ព័ត៌មានថ្មីៗ

សំណង់ទ្វារទឹកនៅដូនកែវអាច នឹងកែប្រែជីភាពពលរដ្ឋឲ្យប្រសើរឡើងមួយកម្រិតទៀត

បានផ្សាយនៅ ថ្ងៃទី 21 ខែ មករា ឆ្នាំ2016 03:01 PM ដោយ ៖ អាជ្ញាធរជាតិអប្សរា

សំណង់ទ្វារទឹកនៅភូមិល្បើក ឃុំដូនកែវ ស្រុកពួក ត្រូវបានសាងសង់ឡើងដោយអាជ្ញាធរជាតិអប្សរា ក្រោមជំនួយថវិការបស់ប្រទេសញូវហ្ស៊ីឡែន ដែលទើបដាក់សម្ពោធឲ្យប្រើប្រាស់នៅព្រឹកថ្ងៃទី២១ ខែមករា ឆ្នាំ២០១៦នេះ អាចនឹងជួយស្រោចស្រពដំណាំចម្ការ ឬស្រែប្រាំងដល់ទៅជាង១ពាន់ហិកតា។ សំណង់ទ្វារទឹកនេះ នឹងអាចកែប្រែជីវភាពប្រជាពលរដ្ឋរាប់ពាន់គ្រួសារក្នុងឃុំនេះ ឲ្យមានភាពល្អប្រសើរឡើងមួយកម្រិតទៀត តាមរយៈការធ្វើដំណាំបន្លែ ឬស្រែប្រាំង។

អគ្គនាយករង ទទួលបន្ទុកនាយកដ្ឋានគ្រប់គ្រងទឹកនៃអាជ្ញាធរជាតិអប្សរា ឯកឧត្តម ហង់ ពៅ បានលើកឡើងក្នុងពិធីសម្ពោធឲ្យប្រើប្រាស់សំណង់ទ្វារទឹកនេះថា ការស្តារប្រព័ន្ធទឹកបុរាណឡើងវិញនេះ មិនត្រឹមតែជួយទប់ស្កាត់ទឹកជំនន់ ឬគ្រោះរាំងស្ងួតប៉ុណ្ណោះទេ តែការងារនេះបានជួយដល់វិស័យកសិកម្មរបស់ប្រជាពលរដ្ឋយ៉ាងច្រើន។ ជាក់ស្តែង សំណង់ទ្វារទឹកនេះ នឹងអាចជួយដល់ការធ្វើស្រែប្រាំង ឬដំណាំរបស់ប្រជាពលរដ្ឋចំនួន៦ភូមិ ដែលមានផ្ទៃដីអាចដាំដុះបានជាង១ពាន់ហិកតា។

សំណង់ទ្វារទឹកដ៏ថ្មីស្រឡាងនេះ គឺជាប្រវត្តិសាស្ត្រថ្មីមួយទៀត ព្រោះថាកន្លងមក ប្រជាពលរដ្ឋដែលរស់នៅខាងជើងបារាយណ៍ទឹកថ្លា មិនធ្លាប់មានប្រភពទឹកសម្រាប់ប្រើប្រាស់ទេ។ ពេលនេះ អាជ្ញាធរជាតិអប្សរាបាននាំយកទឹក ចូលដល់ភូមិដ្ឋានប្រជាពលរដ្ឋផ្ទាល់តែម្តង។

លោក ស្វាយ ហុង មេឃុំដូនកែវលើកឡើងថា ប្រជាពលរដ្ឋនៅឃុំរបស់លោកតាំងពីដើមមកមានមុខរបរតែមួយគត់ គឺធ្វើស្រែវស្សា។ ពួកគាត់ដាំដំណាំដែរ តែជាដំណាំតូចតាចនៅជុំវិញផ្ទះ។ តែដោយសារមានប្រឡាយ និងសំណង់ទ្វារទឹកដែលអាចស្ទាក់ទឹកទុកប្រើប្រាស់សម្រាប់ដំណាំកសិកម្មផ្សេងៗនារដូវប្រាំង នោះអាចនាំមកនូវការកែប្រែមុខមាត់ថ្មីរបស់អ្នកភូមិ។ លោកបន្ថែមថា បើទោះជាកន្លងមក អ្នកភូមិមិនធ្លាប់ធ្វើដំណាំខែប្រាំងក៏ដោយ តែលោកសង្ឃឹមថា ចាប់ពីពេលមានប្រឡាយទឹកដែលមានទឹកគ្រប់គ្រាន់នេះ នឹងអាចកែប្រែឲ្យពួកគាត់ងាកមកដាំដំណាំ ជំនួសឲ្យការធ្វើចំណាកស្រុកទៅរកស៊ីនៅស្រុកផ្សេង។

លោក ទស្ស សុមនាថ ប្រធាននាយកដ្ឋានស្តីទី និងជាអ្នកអនុវត្តគម្រោងអភិវឌ្ឍន៍សេដ្ឋកិច្ចសហគមន៍ និងបេតិកភណ្ឌអង្គរ ហៅកាត់ថា ACHA លើកឡើងថា តាមរយៈកិច្ចសហការជាមួយប្រទេសញូវហ្ស៊ីឡែន យើងកំពុងតែជំរុញប្រជាពលរដ្ឋឲ្យមានការប្រើប្រាស់ទឹកប្រឡាយនេះឲ្យអស់លទ្ធភាព សម្រាប់ដំណាំកសិកម្ម។ យើងនឹងជួយជីកប្រឡាយតូចៗចេញពីប្រឡាយមេ ឬបូមទឹកដោយប្រើថាមពលពន្លឺព្រះអាទិត្យ (ផ្ទាំងសូឡា) ដើម្បីបញ្ជូនទឹកទៅដល់ស្រែ ឬចម្ការរបស់ពួកគាត់។ យើងកំពុងរៀបចំពួកគាត់ជាក្រុមៗ និងមានអ្នកបច្ចេកទេសជួយណែនាំផ្នែកកសិកម្ម។

ប្រឡាយទឹកនេះ ជាប្រឡាយដែលបំបែកចេញពីស្ទឹងសៀមរាប ហូរចាក់ទៅស្ទឹងព្រះស្រុក ដែលអាជ្ញាធរជាតិអប្សរាបានស្តារឡើងវិញ ក្នុងន័យបញ្ជៀសទឹកជំនន់ចេញពីតំបន់ឧទ្យានអង្គរ និងក្រុងសៀមរាប ហើយក៏ជាប្រភពស្រោចស្រពដ៏សំខាន់សម្រាប់ប្រជាកសិករបង្កបង្កើនផល។ ប្រឡាយនេះ មានប្រវែងសរុប៥២គម បច្ចុប្បន្នការស្តារឡើងវិញសម្រេចបាន៣៨គមហើយ។ មិនត្រឹមតែប្រឡាយទេ ហេដ្ឋារចនាសម្ព័ន្ធផ្សេងៗដូចជា ស្ពាន ផ្លូវ និងសំណង់ទ្វារទឹកជាដើម ក៏ត្រូវបានសាងសង់ដំណាលគ្នាដើម្បីសម្រួលការធ្វើចរាចរ និងដើម្បីទប់ទឹកប្រើប្រាស់សម្រាប់វិស័យកសិកម្មរបស់ប្រជាពលរដ្ឋ៕










នាយកដ្ឋានគ្រប់គ្រងទឹកនៃអាជ្ញាធរជាតិអប្សរា សហការជាមួយអាជ្ញាធរភូមិឃុំដែលស្ថិតនៅក្នុងឃុំ-សង្កាត់ចំនួន៧ ក្នុងស្រុកពួក និងក្រុងសៀមរាប បានចុះវាស់វែងដីកសិកម្មនៃសហគមន៍ដែលប្រើប្រាស់ទឹកបារាយណ៍ទឹកថ្លា ដើម្បីងាយស្រួលដល់ការងារគ្រប់គ្រងទឹក និងរៀបចំប្រព័ន្ធផ្លូវទឹកឲ្យបានកាន់តែល្អប្រសើរ។ ក្រុមការងារបានចាប់ផ្តើមចុះវាស់វែងពីពាក់កណ្តាលខែមីនា ឆ្នាំ២០១៦ ហើយគ្រោងនឹងបញ្ចប់ក្នុងរយៈពេល៣ខែខាងមុខ។
ដោយអនុវត្តទៅតាមសារាចរណែនាំរបស់រាជរដ្ឋាភិបាលកម្ពុជា ស្តីពីកង្វះខាតទឹកប្រើប្រាស់ ដោយសាររដូវប្រាំងឆ្នាំនេះអូសបន្លាយពេលយូរ នាយកដ្ឋានគ្រប់គ្រងទឹកនៃអាជ្ញាធរជាតិអប្សរា នៅព្រឹកថ្ងៃទី២៥ ខែមីនា ឆ្នាំ២០១៦នេះ បានប្រកាសផ្អាកការផ្គត់ផ្គង់ទឹកជូនសហគមន៍ ដែលប្រើប្រាស់ទឹកបារាយណ៍សម្រាប់ស្រោចស្រពដំណាំកសិកម្ម។ ការប្រកាសផ្អាកនៅពេលនេះ គឺដើម្បីរក្សាទឹកខ្លះឲ្យនៅសល់នៅបាតបារាយណ៍ ជាជម្រាបផ្គត់ផ្គង់អណ្តូង និងប្រភពទឹកប្រើប្រាស់ប្រចាំថ្ងៃរបស់ប្រជាពលរដ្ឋ។
បច្ចេកវិទ្យាអវកាស (Remote Sensing) ដែលកំពុងអនុវត្តលើការងារអភិរក្សក្នុងរមណីយដ្ឋានអង្គរសព្វថ្ងៃ អាចនឹងត្រូវពង្រីកវិសាលភាពរបស់ខ្លួនទៅកាន់តំបន់បេតិកភណ្ឌដទៃទៀត ដូចជា ប្រាសាទព្រះវិហារ ប្រាសាទកោះកេរ និងប្រាសាទបេងមាលាជាដើម។ នេះបើយោងតាមលទ្ធផលនៃកិច្ចពិភាក្សារវាងឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ជាមួយលោកសាស្ត្រាចារ្យ Bai Chunli ប្រធានបណ្ឌិតសភាវិទ្យាសាស្ត្រចិន នៅទីស្នាក់ការអាជ្ញាធរជាតិអប្សរា នាល្ងាចថ្ងៃទី២២ ខែមីនា ឆ្នាំ២០១៦កន្លងទៅនេះ។
ដោយមានការផ្តួចផ្តើមគំនិត ការចង្អុលបង្ហាញ និងការជំរុញពីឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា នៅព្រឹកថ្ងៃទី១០ខែមីនាឆ្នាំ២០១៦នេះ អាជ្ញាធរជាតិអប្សរាដឹកនាំដោយឯកឧត្តម ឈរ ថាណាត អគ្គនាយករងអាជ្ញាធរជាតិអប្សរា និងជាប្រធានគណៈកម្មការចម្រុះគ្រប់គ្រងអភិរក្ស និងការពារព្រៃឈើនៅតំបន់ប្រាសាទកោះកេរ និងមន្រ្តីបុគ្គលិកមួយចំនួនទៀតបានចុះទៅអប់រំផ្សព្វផ្សាយស្តីពីការគ្រប់គ្រង អភិរក្ស និងថែរក្សាការពារព្រៃឈើនៅតំបន់ប្រាសាទកោះកេរ ដោយមានការចូលរួមអំពីសំណាក់ព្រះសង្ឃ គណៈកម្មការ មន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ មន្ទីរទេសចរណ៍ រដ្ឋបាលព្រៃឈើ អាជ្ញាធរខេត្ត ស្រុក ឃុំ ភូមិនិងប្រជាពលរដ្ឋប្រមាណជាង៦០០អង្គ/រូបមកពីភូមិស្រយង់ខាងជើង ឃុំស្រយង់ ស្រុកគូលែន ខេត្តព្រះវិហារ។
ក្រុមការងារផ្សព្វផ្សាយអប់រំអំពីការងារអភិរក្សព្រៃឈើនៅតំបន់ប្រាសាទកោះកេរ នាព្រឹកថ្ងៃទី២៥ ខែកុម្ភៈនេះ បានចុះជួបប្រជាពលរដ្ឋជាង២០០នាក់នៅវត្តស្រយ៉ង់ ឃុំស្រយ៉ង់ ស្រុកគូលែន ខេត្តព្រះវិហារ។ ការជួបជុំនេះ គឺក្នុងគោលបំណងផ្សព្វផ្សាយ និងអប់រំប្រជាពលរដ្ឋឲ្យយល់ដឹងអំពីតម្លៃនៃការងារអភិរក្ស និងគោលការណ៍សំខាន់ៗដែលត្រូវអនុវត្តក្នុងតំបន់អភិរក្សនៃប្រាសាទកោះកេរ។ នេះជាលើកទី២ហើយនៃយុទ្ធនាការចុះអប់រំប្រជាពលរដ្ឋ បន្ទាប់ពីយុទ្ធនាការទី១បានធ្វើឡើងកាលពីថ្ងៃទី១៨ ខែកុម្ភៈ ឆ្នាំ២០១៦នៅភូមិរំចេក ឃុំស្រយ៉ង់ ខេត្តព្រះវិហារ។ ការផ្សព្វផ្សាយអប់រំ គឺជាបេសកកម្មដ៏សំខាន់មួយដែលត្រូវធ្វើដំណាលគ្នានឹងការបង្រ្កាប ទប់ស្កាត់បទល្មើសព្រៃឈើនៅតំបន់អភិរក្សនេះ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
10
ថ្ងៃនេះ
:
3041
ម្សិលមិញ
:
6621
សប្តាហ៍នេះ
:
32496
ខែនេះ
:
0190385
សរុប
:
014250240