ព័ត៌មានថ្មីៗ

ទំនាក់ទំនងរវាងកំណាយបុរាណវិទ្យា និងការជួសជុលប្រាសាទ

បានផ្សាយនៅ ថ្ងៃទី 29 ខែ ធ្នូ ឆ្នាំ2015 03:35 PM ដោយ ៖ អាជ្ញាធរជាតិអប្សរា

ការជួសជុលប្រាសាទ ឬបុរាណដ្ឋាននានា ជាពិសេសក្នុងរមណីយដ្ឋានអង្គរ យើងតែងឃើញការងារមួយដែលអ្នកជំនាញធ្វើ មុននឹងឈានដល់ការជួសជុលនោះគឺ ការធ្វើកំណាយបុរាណវិទ្យា។ កំណាយបុរាណវិទ្យា គឺជាការជីកកកាយបែបវិទ្យាសាស្ត្រ ដែលធ្វើឡើងយ៉ាងម៉ត់ចត់ និងមានវិធីសាស្ត្រត្រឹមត្រូវ។

តើការជួសជុលប្រាសាទ និងការធ្វើកំណាយបុរាណវិទ្យាមានទំនាក់ទំនងគ្នាយ៉ាងណាខ្លះ?

បុរាណវិទូនៃអាជ្ញាធរជាតិអប្សរា លោក ស្រ៊ុន តិច ដែលកំពុងធ្វើកំណាយបុរាណវិទ្យា នៅប្រាសាទគោកចក បានពន្យល់ថា ការធ្វើកំណាយបុរាណវិទ្យា ជាការស្រាវជ្រាវមួយដែលបង្ហាញអំពីការយកចិត្តទុកដាក់ខ្ពស់ ដល់ការអភិរក្សបេតិកភណ្ឌ គឺបន្សល់ទុកទាំងបេតិកភណ្ឌ និងឯកសារដែលពាក់ព័ន្ធនឹងបេតិកភណ្ឌនោះ។

ការធ្វើកំណាយបុរាណវិទ្យាក្នុងពេលជួសជុលប្រាសាទ ឬបុរាណដ្ឋាននានានោះ គោលដៅសំខាន់គឺដើម្បីធ្វើសម្រង់ប្លង់ ចងក្រងឯកសារមុននឹងឈានដល់ការជួសជុល។ មានន័យថា អ្នកជួសជុលត្រូវដឹងនូវរចនាសម្ព័ន្ធប្រាសាទ ដឹងនូវមូលហេតុដែលប្រាសាទដួលរលំ ឬមានបញ្ហា ប្រវត្តិនៃការជួសជុលកន្លងមក និងចងក្រងឯកសារមុនពេលជួសជុល និងដំណាក់កាលជួសជុល រហូតដល់បញ្ចប់ជាស្ថាពរ។ ការមិនធ្វើកំណាយដើម្បីចងក្រងឯកសារ ហើយជួសជុលតែម្តង ឈ្មោះថា បំផ្លាញនូវស្លាកស្នាមចាស់ ឬរូបភាពដើមនៃប្រាសាទ ឬបុរាណដ្ឋាននានា។

លោកពន្យល់ថា កំណាយបុរាណវិទ្យាមានបីប្រភេទគឺ កំណាយស្រាវជ្រាវ កំណាយ សង្រ្គោះឬការពារ និងកំណាយដើម្បីការងារអភិរក្សជួសជុល។ លោក ស្រ៊ុន តិច ពន្យល់ថា កំណាយដើម្បីស្រាវជ្រាវចងក្រងជាឯកសារ ដូចជាការស្វែងរកឡបុរាណ ផ្លូវបុរាណជាដើម ហៅថា កំណាយស្រាវជ្រាវ។ ចំណែកកំណាយដែលអ្នកជំនាញធ្វើឡើង ដើម្បីសង្គ្រោះ ឬបង្ការការខូចខាតដល់បេតិកភណ្ឌ ដូចករណីធ្វើផ្លូវ ឬធ្វើចំណតយានយន្ត ក្នុងរមណីយដ្ឋានអង្គរជាដើម បើឃើញថា មានស្លាកស្នាមសំណល់បុរាណ អ្នកជំនាញនឹងណែនាំឲ្យជ្រើសរើសកន្លែងផ្សេង បើឃើញគ្មានទេ ទើបអាចធ្វើបាន ជាដើម ហៅថា កំណាយសង្គ្រោះ ឬកំណាយការពារ។

ចំពោះករណីទី៣ គឺជាកំណាយដែលធ្វើឡើង ក្នុងគោលដៅអភិរក្សជួសជុល។ ជាក់ស្តែង កំណាយបុរាណវិទ្យាដែលកំពុងធ្វើនៅប្រាសាទគោកចកនេះ ហៅថា កំណាយបុរាណវិទ្យាសម្រាប់ជួសជុល។ កំណាយនេះ យើងធ្វើឡើងដើម្បីដឹងថា ស្ថានភាពគ្រឹះរបស់ប្រាសាទហ្នឹងវាយ៉ាងណា? ហេតុអ្វីទើបប្រាសាទនេះខូចខាត?

បុរាណវិទូនៃអាជ្ញាធរជាតិអប្សរាមួយរូបទៀត លោក អ៊ឹម សុខរិទ្ធី បានពន្យល់ខ្លឹមសារដូចគ្នានឹងករណីខាងលើដែរ។ ទោះជាយ៉ាងណា លោ កអ៊ឹម សុខរិទ្ធី យល់ថា ការជួសជុលប្រាសាទទាំងអស់មិនមែនសុទ្ធតែត្រូវធ្វើកំណាយនោះទេ គឺវាអាស្រ័យលើទំហំនៃការជួសជុលនោះផងដែរ។ បើការជួសជុលដែលមានទ្រង់ទ្រាយធំ ហើយពាក់ព័ន្ធនឹងខឿន ឬគ្រឹះប្រាសាទ ការធ្វើកំណាយ ក៏រឹងរឹតតែចាំបាច់ណាស់ទៅទៀត៕








អកយំ ជាឈ្មោះប្រាសាទសង់អំពីឥដ្ឋមុនសម័យអង្គរ រាងសាជី (Pyramide) ស្ថិតនៅលើខឿនបីជាន់ មានទំហំ១០០ម៉ែត្របួនជ្រុងស្មើ កសាងឡើងក្នុងរាជព្រះបាទភវវរ្ម័ន ដែលឧទ្ទិសចំពោះទេព «កុម្ភីរេស្វរៈ» ក្នុងអំឡុងសតវត្សទី៦នៃគ.ស។ គេបានរកឃើញសិលាចារឹកចំនួនបីផ្ទាំងនៅក្នុងប្រាសាទនេះ គឺផ្ទាំងទី១នៅលើស៊ុមទ្វារចូលប្រាង្គកណ្តាលផ្នែកខាងកើត ដែលបានបញ្ជាក់អំពីកាលបរិច្ឆេទស្ថិតក្នុងឆ្នាំ៦៧៤នៃគ.ស។ ផ្ទាំងទី២នៅលើស៊ុមទ្វារចូលប្រាង្គកណ្តាលផ្នែកខាងត្បូង បញ្ជាក់កាលបរិច្ឆេទនាដើមសតវត្សទី៨ និងផ្ទាំងទី៣ជាអក្សរចារមួយខ្សែលើជើងទម្រកប់ក្រោមដីកាលលើកទំនប់បារាយណ៍ ដែលបង្ហាញអំពីកាលបរិច្ឆេទឆ្នាំ១០០១នៃគ.ស។
ផ្តែរថ្មមានទម្ងន់ជាង៥តោន និងសសរពេជ្រដែលបានជ្រុះធ្លាក់ពីប្រាសាទឥដ្ឋប៉មទី៨នៃប្រាសាទបាគង ក្នុងអំឡុងឆ្នាំ២០០៩ ដោយកម្លាំងខ្យល់ព្យុះកេតសូណា ត្រូវបានក្រុមអភិរក្សថ្ម នៃអាជ្ញាធរជាតិអប្សរាធ្វើការផ្គុំជួសជូលឡើងវិញ នៅសារមន្ទីរព្រះនរោត្តមសីហនុអង្គរ។ ផ្តែរថ្ម និងសសរពេជ្រនេះ ត្រូវបានក្រុមជំនាញដឹកជញ្ជូនមករក្សាទុកនៅសារមន្ទីរព្រះនរោត្តមសីហនុអង្គរ កាលពីឆ្នាំ២០១២ ដើម្បីធ្វើការអភិរក្សជួសជុល និងតភ្ជាប់ឡើងវិញ។
ប្រាសាទក្រហមជាប្រាសាទឥដ្ឋដែលមានតម្កល់រូបព្រះឥសូររាំដ៏អស្ចារ្យកម្ពស់៤.៥០ម៉ែត្រ (បច្ចុប្បន្នសល់តែបំណែកខ្លះនៅក្នុងប្រាសាទ ឯខ្លះទៀតរក្សាទុកនៅសារមន្ទីរអង្គរ) តាមរចនាប័ទ្មកោះកេរ ឧទ្ទិសចំពោះព្រហ្មញ្ញសាសនា។ អ្នកស្រុក អ្នកធ្វើដំណើរ អ្នកស្រាវជ្រាវមានជំនឿយ៉ាងខ្លាំងលើប្រាសាទក្រហម ព្រោះទីនោះមានអ្នកតាក្រហមដ៏ពូកែស័ក្តិសិទ្ធិ។
កាលពីថ្ងៃទី ០៦ ខែមករា ឆ្នាំ២០១៦ លោក ឈាន រដ្ឋា ប្រធាននាយកដ្ឋានស្តីទី នៃនាយកដ្ឋានអភិរក្សប្រាសាទក្រៅឧទ្យានអង្គរ បានដឹកនាំមន្រី្ត បុគ្គលិកក្រោមឱវាទ ទៅចូលរួមក្នុងពិធីបុណ្យនៅស្ពានបុរាណព្រះទិស (ស្ពានកំពង់ក្តី) ដែលផ្តួចផ្តើមឡើងដោយព្រះសង្ឃ គណៈកម្មការវត្ត ព្រមទាំងពុទ្ធបរិស័ទចំណុះជើងវត្តជីក្រែង និងសាលាស្រុកជីក្រែង ដែលប្រព្រឹត្តទៅពីថ្ងៃទី ០៦ ដល់ថ្ងៃទី ០៨ ខែមករា ឆ្នាំ ២០១៦។
លោក នាង ឈុនអេង និងលោកស្រី យ៉ង់ ដេត ព្រមទាំងលោកស្រី នាង សុវណ្ណារ៉ា ជាបុត្រ ដែលសព្វថ្ងៃរស់នៅទីក្រុងភ្នំពេញបានចំណាយថវិកាផ្ទាល់ខ្លួន ដើម្បីឆ្លាក់ព្រះកេសទេវតាចំនួន៣ ពីថ្មភក់ជំនួសព្រះកេសស៊ីម៉ង់ត៍ដើម្បីដាក់នៅខ្លោងទ្វារទន្លេអុំ ក្រុងអង្គរធំ។
ដើមដំបូងមុន123456បន្ទាប់ចុងក្រោយ

ប្រសាសន៍ឯកឧត្តមប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
4
ថ្ងៃនេះ
:
2876
ម្សិលមិញ
:
14501
សប្តាហ៍នេះ
:
50461
ខែនេះ
:
0312614
សរុប
:
001814649