ព័ត៌មានថ្មីៗ

ចម្លាក់ព្រះកេសទេវតាចំនួន៣នៅខ្លោងទ្វារទន្លេអុំ ត្រូវបានឆ្លាក់ឡើងវិញតាមរយៈការឧបត្ថម្ភថវិកាពីសប្បុរសជនដែលស្រឡាញ់មត៌កវប្បធម៌

បានផ្សាយនៅ ថ្ងៃទី 04 ខែ មករា ឆ្នាំ2016 03:35 PM ដោយ ៖ អាជ្ញាធរជាតិអប្សរា

លោក នាង ឈុនអេង និងលោកស្រី យ៉ង់ ដេត ព្រមទាំងលោកស្រី នាង សុវណ្ណារ៉ា ជាបុត្រ ដែលសព្វថ្ងៃរស់នៅទីក្រុងភ្នំពេញបានចំណាយថវិកាផ្ទាល់ខ្លួន ដើម្បីឆ្លាក់ព្រះកេសទេវតាចំនួន៣ ពីថ្មភក់ជំនួសព្រះកេសស៊ីម៉ង់ត៍ដើម្បីដាក់នៅខ្លោងទ្វារទន្លេអុំ ក្រុងអង្គរធំ។

នៅព្រឹកថ្ងៃទី៤ ខែមករា ឆ្នាំ២០១៦នេះ អ្នកជំនាញនៃអាជ្ញាធរអប្សរាបានយកព្រះកេសដែលឆ្លាក់រួចរាល់ហើយនោះ មកភ្ជាប់នឹងដងខ្លួននៃចម្លាក់ទេវតាទាញព្រ័ត្រឡើងវិញ ក្នុងន័យអភិរក្ស និងលើកតម្លៃមត៌កបេតិកភណ្ឌជាតិ។ ចម្លាក់ព្រះកេសទេវតាទាំង៣នេះ ស្ថិតនៅត្រង់ចម្លាក់ទេវតាទី៦ ទី១១ និងទី២៩ ដែលបាត់ព្រះកេសតាំងពីក្នុងពេលដែលប្រទេសខ្មែរ កំពុងស្ថិតនៅក្នុងភ្លើងសង្រ្គាមនៅឡើយ។

លោក ទិន ទីណា អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ ជាអ្នកសម្របសម្រួលការងារនេះ បញ្ជាក់ថា សប្បុរសជនខ្មែរពីរនាក់ប្តីប្រពន្ធព្រមទាំងបុត្រដែលមានអាសយដ្ឋាននៅបុរីសុភមង្គល សង្កាត់ជ្រោយចង្វារ រាជធានីភ្នំពេញ ជាអ្នកមានជំនឿលើវត្ថុបុរាណ និងស្រឡាញ់ពេញចិត្តយ៉ាងខ្លាំងចំពោះមត៌កវប្បធម៌ខ្មែរ។ ក្រុមគ្រួសារលោកទាំងពីរបានបរិច្ចាគថវិកាផ្ទាល់ខ្លួន ដើម្បីឲ្យក្រុមការងារជាងចម្លាក់នៅភូមិអភិវឌ្ឍន៍ភូមិធម្មជាតិរុនតាឯក ឆ្លាក់ព្រះកេសទេវតាឡើងវិញ ដោយចំណាយថវិកាសរុបអស់ចំនួន១៨០០ដុល្លារអាមេរិក។

លោក សយ សុភារិន្ទ អ្នកជំនាញផ្នែកអភិរក្ស និងជួសជុលថ្ម នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ ដែលកំពុងដឹកនាំការងារតភ្ជាប់ព្រះកេសនេះរៀបរាប់ថា ចម្លាក់ព្រះកេសទេវតាទាំង៣ដែលយើងកំពុងតភ្ជាប់នេះ គឺអ្នកជំនាញបានឆ្លាក់យកទម្រង់ព្រះភក្ត្រពេញទាំងស្រុង ស្របតាមទម្រង់រចនាប័ទ្មនាសម័យនោះ។

លោក សុភារិន្ទ បន្ថែមថា ចម្លាក់ទាញព្រ័ត្រនៅខ្លោងទ្វារទន្លេអុំសរុបទាំងអស់មានចំនួន ១០៨ ដែលក្នុងនោះចម្លាក់ទេវតាចំនួន៥៤ និងចម្លាក់យក្សចំនួន៥៤។ រយៈកាលកន្លងមក អាជ្ញាធរជាតិអប្សរា បានឆ្លាក់ព្រះកេសថ្មីធ្វើពីថ្មភក់ និងភ្ជាប់ឡើងវិញបានចំនួន២៥ហើយ ដែលចម្លាក់ទាំងនេះ ឆ្លាក់តាមរចនាប័ទ្មដើមទាំងស្រុង ដែលមានតម្កល់ទុកនៅអភិរក្សដ្ឋានអង្គរ។

ចំណែកចម្លាក់៣ ដែលជាអំណោយសប្បុរសជននៅពេលនេះ មិនមានចម្លាក់ដើមនៅសេសសល់ទេ ដូច្នេះ អ្នកជំនាញបានឆ្លាក់ព្រះកេសឲ្យមានទម្រង់ស៊ីគ្នានឹងចម្លាក់ដងខ្លួនដែលនៅសល់ ហើយមានលក្ខណៈប្រហាក់ប្រហែលគ្នានឹងព្រះកេសទេវតាផ្សេងៗទៀត ដែលមាននៅទីនេះស្រាប់។ បច្ចុប្បន្ន នៅសល់ចម្លាក់អត់ព្រះកេសចំនួន១១ ដែលមិនទាន់បានឆ្លាក់បំពេញនៅឡើយ។

ការអភិរក្សមត៌កបេតិកភណ្ឌជាតិ គឺជាការងាររបស់យើងទាំងអស់គ្នា។ ការរួមចំណែករបស់សប្បុរសជននៅពេលនេះ គឺជាកាយវិការដ៏ប្រពៃដែលអាជ្ញាធរជាតិអប្សរា សូមកោតសរសើរដោយស្មោះ និងគាំទ្រលើកទឹកចិត្តដល់ប្រជាពលរដ្ឋទូទៅ ដែលគោរពស្រឡាញ់វប្បធម៌ដូនតាខ្មែរ អាចចូលរួមជាមួយអាជ្ញាធរជាតិអប្សរាបានគ្រប់ពេលវេលា និងគ្រប់សកម្មភាព៕






អកយំ ជាឈ្មោះប្រាសាទសង់អំពីឥដ្ឋមុនសម័យអង្គរ រាងសាជី (Pyramide) ស្ថិតនៅលើខឿនបីជាន់ មានទំហំ១០០ម៉ែត្របួនជ្រុងស្មើ កសាងឡើងក្នុងរាជព្រះបាទភវវរ្ម័ន ដែលឧទ្ទិសចំពោះទេព «កុម្ភីរេស្វរៈ» ក្នុងអំឡុងសតវត្សទី៦នៃគ.ស។ គេបានរកឃើញសិលាចារឹកចំនួនបីផ្ទាំងនៅក្នុងប្រាសាទនេះ គឺផ្ទាំងទី១នៅលើស៊ុមទ្វារចូលប្រាង្គកណ្តាលផ្នែកខាងកើត ដែលបានបញ្ជាក់អំពីកាលបរិច្ឆេទស្ថិតក្នុងឆ្នាំ៦៧៤នៃគ.ស។ ផ្ទាំងទី២នៅលើស៊ុមទ្វារចូលប្រាង្គកណ្តាលផ្នែកខាងត្បូង បញ្ជាក់កាលបរិច្ឆេទនាដើមសតវត្សទី៨ និងផ្ទាំងទី៣ជាអក្សរចារមួយខ្សែលើជើងទម្រកប់ក្រោមដីកាលលើកទំនប់បារាយណ៍ ដែលបង្ហាញអំពីកាលបរិច្ឆេទឆ្នាំ១០០១នៃគ.ស។
ផ្តែរថ្មមានទម្ងន់ជាង៥តោន និងសសរពេជ្រដែលបានជ្រុះធ្លាក់ពីប្រាសាទឥដ្ឋប៉មទី៨នៃប្រាសាទបាគង ក្នុងអំឡុងឆ្នាំ២០០៩ ដោយកម្លាំងខ្យល់ព្យុះកេតសូណា ត្រូវបានក្រុមអភិរក្សថ្ម នៃអាជ្ញាធរជាតិអប្សរាធ្វើការផ្គុំជួសជូលឡើងវិញ នៅសារមន្ទីរព្រះនរោត្តមសីហនុអង្គរ។ ផ្តែរថ្ម និងសសរពេជ្រនេះ ត្រូវបានក្រុមជំនាញដឹកជញ្ជូនមករក្សាទុកនៅសារមន្ទីរព្រះនរោត្តមសីហនុអង្គរ កាលពីឆ្នាំ២០១២ ដើម្បីធ្វើការអភិរក្សជួសជុល និងតភ្ជាប់ឡើងវិញ។
ប្រាសាទក្រហមជាប្រាសាទឥដ្ឋដែលមានតម្កល់រូបព្រះឥសូររាំដ៏អស្ចារ្យកម្ពស់៤.៥០ម៉ែត្រ (បច្ចុប្បន្នសល់តែបំណែកខ្លះនៅក្នុងប្រាសាទ ឯខ្លះទៀតរក្សាទុកនៅសារមន្ទីរអង្គរ) តាមរចនាប័ទ្មកោះកេរ ឧទ្ទិសចំពោះព្រហ្មញ្ញសាសនា។ អ្នកស្រុក អ្នកធ្វើដំណើរ អ្នកស្រាវជ្រាវមានជំនឿយ៉ាងខ្លាំងលើប្រាសាទក្រហម ព្រោះទីនោះមានអ្នកតាក្រហមដ៏ពូកែស័ក្តិសិទ្ធិ។
កាលពីថ្ងៃទី ០៦ ខែមករា ឆ្នាំ២០១៦ លោក ឈាន រដ្ឋា ប្រធាននាយកដ្ឋានស្តីទី នៃនាយកដ្ឋានអភិរក្សប្រាសាទក្រៅឧទ្យានអង្គរ បានដឹកនាំមន្រី្ត បុគ្គលិកក្រោមឱវាទ ទៅចូលរួមក្នុងពិធីបុណ្យនៅស្ពានបុរាណព្រះទិស (ស្ពានកំពង់ក្តី) ដែលផ្តួចផ្តើមឡើងដោយព្រះសង្ឃ គណៈកម្មការវត្ត ព្រមទាំងពុទ្ធបរិស័ទចំណុះជើងវត្តជីក្រែង និងសាលាស្រុកជីក្រែង ដែលប្រព្រឹត្តទៅពីថ្ងៃទី ០៦ ដល់ថ្ងៃទី ០៨ ខែមករា ឆ្នាំ ២០១៦។
ការជួសជុលប្រាសាទ ឬបុរាណដ្ឋាននានា ជាពិសេសក្នុងរមណីយដ្ឋានអង្គរ យើងតែងឃើញការងារមួយដែលអ្នកជំនាញធ្វើ មុននឹងឈានដល់ការជួសជុលនោះគឺ ការធ្វើកំណាយបុរាណវិទ្យា។ កំណាយបុរាណវិទ្យា គឺជាការជីកកកាយបែបវិទ្យាសាស្ត្រ ដែលធ្វើឡើងយ៉ាងម៉ត់ចត់ និងមានវិធីសាស្ត្រត្រឹមត្រូវ។
ដើមដំបូងមុន123456បន្ទាប់ចុងក្រោយ

ប្រសាសន៍ឯកឧត្តមប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
3
ថ្ងៃនេះ
:
2859
ម្សិលមិញ
:
14501
សប្តាហ៍នេះ
:
50444
ខែនេះ
:
0312597
សរុប
:
001814632