ព័ត៌មានថ្មីៗ

ក្រុមអភិរក្សថ្មនៃអាជ្ញាធរជាតិអប្សរាជួសជុលបំណែកផ្តែរនិងសសរពេជ្រដែល ជ្រុះធ្លាក់ពីប៉មទី៨នៃប្រាសាទបាគង ដោយសារខ្យល់ព្យុះកេតសូណាជិតរួចរាល់ហើយ

បានផ្សាយនៅ ថ្ងៃទី 17 ខែ មិនា ឆ្នាំ2016 08:38 AM ដោយ ៖ អាជ្ញាធរជាតិអប្សរា

ផ្តែរថ្មមានទម្ងន់ជាង៥តោន និងសសរពេជ្រដែលបានជ្រុះធ្លាក់ពីប្រាសាទឥដ្ឋប៉មទី៨នៃប្រាសាទបាគង ក្នុងអំឡុងឆ្នាំ២០០៩ ដោយកម្លាំងខ្យល់ព្យុះកេតសូណា ត្រូវបានក្រុមអភិរក្សថ្ម នៃអាជ្ញាធរជាតិអប្សរាធ្វើការផ្គុំជួសជូលឡើងវិញ នៅសារមន្ទីរព្រះនរោត្តមសីហនុអង្គរ។ ផ្តែរថ្ម និងសសរពេជ្រនេះ ត្រូវបានក្រុមជំនាញដឹកជញ្ជូនមករក្សាទុកនៅសារមន្ទីរព្រះនរោត្តមសីហនុអង្គរ កាលពីឆ្នាំ២០១២ ដើម្បីធ្វើការអភិរក្សជួសជុល និងតភ្ជាប់ឡើងវិញ។

ប្រធានក្រុមអភិរក្សថ្មនៃអាជ្ញាធរជាតិអប្សរា លោក ឡុង ណារី ដែលកំពុងដឹកនាំការងារជួសជុលនេះរៀបរាប់ថា ផ្តែរ និងសសរពេជ្រនេះមានអាយុកាលជាង១ពាន់ឆ្នាំហើយ មានការពុកផុយនិងជំងឺច្រើន។ លោក ពន្យល់ថា ការជួសជុលថ្មចម្លាក់នេះ មិនខុសពីព្យាបាលមនុស្សចាស់ទេ។ ជំងឺច្រើនមុខច្រើនប្រភេទ អស់ពីឈឺនេះ ឈឺនោះមិនចេះចប់។ ជាក់ស្តែងផ្តែរថ្មនេះ គ្រាន់តែជំងឺដែលក្រុមយើងពិនិត្យឃើញដើម្បីព្យាបាលមានដល់ទៅជាង១០០ប្រភេទជំងឺ ហើយត្រូវការរបៀបព្យាបាលដោយឡែកៗពីគ្នា។

និយាយពីវិធីសាស្ត្រជួសជុលវិញ លោករៀបរាប់ថា “យើងបានរៀនសូត្រវិធីសាស្ត្រនេះពីក្រុមជំនាញអាល្លឺម៉ង់ផង រួមផ្សំនឹងបទពិសោធន៍ជាច្រើនឆ្នាំលើការងារនេះផង។ ដើម្បីភ្ជាប់ផ្ទាំងបំណែកធំៗ យើងប្រើស្នូលភ្ជាប់ប្រភេទ Fiberglass រឹងមាំ តែអាចពត់ចុះឡើងបាន។ យើងប្រើជាតិស៊ីលីខេត ផ្សំនឹងអាកុលចាក់បញ្ចូលទៅក្នុងសាច់ថ្ម ដើម្បីពង្រឹងសាច់ថ្មដែលពុកផុយឡើងវិញ។ ចំណែកជាតិអំបិល និងមេរោគផ្សេងៗដែលជាប់នឹងថ្ម យើងព្យាបាលដោយការដុះសម្អាត លាងទឹក និងហាលឲ្យស្ងួត។ មកដល់ពេលនេះ ការងារយើងជិតរួចរាល់១០០%ហើយ នៅសល់តែបំណែកតូចៗខ្លះទៀតប៉ុណ្ណោះ”។

លោករៀបរាប់បន្ថែមថា សព្វថ្ងៃក្រុមរបស់លោកដែលមានគ្នា២០នាក់កំពុងអនុវត្តការងារជួសជុលចម្លាក់ចំនួន៣កន្លែង ដោយមួយក្រុមកំពុងជួសជុលចម្លាក់នាគនៅប្រាសាទបន្ទាយសំរែ មួយក្រុមទៀតកំពុងជួសជុលចម្លាក់តោនៅប្រាសាទប្រែរូប និងមួយក្រុមដែលកំពុងជួសជុលសសរពេជ្រ និងផ្តែរថ្មនៅសារមន្ទីរព្រះនរោត្តមសីហនុអង្គរនេះ។

ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ លោក លី វណ្ណា បញ្ជាក់ថា បច្ចុប្បន្នប្រាសាទឥដ្ឋប៉មទី៨នៃប្រាសាទបាគងនេះ កំពុងស្ថិតនៅក្នុងការជួសជុលដែរ។ ក្រោយពីការងារជួសជុលប្រាសាទចប់សព្វគ្រប់ ក្រុមការងារនឹងលើកផ្តែរនិងសសរពេជ្រដាក់កន្លែងដើម ក្នុងន័យថែរក្សាតម្លៃដើមនៃបេតិកភណ្ឌឡើងវិញ៕
















                                               ប្រាសាទឥដ្ឋប៉មទី៨នៃប្រាសាទបាគង មុន និងក្រោយ​ជ្រុះធ្លាក់ផ្ដែរ​ និងសសរពេជ្រ
អកយំ ជាឈ្មោះប្រាសាទសង់អំពីឥដ្ឋមុនសម័យអង្គរ រាងសាជី (Pyramide) ស្ថិតនៅលើខឿនបីជាន់ មានទំហំ១០០ម៉ែត្របួនជ្រុងស្មើ កសាងឡើងក្នុងរាជព្រះបាទភវវរ្ម័ន ដែលឧទ្ទិសចំពោះទេព «កុម្ភីរេស្វរៈ» ក្នុងអំឡុងសតវត្សទី៦នៃគ.ស។ គេបានរកឃើញសិលាចារឹកចំនួនបីផ្ទាំងនៅក្នុងប្រាសាទនេះ គឺផ្ទាំងទី១នៅលើស៊ុមទ្វារចូលប្រាង្គកណ្តាលផ្នែកខាងកើត ដែលបានបញ្ជាក់អំពីកាលបរិច្ឆេទស្ថិតក្នុងឆ្នាំ៦៧៤នៃគ.ស។ ផ្ទាំងទី២នៅលើស៊ុមទ្វារចូលប្រាង្គកណ្តាលផ្នែកខាងត្បូង បញ្ជាក់កាលបរិច្ឆេទនាដើមសតវត្សទី៨ និងផ្ទាំងទី៣ជាអក្សរចារមួយខ្សែលើជើងទម្រកប់ក្រោមដីកាលលើកទំនប់បារាយណ៍ ដែលបង្ហាញអំពីកាលបរិច្ឆេទឆ្នាំ១០០១នៃគ.ស។
ប្រាសាទក្រហមជាប្រាសាទឥដ្ឋដែលមានតម្កល់រូបព្រះឥសូររាំដ៏អស្ចារ្យកម្ពស់៤.៥០ម៉ែត្រ (បច្ចុប្បន្នសល់តែបំណែកខ្លះនៅក្នុងប្រាសាទ ឯខ្លះទៀតរក្សាទុកនៅសារមន្ទីរអង្គរ) តាមរចនាប័ទ្មកោះកេរ ឧទ្ទិសចំពោះព្រហ្មញ្ញសាសនា។ អ្នកស្រុក អ្នកធ្វើដំណើរ អ្នកស្រាវជ្រាវមានជំនឿយ៉ាងខ្លាំងលើប្រាសាទក្រហម ព្រោះទីនោះមានអ្នកតាក្រហមដ៏ពូកែស័ក្តិសិទ្ធិ។
កាលពីថ្ងៃទី ០៦ ខែមករា ឆ្នាំ២០១៦ លោក ឈាន រដ្ឋា ប្រធាននាយកដ្ឋានស្តីទី នៃនាយកដ្ឋានអភិរក្សប្រាសាទក្រៅឧទ្យានអង្គរ បានដឹកនាំមន្រី្ត បុគ្គលិកក្រោមឱវាទ ទៅចូលរួមក្នុងពិធីបុណ្យនៅស្ពានបុរាណព្រះទិស (ស្ពានកំពង់ក្តី) ដែលផ្តួចផ្តើមឡើងដោយព្រះសង្ឃ គណៈកម្មការវត្ត ព្រមទាំងពុទ្ធបរិស័ទចំណុះជើងវត្តជីក្រែង និងសាលាស្រុកជីក្រែង ដែលប្រព្រឹត្តទៅពីថ្ងៃទី ០៦ ដល់ថ្ងៃទី ០៨ ខែមករា ឆ្នាំ ២០១៦។
លោក នាង ឈុនអេង និងលោកស្រី យ៉ង់ ដេត ព្រមទាំងលោកស្រី នាង សុវណ្ណារ៉ា ជាបុត្រ ដែលសព្វថ្ងៃរស់នៅទីក្រុងភ្នំពេញបានចំណាយថវិកាផ្ទាល់ខ្លួន ដើម្បីឆ្លាក់ព្រះកេសទេវតាចំនួន៣ ពីថ្មភក់ជំនួសព្រះកេសស៊ីម៉ង់ត៍ដើម្បីដាក់នៅខ្លោងទ្វារទន្លេអុំ ក្រុងអង្គរធំ។
ការជួសជុលប្រាសាទ ឬបុរាណដ្ឋាននានា ជាពិសេសក្នុងរមណីយដ្ឋានអង្គរ យើងតែងឃើញការងារមួយដែលអ្នកជំនាញធ្វើ មុននឹងឈានដល់ការជួសជុលនោះគឺ ការធ្វើកំណាយបុរាណវិទ្យា។ កំណាយបុរាណវិទ្យា គឺជាការជីកកកាយបែបវិទ្យាសាស្ត្រ ដែលធ្វើឡើងយ៉ាងម៉ត់ចត់ និងមានវិធីសាស្ត្រត្រឹមត្រូវ។
ដើមដំបូងមុន123456បន្ទាប់ចុងក្រោយ

ប្រសាសន៍ឯកឧត្តមប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
3
ថ្ងៃនេះ
:
2871
ម្សិលមិញ
:
14501
សប្តាហ៍នេះ
:
50456
ខែនេះ
:
0312609
សរុប
:
001814644