ព័ត៌មានថ្មីៗ

ក្រុមអ្នកបច្ចេកទេសអាជ្ញាធរជាតិអប្សរាកំពុងសម្អាតស្មៅនិងកាត់ក្រីកូនឈើនៅលើប្រាសាទក្រហម

បានផ្សាយនៅ ថ្ងៃទី 01 ខែ កុម្ភៈ ឆ្នាំ2016 08:18 AM ដោយ ៖ អាជ្ញាធរជាតិអប្សរា
ប្រាសាទក្រហមជាប្រាសាទឥដ្ឋដែលមានតម្កល់រូបព្រះឥសូររាំដ៏អស្ចារ្យកម្ពស់៤.៥០ម៉ែត្រ (បច្ចុប្បន្នសល់តែបំណែកខ្លះនៅក្នុងប្រាសាទ ឯខ្លះទៀតរក្សាទុកនៅសារមន្ទីរអង្គរ) តាមរចនាប័ទ្មកោះកេរ ឧទ្ទិសចំពោះព្រហ្មញ្ញសាសនា។ អ្នកស្រុក អ្នកធ្វើដំណើរ អ្នកស្រាវជ្រាវមានជំនឿយ៉ាងខ្លាំងលើប្រាសាទក្រហម ព្រោះទីនោះមានអ្នកតាក្រហមដ៏ពូកែស័ក្តិសិទ្ធិ។

ដោយឡែកទាក់ទងនឹងការថែរក្សា អភិរក្សវិញ ប្រាសាទនេះត្រូវបានភ្នាក់ងារអភិរក្សប្រាសាទនៃនាយកដ្ឋានអភិរក្សប្រាសាទក្រៅឧទ្យានអង្គររបស់អាជ្ញាធរជាតិអប្សរា រៀបចំតម្លើងរន្ទាដែកដើម្បីដកសម្អាតស្មៅនិងកូនរុក្ខជាតិដែលដុះនៅតាមតួប្រាសាទនិងលើកំពូលប្រាសាទចេញកាលពីថ្ងៃទី២៨ខែមករាឆ្នាំ២០១៦។ លោក សំ សារេត ប្រធានការិយាល័យនៃ នាយកដ្ឋានអភិរក្សប្រាសាទក្រៅឧទ្យានអង្គរបានឲ្យដឹងថា ជារៀងរាល់ឆ្នាំឲ្យតែដល់រដូវប្រាំងក្រុមការងារតែងតែឡើងសម្អាតស្មៅនិងដកកូនរុក្ខជាតិតូចធំដុះលើតួនិងកំពូលប្រាសាទក្រហមនិងប្រាសាទផ្សេងៗជាប្រចាំ។ នេះជាលើកទី១ដែលក្រុមការងារសាកល្បងតម្លើងរន្ទាដែកសម្រាប់ឡើងដកសម្អាតស្មៅនិងកាត់ក្រីរុក្ខជាតិនៅតំបន់កោះកេរដោយខ្លួនឯង ព្រោះកន្លងមកយើងដាក់ត្រឹមជណ្តើរឈើឡើងឬរន្ទាទាបៗប៉ុណ្ណោះតាមស្ថានភាពជាក់ស្តែងនិងលទ្ធភាពដែលយើងអាចធ្វើបានក្នុងការសម្អាតប្រាសាទ។

លោក សារេត បន្ថែមទៀតថា សព្វថ្ងៃនេះ យើងមានរន្ទារដែក១៥០ដើមនិងមានបុគ្គលិក១០នាក់ ជាបុគ្គលិកធម្មតា៧នាក់និងអ្នកបច្ចេកទេស៣នាក់សម្រាប់ដំណើរការការងារនេះ។ ការសម្អាតប្រាសាទ ដកស្មៅ និងកាត់ក្រីកូនឈើតូចធំលើតួនិងកំពូលប្រាសាទគឺដើម្បីថែរក្សាការពារប្រាសាទកុំឲ្យបាក់បែកប្រេះស្រាំដោយសាររុក្ខជាតិទាំងនោះ ថែមទាំងធ្វើឲ្យប្រាសាទមានសោភណភាពស្អាត និងទាក់ទាញភ្ញៀវទេសចរផងដែរ។

លោក ហុង ហាក់
ជាបុគ្គលិកជំនាញដែលបានផ្តួចផ្តើមរៀបរន្ទានេះ បានប្រាប់ថា លោកធ្លាប់ឃើញគេតំឡើងរន្ទាដែកសម្រាប់សម្អាតប្រាសាទនិងកាត់ដើមឈើ ព្រមទាំងមានបទពិសោធន៍ធ្លាប់សម្អាតតាមប្រាសាទកន្លងមកនៅក្នុងតំបន់អង្គរផង ទើបយកចំណេះដឹងទាំងនោះមកអនុវត្តនៅប្រាសាទក្រហមម្តង ដើម្បីងាយស្រួលឡើងសម្អាត។ ប៉ុន្តែនៅទីនេះមានការលំបាកច្រើន ហើយប្រឈមនឹងគ្រោះថ្នាក់ខ្លាំងជាងការសម្អាតប្រាសាទនៅតំបន់អង្គរ ព្រោះប្រាសាទនៅតំបន់នេះធ្វើពីឥដ្ឋ ពិសេសប្រាសាទក្រហម វាងាយពុកផុយ និងជ្រុះជាប្រចាំ មិនធន់នឹងកម្លាំងសង្កត់ធ្ងន់បានឡើយ ។

លោកបន្តទៀតថា ចំពោះការតម្លើងរន្ទាដែកដើម្បីសម្អាតប្រាសាទនីមួយៗ គឺមិនឲ្យប៉ះតួប្រាសាទឡើយ ហើយប្រើរយៈពេលបីថ្ងៃទើបតំឡើងរួច ឯការកាត់សម្អាតវិញយើងចំណាយពេលត្រឹមតែពីរថ្ងៃប៉ុណ្ណោះនឹងរួចរាល់ហើយ។ យើងអាចធ្វើការងារនេះបានតែនៅរដូវប្រាំងទេព្រោះរដូវនេះប្រាសាទស្ងួតល្អ មិនរអិល មិនពុកផុយ ងាយស្រួលក្នុងការឡើង។ អាជ្ញាធរជាតិអប្សរាបានធ្វើកិច្ចការងារនេះជាប្រចាំតាំងតែពីឆ្នាំ២០០៥មកដើម្បីថែរក្សាការពារនូវប្រាង្គប្រាសាទបុរាណទាំងអស់ក្នុងតំបន់កោះកេរ ដែលជាកេរ្តិ៍តំណែលរបស់បុព្វបុរសយើងនិងជាមត៌កសម្បត្តិវប្បធម៌បេតិកភណ្ឌមនុស្សជាតិមិនអាចកាត់ថ្លៃបានក្នុងលោក ឲ្យគង់វង្ស មិនឲ្យខូចបាក់បែក និងបាត់បង់សម្រស់សោភណភាពរបស់ប្រាសាទទាំងមូល៕

 

 

អ្នកជំនាញនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការរបស់អាជ្ញាធរជាតិអប្សរា កំពុងធ្វើកំណាយស្រាវជ្រាវបុរាណវិទ្យា និងជួសជុល ពង្រឹងឡើងវិញ។ ការងារនេះចំណាយពេលជាង១ឆ្នាំមកហើយ ដោយចាប់ផ្តើមពីឆ្នាំ២០១៤មក។
កំពែងអង្គរធំភាគឦសានប្រវែង៨ម៉ែត្រកម្ពស់៧ម៉ែត្រកន្លះ ត្រូវបានក្រុមអ្នកជំនាញខ្មែរ ធ្វើការជួសជុលឡើងវិញរួចរាល់ហើយ ក្រោយពីផ្ទាំងកំពែងនេះ និង៣ផ្ទាំងដទៃទៀតបានរងការ បាក់រលំក្នុងអំឡុងខ្យល់ព្យុះកេតសូណា កាលពីឆ្នាំ២០១១កន្លងទៅ។
ចម្លាក់តោធ្វើពីថ្មភក់ចំនួនប្រាំដែលដាក់តាំងនៅមុខប្រាសាទក្រវាន់ នឹងត្រូវនាយកដ្ឋានជំនាញសិក្សាពីទម្រង់រចនាបទដើម្បីធ្វើការជួសជុល និងឆ្លាក់បន្ថែមជើង ក្នុងន័យលើកតម្លៃសម្បត្តិបេតិកភណ្ឌក្នុងរមណីយដ្ឋានអង្គរ។
អ្នកជំនាញនៃអាជ្ញាធរជាតិអប្សរា នឹងបំពាក់ពិតានឈើនៅលើរោងទង កូរសមុទ្រទឹកដោះ នៅក្នុងប្រាសាទអង្គរវត្ត ដែលបានមានភាពពុកផុយ ក្នុងរយៈពេល៦ខែខាងមុខ បន្ទាប់ពីទទួលបានការគាំទ្រពី គណៈកម្មាធិការអាយស៊ីស៊ីអង្គរ ក្នុងកិច្ចប្រជុំបច្ចេកទេសលើកទី២៥ នៅថ្ងៃទី២ ខែធ្នូ ឆ្នាំ២០១៥នេះ។
អ្នកជំនាញរបស់អាជ្ញាធរជាតិអប្សរា កំពុងរៀបចំជួសជុលបង្កាន់ដៃនាគ និងជើងទម្រនៅរានហាលពីខ្លោងទ្វារតារាជ្យទៅក្តារបែន ប្រាសាទអង្គរវត្ត ដែលមានប្រវែងម្ខាងៗ៣១៥ម៉ែត្រ។ គម្រោងនេះ កំពុងតែដាក់ឆ្លងគណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា អាយស៊ីស៊ីអង្គរ ក្នុងកិច្ចប្រជុំបច្ចេកទេសលើកទី២៥របស់ខ្លួន នៅថ្ងៃទី០២ ខែធ្នូ ឆ្នាំ២០១៥។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
3
ថ្ងៃនេះ
:
8793
ម្សិលមិញ
:
12815
សប្តាហ៍នេះ
:
21608
ខែនេះ
:
0104563
សរុប
:
009064134