ព័ត៌មានថ្មីៗ

អាជ្ញាធរជាតិអប្សរាចុះអប់រំផ្សព្វផ្សាយ ការគ្រប់គ្រងអភិរក្សការពារព្រៃឈើនិងសម្បត្តិបេតិកភណ្ឌនៅតំបន់ប្រាសាទកោះកេរជាលើកទី៣

បានផ្សាយនៅ ថ្ងៃទី 12 ខែ មិនា ឆ្នាំ2016 04:56 AM ដោយ ៖ អាជ្ញាធរជាតិអប្សរា
ដោយមានការផ្តួចផ្តើមគំនិត ការចង្អុលបង្ហាញ និងការជំរុញពីឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា នៅព្រឹកថ្ងៃទី១០ខែមីនាឆ្នាំ២០១៦នេះ អាជ្ញាធរជាតិអប្សរាដឹកនាំដោយឯកឧត្តម ឈរ ថាណាត អគ្គនាយករងអាជ្ញាធរជាតិអប្សរា និងជាប្រធានគណៈកម្មការចម្រុះគ្រប់គ្រងអភិរក្ស និងការពារព្រៃឈើនៅតំបន់ប្រាសាទកោះកេរ និងមន្រ្តីបុគ្គលិកមួយចំនួនទៀតបានចុះទៅអប់រំផ្សព្វផ្សាយស្តីពីការគ្រប់គ្រង អភិរក្ស និងថែរក្សាការពារព្រៃឈើនៅតំបន់ប្រាសាទកោះកេរ ដោយមានការចូលរួមអំពីសំណាក់ព្រះសង្ឃ គណៈកម្មការ មន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ មន្ទីរទេសចរណ៍ រដ្ឋបាលព្រៃឈើ អាជ្ញាធរខេត្ត ស្រុក ឃុំ ភូមិនិងប្រជាពលរដ្ឋប្រមាណជាង៦០០អង្គ/រូបមកពីភូមិស្រយង់ខាងជើង ឃុំស្រយង់ ស្រុកគូលែន ខេត្តព្រះវិហារ។

លោក និន ចាន់សាមៀន ប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរាបានលើកឡើងពន្យល់ពីពាក្យបេតិកភណ្ឌជាតិ និងបេតិកភណ្ឌពិភពលោក ព្រមទាំងរបៀបដាក់បញ្ចូលបេតិកភណ្ឌជាតិចូលជាបេតិកភណ្ឌពិភពលោក។ ដោយឡែក និយាយពីទំនាក់ទំនងព្រៃឈើនិងប្រាសាទ លោកសាមៀនបញ្ជាក់ថា ព្រៃឈើមានតួនាទីសំខាន់ណាស់ចំពោះប្រាសាទ ព្រោះព្រៃឈើជារបាំងជួយការពារខ្យល់បក់បោកមិនឲ្យប៉ះពាល់ខ្លាំងពេកនាំឲ្យប្រាសាទឆាប់រេចរឹល ព្រៃឈើជួយការពារទប់ការហូរច្រោះមិនឲ្យត្រូវប្រាសាទខ្លាំងពេក ព្រៃឈើជួយរក្សាសំណើមប្រាសាទមិនឲ្យថ្មឆាប់ស្ងួតខ្លាំងពេកឆាប់ប្រេះស្រាំបែកនិងជោកជាំខ្លាំងងាយពុកផុយ និងព្រៃឈើជួយផ្តល់នូវសោភណភាពដ៏ស្រស់ស្អាតដល់ប្រាសាទ។

ឯកឧត្តម ឈរ ថាណាត មានប្រសាសន៍ថា "ប្រាសាទនិងព្រៃឈើជាទ្រព្យសម្បត្តិមរតកមានតម្លៃមហាសាល បើយើងស្រលាញ់ជាតិ សូមចូលរួមថែរក្សាការពារអភិរក្សទាំងអស់គ្នាព្រោះថាវាជាអាយុជីវិត និងជាដួងព្រលឹងរបស់ជាតិយើងដូចពាក្យស្លោកថាវប្បធម៌រលត់ជាតិរលាយ វប្បធម៌ពណ្ណរាយជាតិថ្កុំថ្កើង។ បើយើងអាចថែរក្សាការពារព្រៃឈើ និងប្រាសាទបាន យើងនឹងដាក់បញ្ចូលជាបេតិកភណ្ឌពិភពលោកក្នុងអង្គការយូណេស្កូ។ នៅពេលយើងដាក់បានហើយ យើងទទួលបានផលប្រយោជន៍យ៉ាងច្រើនពីវា ដូចជាទទួលបានទុនពីបរទេសជួយជួសជុល និងថែរក្សាការពារប្រាសាទ និងមានការហូរចូលភ្ញៀវទេសចរមកទស្សនាប្រាសាទកាន់ច្រើនឡើងៗ ធ្វើឲ្យជីវភាពប្រជាពលរដ្ឋដែលរស់នៅក្នុងតំបន់នេះមានការធូរធារប្រសើរឡើងតាមរយៈបើកសណ្ឋាគារ ផ្ទះសំណាក់ ការលក់ដូរ និងមានការងារឲ្យប្រជាពលរដ្ឋធ្វើផ្សេងៗ”។

សូមបញ្ជាក់ថានេះជាលើកទីបីហើយ ដែលអាជ្ញាធរជាតិអប្សរា សហការជាមួយរដ្ឋបាលខេត្តព្រះវិហារចុះទៅអប់រំផ្សព្វផ្សាយនៅតំបន់ប្រាសាទកោះកេរ ហើយក៏មានសំណួរយ៉ាងច្រើនផុសផុលពីប្រជាពលរដ្ឋទាក់ទងនឹងដីធ្វើកសិកម្ម និងការសាងសង់សំណង់ផ្សេងៗលើដីរបស់ពួកគាត់។ ក្រោយពីបានស្តាប់ការបកស្រាយ និងការពន្យល់របស់ក្រុមការងាររួចមក ប្រជាពលរដ្ឋបានយល់ច្បាស់លាស់ហើយគាំទ្រ និងប្តេជ្ញាចិត្តចូលរួមជួយថែរក្សាការពារអភិរក្សព្រមទាំងទប់ស្កាត់បង្រ្កាបបទល្មើសព្រៃឈើជាមួយអាជ្ញាធរជាតិអប្សរានៅតំបន់ប្រាសាទកោះកេរមិនឲ្យកើតឡើងទៀតឡើយ៕
















នាយកដ្ឋានគ្រប់គ្រងទឹកនៃអាជ្ញាធរជាតិអប្សរា សហការជាមួយអាជ្ញាធរភូមិឃុំដែលស្ថិតនៅក្នុងឃុំ-សង្កាត់ចំនួន៧ ក្នុងស្រុកពួក និងក្រុងសៀមរាប បានចុះវាស់វែងដីកសិកម្មនៃសហគមន៍ដែលប្រើប្រាស់ទឹកបារាយណ៍ទឹកថ្លា ដើម្បីងាយស្រួលដល់ការងារគ្រប់គ្រងទឹក និងរៀបចំប្រព័ន្ធផ្លូវទឹកឲ្យបានកាន់តែល្អប្រសើរ។ ក្រុមការងារបានចាប់ផ្តើមចុះវាស់វែងពីពាក់កណ្តាលខែមីនា ឆ្នាំ២០១៦ ហើយគ្រោងនឹងបញ្ចប់ក្នុងរយៈពេល៣ខែខាងមុខ។
ដោយអនុវត្តទៅតាមសារាចរណែនាំរបស់រាជរដ្ឋាភិបាលកម្ពុជា ស្តីពីកង្វះខាតទឹកប្រើប្រាស់ ដោយសាររដូវប្រាំងឆ្នាំនេះអូសបន្លាយពេលយូរ នាយកដ្ឋានគ្រប់គ្រងទឹកនៃអាជ្ញាធរជាតិអប្សរា នៅព្រឹកថ្ងៃទី២៥ ខែមីនា ឆ្នាំ២០១៦នេះ បានប្រកាសផ្អាកការផ្គត់ផ្គង់ទឹកជូនសហគមន៍ ដែលប្រើប្រាស់ទឹកបារាយណ៍សម្រាប់ស្រោចស្រពដំណាំកសិកម្ម។ ការប្រកាសផ្អាកនៅពេលនេះ គឺដើម្បីរក្សាទឹកខ្លះឲ្យនៅសល់នៅបាតបារាយណ៍ ជាជម្រាបផ្គត់ផ្គង់អណ្តូង និងប្រភពទឹកប្រើប្រាស់ប្រចាំថ្ងៃរបស់ប្រជាពលរដ្ឋ។
បច្ចេកវិទ្យាអវកាស (Remote Sensing) ដែលកំពុងអនុវត្តលើការងារអភិរក្សក្នុងរមណីយដ្ឋានអង្គរសព្វថ្ងៃ អាចនឹងត្រូវពង្រីកវិសាលភាពរបស់ខ្លួនទៅកាន់តំបន់បេតិកភណ្ឌដទៃទៀត ដូចជា ប្រាសាទព្រះវិហារ ប្រាសាទកោះកេរ និងប្រាសាទបេងមាលាជាដើម។ នេះបើយោងតាមលទ្ធផលនៃកិច្ចពិភាក្សារវាងឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ជាមួយលោកសាស្ត្រាចារ្យ Bai Chunli ប្រធានបណ្ឌិតសភាវិទ្យាសាស្ត្រចិន នៅទីស្នាក់ការអាជ្ញាធរជាតិអប្សរា នាល្ងាចថ្ងៃទី២២ ខែមីនា ឆ្នាំ២០១៦កន្លងទៅនេះ។
ក្រុមការងារផ្សព្វផ្សាយអប់រំអំពីការងារអភិរក្សព្រៃឈើនៅតំបន់ប្រាសាទកោះកេរ នាព្រឹកថ្ងៃទី២៥ ខែកុម្ភៈនេះ បានចុះជួបប្រជាពលរដ្ឋជាង២០០នាក់នៅវត្តស្រយ៉ង់ ឃុំស្រយ៉ង់ ស្រុកគូលែន ខេត្តព្រះវិហារ។ ការជួបជុំនេះ គឺក្នុងគោលបំណងផ្សព្វផ្សាយ និងអប់រំប្រជាពលរដ្ឋឲ្យយល់ដឹងអំពីតម្លៃនៃការងារអភិរក្ស និងគោលការណ៍សំខាន់ៗដែលត្រូវអនុវត្តក្នុងតំបន់អភិរក្សនៃប្រាសាទកោះកេរ។ នេះជាលើកទី២ហើយនៃយុទ្ធនាការចុះអប់រំប្រជាពលរដ្ឋ បន្ទាប់ពីយុទ្ធនាការទី១បានធ្វើឡើងកាលពីថ្ងៃទី១៨ ខែកុម្ភៈ ឆ្នាំ២០១៦នៅភូមិរំចេក ឃុំស្រយ៉ង់ ខេត្តព្រះវិហារ។ ការផ្សព្វផ្សាយអប់រំ គឺជាបេសកកម្មដ៏សំខាន់មួយដែលត្រូវធ្វើដំណាលគ្នានឹងការបង្រ្កាប ទប់ស្កាត់បទល្មើសព្រៃឈើនៅតំបន់អភិរក្សនេះ។
គណៈកម្មការចម្រុះដែលត្រូវបានបង្កើតឡើងរួមគ្នារវាងអាជ្ញាធរជាតិអប្សរា និងរដ្ឋបាលខេត្តព្រះវិហារកាលពីដើមឆ្នាំ២០១៦ ឥឡូវនេះត្រូវបានបែងចែកជាក្រុមតូចៗចំនួន៣ ដើម្បីពង្រឹងប្រសិទ្ធភាពការងារអភិរក្ស និងគ្រប់គ្រងព្រៃឈើនៅតំបន់កោះកេរ។ ថ្ងៃទី១៧ ខែកុម្ភៈកន្លងទៅនេះ សេចក្តីប្រកាសពីសមាសភាពក្រុម និងភារកិច្ច ត្រូវបានធ្វើឡើងនៅរដ្ឋបាលខេត្តព្រះវិហារ ក្រោមអធិបតីភាព ឯកឧត្តម ឈរ ថាណាត អគ្គនាយករងអាជា្ញធរជាតិអប្សរា និងជាប្រធានគណៈកម្មការចម្រុះនេះ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
13
ថ្ងៃនេះ
:
1138
ម្សិលមិញ
:
33427
សប្តាហ៍នេះ
:
01138
ខែនេះ
:
0304121
សរុប
:
015373924