ព័ត៌មានថ្មីៗ

អាជ្ញាធរជាតិអប្សរាប្រកាសផ្អាកការផ្គត់ផ្គង់ទឹកជូនសហគមន៍ប្រើប្រាស់ធ្វើកសិកម្មដោយសារទឹកបារាយណ៍នៅសល់តិចពេក

បានផ្សាយនៅ ថ្ងៃទី 26 ខែ មិនា ឆ្នាំ2016 10:00 PM ដោយ ៖ អាជ្ញាធរជាតិអប្សរា
ដោយអនុវត្តទៅតាមសារាចរណែនាំរបស់រាជរដ្ឋាភិបាលកម្ពុជា ស្តីពីកង្វះខាតទឹកប្រើប្រាស់ ដោយសាររដូវប្រាំងឆ្នាំនេះអូសបន្លាយពេលយូរ នាយកដ្ឋានគ្រប់គ្រងទឹកនៃអាជ្ញាធរជាតិអប្សរា នៅព្រឹកថ្ងៃទី២៥ ខែមីនា ឆ្នាំ២០១៦នេះ បានប្រកាសផ្អាកការផ្គត់ផ្គង់ទឹកជូនសហគមន៍ ដែលប្រើប្រាស់ទឹកបារាយណ៍សម្រាប់ស្រោចស្រពដំណាំកសិកម្ម។ ការប្រកាសផ្អាកនៅពេលនេះ គឺដើម្បីរក្សាទឹកខ្លះឲ្យនៅសល់នៅបាតបារាយណ៍ ជាជម្រាបផ្គត់ផ្គង់អណ្តូង និងប្រភពទឹកប្រើប្រាស់ប្រចាំថ្ងៃរបស់ប្រជាពលរដ្ឋ។

នៅចំពោះមុខសហគមន៍អ្នកប្រើប្រាស់ទឹកបារាយណ៍ និងអាជ្ញាធរភូមិឃុំដែលពាក់ព័ន្ធ ឯកឧត្តម ហង់ ពៅ អគ្គនាយករងទទួលបន្ទុកនាយកដ្ឋានគ្រប់គ្រងទឹក មានប្រសាសន៍ថា ការផ្អាកបង្ហូរទឹកជូនប្រជាពលរដ្ឋនៅពេលនេះ គឺដោយសារបរិមាណទឹកបារាយណ៍នៅសល់តិចតួច ដែលអាចនឹងខះរីងស្ងួត បើនៅតែបន្តបង្ហូរចេញទៅផ្គត់ផ្គង់ដំណាំកសិកម្មប្រជាពលរដ្ឋ។ ម្យ៉ាងទៀត ការធ្វើស្រែប្រាំងលើកទី២របស់ប្រជាពលរដ្ឋក៏បានរួចរាល់ហើយដែរ តែការប្រកាសផ្អាកនេះ គឺដើម្បីកុំឲ្យប្រជាពលរដ្ឋបង្កបង្កើនផលសម្រាប់ដំណាក់កាលទី៣ទៀត ព្រោះទឹកបារាយណ៍បានធ្លាក់ដល់កម្រិតទាបបំផុតហើយ។ ឯកឧត្តមក៏លើកសារាចរណែនាំរបស់រាជរដ្ឋាភិបាល ដែលបានណែនាំឲ្យស្ថាប័ន និងអង្គភាពគ្រប់គ្រងទឹកសន្សំសំចៃទឹកទុកសម្រាប់ការប្រើប្រាស់ប្រចាំថ្ងៃរបស់ប្រជាពលរដ្ឋ ដោយសារឆ្នាំនេះប្រទេសជាច្រើននៅលើសកលលោកដោយរួមទាំងកម្ពុជាផង ប្រឈមនឹងរដូវប្រាំងយូរជាងប្រក្រតី។

ពាក់ព័ន្ធនឹងទឹកបារាយណ៍ដែលស្ទើរតែខះរីងនៅពេលនេះ ឯកឧត្តមបញ្ជាក់ថា ដោយសារការបង្ហូរទឹកជូនប្រជាពលរដ្ឋប្រើប្រាស់ឆ្នាំនេះច្រើនជាងឆ្នាំមុន។ “វស្សាកន្លងទៅ ទឹកទន្លេទាបខ្លាំង មិនអាចហូរចូលទំនប់៧៨ ដែលជាឃ្លាំងផ្ទុកទឹកសម្រាប់ស្រោចស្រពស្រែប្រាំងជាង២៦០០ហិកតានៅក្រោមទំនប់។ ប្រជាពលរដ្ឋនៅទីនោះបានស្នើមកយើង ដើម្បីប្រើប្រាស់ទឹកបារាយណ៍ដែរ។ មិនតែប៉ុណ្ណោះ តាមស្ថិតិដែលយើងទទួលបាន ប្រជាពលរដ្ឋបានពង្រីកផ្ទៃដីដាំដុះដល់ទៅជាង១៦០០ហិកតាបន្ថែមទៀត។ ដូច្នេះសរុបទៅ ផ្ទៃដីដែលបន្ថែមថ្មីមានដល់ទៅជាង៤ពាន់ហិកតា ដែលធ្វើឲ្យតម្រូវការទឹកបារាយណ៍មានចំនួនច្រើនលើសធម្មតា។ បច្ចុប្បន្ន ក្រុមការងារយើងកំពុងចុះវាស់វែងដី ដើម្បីក្តាប់ស្ថិតិបានជាក់ស្តែង ដែលអាចឲ្យយើងងាយស្រួលគ្រប់គ្រង និងចែកចាយទឹកឲ្យបានគ្រប់គ្រាន់”

លោក បូ ប៊ត់ សមាជិកក្រុមប្រឹក្សាសង្កាត់ក្របីរៀលបានលើកឡើងថា ប្រជាពលរដ្ឋនៅក្នុងសង្កាត់របស់លោកភាគច្រើន សុទ្ធសឹងជាប្រជាកសិករ ដែលប្រកបរបរកសិកម្មប្រចាំថ្ងៃ ដោយពឹងផ្អែកលើទឹកដែលបានពីទំនប់៧៨ និងបារាយណ៍ទឹកថ្លា។ តែដោយសារឆ្នាំនេះកម្ពស់ទឹកទន្លេទាប មិនអាចហូរចូលទំនប់៧៨បាន ទើបប្រជាពលរដ្ឋងាកមកប្រើប្រាស់ទឹកបារាយណ៍ទាំងស្រុង ដែលជាហេតុធ្វើឲ្យទឹកបារាយណ៍មិនអាចផ្គត់ផ្គង់ទឹកបានជាបន្តទៀត។

ជាការឆ្លើយតប ប្រធានសហគមន៍ប្រើប្រាស់ទឹកបារាយណ៍ខាងលិច លោក ហួត ហៃ បញ្ជាក់ថា លោកនឹងនាំយកដំណឹងនេះទៅជម្រាបប្រជាពលរដ្ឋក្នុងសហគមន៍ឲ្យបានជ្រាបបន្ត ដោយមិនឲ្យប្រជាពលរដ្ឋស្នើសុំឲ្យអាជ្ញាធរបង្ហូរទឹតទៀតទេ ព្រោះស្ថានភាពជាក់ស្តែង គឺទឹកបារាយណ៍ពេលនេះមិនអាចបង្ហូរចេញបានទៀតទេ៕










នាយកដ្ឋានគ្រប់គ្រងទឹកនៃអាជ្ញាធរជាតិអប្សរា សហការជាមួយអាជ្ញាធរភូមិឃុំដែលស្ថិតនៅក្នុងឃុំ-សង្កាត់ចំនួន៧ ក្នុងស្រុកពួក និងក្រុងសៀមរាប បានចុះវាស់វែងដីកសិកម្មនៃសហគមន៍ដែលប្រើប្រាស់ទឹកបារាយណ៍ទឹកថ្លា ដើម្បីងាយស្រួលដល់ការងារគ្រប់គ្រងទឹក និងរៀបចំប្រព័ន្ធផ្លូវទឹកឲ្យបានកាន់តែល្អប្រសើរ។ ក្រុមការងារបានចាប់ផ្តើមចុះវាស់វែងពីពាក់កណ្តាលខែមីនា ឆ្នាំ២០១៦ ហើយគ្រោងនឹងបញ្ចប់ក្នុងរយៈពេល៣ខែខាងមុខ។
បច្ចេកវិទ្យាអវកាស (Remote Sensing) ដែលកំពុងអនុវត្តលើការងារអភិរក្សក្នុងរមណីយដ្ឋានអង្គរសព្វថ្ងៃ អាចនឹងត្រូវពង្រីកវិសាលភាពរបស់ខ្លួនទៅកាន់តំបន់បេតិកភណ្ឌដទៃទៀត ដូចជា ប្រាសាទព្រះវិហារ ប្រាសាទកោះកេរ និងប្រាសាទបេងមាលាជាដើម។ នេះបើយោងតាមលទ្ធផលនៃកិច្ចពិភាក្សារវាងឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ជាមួយលោកសាស្ត្រាចារ្យ Bai Chunli ប្រធានបណ្ឌិតសភាវិទ្យាសាស្ត្រចិន នៅទីស្នាក់ការអាជ្ញាធរជាតិអប្សរា នាល្ងាចថ្ងៃទី២២ ខែមីនា ឆ្នាំ២០១៦កន្លងទៅនេះ។
ដោយមានការផ្តួចផ្តើមគំនិត ការចង្អុលបង្ហាញ និងការជំរុញពីឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា នៅព្រឹកថ្ងៃទី១០ខែមីនាឆ្នាំ២០១៦នេះ អាជ្ញាធរជាតិអប្សរាដឹកនាំដោយឯកឧត្តម ឈរ ថាណាត អគ្គនាយករងអាជ្ញាធរជាតិអប្សរា និងជាប្រធានគណៈកម្មការចម្រុះគ្រប់គ្រងអភិរក្ស និងការពារព្រៃឈើនៅតំបន់ប្រាសាទកោះកេរ និងមន្រ្តីបុគ្គលិកមួយចំនួនទៀតបានចុះទៅអប់រំផ្សព្វផ្សាយស្តីពីការគ្រប់គ្រង អភិរក្ស និងថែរក្សាការពារព្រៃឈើនៅតំបន់ប្រាសាទកោះកេរ ដោយមានការចូលរួមអំពីសំណាក់ព្រះសង្ឃ គណៈកម្មការ មន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ មន្ទីរទេសចរណ៍ រដ្ឋបាលព្រៃឈើ អាជ្ញាធរខេត្ត ស្រុក ឃុំ ភូមិនិងប្រជាពលរដ្ឋប្រមាណជាង៦០០អង្គ/រូបមកពីភូមិស្រយង់ខាងជើង ឃុំស្រយង់ ស្រុកគូលែន ខេត្តព្រះវិហារ។
ក្រុមការងារផ្សព្វផ្សាយអប់រំអំពីការងារអភិរក្សព្រៃឈើនៅតំបន់ប្រាសាទកោះកេរ នាព្រឹកថ្ងៃទី២៥ ខែកុម្ភៈនេះ បានចុះជួបប្រជាពលរដ្ឋជាង២០០នាក់នៅវត្តស្រយ៉ង់ ឃុំស្រយ៉ង់ ស្រុកគូលែន ខេត្តព្រះវិហារ។ ការជួបជុំនេះ គឺក្នុងគោលបំណងផ្សព្វផ្សាយ និងអប់រំប្រជាពលរដ្ឋឲ្យយល់ដឹងអំពីតម្លៃនៃការងារអភិរក្ស និងគោលការណ៍សំខាន់ៗដែលត្រូវអនុវត្តក្នុងតំបន់អភិរក្សនៃប្រាសាទកោះកេរ។ នេះជាលើកទី២ហើយនៃយុទ្ធនាការចុះអប់រំប្រជាពលរដ្ឋ បន្ទាប់ពីយុទ្ធនាការទី១បានធ្វើឡើងកាលពីថ្ងៃទី១៨ ខែកុម្ភៈ ឆ្នាំ២០១៦នៅភូមិរំចេក ឃុំស្រយ៉ង់ ខេត្តព្រះវិហារ។ ការផ្សព្វផ្សាយអប់រំ គឺជាបេសកកម្មដ៏សំខាន់មួយដែលត្រូវធ្វើដំណាលគ្នានឹងការបង្រ្កាប ទប់ស្កាត់បទល្មើសព្រៃឈើនៅតំបន់អភិរក្សនេះ។
គណៈកម្មការចម្រុះដែលត្រូវបានបង្កើតឡើងរួមគ្នារវាងអាជ្ញាធរជាតិអប្សរា និងរដ្ឋបាលខេត្តព្រះវិហារកាលពីដើមឆ្នាំ២០១៦ ឥឡូវនេះត្រូវបានបែងចែកជាក្រុមតូចៗចំនួន៣ ដើម្បីពង្រឹងប្រសិទ្ធភាពការងារអភិរក្ស និងគ្រប់គ្រងព្រៃឈើនៅតំបន់កោះកេរ។ ថ្ងៃទី១៧ ខែកុម្ភៈកន្លងទៅនេះ សេចក្តីប្រកាសពីសមាសភាពក្រុម និងភារកិច្ច ត្រូវបានធ្វើឡើងនៅរដ្ឋបាលខេត្តព្រះវិហារ ក្រោមអធិបតីភាព ឯកឧត្តម ឈរ ថាណាត អគ្គនាយករងអាជា្ញធរជាតិអប្សរា និងជាប្រធានគណៈកម្មការចម្រុះនេះ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
3
ថ្ងៃនេះ
:
0379
ម្សិលមិញ
:
1913
សប្តាហ៍នេះ
:
77033
ខែនេះ
:
0158310
សរុប
:
009340592