ព័ត៌មានថ្មីៗ

អាជ្ញាធរជាតិអប្សរាប្រារព្ធពិធី ទិវាវប្បធម៌ជាតិលើកទី១៨នៅមុខប្រាសាទអង្គរវត្ត

បានផ្សាយនៅ ថ្ងៃទី 02 ខែ មិនា ឆ្នាំ2016 04:12 PM ដោយ ៖ អាជ្ញាធរជាតិអប្សរា

នៅពីមុខប្រាសាទអង្គរវត្ត ដែលជាបេតិកភណ្ឌពិភពលោកដ៏ល្បីល្បាញរបស់កម្ពុជា នាព្រឹកថ្ងៃទី០២ ខែមីនា ឆ្នាំ២០១៦ អាជ្ញាធរជាតិអប្សរាបានរៀបចំទិវាវប្បធម៌ជាតិ ០៣ មីនា លើកទី១៨ ដោយមានការអញ្ជើញចូលរួមពីសំណាក់ថ្នាក់ដឹកនាំ ស្ថាប័នពាក់ព័ន្ធ មន្ត្រីបុគ្គលិក ឆ្មាំ កម្មករ និងសិស្ស និស្សិតយ៉ាងច្រើនកុះករ។

ប្រធានបទសំខាន់សម្រាប់ពិធីក្នុងឱកាសនោះ គឺ «យុវជនដើម្បីវប្បធម៌ជាតិ» ដែលក្នុងនាមអាជ្ញាធរជាតិអប្សរាជាស្ថាប័នមានតួនាទីគ្រប់គ្រងតំបន់ឧទ្យានអង្គរ ជាសម្បត្តិវប្បធម៌ដ៏មានតម្លៃរបស់មនុស្សជាតិទាំងមូល បានយកចិត្តទុកដាក់យ៉ាងខ្លាំងចំពោះការអភិរក្សមរតកទាំងរូបីនិងអរូបីរបស់អង្គរ ព្រមទាំងការបណ្តុះបណ្តាលយុវជនជំនាន់ក្រោយដើម្បីត្រៀមទទួលការបន្តវេនក្នុងកិច្ចការដ៏មានតម្លៃនេះ។

មានប្រសាសន៍ទៅកាន់អង្គពិធីទាំងមូល លោកស្រី អ៊ុំ ម៉ារ៉ាឌី អនុប្រធាននាយកដ្ឋានអភិវឌ្ឍន៍ទេសចរណ៍អង្គរ បានលើកឡើងអំពីកិត្យានុភាពនៃដែនដីអង្គរ រួមទាំងឥទ្ធិពលនៃសិល្បៈខ្មែរនាសម័យនោះ ដែលបានដើរតួនាទីអភិវឌ្ឍន៍នយោបាយនិងវប្បធម៌នៅក្នុងតំបន់ហើយឥទ្ធិពលទាំងនោះបានគ្រប់ដណ្តប់ស្ទើរពេញតំបន់អាស៊ីអាគ្នេយ៍ទៀតផង។ តាមរយៈគុណតម្លៃដ៏វិសេសវិសាលជាសាកលនិងកិច្ចការងារអភិរក្ស អភិវឌ្ឍន៍ ប្រកបដោយចីរភាពរបស់អាជ្ញាធរជាតិអប្សរា និងមានការចូលរួមពីបណ្តាស្ថាប័នជាតិ-អន្តរជាតិដែលពាក់ព័ន្ធទាំងអស់ផងនោះ បានធ្វើឱ្យអង្គរក្លាយជាគោលដៅទាក់ទាញភ្ញៀវទេសចរជាច្រើនលាននាក់ ថែមទាំងបានរួមចំណែកក្នុងការបង្កើនប្រាក់ចំណូលជូនជាតិនិងបង្កើតការងារជាច្រើនផងដែរ។

ចំណែកលោក លី វណ្ណា ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានលើកឡើងថា ក្នុងកិច្ចការអភិរក្ស ពិតណាស់គឺចាំបាច់ត្រូវមានការចូលរួមពីកម្លាំងយុវជន តែក៏ត្រូវមានការណែនាំពីសំណាក់ចាស់ព្រឹទ្ធាចារ្យជំនាញ ក្នុងការផ្ទេរនូវចំណេះដឹងនិងបទពិសោធន៍ដែលធ្លាប់ជោគជ័យលើកិច្ចការទាំងនោះទៅកាន់ពួកគេដោយមិនអាចខ្វះបាន។ ដូច្នេះហើយ ទើបអាជ្ញាធរជាតិអប្សរាបានយកចិត្តទុកដាក់លើការបណ្តុះបណ្តាលធនធានមនុស្ស ជាពិសេសយុវជនដែលជាសរសរទ្រូងដ៏សំខាន់សម្រាប់កិច្ចការអភិរក្សក្នុងពេលអនាគត។

បន្ថែមពីនោះ លោក ជ្រុន សុផល ឧបការីនិងជាប្រធានក្រុមការងារសហគម ក៏បានចាប់អារម្មណ៍ពីការយកចិត្តទុកដាក់របស់អាជ្ញាធរជាតិអប្សរា ចំពោះប្រជាសហគមន៍ដែលរស់នៅក្នុងតំបន់ឧទ្យានអង្គរផងដែរ។ អាជ្ញាធរជាតិអប្សរាយកចិត្តទុកដាក់លើកតម្លៃ ថែរក្សានូវមរតករបស់អ្នកស្រុកអង្គរឱ្យរស់នៅជានិរន្តន៍ ដោយហេតុថា អង្គរជារមណីយដ្ឋានរស់ ដូចនេះ សហគមន៍មនុស្សក៏ជាមរតកបេតិកភណ្ឌវប្បធម៌ដ៏សំខាន់ដែលត្រូវគិតគូរខ្ពស់ដូចប្រាង្គប្រាសាទអង្គរដែរ។

ឯកឧត្តម ត័ន ប៊ុនស៊ុយ អគ្គនាយករងនិងជាតំណាងដ៏ខ្ពង់ខ្ពស់ឯកឧត្តមអគ្គនាយកអាជ្ញាធរជាតិអប្សរា មានមតិថា ការប្រារព្ធទិវាវប្បធម៌ជាតិនៅថ្ងៃនេះ គឺដើម្បីសម្តែងកត្តញ្ញូតាធម៌ចំពោះដូនតាខ្មែរ ព្រមទាំងលើកទឹកចិត្តឱ្យកូនខ្មែរគ្រប់រូបនាំគ្នាការពារ ថែរក្សា និងអភិរក្សសម្បត្តិវប្បធម៌ជាតិឱ្យបានគង់វង្សរហូតទៅ។ លើសពីនោះទៅទៀត ការងារអភិរក្សនិងអភិវឌ្ឍន៍វប្បធម៌ ជាការងារគ្មានទីបញ្ចប់ ដូចនេះ យើងត្រូវមានផែនការគ្រប់គ្រងធនធានមនុស្សឱ្យបានសមស្រប។ ការបណ្តុះបណ្តាល អប់រំយុវជន ជាការងារអាទិភាព ដែលកន្លងមក អាជ្ញាធរជាតិអប្សរាបានបំពេញកិច្ចការងារទាំងនេះជាមួយស្ថាប័នអន្តរជាតិជាច្រើន ដូចជាការរៀបចំវេទិកាយុវជនបេតិកភណ្ឌពិភពលោក និងវេទិកាផ្សេងៗទៀតជាដើម។

ក្រៅពីនោះ អាជ្ញាធរជាតិអប្សរាក៏បានទទួលស្វាគមន៍រាល់កម្មវិធីសិក្សារបស់សិស្សនិស្សិត មកពីបណ្តាមហាវិទ្យាល័យផ្សេងៗដែលមានបំណងចង់ស្វែងយល់ពីការងារអភិរក្សតំបន់រមណីយដ្ឋានអង្គរ។ ម្យ៉ាងទៀត អាជ្ញាធរជាតិអប្សរា ក៏កំពុងពិចារណាលទ្ធភាពបើកឱកាសឱ្យទូលាយដល់យុវជន ដើម្បីបានចូលរួមបំពេញកិច្ចការអភិរក្សនិងអភិវឌ្ឍន៍វប្បធម៌ជាតិ ឱ្យសមស្របតាមគោលនយោបាយរបស់រាជរដ្ឋាភិបាល ដែលចាត់ទុកយុវជនជាសរសរទ្រូងដ៏សំខាន់ក្នុងកិច្ចការអភិរក្សនិងលើកតម្លៃវប្បធម៌ជាតិ។

ក្នុងឱកាសនោះដែរ ក្រុមសិល្បៈរបស់មន្ទីរវប្បធម៌និងវិចិត្រសិល្បៈខេត្តសៀមរាប ក៏បានសម្តែងរបាំទេវប្រទានពរនិងរបាំអប្សរា ជូនថ្នាក់ដឹកនាំនិងភ្ញៀវបានទស្សនាទៀតផង។ ដោយឡែកនារាត្រីថ្ងៃទី០២នេះ ក្រុមសិល្បៈនឹងបន្តសម្តែងភាពល្ខោនស្បែកធំនៅមុខប្រាសាទអង្គរវត្តជូនប្រជាពលរដ្ឋនិងភ្ញៀវទេសចរទាំងអស់បានទស្សនា ដើម្បីអបអរសាទរទិវាវប្បធម៌ជាតិលើកទី១៨ ឆ្នាំ២០១៦។

ក្រៅពីនោះ អាជ្ញាធរជាតិអប្សរាក៏បានលើកទឹកចិត្តដល់យុវជនក្នុងការចូលរួមលើកស្ទួយវប្បធម៌ជាតិ និងចូលរួមគាំទ្រគ្រប់សកម្មភាពនៃព្រឹត្តិការណ៍អង្គរសង្ក្រាន្ត ដែលផ្តួចផ្តើមគំនិតរៀបចំឡើងដោយសហភាពសហព័ន្ធយុវជនកម្ពុជា ក្នុងន័យបង្ហាញនូវប្រពៃណីវប្បធម៌ដ៏ល្អរបស់ជាតិខ្មែរក្នុងថ្ងៃបុណ្យចូលឆ្នាំថ្មីខាងមុខនេះផងដែរ៕














លោកស្រី Gillian Green អ្នកជំនាញជនជាតិអូស្ត្រាលី ផ្នែកវាយនភណ្ឌប្រពៃណី និងជាសមាជិកកិត្តិយសនាយកដ្ឋានប្រតិបត្តិសិល្បៈនៃសាកលវិទ្យាល័យស៊ីដនី ព្រមទាំងជាប្រធានសមាគមសិល្បៈអាស៊ីអូស្ត្រាលី (TAASA) បានយកអំណោយផ្ទាល់ខ្លួនជាសម្ភារៈនិងឧបករណ៍តម្បាញនៃប្រទេសក្នុងតំបន់មេគង្គ ដែលសន្សំបានពីការស្រាវជ្រាវជាយូរឆ្នាំមកហើយ ជូនសារមន្ទីរវាយនភណ្ឌប្រពៃណីអាស៊ីនាព្រឹកថ្ងៃទី១០ ខែមីនា ឆ្នាំ២០១៦។ អំណោយទាំងអស់រួមមានសម្ភារ:សរុបចំនួន៤០ ហើយបែងចែកជា៩មុខ ដួចជា៖ ១- រ៉ក ២- ត្រាក់តម្បាញមួយគូ ៣- ក្តារត្រដក់មួយគូនិងមួយចំហៀង ៤- ជើងដាច់មួយគូនិងមួយចំហៀង ៥- ឈើអន្ទងមួយគូ ៦- ប្រាំង ៧- ឧបករណ៍ស្រាវសូត្រមួយសម្រាប់ ៨- ត្រល់ ៩- ឧបករណ៍កិនផ្លែកប្បាស។ ឧបករណ៍ទាំងនេះធ្វើឡើងពីឈើ ឫស្សី ដែលជាចំណែកផ្សេងៗនៃកីតម្បាញ សម្រាប់ដំណើការត្បាញ មានប្រភពមកពីប្រទេសកម្ពុជា ប្រទេសថៃ និងប្រទេសមីយ៉ាន់មា ហើយមានអាយុកាលមិនក្រោមពី៥០ឆ្នាំឡើយ។
សក្តានុពលទេសចរណ៍នៅខេត្តសៀមរាប គឺទេសចរណ៍វប្បធម៌ ដែលក្រៅពីប្រាង្គប្រាសាទដ៏ល្បីល្បាញជាច្រើនហើយនោះ ជំនឿក៏ជាដួងព្រលឹងដែលមានជីវិតរស់រវើកនិងមានឥទ្ធិពលក្នុងផ្នត់គំនិតរបស់អ្នកស្រុកអង្គរ ហើយត្រូវបានគោរពបូជានិងជឿជាក់យ៉ាងមុតមាំទៀតផង។
ពិធីលៀងមេមត់នៅភូមិក្រវ៉ាន់
( ថ្ងៃទី 24 ខែ កុម្ភៈ ឆ្នាំ2016 )
ជារឿងកម្រសម្រាប់មនុស្សសម័យថ្មីដែលបានគិតគូរ និងជឿស៊ប់លើជំនឿ មូលហេតុដោយសារតែវិទ្យាសាស្ត្រជឿនលឿនខ្លាំង។ ការមិនស្គាល់ពីតម្លៃ និងយកចិត្តទុកដាក់របស់កូនខ្មែរភាគច្រើន បូករួមនឹងការហូរចូលវប្បធម៌បរទេសផងនោះ បានធ្វើឱ្យទំនៀមទម្លាប់មួយចំនួន ដែលជាកេរមរតកដូនតាបន្សល់ទុករាប់សតវត្សមកហើយត្រូវបាត់បង់ម្តងបន្តិចៗ។
ស្វែងយល់ខ្លឹមសារពិធីបុណ្យមាឃបូជា
( ថ្ងៃទី 23 ខែ កុម្ភៈ ឆ្នាំ2016 )
បណ្តាពិធីបុណ្យសំខាន់ៗរបស់ព្រះពុទ្ធសាសនា មាឃបូជា គឺជាពិធីបុណ្យមួយដែលពុទ្ធសាសនិកជនគ្រប់ប្រទេស អ្នកកាន់ព្រះពុទ្ធសាសនាតែងប្រារព្ធធ្វើជារៀងរាល់ឆ្នាំ មិនដែលខកខាន។ ពិធីបុណ្យនេះប្រារព្ធឡើងជារៀងរាល់ថ្ងៃ១៥កើត ខែមាឃ ដើម្បីរំឭកទៅដល់ព្រឹត្តិការណ៍ដ៏សំខាន់ ២ ចំណុចដែលបានកើតឡើង នៅក្នុងពេលដែលព្រះពុទ្ធជាម្ចាស់ ទ្រង់ព្រះធរមាននៅឡើយ។ ព្រឹត្តិការណ៍សំខាន់ទី១ គឺពេលដែលព្រះអង្គទ្រង់ប្រជុំព្រះភិក្ខុសង្ឃចំនួន ១២៥០អង្គ ជាការប្រជុំលើកដំបូង ដើម្បីប្រកាសនូវគោលការណ៍មូលដ្ឋាននៃសាសនា ដែលហៅថា ឱវាទបាតិមោក្ខ។ ខ្លឹមសារសង្ខេបនៃឱវាទបាតិមោក្ខនោះមាន៣គាថាគឺ៖
ទោះបីឆ្លងកាត់សម័យកាលរាប់ពាន់ឆ្នាំ សង្គ្រាមញ៉ាំញីជាច្រើន វិទ្យាសាស្ត្រទំនើបយ៉ាងណាក្តី ក៏ជំនឿមួយចំនួននៅតែមានឥទ្ធិពលនៅក្នុងផ្នត់គំនិតនិងជីវភាពរស់នៅរបស់ប្រជាជនខ្មែរគ្រប់ស្រទាប់ វណ្ណៈដល់សព្វថ្ងៃ ពិសេសអ្នកស្រុកតំបន់អង្គរ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
6
ថ្ងៃនេះ
:
0909
ម្សិលមិញ
:
1879
សប្តាហ៍នេះ
:
05936
ខែនេះ
:
0169865
សរុប
:
009352147