ព័ត៌មានថ្មីៗ

ក្រុមអភិរក្សព្រៃឈើប្រាសាទកោះកេរចាប់ផ្តើមយុទ្ធនាការ ផ្សព្វផ្សាយអំពីការងារអភិរក្សដល់ប្រជាពលរដ្ឋ

បានផ្សាយនៅ ថ្ងៃទី 26 ខែ កុម្ភៈ ឆ្នាំ2016 08:29 AM ដោយ ៖ អាជ្ញាធរជាតិអប្សរា
ក្រុមការងារផ្សព្វផ្សាយអប់រំអំពីការងារអភិរក្សព្រៃឈើនៅតំបន់ប្រាសាទកោះកេរ នាព្រឹកថ្ងៃទី២៥ ខែកុម្ភៈនេះ បានចុះជួបប្រជាពលរដ្ឋជាង២០០នាក់នៅវត្តស្រយ៉ង់ ឃុំស្រយ៉ង់ ស្រុកគូលែន ខេត្តព្រះវិហារ។ ការជួបជុំនេះ គឺក្នុងគោលបំណងផ្សព្វផ្សាយ និងអប់រំប្រជាពលរដ្ឋឲ្យយល់ដឹងអំពីតម្លៃនៃការងារអភិរក្ស និងគោលការណ៍សំខាន់ៗដែលត្រូវអនុវត្តក្នុងតំបន់អភិរក្សនៃប្រាសាទកោះកេរ។ នេះជាលើកទី២ហើយនៃយុទ្ធនាការចុះអប់រំប្រជាពលរដ្ឋ បន្ទាប់ពីយុទ្ធនាការទី១បានធ្វើឡើងកាលពីថ្ងៃទី១៨ ខែកុម្ភៈ ឆ្នាំ២០១៦នៅភូមិរំចេក ឃុំស្រយ៉ង់ ខេត្តព្រះវិហារ។ ការផ្សព្វផ្សាយអប់រំ គឺជាបេសកកម្មដ៏សំខាន់មួយដែលត្រូវធ្វើដំណាលគ្នានឹងការបង្រ្កាប ទប់ស្កាត់បទល្មើសព្រៃឈើនៅតំបន់អភិរក្សនេះ។

ឯកឧត្តម ឈរ ថាណាត អគ្គនាយករងអាជ្ញាធរជាតិអប្សរា និងជាប្រធានគណៈកម្មការចម្រុះគ្រប់គ្រងអភិរក្ស ព្រៃឈើតំបន់ប្រាសាទកោះកេរបានពន្យល់លម្អិតអំពីគោលការណ៍អភិរក្សតំបន់កោះកេរ ដែលយកគំរូតាមតំបន់រមណីយដ្ឋានអង្គរ។ ឯកឧត្តមបានអំពាវនាវឲ្យមានការចូលរួមពីសំណាក់ប្រជាពលរដ្ឋក្នុងការងារនេះ។ “ព្រៃឈើ និងបេតិកភណ្ឌគឺជារបស់យើងទាំងអស់គ្នាបើប្រជាពលរដ្ឋយើងចូលរួម គឺមិនត្រឹមតែឈប់កាប់បំផ្លាញព្រៃឈើប៉ុណ្ណោះទេ តែក៏អាចជួយពន្យល់ណែនាំឲ្យអ្នកផ្សេងទៀតចូលរួមដែរ។ មិនត្រឹមប៉ុណ្ណោះ ប្រជាពលរដ្ឋក៏មិនត្រូវឈរមើលអ្នកណាមកបំផ្លាញព្រៃឈើ និងបេតិកភណ្ឌរបស់យើងដែរ”

លោក និន ចាន់សាមៀន ប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរាបញ្ជាក់ក្នុងពិធីផ្សព្វផ្សាយនេះថា ការអភិរក្សព្រៃឈើមានសារៈសំខាន់ណាស់ចំពោះប្រាសាទក្នុងតំបន់កោះកេរ។ លោកពន្យល់ថា ព្រៃឈើមានប្រយោជន៍៤ យ៉ាងចំពោះប្រាសាទគឺ ព្រៃឈើជារបាំងខ្យល់មិនឲ្យបក់បោកខ្លាំងមកប៉ះប្រាសាទ ព្រៃឈើការពារចម្រោះទឹកដែលហូរបុកខ្លាំងមកលើប្រាសាទ ព្រៃឈើជារក្សាសំណើមជាប្រចាំចំពោះប្រាសាទ និងជាចុងក្រោយ ព្រៃឈើបានផ្តល់សោភណភាពដ៏ស្រស់ស្អាតដល់ប្រាសាទ។ លោករៀបរាប់ថា ប្រាសាទដែលអាចតាំងនៅរាប់ពាន់ឆ្នាំកន្លងមកនេះ ក៏ដោយសារមានគម្របព្រៃឈើនេះហើយ។

លោក អ៊ិត ភូម្រា នាយករដ្ឋបាលព្រៃឈើខេត្តព្រះវិហារលើកឡើងក្នុងពិធីផ្សព្វផ្សាយនេះថា ប្រជាពលរដ្ឋទាំងអស់ត្រូវផ្លាស់ប្តូរគំនិតពីការកាប់បំផ្លាញ មកជាការចូលរួមថែរក្សាព្រៃឈើវិញ។ លោកក៏បានអំពាវនាវឲ្យប្រជាពលរដ្ឋចូលរួមក្នុងការអភិរក្សនេះដែរ តាមរយៈការមិនកាប់បំផ្លាញ ឬរុករានដីធ្វើកម្មសិទ្ធិ និងចូលរួមរាយការណ៍រាល់ពេលប្រទះបទល្មើសព្រៃឈើផ្សេងៗ ដល់សមត្ថកិច្ចពាក់ព័ន្ធទាំងអស់។

លោកតាឈុន អឿន អាយុ៧២ឆ្នាំជាអតីតគ្រូបង្រៀនសម័យសង្គមរាស្ត្រនិយមបានសម្តែងនូវការគាំទ្រយ៉ាងពេញទំហឹងចំពោះការងារអភិរក្សព្រៃឈើ និងសកម្មភាពអប់រំផ្សព្វផ្សាយនេះ ដោយលោកតាបញ្ជាក់ថា ប្រជាពលរដ្ឋភាគច្រើនដែលបានកាប់រានដី ឬលួចកាប់ព្រៃកន្លងមកគឺមកពីមិនយល់ពីតម្លៃនៃព្រៃឈើ និងបេតិកភណ្ឌរបស់ជាតិ។ លោកតាបញ្ជាក់ថា ការទប់ស្កាត់បទល្មើសព្រៃគឺត្រូវផ្តើមចេញពីអ្នកអភិរក្សតែម្តង។ បើអ្នកអភិរក្សធ្វើត្រឹមត្រូវ ដោយហ៊ានដាក់ទោសចំពោះអ្នកប្រព្រឹត្តមិនលើកលែងនោះ ប្រជាពលរដ្ឋច្បាស់ជានឹងខ្លាចរអាជាមិនខាន។ ទន្ទឹមនឹងនេះលោកតាក៏បានអំពាវឲ្យប្រជាពលរដ្ឋចូលរួមឲ្យបានគ្រប់គ្នា ដើម្បីថែរក្សាព្រៃឈើ និងបេតិកភណ្ឌដូនតាឲ្យបានគង់វង្ស។

សូមបញ្ជាក់ថា ដើម្បីទប់ស្កាត់បទល្មើសព្រៃឈើនៅតំបន់កោះកេរ ដែលគ្រប់គ្រងដោយអាជ្ញាធរជាតិអប្សរា រាជរដ្ឋាភិបាលបានបង្កើត គណៈកម្មការចម្រុះមួយ ដែលមានឈ្មោះថា គណៈកម្មការចម្រុះគ្រប់គ្រង អភិរក្ស និងការពារព្រៃឈើនៅតំបន់ប្រាសាទកោះកេរ កាលពីដើមខែមករាកន្លងទៅនេះ។ ក្រុមការងារនេះមានបេសកកម្មសំខាន់ៗដូចជា ការផ្សព្វផ្សាយអប់រំប្រជាពលរដ្ឋឲ្យយល់ដឹងអំពីការងារអភិរក្សព្រៃឈើ ការងារទប់ស្កាត់បទល្មើសព្រៃឈើជាដើម។ ការងារនេះទទួលបានការគាំទ្រយ៉ាងពេញទំហឹងពីសំណាក់គណៈអភិបាលខេត្តព្រះវិហារ ជាពិសេសការចូលរួមដោយផ្ទាល់ពី ឯកឧត្តម អ៊ុំ ម៉ារ៉ា អភិបាលនៃគណៈអភិបាលខេត្តព្រះវិហារ និងអាជ្ញាធរពាក់ព័ន្ធទាំងអស់៕






នាយកដ្ឋានគ្រប់គ្រងទឹកនៃអាជ្ញាធរជាតិអប្សរា សហការជាមួយអាជ្ញាធរភូមិឃុំដែលស្ថិតនៅក្នុងឃុំ-សង្កាត់ចំនួន៧ ក្នុងស្រុកពួក និងក្រុងសៀមរាប បានចុះវាស់វែងដីកសិកម្មនៃសហគមន៍ដែលប្រើប្រាស់ទឹកបារាយណ៍ទឹកថ្លា ដើម្បីងាយស្រួលដល់ការងារគ្រប់គ្រងទឹក និងរៀបចំប្រព័ន្ធផ្លូវទឹកឲ្យបានកាន់តែល្អប្រសើរ។ ក្រុមការងារបានចាប់ផ្តើមចុះវាស់វែងពីពាក់កណ្តាលខែមីនា ឆ្នាំ២០១៦ ហើយគ្រោងនឹងបញ្ចប់ក្នុងរយៈពេល៣ខែខាងមុខ។
ដោយអនុវត្តទៅតាមសារាចរណែនាំរបស់រាជរដ្ឋាភិបាលកម្ពុជា ស្តីពីកង្វះខាតទឹកប្រើប្រាស់ ដោយសាររដូវប្រាំងឆ្នាំនេះអូសបន្លាយពេលយូរ នាយកដ្ឋានគ្រប់គ្រងទឹកនៃអាជ្ញាធរជាតិអប្សរា នៅព្រឹកថ្ងៃទី២៥ ខែមីនា ឆ្នាំ២០១៦នេះ បានប្រកាសផ្អាកការផ្គត់ផ្គង់ទឹកជូនសហគមន៍ ដែលប្រើប្រាស់ទឹកបារាយណ៍សម្រាប់ស្រោចស្រពដំណាំកសិកម្ម។ ការប្រកាសផ្អាកនៅពេលនេះ គឺដើម្បីរក្សាទឹកខ្លះឲ្យនៅសល់នៅបាតបារាយណ៍ ជាជម្រាបផ្គត់ផ្គង់អណ្តូង និងប្រភពទឹកប្រើប្រាស់ប្រចាំថ្ងៃរបស់ប្រជាពលរដ្ឋ។
បច្ចេកវិទ្យាអវកាស (Remote Sensing) ដែលកំពុងអនុវត្តលើការងារអភិរក្សក្នុងរមណីយដ្ឋានអង្គរសព្វថ្ងៃ អាចនឹងត្រូវពង្រីកវិសាលភាពរបស់ខ្លួនទៅកាន់តំបន់បេតិកភណ្ឌដទៃទៀត ដូចជា ប្រាសាទព្រះវិហារ ប្រាសាទកោះកេរ និងប្រាសាទបេងមាលាជាដើម។ នេះបើយោងតាមលទ្ធផលនៃកិច្ចពិភាក្សារវាងឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ជាមួយលោកសាស្ត្រាចារ្យ Bai Chunli ប្រធានបណ្ឌិតសភាវិទ្យាសាស្ត្រចិន នៅទីស្នាក់ការអាជ្ញាធរជាតិអប្សរា នាល្ងាចថ្ងៃទី២២ ខែមីនា ឆ្នាំ២០១៦កន្លងទៅនេះ។
ដោយមានការផ្តួចផ្តើមគំនិត ការចង្អុលបង្ហាញ និងការជំរុញពីឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា នៅព្រឹកថ្ងៃទី១០ខែមីនាឆ្នាំ២០១៦នេះ អាជ្ញាធរជាតិអប្សរាដឹកនាំដោយឯកឧត្តម ឈរ ថាណាត អគ្គនាយករងអាជ្ញាធរជាតិអប្សរា និងជាប្រធានគណៈកម្មការចម្រុះគ្រប់គ្រងអភិរក្ស និងការពារព្រៃឈើនៅតំបន់ប្រាសាទកោះកេរ និងមន្រ្តីបុគ្គលិកមួយចំនួនទៀតបានចុះទៅអប់រំផ្សព្វផ្សាយស្តីពីការគ្រប់គ្រង អភិរក្ស និងថែរក្សាការពារព្រៃឈើនៅតំបន់ប្រាសាទកោះកេរ ដោយមានការចូលរួមអំពីសំណាក់ព្រះសង្ឃ គណៈកម្មការ មន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ មន្ទីរទេសចរណ៍ រដ្ឋបាលព្រៃឈើ អាជ្ញាធរខេត្ត ស្រុក ឃុំ ភូមិនិងប្រជាពលរដ្ឋប្រមាណជាង៦០០អង្គ/រូបមកពីភូមិស្រយង់ខាងជើង ឃុំស្រយង់ ស្រុកគូលែន ខេត្តព្រះវិហារ។
គណៈកម្មការចម្រុះដែលត្រូវបានបង្កើតឡើងរួមគ្នារវាងអាជ្ញាធរជាតិអប្សរា និងរដ្ឋបាលខេត្តព្រះវិហារកាលពីដើមឆ្នាំ២០១៦ ឥឡូវនេះត្រូវបានបែងចែកជាក្រុមតូចៗចំនួន៣ ដើម្បីពង្រឹងប្រសិទ្ធភាពការងារអភិរក្ស និងគ្រប់គ្រងព្រៃឈើនៅតំបន់កោះកេរ។ ថ្ងៃទី១៧ ខែកុម្ភៈកន្លងទៅនេះ សេចក្តីប្រកាសពីសមាសភាពក្រុម និងភារកិច្ច ត្រូវបានធ្វើឡើងនៅរដ្ឋបាលខេត្តព្រះវិហារ ក្រោមអធិបតីភាព ឯកឧត្តម ឈរ ថាណាត អគ្គនាយករងអាជា្ញធរជាតិអប្សរា និងជាប្រធានគណៈកម្មការចម្រុះនេះ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
15
ថ្ងៃនេះ
:
0667
ម្សិលមិញ
:
33427
សប្តាហ៍នេះ
:
00667
ខែនេះ
:
0303650
សរុប
:
015373453