NEWS

The English version of this website is still under construction. This section is only available in Khmer language at this stage. We apologise for any inconvenience

Published on 04 April 2016 02:25 PM Post By ៖ Apsara National Authority
មន្ត្រីបុគ្គលិក ភ្នាក់ងារ និងកម្មករនៃអាជ្ញាធរជាតិអប្សរាជាង៥០នាក់ ដែលដឹកនាំដោយឯកឧត្តម ខូយ គឹមទួ ទីប្រឹក្សាអាជ្ញាធរជាតិអប្សរាបានចូលរួមក្នុងពិធីសម្អាតបរិស្ថានទ្រង់ទ្រាយធំជាមួយនឹងអ្នកចូលរួមជាង៤ពាន់នាក់ផ្សេងទៀត នាព្រឹកថ្ងៃទី២ ខែមេសា ឆ្នាំ២០១៦ ដែលរៀបចំដោយសាលាក្រុងសៀមរាប។ ការចូលរួមសម្អាតបរិស្ថាននៅពេលនេះគឺដើម្បីត្រៀមខ្លួនអបអរសាទរពិធីចូលឆ្នាំថ្មីប្រពៃណីជាតិខ្មែរ ដែលនឹងឈានមកដល់ក្នុងពេលឆាប់ៗខាងមុខនេះ។

ភ្នាក់ងារទេសចរណ៍មួយរូបនៃអាជ្ញាធរជាតិអប្សរាប្រចាំការនៅប្រាសាទអង្គរវត្ត ដែលបានមកចូលរួមក្នុងពិធីសម្អាតបរិស្ថានក្រុងនេះដែរ គឺលោក ជឿង សែមលោក សែម បញ្ជាក់ថា លោកពិតជារីករាយណាស់ដែលបានចូលរួមក្នុងពិធីនេះ។ លោកបានផ្ញើសារទៅកាន់យុវជនទាំងអស់ថា សៀមរាបជាទីក្រុងវប្បធម៌ ដែលសម្បូរដោយប្រាសាទបុរាណរាប់ពាន់ មានភ្ញៀវរាប់ម៉ឺននាក់ចូលមកទស្សនាជារៀងរាល់ថ្ងៃ ដូច្នេះសំរាមក៏មានច្រើនដែរ តែបើយើងនាំគ្នាសម្អាតម្នាក់បន្តិច ហើយភ្ញៀវទេសចរនាំគ្នាសម្អាតម្នាក់បន្តិច ទីក្រុងរបស់យើង ក៏ដូចជារមណីយដ្ឋានអង្គរទាំងមូលនឹងស្រស់ស្អាតបំព្រងមិនខាន។

យុវតី ស្រីយ៉ែន មកពីសហភាពសហព័ន្ធយុវជនកម្ពុជា បានបង្ហាញនូវមោទនភាពរបស់ខ្លួន ដែលបានចូលរួមក្នុងពិធីដ៏មានន័យនេះថា កម្មវិធីសម្អាតបរិស្ថាននេះពិតជាសារមួយល្អណាស់ ដែលអាចជួយក្រើនរំឭកដល់មនុស្សគ្រប់គ្នាថា ពួកគេត្រូវតែយកចិត្តទុកដាក់ពីការទុកដាក់សំរាម និងចោលសំរាមឲ្យបានត្រឹមត្រូវ។ យុវតីរូបនេះបានអំពាវនាវដល់ភ្ញៀវជាតិ និងអន្តរជាតិ ដែលនឹងមកទស្សនាអង្គរនាពេលព្រឹត្តិការណ៍អង្គរសង្ក្រាន្តខាងមុខនេះ សូមយកចិត្តទុកដាក់ថែរក្សាបរិស្ថានទាំងអស់គ្នា ដើម្បីធ្វើឲ្យរមណីយដ្ឋានអង្គរ ជារមណីយដ្ឋានគ្មានសំរាម សក្តិសមជាដួងព្រលឹងជាតិរបស់ខ្មែរ និងជាសម្បត្តិបេតិកភណ្ឌរបស់ពិភពលោក។

បរិស្ថានគឺជាធាតុដ៏សំខាន់ដែលធ្វើឲ្យរមណីយដ្ឋានអង្គរ មានសម្រស់ស្រស់បំព្រង ទាក់ទាញនូវចំណាប់អារម្មណ៍ភ្ញៀវទេចសចរកាន់តែខ្លាំង បន្ថែមទៅលើប្រាង្គប្រាសាទបុរាណដ៏ល្អឯកដែលមានស្រាប់។ អាជ្ញាធរជាតិអប្សរាបានយកចិត្តទុកដាក់ជាខ្លាំងលើបញ្ហានេះ។ ដូច្នេះហើយ ទើបតាំងឆ្នាំ២០០៤មក អាជ្ញាធរជាតិអប្សរា បានចុះឈ្មោះដើម្បីទទួលការវាយតម្លៃបរិស្ថានពីស្ថាប័នធានាគុណភាពជប៉ុនហៅកាត់ថា JQA និងបានទទួលបានវិញ្ញាបនបត្រ ISO14001 ពីស្ថាប័ននេះរយៈពេល៤លើករួចមកហើយ។

ក្នុងន័យនេះ អាជ្ញាធរជាតិអប្សរាបានធ្វើសកម្មភាពការពារថែរក្សាបរិស្ថានជាច្រើនទម្រង់ ដូចជាការបង្កើតអង្គភាពប្រព័ន្ធគ្រប់គ្រងបរិស្ថាន EMS ការបណ្តុះបណ្តាលអំពីបរិស្ថានតាមគ្រឹះស្ថានសិក្សាក្នុងតំបន់រមណីយដ្ឋានអង្គរ និងអប់រំប្រជាពលរដ្ឋ ព្រះសង្ឃអំពីការថែរក្សាបរិស្ថានជាដើម។ ក្រៅពីនេះក៏មានការរៀបចំកម្មវិធីបរិស្ថានប្រចាំឆ្នាំ និងចូលរួមជាមួយស្ថាប័នការពារបរិស្ថានផ្សេងៗទៀតជាប្រចាំ៕










ចម្លាក់តោធ្វើពីថ្មភក់ចំនួនប្រាំដែលដាក់តាំងនៅមុខប្រាសាទក្រវាន់ នឹងត្រូវនាយកដ្ឋានជំនាញសិក្សាពីទម្រង់រចនាបទដើម្បីធ្វើការជួសជុល និងឆ្លាក់បន្ថែមជើង ក្នុងន័យលើកតម្លៃសម្បត្តិបេតិកភណ្ឌក្នុងរមណីយដ្ឋានអង្គរ។
ប្រជាពលរដ្ឋជាង៨០០នាក់មកពី៤ឃុំសង្កាត់ នៅព្រឹកថ្ងៃទី៩ ខែធ្នូ ឆ្នាំ២០១៥នេះ បានចូលរួមជាមួយអាជ្ញាធរជាតិអប្សរា ធ្វើការសម្អាតប្រព័ន្ធប្រឡាយបង្ហូរទឹក ចេញពីបារាយណ៍ខាងលិច ដែលជាប្រភពទឹកដ៏សំខាន់ សម្រាប់ប្រជាសហគមន៍ចំនួន៩ឃុំសង្កាត់ក្នុងក្រុងសៀមរាប និងស្រុកពួកប្រើប្រាស់ក្នុងវិស័យកសិកម្ម។

ការចូលរួមសម្អាតប្រឡាយនៅពេលនេះ ធ្វើឡើងដើម្បីថែទាំងប្រព័ន្ធប្រឡាយមេ ធានាការប្រើប្រាស់យូរអង្វែង ក៏ដូចជាបំពេញតម្រូវការជាក់ស្តែងសម្រាប់ការងារបង្កបង្កើនផលនារដូវប្រាំង ខាងមុខនេះ។

លោក ហួត ហាយ ប្រធានសមាគមកសិករប្រើប្រាស់ទឹកបារាយណ៍ខាងលិច បានឲ្យដឹងក្នុងពេលដែលលោកកំពុងដឹកប្រជាពលរដ្ឋសម្អាតប្រឡាយនេះថា សមាគមរបស់លោកមានប្រជាពលរដ្ឋ៩ឃុំសង្កាត់ និងមានផ្ទៃដីធ្វើសែ្រប្រាំងចំនួន៤ពាន់ហិកតា។ លោកបញ្ជាក់ថា ចាប់តាំងពីអាជ្ញាធរជាតិអប្សរាបានទទួលការគ្រប់គ្រងប្រព័ន្ធទឹកនៅបារាយណ៍ខាងលិចមក កសិករយើងមានទឹកប្រើប្រាស់គ្រប់គ្រាន់សម្រាប់បង្កបង្កើនផល មិនមានការបារម្ភពីកង្វះខាតទឹកនោះទេ។ ការសម្អាតប្រឡាយនៅពេលនេះ គឺជួយសម្រួលទឹកឲ្យបានហូរលឿន អាចស្រោចស្រពដល់ស្រែប្រាំង ដែលនៅខាងក្រោមៗ។

ជំទប់ទី១នៃឃុំខ្នាត លោក មឿន ឈឿត បញ្ជាក់ថា ស្រែប្រាំងនៅក្នុងឃុំរបស់លោកមាន៣៨០ហិកតា។ លោកក៏សម្តែងសេចក្តីរីករាយផងដែរ ដែលអាជ្ញាធរជាតិអប្សរាបានជួយស្តារ និងកាយប្រឡាយចាស់ៗមួយចំនួនក្នុងឃុំរបស់លោក បានប្រើប្រាស់ឡើងវិញ។ លោកបន្ថែមថា សព្វថ្ងៃនេះរាល់សំណូមពររបស់ប្រជាពលរដ្ឋទាក់ទងនឹងទឹកធ្វើកសិកម្ម អាជ្ញាធរជាតិអប្សរា តែងជួយដោះស្រាយទាន់ពេលវេលាមិនដែលខកខានឡើយ។

លោក ជូ រ៉ាឌីណា អនុប្រធាននាយកដ្ឋានគ្រប់គ្រងទឹកបញ្ជាក់ថា ចាប់ពីទទួលបានគោលការណ៍គ្រប់គ្រងទឹក និងទ្វារទឹកនៅបារាយណ៍ខាងលិចពីរាជរដ្ឋាភិបាល រយៈពេលជាង១ឆ្នាំកន្លងមកនេះ យើងបានសហការគ្នាល្អណាស់ជាមួយសហគមន៍ប្រើប្រាស់ទឹកបារាយណ៍ខាងលិច។ យើងបានជួបពិភាក្សាជាមួយពួកគាត់ជាញឹកញាប់ អំពីតម្រូវការរបស់ពួកគាត់ និងអ្វីដែលយើងត្រូវធ្វើបន្ថែមទៀត។ យើងសង្កេតឃើញថា បច្ចុប្បន្នពួកគាត់រីករាយណាស់ ដោយសារមានទឹកគ្រប់គ្រាន់សម្រាប់ការងារបង្កបង្កើនផល។

ការចូលរួមសម្អាតប្រឡាយរបស់ប្រជាកសិករក្នុងពេលនេះ គឺជាការបញ្ជាក់ពីការគាំទ្រ ចំពោះអាជ្ញាធរជាតិអប្សរាដែលបានរៀបចំប្រព័ន្ធធារាសាស្ត្របុរាណនាសម័យអង្គរ ឲ្យដំណើរការឡើងវិញ ដែលសកម្មភាពនេះ មិនត្រឹមតែចូលរួមក្នុងកិច្ចការអភិរក្សប្រាសាង្គប្រាសាទ ការបញ្ជៀសទឹកជំនន់តំបន់អង្គរ និងទីក្រុងសៀមរាបប៉ុណ្ណោះទេ តែថែមទាំងបានក្លាយជាប្រភពទឹកយ៉ាងសំខាន់ដល់បងប្អូនប្រជាពលរដ្ឋសម្រាប់ការងារកសិកម្មទៀតផង។ ជាមួយគ្នានេះដែរ អាជ្ញាធរជាតិអប្សរា សូមគាំទ្រនិងលើកទឹកចិត្តប្រជាពលរដ្ឋក្នុងឧទ្យានអង្គរ ក៏ដូចជាប្រជាពលរដ្ឋទូទៅ ឲ្យចូលរួមក្នុងកិច្ចការអភិរក្ស ក៏ដូចជាកិច្ចការសង្គមផ្សេងៗទៀត។

សូមបញ្ជាក់ថា កាលពីថ្ងៃទី១ ខែកក្កដា ឆ្នាំ២០១៤ រាជរដ្ឋាភិបាលបានប្រគល់ការងារគ្រប់គ្រងទឹក និងទ្វារទឹកនៅបារាយណ៍ខាងលិច ជូនអាជ្ញាធរជាតិអប្សរា ដោយត្រូវទទួលខុសត្រូវទាំងស្រុងលើតម្រូវការទឹកសម្រាប់ស្រូវចំនួន១២០០០ហិកតា (ស្រូវវស្សា៨០០០ហិកតា ស្រូវប្រាំង៤០០០ហិកតា) និងដំណាំរួមផ្សំផ្សេងទៀតចំនួន១០០០ហិកតា និងធានាដោះស្រាយរាល់បញ្ហាគ្រោះទឹកជំនន់ និងភាពរាំងស្ងួត ដែលអាចកើតមានឡើងជាយថាហេតុ។ បន្ទាប់ពីបានទទួលគោលការណ៍នេះហើយ អាជ្ញាធរជាតិអប្សរាបានជួសជុល ស្តារឡើងវិញជាបន្ទាន់នូវទ្វារទឹក និងប្រព័ន្ធប្រឡាយនៃបារាយណ៍ខាងលិច ដែលការងារនេះ ធ្វើឲ្យប្រជាពលរដ្ឋមានទឹកគ្រប់គ្រាន់សម្រាប់ការបង្កបង្កើនផលបានគ្រប់រដូវ៕










Speech of H. E. Ms. Phoeurng Sackona, President of APSARA National Authority

Weather Forecast

Angkor Code of Conduct

Angkor Code of Conduct's Video

Website Visitors

Now Online
:
8
Today
:
8989
Yesterday
:
6621
This Week
:
38444
This Month
:
0196333
Total
:
014256188