NEWS

The English version of this website is still under construction. This section is only available in Khmer language at this stage. We apologise for any inconvenience

Published on 06 April 2016 01:37 PM Post By ៖ Apsara National Authority
ក្នុងកិច្ចប្រជុំបូកសរុបលទ្ធផលការងារប្រចាំត្រីមាសទី១របស់ខ្លួននារសៀលថ្ងៃទី៥ ខែមេសា ឆ្នាំ២០០១៦ គណៈកម្មការចម្រុះអភិរក្សព្រៃឈើតំបន់ការពារប្រាសាទកោះកេរដែលមានតំណាងអាជ្ញាធរជាតិអប្សរាជាប្រធានបានអះអាងថា បទល្មើសព្រៃឈើនៅតំបន់នេះបានថយចុះច្រើនគួរឲ្យកត់សម្គាល់ ហើយប្រជាពលរដ្ឋភាគច្រើនក៏បានយល់ដឹងកាន់តែច្បាស់អំពីតម្លៃនៃការងារអភិរក្សព្រៃឈើ និងបេតិកភណ្ឌ។

តាមរបាយការណ៍ដែលបង្ហាញដោយឯកឧត្តម ឈរ ថាណាត អគ្គនាយករងនៃអាជ្ញាធរជាតិអប្សរា និងជាប្រធានគណៈកម្មការចម្រុះនេះបញ្ជាក់ថា កន្លងមកធ្លាប់មានបទល្មើសព្រៃឈើច្រើន រហូតមានពេលខ្លះជនល្មើសមានគ្រឿងអាវុធក្នុងដៃទៀតផង តែចាប់ពីគណៈកម្មការចម្រុះត្រូវបានបង្កើតឡើងមក បទល្មើសបានថយចុះ ទាំងចំនួន និងមធ្យោបាយប្រព្រឹត្ត។ ជាក់ស្តែង ក្រុមការងារបង្ក្រាបបានបទល្មើសមួយចំនួនដែលជនល្មើសដូរពីប្រើប្រាស់រណារង៉ោងមកប្រើប្រាស់រណារដៃធម្មតា និងពីរថយន្តកន្ត្រៃមកប្រើប្រាស់រទេះដឹកជញ្ជូនដោយមនុស្សវិញ ដែលនេះបញ្ជាក់ថា ជនល្មើសមានការខ្លាចរអារច្រើនចំពោះភ្នាក់ងារអភិរក្ស ដែលបំពេញការងាររបស់ខ្លួនទាំងយប់ទាំងថ្ងៃ។

លទ្ធផលដ៏គួរឲ្យកត់សម្គាល់មួយទៀត គឺការងារផ្សព្វផ្សាយ និងអប់រំប្រជាពលរដ្ឋអំពីការងារអភិរក្សព្រៃឈើ និងបេតិកភណ្ឌក្នុងតំបន់ការពារកោះកេរ។ តាមរបាយការណ៍ខាងលើនេះបញ្ជាក់ថា ក្រុមការងារបានចុះផ្សព្វផ្សាយបានចំនួន៣ភូមិពាក់ព័ន្ធសំខាន់ៗ គឺភូមិរំចេក ភូមិស្រយ៉ង់ខាងត្បូង និងភូមិស្រយ៉ង់ខាងជើង ដែលស្ថិតនៅក្នុងឃុំស្រយ៉ង់ ស្រុកគូលែន ខេត្តព្រះវិហារ។ ប្រជាពលរដ្ឋប្រមាណ៨០%បានមកចូលរួមស្តាប់ និងបានយល់ដឹងកាន់តែច្បាស់អំពីតម្លៃនៃការងារអភិរក្សព្រៃឈើ ហើយពួកគាត់ភាគច្រើនបានសន្យាចូលរួមសហការនិងថែរក្សាព្រៃឈើជាមួយក្រុមគណៈកម្មការចម្រុះនេះ។

ទោះជាយ៉ាងណា គណៈកម្មការចម្រុះនេះនៅតែចង់បានលទ្ធផលដែលល្អប្រសើរជាងនេះ ដោយព្យាយាមកាត់បន្ថយឲ្យខាងតែបានទៅលើបទល្មើស ដោយមិនលើកលែងចំពោះអ្នកប្រព្រឹត្តណាមួយឡើយ ហើយក្រុមការងារផ្សព្វផ្សាយនៃគណៈកម្មការគ្រោងនឹងពង្រីកវិសាលភាពផ្សព្វផ្សាយទៅកាន់ឃុំមួយចំនួនទៀតដែលនៅក្បែរនឹងតំបន់ការពារនៃប្រាសាទកោះកេរ ព្រោះជនល្មើសមួយចំនួនក៏មកពីបណ្តាឃុំទាំងនោះដែរ។ ទន្ទឹមនឹងនេះ ស្មារតីនៃកិច្ចប្រជុំរបស់គណៈកម្មការចម្រុះនេះ ក៏បានសម្តែងការអរគុណ និងការគាំទ្រយ៉ាងពេញទំហឹងរបស់ឯកឧត្តមអគ្គនាយកនៃអាជ្ញាធរជាតិអប្សរា ដែលតែងតែតាមដានការងារ ផ្តល់អនុសាសន៍ដឹកនាំការងារ និងបានចុះមកពង្រឹងស្មារតីក្រុមអភិរក្សព្រៃឈើ ដែលជាកត្តាជំរុញឲ្យការងារយាមល្បាតមានប្រសិទ្ធភាព និងទទួលបានលទ្ធផលកាន់តែល្អប្រសើរឡើង៕






Speech of H. E. Ms. Phoeurng Sackona, President of APSARA National Authority

Weather Forecast

Angkor Code of Conduct

Angkor Code of Conduct's Video

Website Visitors

Now Online
:
10
Today
:
2090
Yesterday
:
6621
This Week
:
31545
This Month
:
0189434
Total
:
014249289