ព័ត៌មានថ្មីៗ

អាជ្ញាធរជាតិអប្សរានិងការយកចិត្តទុកដាក់លើបញ្ហាបរិស្ថាននៅតំបន់ រមណីយដ្ឋានអង្គរ

បានផ្សាយនៅ ថ្ងៃទី 29 ខែ ធ្នូ ឆ្នាំ2015 03:00 PM ដោយ ៖ អាជ្ញាធរជាតិអប្សរា

បរិស្ថានគឺជាផ្នែកដ៏សំខាន់មួយក្នុងការទាក់ទាញចំណាប់អារម្មណ៍ទេសចរឱ្យមកទស្សនារមណីយដ្ឋានអង្គរ ហើយក៏ជាផ្នែកមួយដែលអាជ្ញាធរជាតិអប្សរាយកចិត្តទុកដាក់ ទាំងការគ្រប់គ្រង ផ្តល់ចំណេះដឹង និងធ្វើជាគំរូដល់សហគមន៍ផងដែរ។ ជាក់ស្តែងថ្ងៃទី២៩ ខែធ្នូ ឆ្នាំ២០១៥ ឯកឧត្តម សុខ លក្ខិណា ទីប្រឹក្សាទទួលបន្ទុកអង្គភាពប្រព័ន្ធគ្រប់គ្រងបរិស្ថាន (EMS) ជាតំណាងដ៏ខ្ពង់ខ្ពស់ឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរា រួមទាំងថ្នាក់ដឹកនាំ និងក្រុមការងារជាង២០០នាក់ បានចូលរួមសម្អាតបរិស្ថាន នៅ មុខប្រាសាទព្រះគោក្នុងឧទ្យានរលួស។

លោក កើត វិទ្យា អនុប្រធានអង្គភាពប្រព័ន្ធគ្រប់គ្រងបរិស្ថានបានបញ្ជាក់ថា អាជ្ញាធរជាតិអប្សរាបានរៀបចំកម្មវិធីបរិស្ថានស្អាត រមណីយដ្ឋានស្អាត គឺផ្តើមពីយើងទាំងអស់គ្នានេះ ០៩លើករួចមកហើយនៅឧទ្យានកណ្តាលនៃរមណីយដ្ឋានអង្គរ ចាប់ពីអង្គរទទួលបានវិញ្ញាបនបត្រ ISO 140001 នាឆ្នាំ២០០៦ តែដោយឡែកឆ្នាំនេះប្តូរគោលដៅមកធ្វើនៅឧទ្យានរលួសវិញម្តង។

លោកបន្តថា កម្មវិធីនេះជាការរួមចំណែកមួយក្នុងការលើកស្ទួយវិស័យទេសចរណ៍នៅក្នុងខេត្តសៀមរាប និងទប់ស្កាត់បម្រែបម្រួលនៃអាកាសធាតុផងដែរ ដែលអាជ្ញាធរជាតិអប្សរា មានអង្គភាពប្រព័ន្ធគ្រប់គ្រងបរិស្ថានជាអ្នកទទួលខុសត្រូវនិងយកចិត្តទុកដាក់លើបញ្ហាបរិស្ថានទាំងនេះ។

បន្ថែមពីនោះ ក្នុងឆ្នាំ២០១៥នេះអាជ្ញាធរជាតិអប្សរាមានកម្មវិធីបរិស្ថានចំនួន៦២ដែលត្រូវអនុវត្តឱ្យស្របតាមស្តង់ដារអន្តរជាតិ រួមមានការបង្ក្រាបបទល្មើសបរិស្ថាន ព្រៃឈើ ការត្រួតពិនិត្យគុណភាពទឹក ខ្យល់ ទប់ស្កាត់សំណង់ខុសច្បាប់ ពិសេសការគ្រប់គ្រងសំណល់រឹង រាវ ផ្លាស្ទិក ។ល។

ឯកឧត្តម សុខ លក្ខិណា ក៏បានគូសបញ្ញាក់ដែរអំពីការធ្វើឱ្យបរិស្ថានស្អាតនៅក្នុង រមណីយដ្ឋានអង្គរទាំងមូលថា ការសម្អាតបរិស្ថានឱ្យស្អាតមិនអាចធ្វើម្នាក់ឯងបានទេ គឺត្រូវចាប់ផ្តើមពីយើងទាំងអស់គ្នា។ បរិស្ថានពាក់ព័ន្ធខ្លាំងណាស់ទៅនឹងសុខុមាលភាពប្រជាជននិងបម្រែបម្រួលអាកាសធាតុដែលពិភពលោកកំពុងចាប់អាម្មណ៍ ហើយការប្រារព្ធពិធីសម្អាតបរិស្ថានថ្ងៃនេះ ជាសារមួយពញ្ញាក់ស្មារតីដល់យើងគ្រប់គ្នានិងជាទម្លាប់ដែលអាជ្ញាធរជាតិអប្សរាតែងតែធ្វើផងដែរ។

ឯកឧត្តមក៏បានសំណូមពរ សូមឱ្យបងប្អូនអ្នកស្រុក អ្នកលក់ដូរ មគ្គុទ្ទេសក៍ទេចរ ទេសចរជាតិអន្តរជាតិទាំងអស់ ចូលរួមថែរក្សាបរិស្ថានទាំងអស់គ្នាឱ្យបានស្អាត ទុកដាក់សំរាមឱ្យបានត្រឹមត្រូវ ពិសេសគឺគោរពតាមក្រមប្រតិបត្តិអង្គរដែលបានដាក់ឱ្យអនុវត្តនាពេលថ្មីៗកន្លងមកនេះឱ្យបានខ្ជាប់ខ្ជួន៕












នាយកដ្ឋានគ្រប់គ្រងទឹកនៃអាជ្ញាធរជាតិអប្សរា សហការជាមួយអាជ្ញាធរភូមិឃុំដែលស្ថិតនៅក្នុងឃុំ-សង្កាត់ចំនួន៧ ក្នុងស្រុកពួក និងក្រុងសៀមរាប បានចុះវាស់វែងដីកសិកម្មនៃសហគមន៍ដែលប្រើប្រាស់ទឹកបារាយណ៍ទឹកថ្លា ដើម្បីងាយស្រួលដល់ការងារគ្រប់គ្រងទឹក និងរៀបចំប្រព័ន្ធផ្លូវទឹកឲ្យបានកាន់តែល្អប្រសើរ។ ក្រុមការងារបានចាប់ផ្តើមចុះវាស់វែងពីពាក់កណ្តាលខែមីនា ឆ្នាំ២០១៦ ហើយគ្រោងនឹងបញ្ចប់ក្នុងរយៈពេល៣ខែខាងមុខ។
ដោយអនុវត្តទៅតាមសារាចរណែនាំរបស់រាជរដ្ឋាភិបាលកម្ពុជា ស្តីពីកង្វះខាតទឹកប្រើប្រាស់ ដោយសាររដូវប្រាំងឆ្នាំនេះអូសបន្លាយពេលយូរ នាយកដ្ឋានគ្រប់គ្រងទឹកនៃអាជ្ញាធរជាតិអប្សរា នៅព្រឹកថ្ងៃទី២៥ ខែមីនា ឆ្នាំ២០១៦នេះ បានប្រកាសផ្អាកការផ្គត់ផ្គង់ទឹកជូនសហគមន៍ ដែលប្រើប្រាស់ទឹកបារាយណ៍សម្រាប់ស្រោចស្រពដំណាំកសិកម្ម។ ការប្រកាសផ្អាកនៅពេលនេះ គឺដើម្បីរក្សាទឹកខ្លះឲ្យនៅសល់នៅបាតបារាយណ៍ ជាជម្រាបផ្គត់ផ្គង់អណ្តូង និងប្រភពទឹកប្រើប្រាស់ប្រចាំថ្ងៃរបស់ប្រជាពលរដ្ឋ។
បច្ចេកវិទ្យាអវកាស (Remote Sensing) ដែលកំពុងអនុវត្តលើការងារអភិរក្សក្នុងរមណីយដ្ឋានអង្គរសព្វថ្ងៃ អាចនឹងត្រូវពង្រីកវិសាលភាពរបស់ខ្លួនទៅកាន់តំបន់បេតិកភណ្ឌដទៃទៀត ដូចជា ប្រាសាទព្រះវិហារ ប្រាសាទកោះកេរ និងប្រាសាទបេងមាលាជាដើម។ នេះបើយោងតាមលទ្ធផលនៃកិច្ចពិភាក្សារវាងឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ជាមួយលោកសាស្ត្រាចារ្យ Bai Chunli ប្រធានបណ្ឌិតសភាវិទ្យាសាស្ត្រចិន នៅទីស្នាក់ការអាជ្ញាធរជាតិអប្សរា នាល្ងាចថ្ងៃទី២២ ខែមីនា ឆ្នាំ២០១៦កន្លងទៅនេះ។
ដោយមានការផ្តួចផ្តើមគំនិត ការចង្អុលបង្ហាញ និងការជំរុញពីឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា នៅព្រឹកថ្ងៃទី១០ខែមីនាឆ្នាំ២០១៦នេះ អាជ្ញាធរជាតិអប្សរាដឹកនាំដោយឯកឧត្តម ឈរ ថាណាត អគ្គនាយករងអាជ្ញាធរជាតិអប្សរា និងជាប្រធានគណៈកម្មការចម្រុះគ្រប់គ្រងអភិរក្ស និងការពារព្រៃឈើនៅតំបន់ប្រាសាទកោះកេរ និងមន្រ្តីបុគ្គលិកមួយចំនួនទៀតបានចុះទៅអប់រំផ្សព្វផ្សាយស្តីពីការគ្រប់គ្រង អភិរក្ស និងថែរក្សាការពារព្រៃឈើនៅតំបន់ប្រាសាទកោះកេរ ដោយមានការចូលរួមអំពីសំណាក់ព្រះសង្ឃ គណៈកម្មការ មន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ មន្ទីរទេសចរណ៍ រដ្ឋបាលព្រៃឈើ អាជ្ញាធរខេត្ត ស្រុក ឃុំ ភូមិនិងប្រជាពលរដ្ឋប្រមាណជាង៦០០អង្គ/រូបមកពីភូមិស្រយង់ខាងជើង ឃុំស្រយង់ ស្រុកគូលែន ខេត្តព្រះវិហារ។
ក្រុមការងារផ្សព្វផ្សាយអប់រំអំពីការងារអភិរក្សព្រៃឈើនៅតំបន់ប្រាសាទកោះកេរ នាព្រឹកថ្ងៃទី២៥ ខែកុម្ភៈនេះ បានចុះជួបប្រជាពលរដ្ឋជាង២០០នាក់នៅវត្តស្រយ៉ង់ ឃុំស្រយ៉ង់ ស្រុកគូលែន ខេត្តព្រះវិហារ។ ការជួបជុំនេះ គឺក្នុងគោលបំណងផ្សព្វផ្សាយ និងអប់រំប្រជាពលរដ្ឋឲ្យយល់ដឹងអំពីតម្លៃនៃការងារអភិរក្ស និងគោលការណ៍សំខាន់ៗដែលត្រូវអនុវត្តក្នុងតំបន់អភិរក្សនៃប្រាសាទកោះកេរ។ នេះជាលើកទី២ហើយនៃយុទ្ធនាការចុះអប់រំប្រជាពលរដ្ឋ បន្ទាប់ពីយុទ្ធនាការទី១បានធ្វើឡើងកាលពីថ្ងៃទី១៨ ខែកុម្ភៈ ឆ្នាំ២០១៦នៅភូមិរំចេក ឃុំស្រយ៉ង់ ខេត្តព្រះវិហារ។ ការផ្សព្វផ្សាយអប់រំ គឺជាបេសកកម្មដ៏សំខាន់មួយដែលត្រូវធ្វើដំណាលគ្នានឹងការបង្រ្កាប ទប់ស្កាត់បទល្មើសព្រៃឈើនៅតំបន់អភិរក្សនេះ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
6
ថ្ងៃនេះ
:
0366
ម្សិលមិញ
:
10360
សប្តាហ៍នេះ
:
20654
ខែនេះ
:
0174163
សរុប
:
012943595