ព័ត៌មានថ្មីៗ

អាជ្ញាធរជាតិអប្សរាប្រារព្ធពិធី ទិវាវប្បធម៌ជាតិលើកទី១៨នៅមុខប្រាសាទអង្គរវត្ត

បានផ្សាយនៅ ថ្ងៃទី 02 ខែ មិនា ឆ្នាំ2016 04:12 PM ដោយ ៖ អាជ្ញាធរជាតិអប្សរា

នៅពីមុខប្រាសាទអង្គរវត្ត ដែលជាបេតិកភណ្ឌពិភពលោកដ៏ល្បីល្បាញរបស់កម្ពុជា នាព្រឹកថ្ងៃទី០២ ខែមីនា ឆ្នាំ២០១៦ អាជ្ញាធរជាតិអប្សរាបានរៀបចំទិវាវប្បធម៌ជាតិ ០៣ មីនា លើកទី១៨ ដោយមានការអញ្ជើញចូលរួមពីសំណាក់ថ្នាក់ដឹកនាំ ស្ថាប័នពាក់ព័ន្ធ មន្ត្រីបុគ្គលិក ឆ្មាំ កម្មករ និងសិស្ស និស្សិតយ៉ាងច្រើនកុះករ។

ប្រធានបទសំខាន់សម្រាប់ពិធីក្នុងឱកាសនោះ គឺ «យុវជនដើម្បីវប្បធម៌ជាតិ» ដែលក្នុងនាមអាជ្ញាធរជាតិអប្សរាជាស្ថាប័នមានតួនាទីគ្រប់គ្រងតំបន់ឧទ្យានអង្គរ ជាសម្បត្តិវប្បធម៌ដ៏មានតម្លៃរបស់មនុស្សជាតិទាំងមូល បានយកចិត្តទុកដាក់យ៉ាងខ្លាំងចំពោះការអភិរក្សមរតកទាំងរូបីនិងអរូបីរបស់អង្គរ ព្រមទាំងការបណ្តុះបណ្តាលយុវជនជំនាន់ក្រោយដើម្បីត្រៀមទទួលការបន្តវេនក្នុងកិច្ចការដ៏មានតម្លៃនេះ។

មានប្រសាសន៍ទៅកាន់អង្គពិធីទាំងមូល លោកស្រី អ៊ុំ ម៉ារ៉ាឌី អនុប្រធាននាយកដ្ឋានអភិវឌ្ឍន៍ទេសចរណ៍អង្គរ បានលើកឡើងអំពីកិត្យានុភាពនៃដែនដីអង្គរ រួមទាំងឥទ្ធិពលនៃសិល្បៈខ្មែរនាសម័យនោះ ដែលបានដើរតួនាទីអភិវឌ្ឍន៍នយោបាយនិងវប្បធម៌នៅក្នុងតំបន់ហើយឥទ្ធិពលទាំងនោះបានគ្រប់ដណ្តប់ស្ទើរពេញតំបន់អាស៊ីអាគ្នេយ៍ទៀតផង។ តាមរយៈគុណតម្លៃដ៏វិសេសវិសាលជាសាកលនិងកិច្ចការងារអភិរក្ស អភិវឌ្ឍន៍ ប្រកបដោយចីរភាពរបស់អាជ្ញាធរជាតិអប្សរា និងមានការចូលរួមពីបណ្តាស្ថាប័នជាតិ-អន្តរជាតិដែលពាក់ព័ន្ធទាំងអស់ផងនោះ បានធ្វើឱ្យអង្គរក្លាយជាគោលដៅទាក់ទាញភ្ញៀវទេសចរជាច្រើនលាននាក់ ថែមទាំងបានរួមចំណែកក្នុងការបង្កើនប្រាក់ចំណូលជូនជាតិនិងបង្កើតការងារជាច្រើនផងដែរ។

ចំណែកលោក លី វណ្ណា ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានលើកឡើងថា ក្នុងកិច្ចការអភិរក្ស ពិតណាស់គឺចាំបាច់ត្រូវមានការចូលរួមពីកម្លាំងយុវជន តែក៏ត្រូវមានការណែនាំពីសំណាក់ចាស់ព្រឹទ្ធាចារ្យជំនាញ ក្នុងការផ្ទេរនូវចំណេះដឹងនិងបទពិសោធន៍ដែលធ្លាប់ជោគជ័យលើកិច្ចការទាំងនោះទៅកាន់ពួកគេដោយមិនអាចខ្វះបាន។ ដូច្នេះហើយ ទើបអាជ្ញាធរជាតិអប្សរាបានយកចិត្តទុកដាក់លើការបណ្តុះបណ្តាលធនធានមនុស្ស ជាពិសេសយុវជនដែលជាសរសរទ្រូងដ៏សំខាន់សម្រាប់កិច្ចការអភិរក្សក្នុងពេលអនាគត។

បន្ថែមពីនោះ លោក ជ្រុន សុផល ឧបការីនិងជាប្រធានក្រុមការងារសហគម ក៏បានចាប់អារម្មណ៍ពីការយកចិត្តទុកដាក់របស់អាជ្ញាធរជាតិអប្សរា ចំពោះប្រជាសហគមន៍ដែលរស់នៅក្នុងតំបន់ឧទ្យានអង្គរផងដែរ។ អាជ្ញាធរជាតិអប្សរាយកចិត្តទុកដាក់លើកតម្លៃ ថែរក្សានូវមរតករបស់អ្នកស្រុកអង្គរឱ្យរស់នៅជានិរន្តន៍ ដោយហេតុថា អង្គរជារមណីយដ្ឋានរស់ ដូចនេះ សហគមន៍មនុស្សក៏ជាមរតកបេតិកភណ្ឌវប្បធម៌ដ៏សំខាន់ដែលត្រូវគិតគូរខ្ពស់ដូចប្រាង្គប្រាសាទអង្គរដែរ។

ឯកឧត្តម ត័ន ប៊ុនស៊ុយ អគ្គនាយករងនិងជាតំណាងដ៏ខ្ពង់ខ្ពស់ឯកឧត្តមអគ្គនាយកអាជ្ញាធរជាតិអប្សរា មានមតិថា ការប្រារព្ធទិវាវប្បធម៌ជាតិនៅថ្ងៃនេះ គឺដើម្បីសម្តែងកត្តញ្ញូតាធម៌ចំពោះដូនតាខ្មែរ ព្រមទាំងលើកទឹកចិត្តឱ្យកូនខ្មែរគ្រប់រូបនាំគ្នាការពារ ថែរក្សា និងអភិរក្សសម្បត្តិវប្បធម៌ជាតិឱ្យបានគង់វង្សរហូតទៅ។ លើសពីនោះទៅទៀត ការងារអភិរក្សនិងអភិវឌ្ឍន៍វប្បធម៌ ជាការងារគ្មានទីបញ្ចប់ ដូចនេះ យើងត្រូវមានផែនការគ្រប់គ្រងធនធានមនុស្សឱ្យបានសមស្រប។ ការបណ្តុះបណ្តាល អប់រំយុវជន ជាការងារអាទិភាព ដែលកន្លងមក អាជ្ញាធរជាតិអប្សរាបានបំពេញកិច្ចការងារទាំងនេះជាមួយស្ថាប័នអន្តរជាតិជាច្រើន ដូចជាការរៀបចំវេទិកាយុវជនបេតិកភណ្ឌពិភពលោក និងវេទិកាផ្សេងៗទៀតជាដើម។

ក្រៅពីនោះ អាជ្ញាធរជាតិអប្សរាក៏បានទទួលស្វាគមន៍រាល់កម្មវិធីសិក្សារបស់សិស្សនិស្សិត មកពីបណ្តាមហាវិទ្យាល័យផ្សេងៗដែលមានបំណងចង់ស្វែងយល់ពីការងារអភិរក្សតំបន់រមណីយដ្ឋានអង្គរ។ ម្យ៉ាងទៀត អាជ្ញាធរជាតិអប្សរា ក៏កំពុងពិចារណាលទ្ធភាពបើកឱកាសឱ្យទូលាយដល់យុវជន ដើម្បីបានចូលរួមបំពេញកិច្ចការអភិរក្សនិងអភិវឌ្ឍន៍វប្បធម៌ជាតិ ឱ្យសមស្របតាមគោលនយោបាយរបស់រាជរដ្ឋាភិបាល ដែលចាត់ទុកយុវជនជាសរសរទ្រូងដ៏សំខាន់ក្នុងកិច្ចការអភិរក្សនិងលើកតម្លៃវប្បធម៌ជាតិ។

ក្នុងឱកាសនោះដែរ ក្រុមសិល្បៈរបស់មន្ទីរវប្បធម៌និងវិចិត្រសិល្បៈខេត្តសៀមរាប ក៏បានសម្តែងរបាំទេវប្រទានពរនិងរបាំអប្សរា ជូនថ្នាក់ដឹកនាំនិងភ្ញៀវបានទស្សនាទៀតផង។ ដោយឡែកនារាត្រីថ្ងៃទី០២នេះ ក្រុមសិល្បៈនឹងបន្តសម្តែងភាពល្ខោនស្បែកធំនៅមុខប្រាសាទអង្គរវត្តជូនប្រជាពលរដ្ឋនិងភ្ញៀវទេសចរទាំងអស់បានទស្សនា ដើម្បីអបអរសាទរទិវាវប្បធម៌ជាតិលើកទី១៨ ឆ្នាំ២០១៦។

ក្រៅពីនោះ អាជ្ញាធរជាតិអប្សរាក៏បានលើកទឹកចិត្តដល់យុវជនក្នុងការចូលរួមលើកស្ទួយវប្បធម៌ជាតិ និងចូលរួមគាំទ្រគ្រប់សកម្មភាពនៃព្រឹត្តិការណ៍អង្គរសង្ក្រាន្ត ដែលផ្តួចផ្តើមគំនិតរៀបចំឡើងដោយសហភាពសហព័ន្ធយុវជនកម្ពុជា ក្នុងន័យបង្ហាញនូវប្រពៃណីវប្បធម៌ដ៏ល្អរបស់ជាតិខ្មែរក្នុងថ្ងៃបុណ្យចូលឆ្នាំថ្មីខាងមុខនេះផងដែរ៕














ព្រឹកថ្ងៃទី១៨ ខែកុម្ភៈនេះ អាជ្ញាធរមូលដ្ឋាន ព្រះសង្ឃ និងអាចារ្យគណៈកម្មការនៃបណ្តាវត្ត ដែលស្ថិតនៅក្នុងតំបន់រមណីយដ្ឋានអង្គរ ចំនួន១១៩អង្គ/នាក់ បានមកជួបជុំគ្នានៅទីស្នាក់ការនៃអាជ្ញាធរជាតិអប្សរា ដើម្បីចូលរួមក្នុងសិក្ខាសាលាមួយស្តីពី កិច្ចការវត្តអារាមនៅក្នុងតំបន់ឧទ្យានអង្គរ។ គោលបំណងសំខាន់នៃសិក្ខាសាលានេះ គឺរិះរកមធ្យោបាយយ៉ាងណាដែលអាចឲ្យវត្តអារាម ជាពិសេស វត្តដែលនៅក្នុងរមណីយដ្ឋានអង្គរ មានតួនាទីសំខាន់ក្នុងការរួមចំណែកអភិរក្សបេតិកភណ្ឌអង្គរ។
របាយការណ៍លម្អិតរបស់មន្ទីរទេសចរណ៍ខេត្តសៀមរាបបានបង្ហាញថា ចំនួនភ្ញៀវទេសចរក្នុងខេត្ត សៀមរាបក្នុងឆ្នាំ២០១៥កន្លងទៅនេះមានចំនួន ៥.០១១.៣១៦នាក់ ថយចុះ០,២៥% បើធៀបនឹងឆ្នាំ២០១៤ ដែលក្នុងនោះភ្ញៀវបរទេសមាន ២.១២៤.៨៦៣នាក់ ថយចុះ៩,៦១% ភ្ញៀវជាតិមានចំនួន ២.៨៨៦.៤៥៣នាក់ កើនឡើង៨% បើធៀបឆ្នាំ២០១៤។
បុណ្យឡើងមាឃភូមិក្រវ៉ាន់
( ថ្ងៃទី 12 ខែ កុម្ភៈ ឆ្នាំ2016 )
៣កើតមាឃធំ ជាថ្ងៃបុណ្យដែលអ្នកសៀមរាបភាគច្រើន ជាពិសេសអ្នកតំបន់អង្គរនាំគ្នាប្រារព្ធពិធីបុណ្យឡើងមាឃ ឬឡើងអ្នកតា។ អ្នកភូមិក្រវ៉ាន់ ដែលមានទីតាំងស្ថិតនៅសង្កាត់នគរធំ ក្រុងសៀមរាប និងជាភូមិមួយដែលស្ថិតនៅក្នុងរមណីយដ្ឋានអង្គរ ក៏នៅតែរក្សាប្រពៃណីបុណ្យឡើងមាឃនេះដែរ តែពិធីនេះហាក់មានលំនាំផ្សេង បើធៀបនឹងភូមិខ្លះទៀតដែលនៅឆ្ងាយពីអង្គរ។
រទេះគោគឺជាយានជំនិះ និងជាឧបករណ៍ដឹកជញ្ជូនផលកសិកម្ម ដ៏យូរលង់របស់បុព្វបុរសខ្មែរ។ បច្ចុប្បន្ន មធ្យោបាយដឹកជញ្ជូននេះបានបាត់បង់ជាបណ្តើរៗ ដោយជំនួសមកវិញនូវគ្រឿងចក្រមានឡាន និងគោយន្តជាដើម។ នៅតំបន់អង្គរ មធ្យោបាយដឹកជញ្ជូននេះនៅមានប្រើប្រាស់សម្រាប់ជីវភាពប្រចាំថ្ងៃនៅឡើយ តែក៏មិនមានគ្រប់ផ្ទះ ឬច្រើនលើសលុបដូចសម័យបុរាណនោះដែរ។
បើនិយាយពីតំបន់អង្គរគឺប្រជុំទៅដោយប្រាង្គប្រាសាទបុរាណ វប្បធម៌ ទំនៀមទម្លាប់ និងជំនឿជាច្រើនបន្សល់ទុកដល់សព្វថ្ងៃ ដែលទាក់ទាញទេសចរបំផុតឱ្យចូលមកទស្សនានិងសិក្សាឈ្វេងយល់។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
3
ថ្ងៃនេះ
:
0871
ម្សិលមិញ
:
1879
សប្តាហ៍នេះ
:
05898
ខែនេះ
:
0169827
សរុប
:
009352109