ព័ត៌មានថ្មីៗ

ការព្យាបាលជំងឺដើមឈើនៅក្នុងតំបន់រមណីយដ្ឋានអង្គរ

បានផ្សាយនៅ ថ្ងៃទី 01 ខែ មករា ឆ្នាំ2016 04:27 PM ដោយ ៖ អាជ្ញាធរជាតិអប្សរា

នៅក្នុងតំបន់រមណីយដ្ឋានអង្គរ ប្រាសាទ ព្រៃឈើ និងសហគមន៍មានទំនាក់ទំនងគ្នាយ៉ាងជិតស្និទ្ធ។ ជាក់ស្តែង កិច្ចប្រជុំ ICC-Angkor ក៏បានសម្រេចផងដែរថា នៅក្នុងឧទ្យានអង្គរមានធាតុសំខាន់បំផុត ចំនួន០៣ គឺប្រាសាទតំណាងឱ្យ (វប្បធម៌) ធម្មជាតិ (ដើមឈើ សត្វព្រៃ ទឹក។ល។) និងសហគមន៍ (ប្រជាជន ទំនៀមទម្លាប់ ប្រពៃណី) ដែលអាជ្ញាធរជាតិអប្សរាត្រូវយកចិត្តទុកដាក់ឲ្យខ្លាំង។

ក្នុងចំណោមធាតុទាំងបីនេះ ដើមឈើបានធ្វើឲ្យឧទ្យានអង្គរមានសោភណភាពស្រស់ស្អាត និងជារនាំងការពារប្រាសាទផងដែរ។ ប៉ុន្តែដោយសារកត្តាធម្មជាតិនិងមនុស្សបានធ្វើឲ្យដើមឈើធំៗខ្លះមានជំងឺដែលចាំបាច់ត្រូវធ្វើការព្យាបាលឱ្យទាន់ពេល ដើម្បីឲ្យដើមឈើលូតលាស់ល្អ មានសុខភាពរឹងមាំឡើងវិញ។

ក្នុងបទបង្ហាញដល់អង្គពិធី នាឱកាសបូកសរុបលទ្ធផលការងារប្រចាំឆ្នាំ២០១៥ កាលពីថ្ងៃទី៣១ ធ្នូម្សិលមិញនេះ លោក ទូច តេត្រា ប្រធានការិយាល័យគ្រប់គ្រងទេសភាពវប្បធម៌នៃអាជ្ញាធរជាតិអប្សរាបានបញ្ជាក់ថា ដើមឈើក៏ដូចមនុស្សដែរ វាត្រូវការអុកស៊ីសែន ការសម្រាក ចំណីអាហារ ទឹក មានជំងឺ និងត្រូវការព្យាបាលដូចគ្នា។

លោកក៏បានលើកឡើងផងដែរអំពីដើមឈើមានជំងឺត្រូវព្យាបាល គឺដើមឈើដែលមានរបួសដោយការកាប់ ចាំង ដំដែកគោល ឬសរសេរអក្សរពីលើ ដែលធ្វើឱ្យឆ្លងមេរោគ។ ដើមឈើខ្លះក៏មានដំបៅដែលបង្កឡើងដោយផ្សិត ការពុកតួដើមឈើ និងពុកគល់។ ដើមឈើដែលដំបៅឫស ដោយសកម្មភាពមនុស្សជាន់ពីលើជារៀងរាល់ថ្ងៃឬមានវត្ថុធ្ងន់ៗសង្កត់លើ។ ដើមឈើដំបៅគល់ដោយការចោះយកជ័រ និងដើមឈើដែលមានក្រណាត់រុំជុំវិញដើម។

លើសពីនោះ លោកតេត្រាបញ្ជាក់ថា ដើមឈើក៏មានជំងឺស្ត្រេសដែរ។ ជំងឺនេះបង្កឡើងដោយចាក់ដីហាប់ណែន ចាក់បេតុងពីលើឬចាក់ដីលុបគល់ដែលមានជម្រៅជ្រៅ និងការដាក់ពន្លឺភ្លើងអគិ្គសនីខ្លាំងជិតដើមឈើជារៀងរាល់ថ្ងៃ ដែលបង្ករផលប៉ះពាល់ដល់ដំណេករបស់ដើមឈើ។

ចំណែកវិធីសាស្ត្រក្នុងការព្យាបាល ត្រូវអនុវត្តទៅតាមប្រភេទជំងឺផ្សេងៗគ្នា។ ចំពោះឈើដែលពុកគល់ ឬដើម ត្រូវកោសនិងលាងសម្អាតសាច់ឈើពុកឬដុះផ្សិតឲ្យស្អាត បន្ទាប់មកបាញ់ឬលាបជ័រទឹកនៅលើផ្ទៃដែលបានសម្អាតហើយនោះ។ ជំងឺខ្លះ ត្រូវបិទប្រហោងតូចៗដោយប្រើល្បាយដីដំបូកក៏បាន ដោយក្រមួនក៏បានតាមលទ្ធភាពដែលយើងមាន ហើយត្រូវធ្វើចង្អូរបង្ហូរទឹកនិងដី ចេញផង។

ចំណែកដើមឈើខ្លះទៀតដែលមានឫសធំៗចេញផុតពីដី ជាពិសេសក្នុងតំបន់ប្រាសាទ ដែលមានភ្ញៀវទស្សនាច្រើន ដើរកាត់ អង្គុយពីលើ ហើយបង្កឲ្យមានជំងឺនោះ យើងធ្វើកម្រាលឈើឬជណ្តើរឈើកុំឲ្យមនុស្សឈរឬដើរពីលើតទៅទៀត។ ចំណែកជំងឺស្ត្រេសវិញ ត្រូវព្យាបាលដោយយកពន្លឺអគ្គីសនីចេញឬបន្ថយពន្លឺឲ្យមកនូវកម្រិតទាប។ ឈូសឆាយធ្វើឲ្យដីធូរឬគាស់យកបេតុងចេញ ដាក់ជី ដាំស្មៅពីលើ ។ល។ កាប់រណ្តៅជុំវិញគល់ឈើ ស្រោចទឹក ដាក់ជី។

គួរបញ្ជាក់ផងដែរថា បច្ចេកវិទ្យាដ៏វិសេសនេះត្រូវបានបង្ហាត់បង្រៀនដោយអ្នកជំនាញមកពីប្រទេសឥណ្ឌា ហើយក្នុងឆ្នាំ២០១៥នេះ អាជ្ញាធរជាតិអប្សរាព្យាបាលជំងឺដើមឈើបានចំនួន៨៤១ដើម នៅតាមប្រាសាទនានានិងផ្លូវវង់ទស្សនានៅក្នុងឧទ្យានអង្គរ៕






នាយកដ្ឋានគ្រប់គ្រងទឹកនៃអាជ្ញាធរជាតិអប្សរា សហការជាមួយអាជ្ញាធរភូមិឃុំដែលស្ថិតនៅក្នុងឃុំ-សង្កាត់ចំនួន៧ ក្នុងស្រុកពួក និងក្រុងសៀមរាប បានចុះវាស់វែងដីកសិកម្មនៃសហគមន៍ដែលប្រើប្រាស់ទឹកបារាយណ៍ទឹកថ្លា ដើម្បីងាយស្រួលដល់ការងារគ្រប់គ្រងទឹក និងរៀបចំប្រព័ន្ធផ្លូវទឹកឲ្យបានកាន់តែល្អប្រសើរ។ ក្រុមការងារបានចាប់ផ្តើមចុះវាស់វែងពីពាក់កណ្តាលខែមីនា ឆ្នាំ២០១៦ ហើយគ្រោងនឹងបញ្ចប់ក្នុងរយៈពេល៣ខែខាងមុខ។
ដោយអនុវត្តទៅតាមសារាចរណែនាំរបស់រាជរដ្ឋាភិបាលកម្ពុជា ស្តីពីកង្វះខាតទឹកប្រើប្រាស់ ដោយសាររដូវប្រាំងឆ្នាំនេះអូសបន្លាយពេលយូរ នាយកដ្ឋានគ្រប់គ្រងទឹកនៃអាជ្ញាធរជាតិអប្សរា នៅព្រឹកថ្ងៃទី២៥ ខែមីនា ឆ្នាំ២០១៦នេះ បានប្រកាសផ្អាកការផ្គត់ផ្គង់ទឹកជូនសហគមន៍ ដែលប្រើប្រាស់ទឹកបារាយណ៍សម្រាប់ស្រោចស្រពដំណាំកសិកម្ម។ ការប្រកាសផ្អាកនៅពេលនេះ គឺដើម្បីរក្សាទឹកខ្លះឲ្យនៅសល់នៅបាតបារាយណ៍ ជាជម្រាបផ្គត់ផ្គង់អណ្តូង និងប្រភពទឹកប្រើប្រាស់ប្រចាំថ្ងៃរបស់ប្រជាពលរដ្ឋ។
បច្ចេកវិទ្យាអវកាស (Remote Sensing) ដែលកំពុងអនុវត្តលើការងារអភិរក្សក្នុងរមណីយដ្ឋានអង្គរសព្វថ្ងៃ អាចនឹងត្រូវពង្រីកវិសាលភាពរបស់ខ្លួនទៅកាន់តំបន់បេតិកភណ្ឌដទៃទៀត ដូចជា ប្រាសាទព្រះវិហារ ប្រាសាទកោះកេរ និងប្រាសាទបេងមាលាជាដើម។ នេះបើយោងតាមលទ្ធផលនៃកិច្ចពិភាក្សារវាងឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ជាមួយលោកសាស្ត្រាចារ្យ Bai Chunli ប្រធានបណ្ឌិតសភាវិទ្យាសាស្ត្រចិន នៅទីស្នាក់ការអាជ្ញាធរជាតិអប្សរា នាល្ងាចថ្ងៃទី២២ ខែមីនា ឆ្នាំ២០១៦កន្លងទៅនេះ។
ដោយមានការផ្តួចផ្តើមគំនិត ការចង្អុលបង្ហាញ និងការជំរុញពីឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា នៅព្រឹកថ្ងៃទី១០ខែមីនាឆ្នាំ២០១៦នេះ អាជ្ញាធរជាតិអប្សរាដឹកនាំដោយឯកឧត្តម ឈរ ថាណាត អគ្គនាយករងអាជ្ញាធរជាតិអប្សរា និងជាប្រធានគណៈកម្មការចម្រុះគ្រប់គ្រងអភិរក្ស និងការពារព្រៃឈើនៅតំបន់ប្រាសាទកោះកេរ និងមន្រ្តីបុគ្គលិកមួយចំនួនទៀតបានចុះទៅអប់រំផ្សព្វផ្សាយស្តីពីការគ្រប់គ្រង អភិរក្ស និងថែរក្សាការពារព្រៃឈើនៅតំបន់ប្រាសាទកោះកេរ ដោយមានការចូលរួមអំពីសំណាក់ព្រះសង្ឃ គណៈកម្មការ មន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ មន្ទីរទេសចរណ៍ រដ្ឋបាលព្រៃឈើ អាជ្ញាធរខេត្ត ស្រុក ឃុំ ភូមិនិងប្រជាពលរដ្ឋប្រមាណជាង៦០០អង្គ/រូបមកពីភូមិស្រយង់ខាងជើង ឃុំស្រយង់ ស្រុកគូលែន ខេត្តព្រះវិហារ។
ក្រុមការងារផ្សព្វផ្សាយអប់រំអំពីការងារអភិរក្សព្រៃឈើនៅតំបន់ប្រាសាទកោះកេរ នាព្រឹកថ្ងៃទី២៥ ខែកុម្ភៈនេះ បានចុះជួបប្រជាពលរដ្ឋជាង២០០នាក់នៅវត្តស្រយ៉ង់ ឃុំស្រយ៉ង់ ស្រុកគូលែន ខេត្តព្រះវិហារ។ ការជួបជុំនេះ គឺក្នុងគោលបំណងផ្សព្វផ្សាយ និងអប់រំប្រជាពលរដ្ឋឲ្យយល់ដឹងអំពីតម្លៃនៃការងារអភិរក្ស និងគោលការណ៍សំខាន់ៗដែលត្រូវអនុវត្តក្នុងតំបន់អភិរក្សនៃប្រាសាទកោះកេរ។ នេះជាលើកទី២ហើយនៃយុទ្ធនាការចុះអប់រំប្រជាពលរដ្ឋ បន្ទាប់ពីយុទ្ធនាការទី១បានធ្វើឡើងកាលពីថ្ងៃទី១៨ ខែកុម្ភៈ ឆ្នាំ២០១៦នៅភូមិរំចេក ឃុំស្រយ៉ង់ ខេត្តព្រះវិហារ។ ការផ្សព្វផ្សាយអប់រំ គឺជាបេសកកម្មដ៏សំខាន់មួយដែលត្រូវធ្វើដំណាលគ្នានឹងការបង្រ្កាប ទប់ស្កាត់បទល្មើសព្រៃឈើនៅតំបន់អភិរក្សនេះ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
5
ថ្ងៃនេះ
:
1206
ម្សិលមិញ
:
14672
សប្តាហ៍នេះ
:
60579
ខែនេះ
:
0001206
សរុប
:
012983520