ព័ត៌មានថ្មីៗ

អ្នកជំនាញរបស់អាជ្ញាធរជាតិអប្សរាកំពុងធ្វើកំណាយស្រាវជ្រាវ និងជួសជុលប្រាសាទគោកចក

បានផ្សាយនៅ ថ្ងៃទី 28 ខែ ធ្នូ ឆ្នាំ2015 02:15 PM ដោយ ៖ អាជ្ញាធរជាតិអប្សរា

អ្នកជំនាញនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការរបស់អាជ្ញាធរជាតិអប្សរា កំពុងធ្វើកំណាយស្រាវជ្រាវបុរាណវិទ្យា និងជួសជុល ពង្រឹងឡើងវិញ។ ការងារនេះចំណាយពេលជាង១ឆ្នាំមកហើយ ដោយចាប់ផ្តើមពីឆ្នាំ២០១៤មក។ 

អ្នកស្រី នេត ស៊ីមន មន្ត្រីផ្នែកបុរាណវិទ្យាបញ្ជាក់នៅព្រឹកថ្ងៃទី២៨ ខែធ្នូនេះថា ប្រាសាទគោកចកជាសំណង់ធ្វើពីឥដ្ឋ ដែលសាងឡើងក្នុងសតវត្សទី៩ ក្នុងរាជ្យព្រះបាទជ័យរ្ម័នទី៣។ អ្នកស្រាវជ្រាវជនជាតិបារាំង លោក ហង់រី ម៉ាហ្សាល ធ្លាប់មក និងបានកត់ត្រាពីការប្រទះឃើញប្រាសាទគោកចកនេះ ក្នុងឆ្នាំ១៩១៩ ហើយសាលាបារាំងចុងបូព៌ា បានចាប់ផ្តើម សម្អាតព្រៃ និងកាយដីដែលគរក្បែរប្រាសាទ ចេញជារូបរាងប្រាសាទច្បាស់ឡើងវិញនៅឆ្នាំ១៩៥១។ អ្នកជំនាញបុរាណវិទ្យា ដែលកំពុងដឹកនាំធ្វើកំណាយនៅប្រាសាទនេះ គឺលោក ស្រ៊ុន តិច។ លោករៀបរាប់ថា តាមរយៈកំណាយនេះយើងសង្កេតឃើញថា ការខូចខាតនៃប្រាសាទគោកចកនេះ អាចបណ្តាលមកពីមូលហេតុពីរយ៉ាងគឺ ដោយសារបញ្ហាខឿន និងដើមឈើដុះពីលើ។ “ការទ្រុឌទ្រោមប្រាសាទនេះមានបញ្ហាពីរដែលបណ្តាលឲ្យខូចខាត។ ទី១គឺបរិយាកាស ដែលមានព្រៃហ្នឹងឯង។ ទី២ដែលមានបញ្ហាហែកញែក(ជញ្ជាំងប្រាសាទ)ហ្នឹង គឺបណ្តាលមកពីខឿនប្រាសាទហ្នឹងផ្ទាល់។ ប្រាសាទនេះគឺថា គាត់រៀបខឿនពីឥដ្ឋ រួចបានរៀបថ្មបាយក្រៀមហើយទើបដាក់ឥដ្ឋមួយជាន់ទៀត។ ចឹងថ្មបាយក្រៀម និងឥដ្ឋហ្នឹងវាអត់មានកម្លាំងខាំភ្ជាប់គ្នាខ្លាំង ដូចជាថ្មបាយក្រៀម និងថ្មបាយក្រៀមទេ។ ជាទូទៅ ក្នុងតំបន់អង្គរ ខឿនគេច្រើនរៀបថ្មពីបាយក្រៀម ព័ទ្ធដោយថ្មភក់។ ចឹងប្រាសាទហ្នឹងដែលជួបបញ្ហាញែកហែកខឿន ដោយសារបញ្ហាខឿនហ្នឹងផ្ទាល់"។

អនុប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ លោក តាន់ សុផល ដែលទទួលបន្ទុកមើលការងារជួសជុលប្រាសាទគោកចកនេះ បានបញ្ជាក់ថា ក្រុមការងារបានចាប់ផ្តើមជួសជុលប្រាសាទនេះជាងមួយឆ្នាំហើយ ដោយចាប់ផ្តើមពីឆ្នាំ២០១៤មក។ “យើងនៅសល់២ដំណាក់កាល ដែលនឹងត្រូវចំណាយពេលប្រហែល២ឆ្នាំទៀតទើបរួចរាល់។ ការងារនេះយើងធ្វើតាមរបៀបជួសជុលបុរាណ ដែលមានលំនាំដូចគ្នានឹងការជួសជុលប្រាសាទឥដ្ឋផ្សេងៗទៀត ដូចជាប្រាសាទព្រះគោ និងប្រាសាទលលៃដែរ។ យើងប្រើធាតុផ្សំបុរាណ មិនប្រើស៊ីម៉ង់តិ៍ទេ គឺយើងផ្សំបាយអពីកំទេចឥដ្ឋ ខ្សាច់ កំបោរលៀស កាវស្បែកគោ ស្ករត្នោត និងទឹក"

លោក សុផល បញ្ជាក់ថា បើទោះជាយើងបញ្ចប់ក្នុងរយៈពេល២ឆ្នាំទៀតក្តី ក៏មិនមែនមានន័យថា ប្រាសាទនេះនឹងមានរូបរាងដើមទាំងស្រុង មានកំពូល និងជញ្ជាំងគ្រប់កន្លែងដូចទើបសាងសង់ហើយនោះទេ។ “ការជួសជុលរបស់យើង គឺជួសជុលដោយរក្សាទម្រង់ដើម ទប់ស្កាត់ការខូចខាតជាបន្តទៀត។ យើងប្រើឥដ្ឋចាស់ៗ ដែលអាចស្វែងរកមកបាន និងបន្ថែមឥដ្ឋថ្មីបន្តិចបន្តួច ត្រង់ចំណុចដែលខានមិនបាន។ តែយើងមិនអាចទៅតកំពូលឲ្យដូចដើមវិញបានទេ”

ការងារអភិរក្ស និងជួសជុលប្រាសាទ គឺជាភារកិច្ចស្នូលរបស់អាជ្ញាធរជាតិអប្សរា។ កន្លងមក កិច្ចការនេះ យើងពឹងផ្អែកខ្លាំងទៅលើអ្នកជំនាញការបរទេស។ ប៉ុន្តែ បច្ចុប្បន្ននេះ អាជ្ញាធរជាតិអប្សរាមានធនធានមនុស្ស ដែលទទួលបានការបណ្តុះបណ្តាលពីស្ថាប័នអន្តរជាតិផ្សេងៗ ព្រមទាំងការអនុវត្តការងារផ្ទាល់ជាប្រចាំ អាចចាប់ផ្តើមបំពេញការងារមួយចំនួនដោយខ្លួនឯងបាន។ មិនតែប៉ុណ្ណោះ បណ្តាប្រទេសជាមិត្តជាមួយក៏បានមកស្រង់បទពិសោធន៍លើការងារអភិរក្ស ជួសជុល និងស្រាវជ្រាវបុរាណវិទ្យា ពីសំណាក់អ្នកជំនាញរបស់អាជ្ញាធរជាតិអប្សរាផងដែរ៕















 
អកយំ ជាឈ្មោះប្រាសាទសង់អំពីឥដ្ឋមុនសម័យអង្គរ រាងសាជី (Pyramide) ស្ថិតនៅលើខឿនបីជាន់ មានទំហំ១០០ម៉ែត្របួនជ្រុងស្មើ កសាងឡើងក្នុងរាជព្រះបាទភវវរ្ម័ន ដែលឧទ្ទិសចំពោះទេព «កុម្ភីរេស្វរៈ» ក្នុងអំឡុងសតវត្សទី៦នៃគ.ស។ គេបានរកឃើញសិលាចារឹកចំនួនបីផ្ទាំងនៅក្នុងប្រាសាទនេះ គឺផ្ទាំងទី១នៅលើស៊ុមទ្វារចូលប្រាង្គកណ្តាលផ្នែកខាងកើត ដែលបានបញ្ជាក់អំពីកាលបរិច្ឆេទស្ថិតក្នុងឆ្នាំ៦៧៤នៃគ.ស។ ផ្ទាំងទី២នៅលើស៊ុមទ្វារចូលប្រាង្គកណ្តាលផ្នែកខាងត្បូង បញ្ជាក់កាលបរិច្ឆេទនាដើមសតវត្សទី៨ និងផ្ទាំងទី៣ជាអក្សរចារមួយខ្សែលើជើងទម្រកប់ក្រោមដីកាលលើកទំនប់បារាយណ៍ ដែលបង្ហាញអំពីកាលបរិច្ឆេទឆ្នាំ១០០១នៃគ.ស។
ផ្តែរថ្មមានទម្ងន់ជាង៥តោន និងសសរពេជ្រដែលបានជ្រុះធ្លាក់ពីប្រាសាទឥដ្ឋប៉មទី៨នៃប្រាសាទបាគង ក្នុងអំឡុងឆ្នាំ២០០៩ ដោយកម្លាំងខ្យល់ព្យុះកេតសូណា ត្រូវបានក្រុមអភិរក្សថ្ម នៃអាជ្ញាធរជាតិអប្សរាធ្វើការផ្គុំជួសជូលឡើងវិញ នៅសារមន្ទីរព្រះនរោត្តមសីហនុអង្គរ។ ផ្តែរថ្ម និងសសរពេជ្រនេះ ត្រូវបានក្រុមជំនាញដឹកជញ្ជូនមករក្សាទុកនៅសារមន្ទីរព្រះនរោត្តមសីហនុអង្គរ កាលពីឆ្នាំ២០១២ ដើម្បីធ្វើការអភិរក្សជួសជុល និងតភ្ជាប់ឡើងវិញ។
ប្រាសាទក្រហមជាប្រាសាទឥដ្ឋដែលមានតម្កល់រូបព្រះឥសូររាំដ៏អស្ចារ្យកម្ពស់៤.៥០ម៉ែត្រ (បច្ចុប្បន្នសល់តែបំណែកខ្លះនៅក្នុងប្រាសាទ ឯខ្លះទៀតរក្សាទុកនៅសារមន្ទីរអង្គរ) តាមរចនាប័ទ្មកោះកេរ ឧទ្ទិសចំពោះព្រហ្មញ្ញសាសនា។ អ្នកស្រុក អ្នកធ្វើដំណើរ អ្នកស្រាវជ្រាវមានជំនឿយ៉ាងខ្លាំងលើប្រាសាទក្រហម ព្រោះទីនោះមានអ្នកតាក្រហមដ៏ពូកែស័ក្តិសិទ្ធិ។
កាលពីថ្ងៃទី ០៦ ខែមករា ឆ្នាំ២០១៦ លោក ឈាន រដ្ឋា ប្រធាននាយកដ្ឋានស្តីទី នៃនាយកដ្ឋានអភិរក្សប្រាសាទក្រៅឧទ្យានអង្គរ បានដឹកនាំមន្រី្ត បុគ្គលិកក្រោមឱវាទ ទៅចូលរួមក្នុងពិធីបុណ្យនៅស្ពានបុរាណព្រះទិស (ស្ពានកំពង់ក្តី) ដែលផ្តួចផ្តើមឡើងដោយព្រះសង្ឃ គណៈកម្មការវត្ត ព្រមទាំងពុទ្ធបរិស័ទចំណុះជើងវត្តជីក្រែង និងសាលាស្រុកជីក្រែង ដែលប្រព្រឹត្តទៅពីថ្ងៃទី ០៦ ដល់ថ្ងៃទី ០៨ ខែមករា ឆ្នាំ ២០១៦។
លោក នាង ឈុនអេង និងលោកស្រី យ៉ង់ ដេត ព្រមទាំងលោកស្រី នាង សុវណ្ណារ៉ា ជាបុត្រ ដែលសព្វថ្ងៃរស់នៅទីក្រុងភ្នំពេញបានចំណាយថវិកាផ្ទាល់ខ្លួន ដើម្បីឆ្លាក់ព្រះកេសទេវតាចំនួន៣ ពីថ្មភក់ជំនួសព្រះកេសស៊ីម៉ង់ត៍ដើម្បីដាក់នៅខ្លោងទ្វារទន្លេអុំ ក្រុងអង្គរធំ។
ដើមដំបូងមុន123456បន្ទាប់ចុងក្រោយ

ប្រសាសន៍ឯកឧត្តមប្រធានអាជ្ញាធរជាតិអប្សរា

មតិស្វាគមន៍ឯកឧត្តមអគ្គនាយកអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
2
ថ្ងៃនេះ
:
12557
ម្សិលមិញ
:
9216
សប្តាហ៍នេះ
:
43584
ខែនេះ
:
0379881
សរុប
:
002308541