុំបេងមាលានៃមជ្ឈមណ្ឌលអាជា្ញធរជាតិអប្សរា ។

ឯកឧត្តមអគ្គនាយក បានសម្តែងនូវការអបអរសាទរចំពោះមគ្គុទេ្ទសក៍ទេសចរណ៍ទាំង២០រូប ដែលមានឱកាសទៅចូលរួមវគ្គបណ្តុះបណ្តាលមគ្គុទេ្ទសក៍ទេសចរណ៍នៅទីក្រុងម៉ាកាវ សាធារណរដ្ឋប្រជាមានិតចិន ដើម្បីទទួលបានចំណេះដឹងនិងបទពិសោធន៍ថ្មីៗបន្ថែមទៀតសម្រាប់យកមកចូលរួមចំណែកអភិវឌ្ឍវិស័យទេសចរណ៍នៅប្រទេសកម្ពុជាយើងឲ្យកាន់តែល្អប្រសើរ។

នាឱកាសនោះ ឯកឧត្តមអគ្គនាយកបានផ្តាំផ្ញើមគ្គុទេ្ទសក៍ទេសចរណ៍ទាំងអស់ថា ការទៅចូលរួមវគ្គបណ្តុះ បណ្តាលមគ្គុទេ្ទសក៍ទេសចរណ៍នេះ មិនត្រឹមតែចាំទទួលយកចំណេះដឹងនិងបទពិសោធន៍ពីគេប៉ុណ្ណោះទេ ប៉ុន្តែយើងត្រូវធ្វើបទបង្ហាញឲ្យគេបានដឹង និងបានយល់អំពីតម្លៃបេតិកភណ្ឌជាតិ និងការខិតខំប្រឹងប្រែងរបស់អាជា្ញធរជាតិអប្សរាក្នុងការថែរក្សា ការពារ អភិរក្ស និងអភិវឌ្ឍន៍រមណីយដ្ឋានប្រវត្តិសាស្ត្រអង្គរដែលជាសម្បត្តិបេតិកភណ្ឌពិភពលោកប្រកបដោយចីរភាព និងបានក្លាយជាគម្រូដ៏ល្អមួយសម្រាប់តំបន់បេតិកភណ្ឌដទៃៗទៀតលើសកលលោក។

ឯកឧត្តមអគ្គនាយកបញ្ជាក់បន្ថែមទៀតពីដំណើរការនៃកិច្ចប្រជុំអាយស៊ីស៊ីអង្គរ( ICC- ANGKOR) ដែលប្រព្រឹត្តទៅក្នុងមួយឆ្នាំ២ដងជារៀងរាល់ឆ្នាំ មានការចូលរួមពីបណ្តាអ្នកជំនាញជាន់ខ្ពស់អន្តរជាតិ និងប្រទេសជាដៃគូសហការចំនួន២៦ប្រទេសទៀតមកពិភាក្សាលម្អិតលើការអនុវត្តគម្រោងអភិរក្ស ជួសជុលប្រាសាទនិងការអភិវឌ្ឍផ្សេងៗក្នុងរមណីយដ្ឋានប្រវត្តិសាស្រ្តអង្គរ។

លោក ខៀវ ធី ជាមគ្គុទ្ទេសក៍ទេសចរណ៍ភាសាអង់គ្លេស តំណាងឲ្យមគ្គុទ្ទេសក៍ទេសចរណ៍ដែលត្រូវទៅចូលរួមវគ្គបណ្តុះបណ្តាលនៅម៉ាកាវទាំងអស់បានលើកឡើងថា លោកនិងមគ្គុទ្ទេសក៍ទេសចរណ៍ទាំងអស់មានសេចក្តីសប្បាយរីករាយខ្លាំងណាស់ដែលមានឱកាសបានចូលរួមវគ្គបណ្តុះបណ្តាលដ៏មានសារៈសំខាន់នេះក្រោមការសម្របសម្រួលយ៉ាងយកចិត្តទុកដាក់ពីអាជ្ញាធរជាតិអប្សរាហើយនឹងធ្វើតាមការផ្តាំផ្ញើ និងការណែនាំរបស់ឯកឧត្តមអគ្គនាយកឲ្យល្អប្រសើរ។

ជាមួយគ្នានេះដែរ លោកនិងមគ្គុទេ្ទសក៍ទេសចរណ៍ទាំងអស់បានថ្លែងអំណរគុណយ៉ាងជ្រាលជ្រៅចំពោះអាជ្ញាធរជាតិអប្សរាដែលបានយកចិត្តទុកដាក់និងផ្តល់ឱកាសឲ្យពួកគាត់បានទៅចូលរួមវគ្គបណ្តុះបណ្តាលផ្លាស់ប្តូរបទពិសោធន៍គ្នាទៅវិញទៅមកលើឆាកអន្តរជាតិ។

គួររំឭកថា អាជា្ញធរជាតិអប្សរាបានសហការគ្នាជាមួយអង្គការទេសចរណ៍ពិភពលលោក(UNWTO) បានប្រកាសជូនដំណឹងប្រឡងជ្រើសរើសមគ្គុទេ្ទសក៍ទេសចរណ៍ ដើម្បីទៅវគ្គបណ្តុះ បណ្តាលខ្លីនៅទីក្រុងម៉ាកាវ សាធារណរដ្ឋប្រជាមានិតចិនកាលពីថ្ងៃទី២៧ ខែមេសា ឆ្នាំ២០១៦នៅមជ្ឈមណ្ឌលបណ្តុះបណ្តាលអង្គរនៃអាជា្ញធរជាតិអប្សរាកន្លងមក ដោយមានកិច្ចសហការចូលរួមធ្វើជា គណៈកម្មការជ្រើសរើសពីសំណាក់តំណាងក្រសួងទេសចរណ៍និងក្រសួងវប្បធម៌និងវិចិត្រសិល្បៈផងដែរ៕











ដោយសាររដូវវស្សាឆ្នាំនេះមានភ្លៀងតិច និងមិនទៀងទាត់ ធ្វើឱ្យស្រះប្រាសាទអង្គរវត្តមានទឹកតិច និងឆាប់រីកទឹក។ ដើម្បីបង្កើនសម្រស់និងភាពទាក់ទាញនៅទីនេះ នាយកដ្ឋានគ្រប់គ្រងទឹកនៃអាជ្ញាធរជាតិអប្សរាបានចាប់ផ្តើមបូមបញ្ចូលទឹកក្នុងស្រះខាងត្បូងនៃប្រាសាទអង្គរវត្ត។
ដើម្បីធានាដល់សុវត្ថិភាពភ្ញៀវទេសចរ សាធារណជន ក៏ដូចជាដើម្បីលើកកម្ពស់សោភ័ណភាពនៅតាមដងផ្លូវ និងនៅតាមបរិវេណប្រាសាទ ក្នុងរមណីយដ្ឋានអង្គរ និងតំបន់ដែលគ្រប់គ្រងដោយអាជ្ញាធរជាតិអប្សរា នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរានឹងកាត់ដកហូត និងកាត់ក្រីមែកឈើ នៅតាមទីតាំងមួយចំនួន។ដើម្បីទទួលបានព័ត៌មានលំអិតសូមអានសេចក្ដីជូនដំណឹងដូចមានភ្ជាប់ជូនខាងក្រោម៖
ត្រពាំងបុរាណចំនួន៨កន្លែង ស្ថិតនៅឃុំដូនកែវ ស្រុកពួក ខេត្តសៀមរាប ដែលស្ថិតក្នុងតំបន់រមណីយដ្ឋានអង្គរ ត្រូវបានអនុញ្ញាតឱ្យស្ដារឡើងវិញ ដើម្បីជាប្រយោជន៍ដល់អ្នកភូមិសម្រាប់រក្សាទឹកទុកប្រើប្រាស់នារដូវប្រាំង ក៏ដូចជាដើម្បីប្រយោជន៍សហគមន៍ទាំងមូល។
អង្គភាពប្រព័ន្ធគ្រប់គ្រងបរិស្ថានអង្គរនៃអាជ្ញាធរជាតិអប្សរា បានខិតខំប្រឹងប្រែងដើម្បី បណ្តុះគំនិតកុមារឱ្យយល់ដឹង ភ្ញាក់រឭក និងចេះស្រឡាញ់ថែរក្សាការពារសម្បត្តិវប្បធម៌ សម្បត្តិធម្មជាតិ នៃតំបន់អង្គរដើម្បីឈានទៅរស់នៅក្នុងសង្គមប្រកបដោយសុខមាលភាព សុខដុមរម្យនារវាងបរិស្ថានស្អាត សង្គមវប្បធម៌ និងសង្គមរស់នៅរបស់មនុស្សក្នុងតំបន់អង្គរទាំងមូល។
ដើមដំបូងមុន12345...279280បន្ទាប់ចុងក្រោយ

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
4
ថ្ងៃនេះ
:
5467
ម្សិលមិញ
:
12216
សប្តាហ៍នេះ
:
05467
ខែនេះ
:
0155037
សរុប
:
009904723