ព័ត៌មានថ្មីៗ

អ្នកជំនាញរបស់អាជ្ញាធរជាតិអប្សរាកំពុងធ្វើកំណាយស្រាវជ្រាវ និងជួសជុលប្រាសាទគោកចក

បានផ្សាយនៅ ថ្ងៃទី 28 ខែ ធ្នូ ឆ្នាំ2015 02:15 PM ដោយ ៖ អាជ្ញាធរជាតិអប្សរា

អ្នកជំនាញនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការរបស់អាជ្ញាធរជាតិអប្សរា កំពុងធ្វើកំណាយស្រាវជ្រាវបុរាណវិទ្យា និងជួសជុល ពង្រឹងឡើងវិញ។ ការងារនេះចំណាយពេលជាង១ឆ្នាំមកហើយ ដោយចាប់ផ្តើមពីឆ្នាំ២០១៤មក។ 

អ្នកស្រី នេត ស៊ីមន មន្ត្រីផ្នែកបុរាណវិទ្យាបញ្ជាក់នៅព្រឹកថ្ងៃទី២៨ ខែធ្នូនេះថា ប្រាសាទគោកចកជាសំណង់ធ្វើពីឥដ្ឋ ដែលសាងឡើងក្នុងសតវត្សទី៩ ក្នុងរាជ្យព្រះបាទជ័យរ្ម័នទី៣។ អ្នកស្រាវជ្រាវជនជាតិបារាំង លោក ហង់រី ម៉ាហ្សាល ធ្លាប់មក និងបានកត់ត្រាពីការប្រទះឃើញប្រាសាទគោកចកនេះ ក្នុងឆ្នាំ១៩១៩ ហើយសាលាបារាំងចុងបូព៌ា បានចាប់ផ្តើម សម្អាតព្រៃ និងកាយដីដែលគរក្បែរប្រាសាទ ចេញជារូបរាងប្រាសាទច្បាស់ឡើងវិញនៅឆ្នាំ១៩៥១។ អ្នកជំនាញបុរាណវិទ្យា ដែលកំពុងដឹកនាំធ្វើកំណាយនៅប្រាសាទនេះ គឺលោក ស្រ៊ុន តិច។ លោករៀបរាប់ថា តាមរយៈកំណាយនេះយើងសង្កេតឃើញថា ការខូចខាតនៃប្រាសាទគោកចកនេះ អាចបណ្តាលមកពីមូលហេតុពីរយ៉ាងគឺ ដោយសារបញ្ហាខឿន និងដើមឈើដុះពីលើ។ “ការទ្រុឌទ្រោមប្រាសាទនេះមានបញ្ហាពីរដែលបណ្តាលឲ្យខូចខាត។ ទី១គឺបរិយាកាស ដែលមានព្រៃហ្នឹងឯង។ ទី២ដែលមានបញ្ហាហែកញែក(ជញ្ជាំងប្រាសាទ)ហ្នឹង គឺបណ្តាលមកពីខឿនប្រាសាទហ្នឹងផ្ទាល់។ ប្រាសាទនេះគឺថា គាត់រៀបខឿនពីឥដ្ឋ រួចបានរៀបថ្មបាយក្រៀមហើយទើបដាក់ឥដ្ឋមួយជាន់ទៀត។ ចឹងថ្មបាយក្រៀម និងឥដ្ឋហ្នឹងវាអត់មានកម្លាំងខាំភ្ជាប់គ្នាខ្លាំង ដូចជាថ្មបាយក្រៀម និងថ្មបាយក្រៀមទេ។ ជាទូទៅ ក្នុងតំបន់អង្គរ ខឿនគេច្រើនរៀបថ្មពីបាយក្រៀម ព័ទ្ធដោយថ្មភក់។ ចឹងប្រាសាទហ្នឹងដែលជួបបញ្ហាញែកហែកខឿន ដោយសារបញ្ហាខឿនហ្នឹងផ្ទាល់"។

អនុប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ លោក តាន់ សុផល ដែលទទួលបន្ទុកមើលការងារជួសជុលប្រាសាទគោកចកនេះ បានបញ្ជាក់ថា ក្រុមការងារបានចាប់ផ្តើមជួសជុលប្រាសាទនេះជាងមួយឆ្នាំហើយ ដោយចាប់ផ្តើមពីឆ្នាំ២០១៤មក។ “យើងនៅសល់២ដំណាក់កាល ដែលនឹងត្រូវចំណាយពេលប្រហែល២ឆ្នាំទៀតទើបរួចរាល់។ ការងារនេះយើងធ្វើតាមរបៀបជួសជុលបុរាណ ដែលមានលំនាំដូចគ្នានឹងការជួសជុលប្រាសាទឥដ្ឋផ្សេងៗទៀត ដូចជាប្រាសាទព្រះគោ និងប្រាសាទលលៃដែរ។ យើងប្រើធាតុផ្សំបុរាណ មិនប្រើស៊ីម៉ង់តិ៍ទេ គឺយើងផ្សំបាយអពីកំទេចឥដ្ឋ ខ្សាច់ កំបោរលៀស កាវស្បែកគោ ស្ករត្នោត និងទឹក"

លោក សុផល បញ្ជាក់ថា បើទោះជាយើងបញ្ចប់ក្នុងរយៈពេល២ឆ្នាំទៀតក្តី ក៏មិនមែនមានន័យថា ប្រាសាទនេះនឹងមានរូបរាងដើមទាំងស្រុង មានកំពូល និងជញ្ជាំងគ្រប់កន្លែងដូចទើបសាងសង់ហើយនោះទេ។ “ការជួសជុលរបស់យើង គឺជួសជុលដោយរក្សាទម្រង់ដើម ទប់ស្កាត់ការខូចខាតជាបន្តទៀត។ យើងប្រើឥដ្ឋចាស់ៗ ដែលអាចស្វែងរកមកបាន និងបន្ថែមឥដ្ឋថ្មីបន្តិចបន្តួច ត្រង់ចំណុចដែលខានមិនបាន។ តែយើងមិនអាចទៅតកំពូលឲ្យដូចដើមវិញបានទេ”

ការងារអភិរក្ស និងជួសជុលប្រាសាទ គឺជាភារកិច្ចស្នូលរបស់អាជ្ញាធរជាតិអប្សរា។ កន្លងមក កិច្ចការនេះ យើងពឹងផ្អែកខ្លាំងទៅលើអ្នកជំនាញការបរទេស។ ប៉ុន្តែ បច្ចុប្បន្ននេះ អាជ្ញាធរជាតិអប្សរាមានធនធានមនុស្ស ដែលទទួលបានការបណ្តុះបណ្តាលពីស្ថាប័នអន្តរជាតិផ្សេងៗ ព្រមទាំងការអនុវត្តការងារផ្ទាល់ជាប្រចាំ អាចចាប់ផ្តើមបំពេញការងារមួយចំនួនដោយខ្លួនឯងបាន។ មិនតែប៉ុណ្ណោះ បណ្តាប្រទេសជាមិត្តជាមួយក៏បានមកស្រង់បទពិសោធន៍លើការងារអភិរក្ស ជួសជុល និងស្រាវជ្រាវបុរាណវិទ្យា ពីសំណាក់អ្នកជំនាញរបស់អាជ្ញាធរជាតិអប្សរាផងដែរ៕















 
ចម្លាក់នាគចំនួន៤នៅប្រាសាទបន្ទាយសំរែ ដែលបានធ្លាក់បាក់ជាច្រើនកំណាត់អស់កាលជាយូរមកហើយនោះ ត្រូវបានក្រុមអភិរក្សថ្មរបស់អាជ្ញាធរជាតិអប្សរា ប្រមូលយកមកជួសជុលជិតរួចរាល់អស់ហើយ ក្រោយចំណាយពេលអស់ជិត៤ខែ និងរង់ចាំតែលើកដាក់លើជើងទម្រវិញប៉ុណ្ណោះ។
រូបចម្លាក់មានទម្រង់ជាសន្លឹកសីមាសម្រាប់ដាក់តាំងលម្អនៅតាមជ្រុងប្រាសាទ ត្រូវបានក្រុមមន្ត្រីអភិរក្សប្រាសាទប្រទះឃើញ ពេលកាយប្រឡាយរំដោះទឹកចេញពីប្រាសាទបន្ទាយស្រី។ រូបនេះមានចម្លាក់ជារូបគ្រុឌ និងមានក្បាច់លម្អព័ទ្ធជុំវិញដែលមានទំហំទទឹងប្រវែង១២សង់ទី ម៉ែត្រ និងបណ្តោយប្រវែង២៩សង់ទីម៉ែត្រ ធ្វើពីថ្មភក់ពណ៌ក្រហម ក្នុងទម្រង់រចនាប័ទ្មសម័យបន្ទាយស្រី។
ក្រៅពីការងារជួសជុលប្រាសាទ និងបុរាណដ្ឋានដែលមានទ្រង់ទ្រាយធំ ការសម្អាតរុក្ខជាតិតូចធំដែលដុះលើប្រាសាទ ក៏ជាផ្នែកមួយនៃការអភិរក្សផងដែរ។ ប្រាសាទតូចធំដែលមានរុក្ខជាតិដុះហ៊ុំព័ទ្ធ ដោយគ្មានការកាត់សម្អាត ឬដកចេញទេ នឹងធ្វើឲ្យបាត់បង់សោភណភាព និងអាចបង្កភាពពុកផុយដល់ថ្មប្រាសាទ ឬបើដើមឈើកាន់តែធំអាចធ្វើឲ្យបាក់រលំប្រាសាទបាន។
អាជ្ញាធរជាតិអប្សរាបានបញ្ជូនមន្ត្រីជំនាញស្ថាបត្យកម្ម និងបុរាណវិទ្យា២រូប គឺលោក ហេង ហ្ស៊ើឌី និងលោក ជួន ប៊ុនណាត ដើម្បីសហការជាមួយអាជ្ញាធរជាតិព្រះវិហារ។ មន្ត្រីជំនាញទាំងពីររូបនេះបានចុះទៅបំពេញកិច្ចការមួយចំនួន ជាមួយអាជ្ញាធរជាតិព្រះវិហារតាំងពីដើមខែសីហា រហូតដល់ដើមខែកញ្ញា ឆ្នាំ២០១៥។
វិទ្យាស្ថានស្រាវជ្រាវជាតិណារ៉ា របស់ប្រទេសជប៉ុន បានចាប់ផ្តើមជួសជុលប្រាសាទតុបខាងលិចក្នុងឆ្នាំ២០១១។ ថ្ងៃទី២៣ ខែកញ្ញានេះបានបញ្ចប់ជំហានទី១ ដោយបានបិទបញ្ចប់ការជួសជុលប្រាង្គខាងត្បូងនៃប្រាសាទនេះ។

ឯកឧត្តម រស់ បូរ៉ាត់ អគ្គនាយករងនៃអាជ្ញាធរជាតិអប្សរា និងឯកឧត្តម Kamoshida Naoki ទីប្រឹក្សាអគ្គរដ្ឋទូតជប៉ុនប្រចាំកម្ពុជា គឺជាអធិបតីនៃពិធីបិទវគ្គជួសជុលប្រាង្គខាងត្បូង និងបើកការដ្ឋានជួសជុលប្រាង្គខាងជើង កាលពីព្រឹកមិញនេះ។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
3
ថ្ងៃនេះ
:
0911
ម្សិលមិញ
:
16977
សប្តាហ៍នេះ
:
17888
ខែនេះ
:
0206019
សរុប
:
009165590