ព័ត៌មានថ្មីៗ

អាជ្ញាធរជាតិអប្សរាបានទទួលទូកបុរាណពីប្រជាពលរដ្ឋ នៅភូមិបំពេញរាជ្យមករក្សាទុកនៅកសិណអង្គរវត្ត

បានផ្សាយនៅ ថ្ងៃទី 09 ខែ មេសា ឆ្នាំ2016 09:36 PM ដោយ ៖ អាជ្ញាធរជាតិអប្សរា
ទូកបុរាណដែលម្ចាស់ការដ្ឋានបូមខ្សាច់ ប្រទះឃើញកប់នៅក្នុងដីជម្រៅជាង៧ម៉ែត្រ នៅក្នុងភូមិបំពេញរាជ្យ ឃុំលាងដៃ ស្រុងអង្គរធំ ខេត្តសៀមរាប ត្រូវបានអាជ្ញាធរជាតិអប្សរាទទួលយកមករក្សាទុកក្នុងកសិណអង្គរវត្តហើយ នារសៀលថ្ងៃទី៨ ខែមេសា ឆ្នាំ២០១៦។

ទូកបុរាណនេះមានប្រវែង១២,៨៣ម៉ែត្រ ជាប្រភេទទូកឃ្លោង ត្រូវបានគេសន្និដ្ឋានបឋមថា ធ្វើពីដើមគគីរ និងជាប្រភេទទូកដែលធ្វើពីដើមឈើតែមួយដើមគត់។ អ្នកជំនាញពុំទាន់ហ៊ានសន្និដ្ឋានថា វាត្រូវបានគេធ្វើឡើងក្នុងសម័យកាលណា មានអាយុប៉ុន្មាននៅឡើយ គេគ្រាន់តែដឹងថា ទូកប្រភេទនេះ ជាទូកកម្រដែលអ្នកស្រាវជ្រាវមិនងាយបានប្រទះឃើញ។

លោកសាស្ត្រាចារ្យ Azedine BESCHAOUCH លេខាធិការវិទ្យាសាស្ត្រនៃគណៈកម្មការធិការអាយស៊ីស៊ី-អង្គរ ដែលបានទៅពិនិត្យមើលទូកនៅទីតាំងរកឃើញផ្ទាល់ បានបញ្ជាក់ថា យោងតាមកំណកដីដែលកប់ពីលើទូកមានជម្រៅបែបនេះ វាបញ្ជាក់ប្រាប់ថា ទូកនេះមានអាយុកាលយូរមកហើយ។ ទូកនេះ ជាប្រភេទទូកដែលគេលែងប្រទះឃើញប្រើប្រាស់ក្នុងប្រទេសកម្ពុជាបន្តទៀតដែរ។ នេះជាពិតជាសំណាងណាស់ដែលយើងបានប្រទះឃើញវត្ថុបុរាណ ដែលជាបេតិកភណ្ឌដ៏មានតម្លៃបែបនេះ។ លោកសាស្ត្រាចារ្យបន្ថែមថា លោកនឹងយកបំណែកតូចនៃទូកនេះទៅធ្វើការវិភាគតាមបច្ចេកវិទ្យាវិទ្យាសាស្ត្រ ដើម្បីកំណត់កាលបរិច្ឆេទជាក់លាក់នៃទូកនេះ។

ឯកឧត្តម ហង់ ពៅ អគ្គនាយករងទទួលបន្ទុកនាយកដ្ឋានគ្រប់គ្រងទឹកបញ្ជាក់ថា ក្រោយពីទទួលបានដំណឹងពីប្រជាពលរដ្ឋដែលថា គេបានប្រទះឃើញទូកបុរាណនៅក្នុងការដ្ឋានបូមខ្សាច់មក លោកបានបញ្ជូនក្រុមការងារធ្វើការជាមួយអាជ្ញាធរភូមិឃុំ ដើម្បីទទួលបានព័ត៌មានជាក់លាក់តាំងពីថ្ងៃទី១៧ ខែមីនា មកម្ល៉េះ តែរកមិនឃើញ ដោយសារម្ចាស់ការដ្ឋានមិនព្រមសហការជាមួយ។ ប៉ុន្តែ ដោយក្រុមការងារនៅតែបន្តសហការជិតស្និទ្ធជាមួយអាជ្ញាធរភូមិឃុំ និងព្យាយាមពន្យល់ម្ចាស់ការដ្ឋានឲ្យបានយល់អំពីតម្លៃនៃបេតិកភណ្ឌ និងច្បាប់នៃការគ្រប់គ្រងនេះជាច្រើនលើកច្រើនសា ទើបនៅព្រឹកថ្ងៃទី៨ ខែមេសានេះគាត់ព្រមសហការជាមួយ ហើយកាយយកទូកដែលកប់ទៅក្នុងភក់នោះឡើងមកវិញ។

លោក គឹម ឆន មេឃុំលាងដៃបានលើកឡើងថា លោកបានទទួលដំណឹងនៃការឃើញទូកបុរាណនេះជាងពីរសប្តាហ៍មកហើយ ព្រមទាំងបានបញ្ជូនក្រុមប្រឹក្សាឃុំទៅតាមដានទៀតផង។ តែក្រោយមក ម្ចាស់ការដ្ឋានបែរជានិយាយថា មិនបានឃើញទូកបុរាណនោះទៅវិញ ប្រហែលជាដោយសារតែគាត់បារម្ភពីការបិទការដ្ឋានបូមខ្សាច់របស់គាត់ ទើបគាត់ព្យាយាមលាក់ពីពួកយើង។ ប៉ុន្តែ ដោយក្រុមការងារចេះតែតាមដានជាប្រចាំ និងពន្យល់គាត់សព្វគ្រប់ទើបគាត់ព្រមបង្ហាញការពិតដល់ពួកយើង។

អ្នកស្រី សំ យិន រស់នៅភូមិប្រដាក និងជាម្ចាស់ការដ្ឋានបូមខ្សាច់ ដែលបានប្រទះឃើញទូកបុរាណនេះរៀបរាប់ថា អ្នកស្រីបានប្រទះឃើញទូកនេះមែន តាំងតែពីជាង១០ថ្ងៃមុន តែអ្នកស្រីបានឲ្យគេពន្លិចទៅវិញ។ អ្នកស្រីបញ្ជាក់ថា ការដែលអ្នកស្រីចេះតែលាក់នោះ គឺដោយសារអ្នកស្រីបានយល់សប្តិឃើញម្ចាស់ទូក គេមកប្រាប់ថា ត្រូវរៀបចំទូកជាតំណាងឲ្យគេ ព្រមទាំងរៀបចំបាយសី លេងភ្លេងជូនគេ ទើបអាចយកទូកចេញបាន។ ឥឡូវនេះ អ្នកស្រីបានរៀបចំទូកតំណាងដែលធ្វើពីដើមខ្លែងគង់ប្រវែង២ចំអាមកន្លះ និងរៀបចំបាយសី១២ថ្នាក់បានរួចរាល់ហើយ ទើបអ្នកស្រីសម្រេចបា្រប់ដល់អាជ្ញាធរនៅពេលនេះ។

សូមបញ្ជាក់ថា ក្នុងពិធីទទួលទូកបុរាណនេះ អាជ្ញាធរជាតិអប្សរាក៏បានឧបត្ថម្ភថវិកាដល់ ម្ចាស់ការដ្ឋានក្នុងការរៀបចំបាយសី និងធ្វើពិធីតំឡើងនៅថ្ងៃទី១៣ ខែមេសាខាងមុខ ព្រមទាំងឧបត្ថម្ភដល់កម្មករទាំង២៥នាក់ និងអាជ្ញាធរមូលដ្ឋាន ដែលបានផ្តល់កិច្ចសហការជ្រោមជ្រែងនាំយកទូកមករក្សាទុកនៅកសិណអង្គរវត្ត ដែលនេះជាគំរូល្អមួយ ក្នុងកិច្ចសហការល្អលើការងារអភិរក្សបេតិកភណ្ឌដូនតាខ្មែរ៕










នាយកដ្ឋានគ្រប់គ្រងទឹកនៃអាជ្ញាធរជាតិអប្សរា សហការជាមួយអាជ្ញាធរភូមិឃុំដែលស្ថិតនៅក្នុងឃុំ-សង្កាត់ចំនួន៧ ក្នុងស្រុកពួក និងក្រុងសៀមរាប បានចុះវាស់វែងដីកសិកម្មនៃសហគមន៍ដែលប្រើប្រាស់ទឹកបារាយណ៍ទឹកថ្លា ដើម្បីងាយស្រួលដល់ការងារគ្រប់គ្រងទឹក និងរៀបចំប្រព័ន្ធផ្លូវទឹកឲ្យបានកាន់តែល្អប្រសើរ។ ក្រុមការងារបានចាប់ផ្តើមចុះវាស់វែងពីពាក់កណ្តាលខែមីនា ឆ្នាំ២០១៦ ហើយគ្រោងនឹងបញ្ចប់ក្នុងរយៈពេល៣ខែខាងមុខ។
ដោយអនុវត្តទៅតាមសារាចរណែនាំរបស់រាជរដ្ឋាភិបាលកម្ពុជា ស្តីពីកង្វះខាតទឹកប្រើប្រាស់ ដោយសាររដូវប្រាំងឆ្នាំនេះអូសបន្លាយពេលយូរ នាយកដ្ឋានគ្រប់គ្រងទឹកនៃអាជ្ញាធរជាតិអប្សរា នៅព្រឹកថ្ងៃទី២៥ ខែមីនា ឆ្នាំ២០១៦នេះ បានប្រកាសផ្អាកការផ្គត់ផ្គង់ទឹកជូនសហគមន៍ ដែលប្រើប្រាស់ទឹកបារាយណ៍សម្រាប់ស្រោចស្រពដំណាំកសិកម្ម។ ការប្រកាសផ្អាកនៅពេលនេះ គឺដើម្បីរក្សាទឹកខ្លះឲ្យនៅសល់នៅបាតបារាយណ៍ ជាជម្រាបផ្គត់ផ្គង់អណ្តូង និងប្រភពទឹកប្រើប្រាស់ប្រចាំថ្ងៃរបស់ប្រជាពលរដ្ឋ។
បច្ចេកវិទ្យាអវកាស (Remote Sensing) ដែលកំពុងអនុវត្តលើការងារអភិរក្សក្នុងរមណីយដ្ឋានអង្គរសព្វថ្ងៃ អាចនឹងត្រូវពង្រីកវិសាលភាពរបស់ខ្លួនទៅកាន់តំបន់បេតិកភណ្ឌដទៃទៀត ដូចជា ប្រាសាទព្រះវិហារ ប្រាសាទកោះកេរ និងប្រាសាទបេងមាលាជាដើម។ នេះបើយោងតាមលទ្ធផលនៃកិច្ចពិភាក្សារវាងឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ជាមួយលោកសាស្ត្រាចារ្យ Bai Chunli ប្រធានបណ្ឌិតសភាវិទ្យាសាស្ត្រចិន នៅទីស្នាក់ការអាជ្ញាធរជាតិអប្សរា នាល្ងាចថ្ងៃទី២២ ខែមីនា ឆ្នាំ២០១៦កន្លងទៅនេះ។
ដោយមានការផ្តួចផ្តើមគំនិត ការចង្អុលបង្ហាញ និងការជំរុញពីឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា នៅព្រឹកថ្ងៃទី១០ខែមីនាឆ្នាំ២០១៦នេះ អាជ្ញាធរជាតិអប្សរាដឹកនាំដោយឯកឧត្តម ឈរ ថាណាត អគ្គនាយករងអាជ្ញាធរជាតិអប្សរា និងជាប្រធានគណៈកម្មការចម្រុះគ្រប់គ្រងអភិរក្ស និងការពារព្រៃឈើនៅតំបន់ប្រាសាទកោះកេរ និងមន្រ្តីបុគ្គលិកមួយចំនួនទៀតបានចុះទៅអប់រំផ្សព្វផ្សាយស្តីពីការគ្រប់គ្រង អភិរក្ស និងថែរក្សាការពារព្រៃឈើនៅតំបន់ប្រាសាទកោះកេរ ដោយមានការចូលរួមអំពីសំណាក់ព្រះសង្ឃ គណៈកម្មការ មន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ មន្ទីរទេសចរណ៍ រដ្ឋបាលព្រៃឈើ អាជ្ញាធរខេត្ត ស្រុក ឃុំ ភូមិនិងប្រជាពលរដ្ឋប្រមាណជាង៦០០អង្គ/រូបមកពីភូមិស្រយង់ខាងជើង ឃុំស្រយង់ ស្រុកគូលែន ខេត្តព្រះវិហារ។
ក្រុមការងារផ្សព្វផ្សាយអប់រំអំពីការងារអភិរក្សព្រៃឈើនៅតំបន់ប្រាសាទកោះកេរ នាព្រឹកថ្ងៃទី២៥ ខែកុម្ភៈនេះ បានចុះជួបប្រជាពលរដ្ឋជាង២០០នាក់នៅវត្តស្រយ៉ង់ ឃុំស្រយ៉ង់ ស្រុកគូលែន ខេត្តព្រះវិហារ។ ការជួបជុំនេះ គឺក្នុងគោលបំណងផ្សព្វផ្សាយ និងអប់រំប្រជាពលរដ្ឋឲ្យយល់ដឹងអំពីតម្លៃនៃការងារអភិរក្ស និងគោលការណ៍សំខាន់ៗដែលត្រូវអនុវត្តក្នុងតំបន់អភិរក្សនៃប្រាសាទកោះកេរ។ នេះជាលើកទី២ហើយនៃយុទ្ធនាការចុះអប់រំប្រជាពលរដ្ឋ បន្ទាប់ពីយុទ្ធនាការទី១បានធ្វើឡើងកាលពីថ្ងៃទី១៨ ខែកុម្ភៈ ឆ្នាំ២០១៦នៅភូមិរំចេក ឃុំស្រយ៉ង់ ខេត្តព្រះវិហារ។ ការផ្សព្វផ្សាយអប់រំ គឺជាបេសកកម្មដ៏សំខាន់មួយដែលត្រូវធ្វើដំណាលគ្នានឹងការបង្រ្កាប ទប់ស្កាត់បទល្មើសព្រៃឈើនៅតំបន់អភិរក្សនេះ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
8
ថ្ងៃនេះ
:
1828
ម្សិលមិញ
:
26968
សប្តាហ៍នេះ
:
28796
ខែនេះ
:
0173238
សរុប
:
010129385